Panorama 1993

EXPLOSION DE GENTE NON CESSA ANTE 2015

Le explosion del populationes in le mundo non va cessar durante le veniente annos. Le cifra de nascentias remanera al mesme nivello possibilemente usque anno 2004, probabilemente usque 2015.

Isto demonstra un recente reporto ab le fundation de infantes, UNICEF, sub le Nationes Unite. Secundo le reporto The State of the World’s Children, 1993, Asia del Est expecta que le numero de nascentias cadera mollemente ab iste anno, e Latinoamerica experientiara un stagnation. Ma in Africa, le explosion continuara, e isto superpassa le parve diminutiones in altere partes del mundo.

In 1998 le population global attingera sex milliardos, duo annos plus tosto que in prognoses anterior. Post 2025 nos essera 8,5 milliardos de homines.

Grande cadita necessari:

Le cadita de nascentias significa que cata femina non da nascentia a tante infantes como antea. Le presente cifra in media pro omne paises developpamental es 3,9 infantes per femina. Si on attingera le prognose de 8,5 milliardos de homines in 2025, le frequentia de nascentia in iste paises debe cader ab 3,9 a 2,1 infantes in anno 2010. Le paises industrialisate e Hongkong, Taiwan, Singapore, e Corea ja ha un cifra de 2,1 o minus. Thailandia experientia 2,2 infantes per femina post un cadita dramatic durante le passate 25 annos. 2,1 infantes per femina da exactemente 8,5 milliardos de homines. Mesmo si iste rata essera attingite in anno 2010, nos essera 10 milliardos sur le Terra in 2050 — si antea maladias epidemic incurabile o guerras atomari non ha diminuite le population.

Le grande numero de infantes es anque causate per le facto que il habera un numero multo plus grande de feminas qui attinge al etate matur pro parturir. Ma circa 40% del population sur le Terra ha hodie minus que 15 annos. Pro isto le cifras non cadera immediatemente.

UNICEF conclude que on debe assecurar servicios sanitari basic e un mortalitate minor pro infantes, de maniera que le parentes non senti le besonio de haber plus de infantes pro assecurar que alcunes supervive. Le accesso a prevention anque debe esser melior, e pueras e feminas debe esser melio educate pro comprender le necessitate de non haber multe infantes.

Anno del aborigines:

Le nationes Unite ha declarate 1993 le anno del aborigines. In toto 300 milliones, qui parla 5.000 linguas e habita in 70 paises, forma le aborigines del mundo. Ma le numero de aborigines cade. Brasil, pro exemplo, ha perdite 87 tribos ab 1900 a 1950. Un tertio del linguas nord-american e duo tertios del linguas austral ha disparite desde 1800, le majoritate durante iste seculo. Le anno essera marcate per eventos in omne partes del mundo.

(Publicate in Panorama, januario-februario 1993)

CENTOS DE BALLONES COLORAVA LE CELO

Canada: Del 10 al l18 de augusto, 1991, le Festa de Ballones del Alte Richelieu presentava su 8-ve saison con le evento le plus prestigiose e le plus colorate del anno — le decime campionato mundial del ballon. Iste evento univa pro le prime vice in Canada 175 ballones de 27 paises.

Duo vices per die a 6 e a 18 horas le ballones esseva plenate e deterrava, e le celo esseva vive con lor colores. Inter le volos le festa continuava con le activitates super le themas del spatio, le phantasia, e le ecologia.

Durante iste septimana de ballones le activitates includeva le paradas, le competitiones de tambur e clarino, un spectaculo in memoria de Gerry Boulet (un musico de rock quebechese de Saint-Jean), le gruppo musical Bison del Policia federal canadian (le famose RCMP), le volos de nocte con un concerto del circulo philharmonic de Saint-Jean sur Richelieu, e con le 325-e anniversario del Forte de Saint-Jean fundate in 1666 sub le rege Louis XIV, le 50e anniversario del Cadettos del aere del Fortias militar canadian, e finalmente un grande circo aeree pro terminar un septimana spectacular.

INSULAS FABULOSE; LE ANDAMANES E LE NICOBARES

India: Le archipelago Andaman e Nicobar in le Baia de Bengal, consistente de plus quam 300 insulas, forma un stricte e rupte catena extendente se 850 kilometros ab nord a sud. Iste insulas undulante son coperite de dense forestes. Un grandissime varietate de flores exotic e 242 species de aves son trovate ci.

Ptolemeo, le geographo greco-egyptian del secunde seculo A.D., describeva le archipelago como "insulas de bon fortuna," durante que Niccola Conti, le navigator italian, los appellava "insulas de auro". Le 46 species de mammales e le 78 de reptiles incontrate hic face le insulas un veritabile paradiso pro ecologistas, expertos marin, e amantes del natura. Le blanc plagias, al longe de un litoral serpentante, son frangiate de arbores de coco, le quales oscilla al rhythmo de suave brisas ab le mar.

Port Blair, le capital, es le entrata al Andamanes e per aere e per mar. Il ha volos ab Calcutta e Madras, ambes equidistante ab illo. Iste urbe ha un del plagias le plus pictoresc del pais India: "Le Corbyn’s Cove" (cove es un parve baia). Illo es ideal pro baniar se in le mar. Inter le altere attractiones touristic son Bird Island, Wandoor Beach, Ross Island, e The Farm of Sippighat. De plus, es situate in Port Blair un monumento national, "The Cellular Jail" (le prision in forma de cellulas), ubi multe patriotas indian era incarcerate per le governamento britannic.

Con le equator non lontan, le climate es assatis uniforme — calide e humide. A causa de su location geographic, le Insulas Andamanes e Nicobares se trova sub le influentia de monsones e de sud-west e de nord-est. Il resulta que il pluve per tote le anno excepte in le menses de martio, april, e octobre, 380 mm essente le cadita annual de pluvia. Iste typo de climate es conducente a crescimento luxuriose de forestes, le quales occupa un parte substantial del area del terra.

Le amimales que habita iste forestes son numerose. Importante inter illos son le macaque que mangia canceres, le crocodilo que vive in aquas salin, le porco salvage de Andaman, e le megapodo de Nicobar.

Le aquas circumferente le circa 300 insulas son le plus ric del mundo. Con scolios extensive de corallos e altere ecosystemas marin, litteralmente erumpe un profusion de vita.

Le habitantes indigene de iste insulas son dividite a in sex gruppos tribal — quatro del quales vive in le Andamanes: le onges, le andamaneses, le jarawas, e le sentineleses, e istes son negroides, durante que in le Nicobares le shompens e le nicobareses son mongoloide. Il non habeva multe information re iste gruppos tribal ante le fin del 18-ve seculo ante que le governamento britannic decideva a colonisar le Insulas Andamanes e Nicobares.

Le onges, un triba que habita le parve Andaman, era usque recentemente protegite del "civilisation" propter lor isolation geographic. Le jarawas qui continua a resister le mundo exterior habita un reserva sur le costa occidental del Andamanes medie e sud. Le sentineleses, etiam hostil, habita le Sentinels del nord verso le occidente del insulas Labyrinth, in le Sudandaman. Le shompens, seminomade e mongoloide, son habitantes del forestes del Grande Nicobar. Essente dependente quasi plenmente del forestes, illes move inter le montanias e le forestes. Le nicobareses, le gruppo le plus grande del Insulas Andamanes e Nicobares, son trovate multissimemente in Car Nicobar. Illes son pastores e horticulturistas robuste. Inter tote le grupppos, le nicobareses es illes qui era multo influentiate per le assi appellate civilisation.

LE LOCO LE PLUS FELICE SUR LE TERRA

Francia: In maio nos visitava in le quadro de un viage per autobus de tres dies"Euro-Disney," situate al est de Paris. Nos participava in iste viage con tote nostre familia, a saper, 17 personas de 2 usque a 66 annos. Le motivo esseva nostre matrimonio de 40 annos.

Le bus veniva pro prender nos a 8 horas del nostre hotel in Paris. Disneyland ha anque 6 hotels, ma illos es supercostose. Le chauffeur del autobus nos livrava exactemente al hora de apertura (9 horas) a presso de Disneyland. Nos esseva ponite sur un immense terreno a parcar. Via un trottoir rolante nos attingeva le entrata. Proque nos habeva passaportos de accesso, nos poteva entrar directemente.

Primo nos veniva in "Main Street" (strata principal). Main Street es un copia de un strata principal in un urbe american de circa anno 1900. Nos videva un tram, un carro cellular, e un carro de pumperos, omnes trahite per cavallos. Nos montava in le carro cellular pro facer un parve excursion. Il habeva in Main Street ubique botecas, e nos videva un kiosque de musica, in le qual un orchestra musicava. Le ambiente esseva multo placente, e anque le tempore esseva splendide.

Castello e carosello:

A partir de Main Street, nos vadeva al castello del "Bella dormiente del bosco" in"Fantasyland" (Pais de phantasia). Nunc nos videva in realitate le castello multo magnific, que nos habeva vidite usque ora solmente sur le prospectos de reclamo. E illo non nos decipeva. In le castello de nove botecas e sub le castello il habeva un grotta con un ignivome dracon horripilante. Nostre granfilio de cinque annos non osava entrar in le grotta.

Vicin al castello esseva un antique carosello a vapor. Pro me il esseva le momento le plus felice de iste die, tunc nos con tote le familia rotava relaxatemente in le carosello. Postea nos decideva explorar Disneyland in parve gruppos. Mi sposo Jan e io continuava ergo nostre cammino insimul. A vices nos incontrava membros del familia.

Ben que Euro-Disney non es si grande como io habeva pensate, il esseva infacibile participar a omne attractiones. Il anque deveniva semper plus occupate, de sorta que on debeva star in cauda. Disneyland esseva mundate excellentemente. Il non esseva permittite apportar viveres. On poteva mangiar in un del multe restaurantes, o on poteva comprar alique pro mangiar o potar apud un del kiosques. Ante diverse restaurantes musicos sonava.

In Fantasyland nos vadeva ancora in carrettas preter diverse scenas del conto de Blanca-Nive e Pinocchio. On poteva anque navigar in un barca per "Small World"(Mundo Parve). On vadeva preter parve pupas qui in costumes national cantava le cantionetta "It’s a small world" in le lingua de lor patria. Nostre infantes incontrava ancora figuras del contos de Disney, e illes se delectava in le representation del spectaculo del Bella dormiente del bosco.

Jan e io habeva intertanto ite a "Adventureland" (Terra de Aventuras). Nos veniva primo in un sorta de mundo oriental. Casas, tectos, turres, como si on esseva in Turchia o Marocco. In un bazar oriental on poteva comprar cosas interessante. A un altere parte de Adventureland nos videva un grande nave pirata sur le qual on poteva navigar. Il habeva anque un grotta de piratas, ubi on, sedente in parve barcas, navigava in aqua multo salvage preter scenas con piratas.

Omne cosas in Disneyland habeva essite construite perfectemente: montes, paisages, arbores, super toto de alicun distantia non a distinguer del natural. Multo ingeniose esseva le arbore con le casa del familia Robinson.

Post Adventureland nos veniva in "Frontierland" (Terra del Frontieras, le West salvage). Illac nos faceva un curso horripilante a transverso le "Big Thunder Mountain" (Grande Monte de Tonitro). Tunc nos stava in cauda, nos audiva critar le homines. E postea nos ipse critava terribilemente, vadente per un carretta via un sorta de octovolante: montar, descender, lumine, obscuritate, blocos de rocca que menaciava cader super nos. Io non osarea vader un secunde vice a in Thunder Mountain.

Pro Jan, isto esseva le puncto culminante del die. Nos visitava in Frontierland ancora un altere attraction excitante, a saper "Phantom Manor" (Casa de Spectros), un experientia multo extraordinari. On veniva in un camera con varie picturas, de ubi le personas nos reguardava. Le lumine se extingueva, e le camera in su totalitate iva in basso, e illac nos incontrava le spectros: spectros dansante e spectros musicante e ubique telas de aranea. Incredibilemente facite.

De "Discoveryland" (Terra de Discopertas) nos non videva multo. Solmente nostre senior filio affin, su filio, e nostre filio Douwe lo visitava. Illes videva, i.a., un film tridimensional con le stella de musica Michael Jackson.

Al fin es a remarcar le grande parada, que habeva loco al mediedie. Super multo grande carros carnevalesc nos videva omne figuras de Walt Disney, e anque carrossas, naves, e mesmo edificios nos passava. Isto esseva un spectaculo enorme.

A 18 horas nos vadeva de novo per autobus a Paris, post un die inoblidabile.

(Per Franske Persun, publicate in Panorama, martio-april, 1993)

CANNIBALES AB APUD LE VISTULA

Polonia: 15.000 annos retro presso le loco ubi ora Cracovia es situate, un horda de aggressores attaccava le habitantes. Le resistentia esseva breve. Le victores mangiava le vincites.

Tracias de restos human in le caverna Maszycka, que se trova a 12 km de Cracovia, esseva trovate in le secunde medietate del 19-e seculo, ma solmente in le penultime decennio de iste seculo on comenciava ibi excavation.

Le ultime recercas anthropologic monstrava que le restos trovate esseva super toto fragmentos de cranios rumpite per cannibales pro extraher le cerebros de al minus 16 personas. Un medietate de illes esseva infantes, le ceteres pertineva in partes equal a viros e feminas.

Post mangiar les, le cannibales partiva sin prender objectos pertinente al victimas. Omne le cosas remaneva in lor locos, e pro isto le caverna ganiava le nomine "Le Pompei polonese."

Archeologos discoperiva un casa complete. In le caverna Maszycka illes trovava instrumentos preparate a utilisar e non damnificate, jectate via per le usatores. Le habitantes del caverna de facto habitava in un tenta de pelle construite in illo. Internemente il habeva un "cocina" con un focar, un "armario" continente instrumentos e un supporto pro lanceas, e profunde in le caverna probabilemente il habeva un "refrigerator" sui generis.

Un examine de silices trovate in le caverna faceva scientistas concluder que multes de illos esseva facite de materiales transportate apud le Dniestr o ab un region del Germania hodierne.

Assi pro le prime vice in Europa on discoperiva tracias de un colonia del epocha paleolithic in un condition intacte.

(Originalmente publicate in le Gazeta Wyborcza, redigite per Jerzy Dembicki, e publicate in Panorama, No. 2, martio-april 1993)

CIVILISATION DISPARITE TROVATE IN AMAZONAS

Amazonas: Archeologos ha retrovate un civilisation disparite in le centro del jungla Amazonas. Le restos se data a 6.000 annos ante Christo e da nove provas que le civilisation del Nove Mundo habeva su origine in le abassamento del Amazonas e non in le culturas pre-inca in le Montes de Andes o le precoce Mexico.

Le archeologos veni ab le Universitate Oxford in Grande Britannia, e le trovatas esseva facite per medio de probas radiocarbonic a fragmentos de carbon, pecias de ollas, etc., excavate in Taperinha profundemente in le jungla. Le civilisation ancian consisteva de grande habitationes, alcunos forsan in le grandor de un citate, al ripas del rivera Amazonas ante 6.000-8.000 annos. Le restos veni ab large depositos de residuos coperiente usque a 200.000 kilometros quadrate e 59 metros profunde.

(Per Thomas Breinstrup, publicate in Panorama, No. 2, martio-april, 1993)

LIBERE IN ANIMA

Malta: Malta es un del minime paises de Europa. Illo consiste del insula Malta e duo parve insulas — Gozo e Camino. Malgrado su area insignificante iste pais multe vices ha jocate un parte decisive in le historia de Europa. On pote demandar se como isto esseva possibile.

Tres incidentes central in le historia de Malta probabilemente esseva decisive etiam in le historia de Europa.

Le anno 58 un nave roman naufragava al costa nord de Malta. Inter le salvates esseva un prisionero, le apostolo Paulo. Ille esseva conducite a Medina, ubi le governator roman, Publius, resideva. Paulo demorava hic tres menses. Durante iste tempore ille succedeva a curar le patre malade del governator. Le governator tunc se faceva tornar al christianitate, e le christianisation de Malta sequeva.

Postea un cathedral consecrate al sanctos Paulo e Petro esseva erigite in Medina al mesme sito ubi le governator roman resideva. In 1693 un tremor de terra destrueva le cathedral, e un nove cathedral magnific esseva construite in su placia.

Il ha anque un altere cathedral in Malta, le co-cathedral de Sancte Johannes (in maltese San Gwann). Le capital habeva essite transferite ab Medica a Valletta, e etiam Valletta debeva haber su cathedral proprie. Iste duo cathedrales es unos del plus magnific que nos ha vidite.

Un altere incidente occurreva in 1565, quando le cavalleros del Ordine de Sancte Johannes insimul con le gente de Malta repulsava un attacco feroce del turcos. A iste tempore le stato ottoman se extendeva ab Austria in le west del Golfo Persian in le est, e su galeras esseva vidite cruciar le Mediterraneo.

Sultan Suleyman le Grande de Istanbul reguardava Malta con su portos excellente como un obstaculo pro su expansion al west e desirava occupar lo. Le turcos attacava Malta con un grande flotta, 30.000 soldatos e multe equipamento. Le sultan esseva convincite que le battalia esserea vincite post poc dies, nam le Ordine de cavalleros monstrava solmente minus de 1.000 combattantes, adjutate per circa 8.000 malteses. Il esseva un battalia multo sanguinose e feroce, e le assaltatores perdeva.

Le incidente tertie de grande importantia esseva que le malteses non se lassava conquirer per Italia e Germania durante le Secunde Guerra Mundial. Il esserea decisive pro le potentias axial poter dominar Malta e su portas importante. Le insulas, specialmente le capital, Valletta, esseva bombate die e nocte durante plus que un anno. In le menses martio e april, 1942, esseva jectate super Malta plus que le duple quantitate de bombas que cadeva sur London in un anno.

Le germanos e le italianos non succedeva occupar Malta. Multe historicos opina que iste facto totalmente alterava le resultato del guerra.

Pro isto nos debe regratiar Malta.

(Per Dagrun e Ole ?seth, publicate in Panorama, maio-junio, 1993)

LE LINGUA ORAL QUE DEVENIVA POIS SCRIPTE

Malta: Le prime homines qui se establiva in Malta ha secundo nostre saper hodie venite ab Sicilia circa 7.500 annos retro. Illes veniva in barcas, portante animales domestic, ceramica, granas, e utensiles neolithic pro agricultura.

Ab circa 800 a.C., phenicios veniva e fundava stationes de commercio. Illes, e plus tarde le carthagineses, misceva con le indigenas e influeva super le traditiones e lingua de istos. Le lingua que se developpava ha formate le base del lingua maltese de hodie, le si-nominati malti.

Quando le romanos conquireva le insula in 218 a.C., illes principalmente lassava in pace le malteses, lor costumes, e lor lingua.

In 870 arrivava le arabes, qui regnava super Malta plus que 300 annos. Multe vocabulos de origine arabe esseva adoptate in le lingua, lo que esseva natural, proque le arabe pertine al mesme familia de linguas como maltese e pheniciano.

Plus tarde altere soveranos con altere linguas dominava super Malta. Totevia su lingua original esseva ben conservate. Hodie on conta le lingua maltese principalmente como semitic. In plus, illo contine parolas prestate del italiano, inter alteres in le lingua de derecto, arte, e litteratura. Le maltese anque ha parolas prestate de anglese in le lingua technic.

Le angleses regnava super Malta ab 1802 a 1974. Anglese e italiano esseva le linguas inseniate in le scholas. Le attaco italian de Mussolini a Ethiopia eveliava le abomination de tote le mundo, e le governator general de Malta decideva que italiano, con un notification de duo jornos, debeva esser excambiate de maltese in le scholas. Hodie omne malteses parla maltese, naturalmente, in addition multo ben anglese.

Maltese es le sol lingua semitic que es scribite per le alphabeto latin. Durante longe tempore malti esseva un lingua oral. Solmente in le principio del 19-ne seculo Malta habeva su lingua de littera proprie con dictionario e grammatica elaborate.

Post que Malta obteneva su independentia in 1974, on ha comenciate usar signos con le nomines maltese sur vias, placias, edificios, etc. Le previe strata “St. John’s Street” in Valletta es ora nomintate Triq San Gwanne e “East Street” ha le nomineTriq il Lvant.

Re le lingua on pote anque mentionar que le nomines del dies concorda con le numerales ordinal 1-7 e comencia per dominica: il-hadd, it-tnejn, it-tleta, l-erbgha, il-hamis, il-gimgha, is sibt. Le particulas il-, it-, etc., es le articulo definite (l-), que es influite per le prime littera del parola sequente. “Jovedi,” l-erbgha, es pronunciate [l-erba], proque -gh-, scribite con un extra linea a transverso del h, sovente es mute. Le parola maltese pro interlingua “le sol” es ix-xemx, pronunciate [isj-sjemsj].

Un cosa multo interessante in le museo archeologic de Vallett es un parve pilar de petra trovate in le vicinitate de Marsaxlokk. Illo porta duo inscriptiones identic, le un in phenicio, le altere in greco. Pro le scientistas qui succedeva interpretar le characteres phenicie, isto ha essite de grande importantia.

(Per Dagrun e Ole ?seth, publicate in Panorama, maio-junio, 1993)

350 ANNOS CON MONTREAL

Canada: Iste estate Montreal essera stimulate per un humor festive que permittera milliones de quebecheses a celebrar un evento multo special — le 350me anniversario del fundation de Montreal. Pro marcar le occasion le Corporation del Celebrationes del 350-me Anniversario de Montreal ha create un programma vermente unic. Montrealanos e altere quebecheses dunque poterea passar un estate inoblidabile de plus de un puncto de vista.

Ma non crede que le 350-me anniversario consistera solmente de alicun eventos impressive e spectacular; il habera al contrario un serie de eventos de grande varietate que permittera omne citatanos a celebrar iste occasion multo unic. Naturalmente qualque ceremonias essera plus official que alteres. De tempore in tempore alcun eventos involvera solmente un quartiero del citate, alteres essera plus large. Ma il ha un certitude que nemo se enoiara durante le 150 dies de celebrationes.

Depost que tote le population del citate de Montreal essera involvite per le eventos que evenira in le quartieros differente, plure eventos plus general occurrera in le locos que contribue al reputation del citate. Inter istos es Monte Regal, le vetere Montreal, le vetere Porto, le Centro canadian pro le Architectura, le Jardines botanic, le Castello de Ramezay, e multe alteres.

Totevia, tres sitos in particular essera hospite a un plus grande concentration de eventos planificate: le vetere Montreal e le vetere Porto, le nove Placia Berri, e le Parco del Insulas.

Initialmente, le mercato de Bonsuccurso in le vetere Montreal devenira le centro de nervo del celebrationes, como le puncto focal permanente pro le information. In addition, exhibitiones prestigiose se tenera illac, e le major parte de visitatores lo usara como un loco de incontro.

Alibi, le nove Placia Berri, locate in le centro del citate, essera le sito de eventos ben-planificate. A pauc passos del Universitate de Quebec a Montreal (UQAM) e le terminus de autobus intercitate, iste placia vibrara definitivemente con activitate.

Quanto al Parco del Insulas, un puncto de incontro super le insula de Sancte Helena in le medio del fluvio Sancte Laurentia, illo es capace de accomodar plus de 75.000 personas in cata del tres grande dies thematic del monstras e del creativitate. Assi le 18 de julio “Montreal e le canto francophone” revidera le canto francese. Le 25 de julio sub le thema “Montreal recipe” intertenitores de Montreal e de altere paises essera sub le lumines theatral. Finalmente, “Montreal al rhythmo del Americas” presentara un varietate de monstras super plure scenas devotate al musica del paises del populos del tres Americas.

Ben que iste monstras occurrera sin interruption, il es nonobstante multo natural inaugurar iste festivitates con ceremonias de apertura que essera multo special in lor scopo e in lor qualitate. Assi del 15 al 18 de maio montrealanos e visitatores de alibi pote reguardar un intertenimento bastante unic.

Le vespere del 15 de maio un monstra de sono e lumine transformara le Placia de Armas ante le Basilica de Nostre Seniora a un enorme theatro exterior con le centos de actores qui revivificara le grande eventos in le historia del citate. Iste monstra se repetera le 16 e le 17 de maio. Subsequentemente monstras se tenera in le nocte omne le venerdis, sabatos, e dominicas durante le estate.

Le proxime die, le facilitates al vetere Porto e al vetere Montreal essera aperite. Iste duo centros permittera le visitatores a prender avantage del installationes e de equipamento que injectara un sufflo de aere fresc economic in le vicinitate. Alora, le vespera del 16 de maio un monstra de foco de artificio sin precedentia illuminara tote le celo supra Montreal. Le foco de artificio se lanceara del Monte Regal, que permittera tote le population a gauder de un monstra imbattibile.

Le 17 de maio un missa in le basilica de Nostre Seniora commemorara le prime missa (catholic roman) celebrate a Montreal. Finalmente le 18 de maio le Orchestra Symphonic de Montreal completara le serie de eventos lanceante le activitates. In addition, plus de 17 activitates differente comprehendera le programma pro iste tres dies. Nos debe mentionar le aperatura del Placia Berri, le qual, como le annos passara, devenira un del centros le plus active in le vita de montrealanos.

Le grande majoritate de altere festas, que ha devenite un characteristica regular in le calendario montrealan, ha sequite in le passos del 350-me celebrationes e ha devenite illos mesme un parte del festivitates.

Per exemplo, le Festa International de Jazz adde duo dies a su programma pro celebrar Montreal. Quanto al festa "Justo pro Rider", le intertenimento in le stratas essera plus importante que jammais, e le gala de clausura essera multo exceptional. Pro non esser oblidate, il habera le aperatura del museo "Justo pro Rider," un facilitate unic in su genere.

Le Festa Mundial del Film essera anque involvite in le celebrationes per un evento pro le publico general. Finalmente, le Festa International del Dansa Moderne dara plus emphase al choreographos montrealan e al nove generation.

Alibi, un del plus popular monstras estive, le Competition International de Focos de Artificio de Benson e Hedges, essera integrate in le celebrationes. Iste competition international exceptional de classe mundial se extendera durante dece septimanas consecutive. Remanente al Rondo, iste monstras extraordinari permittera le centos de milles de spectatores a testar alicun eventos vermente original.

Durante le periodo del festivitates plure eventos international essera addite: un Monstra Aeree International le 5-6 de junio, un parada de automobiles antique le 10-12 de julio, e le Campionato Mundial de Remar e pro le Juniores e pro le levepesos le 12-16 de augusto. Finalmente, le prime Festa del Musica "Country" de Montreal prendera avantage del celebrationes pro debutar se.

Le quartieros de Montreal essera anque le sitos de eventos plus local que permittera lor residentes a discoperir plure elementos de lor historia e de lor activitates actual.

(Per Richard W. Sorfleet, publicate in Panorama,maio-junio, 1993)

LE ALTERE LATERE DEL COMERCIO LIBERE NORD-AMERICAN

Mexico: Le "maquiladora" es un zona libere de montage de productos destinate exclusivemente al exportation. Illos era establite comenciante in 1966 preter le frontiera nord-mexican, e illos es parte del programma governamental de exploitation del mano-de-obra disponibile presso del frontiera al Statos Unite de America.

Le establimento de iste zona libere coincideva in le annos 1960s con le perdita del competitivitate del SUA super le mercato mundial debite in parte al cadita de lor productivitate e lor alte costos de production.

Le programma del "maquiladora" pro Mexico es un initiativa pro que le interprissas american cerca a ameliorar le competitivitate de lor productos comparabile al mercantias estranier. In le mesme epocha le SUA autorisava tarifas special, que rendeva possibile le retorno del prime materiales o de lor componentes industrial exportate pro lor transformation.

Le governamento mexican offere avantages numerose al interprisas que investi in le"maquilas," inter le quales on trova:

. Costo de mano-de-obra: US$1,00/h. contra $8,00-13,00 in le SUA;

. Costos de installation: US$25,00-30,00/pede quadrate in Mexico contra US$30-40/pede quadrate in le SUA:

. Tarifas de electricitate: US$0,04/kWh in Mexico contra US$0,44 in le SUA;

. Impostos mexican plus basse e le offertas de facilitates administrative e servicios financiari e de credito con un infrastructura jam construite in le citates mexican con lor parcos industrial;

. Un multo grande disponibilitate de mano-de-obra mexican.

Non ben educate:

Vinti-cinque annos post le initio del programma de installation de zonas libere in Mexico, on contava in 1991 1.886 interprisas que forniva le empleo a 434.147 travaliatores. Le majoritate de iste interprisas es situate al frontiera nord del pais, principalmente in le citates de Ciudad Juarez, Tijuana, Matamoros, Reynos, e Nogales.

Le travaliatores del "maquiladoras" es in majoritate le juvenes e le feminas, qui son multo pauco scholarisate. Illes veni de alterre regiones del pais pro travaliar al frontiera. Generalmente illes non ha multe experientia, e illes non es multo stabile al travalio. Inter le rationes que explica le alte nivello de rotation de personal e dunque le pauc ancianitate accumulate, on nota le salarios multo basse, le rhythmo rapide del production, e le problemas specificamente feminin como le maternitate.

In plus, le character migrante del travaliatores explica anque proque multes inter illes transversa le frontiera american al recerca de melior pagas.

Le plus importante sectores industrial del "maquiladoras" es machineria e equipamento electronic e electric, vestimentos, alimentos, minerales non-metallic, productos chimic, minerales metallic, machinera e equipamento de transporto, e calceatura.

Le genere de travalio que predomina es relativemente simple, de pauc complexitate, que face quasi non-existente le programmas de formation.

Sex milliones sin labor:

Effectivemente si le crescimento del empleo in le zonas libere es constante desde quasi 30 annos, le expectationes governamental non se ha materialisate tanto. Considerante que hodie in Mexico il ha plus que sex milliones de disempleatos, 12 milliones de travaliatores sub-empleate, e cata anno plus que un million de juvenes junge al mercato de travalio, le empleos create per le programma son insignificante in comparation. Le sector de "maquiladoras" confronta un problema importante: le existentia e crescimento de fluctuationes del disveloppamento economic del SUA, ubi le interprisas son basate. Quando le economia american es in recession — como actualmente — le empleo in le zonas discresce. Quando iste interprisas es confrontate per conflictos de travalio — administrative o altere — illos claude lor portas, lassante le empleatos sin ressources.

In le "maquilas" le rhythmo de travalio e normas de productivitate es superior al standards international. Le personal debe sequer un rhythmo de production alicun vices inhuman. Le supervision del travalio in le fabricas es multo rigorose e se exercita per le auxilio de medios electronic e pressiones personal super le travaliatores. Del altere parte, si le interprisas ultrapassa le normas relative al production, il es proque illos non ha respectate ulle norma international del hygiene o del securitate al travalio. Isto provoca numerose maladias inter le personal como le hypertension, dermatitis, diminution del vista, nervositate, e anxietate.

Malgrado le facto que le personal del "maquiladora" son in majoritate feminas in iste interprisas, il non ha conditiones que recognosce lor necessitates special salvo que illos que nunc existe in le lege de travalio mexican — i.e., le pregnantia, nascentia, e lactation.

In certe fabricas le travaliatrices debe manipular materiales toxic sin ulle protection adequate. Studios recente demonstra que le travaliatrices del "maquilas" parturi infantes qui ha un peso insufficiente in 14% del nascentias, tres vices plus que le nivello in le sector de servicios.

Le societate mexican debe interpretar iste phenomeno como un signal de allerta e debe prender mesuras immediate de surveliantia e de preservation, dice multo expertos. Iste infantes del "maquiladoras" es disavantagiate mesmo ante de esser integrate in le societate. Illes habera plus de hasardo de suffrer maladias seriose; lor crescimento essera limitate; e illes sera exponite a riscos elevate de morir a un etate basse.

On debe resolver non solmente le problemas que existe quanto al ambiente, ma anque assecurar que le interprisas age differentemente le postdeman del Tractato de Commercio Libere Nord-American. Il es previsibile que iste tractato favorisara le augmentation del numero de empleos in le sector del "maquiladoras", ma nihil nos garanti que le mesuras radical se prendera pro ameliorar le situation actual. Le problemas ligate al deterioration del conditiones de vita del travaliatores se generalisa, particularmente concernente le sanitate de feminas.

Le population mexican ha pagate un precio social multo elevate a fin que le"maquiladoras" attinge lor objectivos. Iste precio ha essite le deterioration de conditiones del vita del populationes originante del region, le povressa e le salarios basse, le travalio simplice e monotone con nulle formation professional, le immunditia e le contamination al travalio, nulle amelioration de nivellos del vita pro le juvene travaliatores.

(Per Richard W. Sorfleet, publicate in Panorama, No. 3, maio-junio 1993)

VENETIA MENACIATE PER UN VER EXODO

Italia: Le citate romantic italian, Venetia, experientia le plus basse numero de habitantes jamais. Un ver exodo ha comenciate, e le politicos ora essaya facer le citate flottante un loco con taxas reducite pro attraher le gente.

74.974 venetianos monstra le plus recente contar del habitantes. Cata anno plus que 1.500 personas abandona Venetia. Ante 40 annos le population esseva quasi le duple de hodie. Venetia lucta contra le mar, que menacia le fundamento del citate, e le numero de neonascentias (400) monstra un longe distantia del mortes (1.200) le anno passate.

Le burgomaestro venetian, Ugo Bergamo, ha appellate al comit?inter-ministerial pro Venetia demandante reductiones del taxas pro incoragiar le venetianos a remaner. Le consilio municipal initiava ante alcun annos un ample restauration de ancian edificios, lo que anque ha su precio. Inter altere cosas il es sovente impossibile que le copulas novemente maritate ha bastante moneta pro comprar lor proprie habitation. E le citate cata die es inundate per plus que 100.000 touristas, qui lassa post se tracias clar de lor presentia.

(Per Thomas Breinstrup, publicate in Panorama, No. 3, maio-junio, 1993)

NOVE STATO RETROVA SU IDENTITATE

Es ben cognite que ab le 1 de januario 1993 existe super le mappa del continente europee un nove stato, Slovachia.

Slovachia es situate in le centro de Europa. Su vicinos son Hungaria, Austria, Polonia, Ukraina, e (naturalmente) le Republica Chec. Slovachia ha circa cinque milliones de habitantes. Illo es un stato democratic. Su prime presidente es un eminente economista, Dipl.Ing. Michal Kov?, CSc (63 annos).

Le patria del slovacos es un ver paradiso pro le touristas. Le Alte Tatra es visitate per estranieros de tote le mundo. Universalmente note es etiam le thermas Piesht’ani pro le rheumaticos. Multe excellente fontes medicinal flue — non exploitate — in le fluvios.

Le metropole del pais es Bratislava, con circa 500.000 habitantes. Illo es situate super le Danubio. Su castello es le residentia del presidente.

Le valuta es le corona slovac (Sk). Le standardo original era blanc-blau-rubie, per hasardo le mesme como le standardo russe hodierne. Isto ha causate que le slovacos debe adder in le medie un cruce a duo brachios super tres montes. Multes non sape le historia del cruce a duo brancas. Secundo le Evangelio Pontius Pilatus ha ordinate — contra le protestationes de judeos — fixar super le inscription INRI (Jeses Nazarenus Rex Judeorum). Ora le branca plus curte porte iste inscription. In le anno 863 le christianos orthodoxe (del oriente) comenciava usar iste forma de cruce. Le christianismo apportava a Slovachia (antea Grande Moravia) duo fratres de Macedonia: Constantino-Cyrilo e Methodo.

Le lingua slovac appertine al gruppo del linguas slave occidental. Alicunos inter le slavistas tracta le slovaco como lingua-ponte de omne gruppos slave. Su lexico corresponde in multe punctos con le vocabulario de interlingua. Iste coincidentia, naturalmente, concerne le parolas estranier, in majoritate greco-latin.

Le structura de formation de parolas estranier per medio de affixos es multo simile al derivation de interlingua. Le dictionarios del parolas estranier contine un enorme quantitate de entratas initate per le affixos a-, e-, ex-, de-, di-, dis-, kon-, kontra-(scribite in orthographia slovac) e mis-, pre-, pro- re-, trans-. Simile situation existe in le dominio del suffixos.

Le independentia de Slovachia ha apportate al vita quotidian del slovacos multe problemas, sed usque ora le pluralitate del gente ordinari porta iste difficultates —principalmente economic — patientemente, sin inquietudes social. On spera que per le diligentia e assiduitate e per le manos laboriose va venir etiam pro le nation slovac melior tempores.

(Per Julius Tomin, publicate in Panorama, julio-augusto, 1993)

LE ARBORE MEDICINAL: MIRACULO O MOBILE?

SUA: Ex ramettos de un arbore malaysian, recercatores in Washington, D.C., in 1991 isolava un substantia que bloccava le expansion del virus credite a causar le SIDA in humanos.

Biologos retornava in haste a Malaysia pro plus de specimenes, ma quando illes arrivava al mesme palude, le arbore habeva disparite. Desde ille tempore nulle arbore produce le mesme composito.

Iste historia era revelate al initio de maio per un deputato del Stato de Massachusetts, Gerry Studds.

Le arbore pertineva al familia guttiferae. E de iste sol arbore scientistas habeva colligite approximativemente duo libras de ramettos, folios, e fructos pro usar los in alcun experimentos.

Al Centro de Recerca del Instituto National de Cancere in Maryland, le scientistas reduceva le material crude resemblante le succo a un composito appellate calanolide A e lo probava contra HIV-1, le virus le plus commun cognoscite in casos de SIDA. Cellulas human placiate normalmente in un receptaculo de tests normalmente serea occidite per le virus in qualque dies.

Le resultatos era publicate le anno passate in le Jornal del Chimia Medicinal. In le documento presentate le 6 de maio iste anno le autores diceva que quando lor equipa retornava a Malaysia in 1991 pro plus de specimenes, illes trovava que le arbore habeva essite abattite un pauco de tempore post lor partita in 1987.

SHAKESPEARE: UN POSSIBLE CO-AUTOR

SUA: Un anonyme pecia theatral con le titulo "The Second Maiden's Tragedy" pote esser un pecia perdite de William Shakespeare.

Le documento rar esseva trovate in le New York Public Library per Charles Hamilton, 79 annos e experto de manuscriptos. Ille discoperiva in 1983 que le si-nominate diarios de Adolf Hitler esseva un fraude. E ille concludeva post studios de signaturas que Shakespeare scribeva su proprie testamento de circa 2-1/2 paginas. Iste testamento esseva comparate con le manuscripto al pecia theatral ab 1616, e secundo Hamilton cata littera es identic in su forma.

Altere recercatores non es de accordo con Hamilton. David Scott Kastan, professor de anglese e litteratura comparative al Universitate Columbia, dice al agentia de pressa Associated Press que ille non crede le theoria, ma que "il esserea idiotic refusar lo immediatemente".

Le pecia tracta de un rege tyrannic que es refusate per un belle femina. Quando ille invia su soldatos pro raper la, illa committe suicidio. Le rege apporta su corpore a su habitation, e le spectro del puera cerca adjuta presso le ver amante de illa, qui age como interprenditor de funerales e coperi le corpore de illa con toxico. Le rege mal basia le corpore e mori. Le ver amante del puera, qui mesme es un rege expulsate, retorna al throno.

AMERICANOS POVRE CRESCE IN NUMERO

SUA: Le numero de americanos povre saltava a 36,9 milliones le anno passate. Isto es plus multo que a ulle tempore desde que John F. Kennedy esseva presidente.

Le Census Bureau reportava que 1,2 milliones de americanos esseva addite al numero de povres le anno passate. Le rationes es disoccupation e recession general. Al mesme tempore le numero de americanos sin assecurantia de sanitate cresceva duo milliones le anno passate a 37,4 milliones ? o 14,7% del population statounitese.

Americanos povre contava 14,5% del population in 1992, le plus alte cifra desde 15,2% in 1983. Un povre es un persona cuje ganio es le limite national de povressa. Pro un familia de quatro in 1992 le limite esseva $14.335, pro singules $7.143.

Le disoccupation esseva nationalmente 7,4% in 1992. Le ultime vice que il habeva tante gente povre esseva in 1962, quando 38,6 milliones de americanos esseva sub le limite de povressa. E alora le population esseva minor que hodie.

1857, LE MATRE DEL TREMORES DE TERRA?

SUA: Un studio recente, publicate in le periodico Science, reportava que le potente tremor de terra californian de 1857 exerceva tante tension subterranee que mesmo post 130 annos illo continua a causar altere forte tremores.

"Il es parve observationes como isto que pote producer nove intuitiones concernente como tremores de terra occurre", dice le autor del articulo, le seismologo Chris Sanders del Universitate del Stato de Arizona. "Il ha ancora multo a esser apprendite re fallias."

Le conclusiones de Sanders era publicate solo duo dies ante que duo tremores rolava trans California. Le prime, mesurante 6 super le scala Richter, colpava un parte remote del deserto California-Nevada. Le secunde, mesurante 3,5, colpava un section montaniose al nord de Los Angeles.

Le nove studio suggere que le tremor de terra a Forte Tejon in 1857 super le fallia San Andreas, estimate a 8,3, causava un pulso de tension subterranee que moveva al rapiditate de un millia/anno, como un parve unda movente lentemente trans un stagno.

Le fallia San Andreas coperi approximativemente 650 millias in California; e le fallia San Jacinto, que se separa del fallia San Andreas pressso de San Bernardino, va al sudest verso Mexico.

Quando le pression arrivava a sectiones del San Jacinto, illo causava al minus septe tremores inter 5,9 e 6,8 de 1899 al seismo recente a Superstition Hills in 1987 al est de San Diego.

"Cata seismo occurreva progressivemente plus al sudest. Si le scientistas habeva potite traciar tal pulsos, illes haberea potite predicer le tremors", dice Sanders. Ille adde que in omne probabilitate il haberea habite tremores illac, ma illos non haberea occurrite in un tal maniera progressive.

Si le patrono continua, un tremor de terra mesurante 6,5 poterea occurrer in 20 a 30 annos, quando le lente pulso arrivara al fallia Imperial al sud del fallia San Jacinto in le Valle Imperial al est de San Diego.

"Il es surprendente, certo, ma anque rationabile", dice le seismologo Hiro Kanamori."Il es certemente possibile que le seismicitate actual in California del sud reflecte ancora le effectos de 1857".

(Per Richard W. Sorfleet, publicate in Panorama, novembre-decembre, 1993)