MINA FAMOSE
Polonia: Un del plus grande attractiones touristic de Polonia del sud es le mina de sal in Wielczka, un parve urbe situate 14 kilometros del centro de Kraków.
Le prime puteo minerari esseva facite verso le fin del 13‑tie seculo, ma on comenciava producer sal ibi jam in le medio de neolitho (3500-2500 a.C.). Tunc on usava le methodo de evaporation del aqua salin fornite per numerose fontes de superficie.
Al presente, post septe centos de annos de exploitation ininterrupte, le mina es plus que 7 km longe, su largor se approcha a 900 m, e su profunditate attinge 327 m. Il ha in illo circa 2.000 cameras post-exploitational sur novem nivellos. Le spatio vacue in le profunditate del terra amonta a un volumine de 7,3 milliones de metros cubic. Illo es le resultato del excavation de circa 25 milliones de tonnas de sal. Le longitude total del corridores e cameras es circa 300 km.
In 1978 le mina esseva inscribite sur le lista del Patrimonio Mundial Cultural e Natural del UNESCO.
Le itinerario touristic del mina e exposition subterranee del Museo Cracovian del Minas include 20 cameras postexploitational sur le tres nivellos le plus alte. Touristas percurre un distantia de 3 km durante circa 2,5 horas.
Al plus impressive monumentos pertine le cappella Sancte Kinga, que esseva facite in un grumo del solide sal verde. Illo es le plus grande cappella subterranee (longitude: 55 m, largor: 18 m, latitude: 12 m). Le travalios tendente a transformar le cavitate in un sanctuario esseva comenciate in 1895 e complite in 1963.
Desde 1964 in le mina il ha un sanatorio in le qual on cura le asthma bronchic e le asthma allergic.
Al fin mi impressiones personal: Io visitava le mina cinque vices, sempre con mi amicos estranier. Un de illes, un svedese, durante multe annos habeva soniate de vider lo, ante que ille lo visitava in 1968. (In le annos sequente ille veniva a nos vinti-sex vices.) Le mina, unic in le mundo, le impressionava multo — e anque me, ben que tunc io esseva in illo pro le tertie vice.
(Per Jerzy Dembicki, publicate in Panorama, januario-februario, 1996)
LE INDIGENAS CANARI PARLA PER SIBILAR
Insulas Canari: Visita Gomera, un del septe Insulas Canari, e vos audira probabilemente un sono resimiliante le sono de canarios con altoparlatores.
Le Hawke’s Bay Herald-Tribune, jornal de Nove Zelanda, reporta que iste son o es le “silbo” o linguage sibilation, durante seculos le lingua secunde del habitantes del insula.
Ben que apprender lo require cinque annos e exige multo habilitate, le silbo esseva utilisate ordinarimente pro paisanos functionante in le interior del insula, in le montanias, proque illo se porta a un distantia multo plus grande que un linguage regular.
"Es possibile dicer alique pro sibilation, e si le tempore es bon, vos pote audir lo de tres kilometros", dice un nativo de Gomera.
Cata littera del alphabeto corresponde a un sono de sibilation, ergo on pote exprimer etiam vocabulos moderne.
(Per Robert Pert, publicate in Panorama, januario-februario, 1996)
KALMAR SE PREPARA PRO FESTA DE UNION
Svedia: Le tres regentes scandinave e le presidentes ab Islanda e Finlandia se incontrara le 20 de julio 1997 in Kalmar pro celebrar le 600-esime anniversario del prime union nordic.
Le municipio de Kalmar ha budgetate con 13 milliones de coronas svedese pro un gigantic manifestation cultural in occasion del union, signate al castello Kalmar in 1397. Le rege danese Erik VII de Pomerania esseva coronate rege de Danmark-Norvegia in 1396 e esseva in le estate sequente laudate per le svedeses. Isto esseva le fundamento del Union Kalmar.
Le regina danese, Margrete, matre de Erik, invitava omne iste regentes scandinave a un incontro in le castello Kalmar. In le initio de Junio, 1397, delegationes ab Denmark e Svedia incontrava le archiepiscopos de Lund e Uppsala. Un delegation minor veniva ab Norvegia, sin le archiepiscopo ab Nidaros.
Le 13 de junio on poteva coronar Erik como rege del tres paises nordic, mesmo si le"littera de coronation" solmente esseva preste alcun septimanas postea. Le union mesme demandava negotiationes intense, ma finalmente — al 20 de julio — le documento del union Kalmar esseva signate.
Le littera de union fixa que le tres paises nordic ha un rege commun, un politica estranier commun, e un union de defensa. Ma le tres regnos continua haber leges separate.
Le union Kalmar cessava realmente in 1448 e esseva dissolvite in 1523, quando Gustav Vasa esseva coronate rege de Svedia.
Al jubileo se assembla historicos ab le paises nordic pro discuter le factos a un seminario. Un serie de altere activitates cultural es sub planification pro le jubileo.
(Per Thomas Breinstrup, publicate in Panorama, januario-februario, 1996)
LE SECRETOS DE JUPITER REVELATE
Durante 57 minutas le sonda non-equipate Galileo succedeva transmitter datos preciose al Terra, ante que illo le 7 de decembre con 170.000 km per hora esseva destruite in le forte atmosphera de Jupiter, le planeta le plus grande de nostre systema solar. Le temperatura esseva 465 grados, e le pressura de aere 30 vices plus grande que sur le Terra.
52 minutas plus tarde le datos arrivava al scientistas in le administration spatial american NASA. Alora finiva le contacto con le sonda, que habeva viagiate desde octobre 1989. Illo ja passava Venus. Le nave spatial materne ora es in orbita circum Jupiter e va durante le veniente duo annos approximar se al grande lunas Ganymedes, Callisto, e Europa. On expecta reciper circa 1.500 photos ab le universo. Galileo mesme passava le quarte luna de Jupiter, Io, e usava le gravitation de illo pro frenar.
Al profunditate de 160 km detra le nubes de Jupiter le transmissiones ab Galileo cessava, e le sonda dispareva.
Le multissime informationes del consistentia del nubes que coperi Jupiter va dar al scientistas importante sapientia super le apparition de nostre systema solar ante 5.000.000.000 annos.
Galileo ha durante su viage habite plure problemas ma finiva su vita con successo. Le viage costava 1,4 milliardos dollars e esseva planificate desde 1986.
Le sonda porta le nomine de Galileo Galilei, qui in 1610 discoperiva le quatro lunas de Jupiter per su telescopio. Le nave spatial materne va incontrar Ganymedes le 27 de junio iste anno.
(Per Thomas Breinstrup, publicate in Panorama, januario-februario 1996)
INSULA DIVIDITE CON TRESORES INCOGNITE
Cypro: Conforme al mythologia, le insula de Cypro - 1.251 kilometros quadrate con un population de circa 600.000 - esseva le loco natal de Aphrodite, le dea del amor, qui esseva create del scuma blanc del undas. Hodie, Cypro es ancora si belle e attractive como Aphrodite.
Cypro es le plus grande insula del Mediterraneo Oriental. Le excavationes in le insula revelava le evidentias del colonias establite posteriormente usque le millennio septime (i.e., le Epocha de Petra). Le romanos, le byzantinos, le venetianos, le ottomanos, le britones, e finalmente le turcos moderne ha contribuite al civilisation del insula.
Le dynastia francese se combinava con le elementos byzantin e gothic creante un pauc del plus eminente ecclesias e abbatias in iste parte del mundo. Le ottomanos, qui regeva 300 annos, addeva le aqueductos, le banios turc, e le caravansarayes e introduceva le population turc sur le insula.
In consequentia del debilitation del imperio ottoman, le governamentos britannic e ottoman signava un convention in 1878 que permitteva que le britones occupava Cypro "pro defender le territorio ottoman contra le armeas russe". Durante le governamento britannic, le populationes grec e turc viveva relativemente in pace.
Cypro es un insula dividite hodie. Durante iste annos del governamento britannic, le movimento Enosis, que intendeva un union con Grecia, deveniva plus forte intra le communitate grec-cypriota. Iste esseva un anathema pro le population turc. Como un compromisso, le britones consentiva conceder Cypro le independentia, e in 959 Grecia, Turchia, e Britannia signava le Accordo London, que forniva tote tres paises a intervenir in omne casos de un menacia al independentia de Cypro.
Le tensiones inter le duo communitates gradualmente augmentava, e le cypriotas grec insisteva super le union con Grecia. In 1974 illes essayava un colpo de stato. Timente que vitas turc esseva in periculo e que le insula devenirea un parte de Grecia, Turchia interveniva e ganiava le controlo de 37% del nord de Cypro.
Un cessa-foco esseva declarate preter un zona tampon que es ancora patruliate per le Nationes Unite hodie.
Post que omne essayos e negotiationes intercommunal provava van, le governamento cypriota turc declarava un Stato Cypriota Turc in 1983. Hodie 170.000 turcos in le nord e 600.000 grecos in le sud vive in Cypro.
Girne (Kyrenia):
Le visitatores a Cypro del Nord generalmente se dirige verso Girne in le nord in prime loco, proque iste es un loco ubi le major parte del hoteles grande e le plagias belle es concentrate.
Circumferite per le plantationes de citrus e le forestes, Girne es un citate exceptionalmente belle. Illo ha un belle porto ancian que esseva imbraciate per un castello enorme de venetianos.
Le porto es lineate per le cafe e restaurantes que esseva immagazinate intra o ante le edificationes historic que olim serviva le magazines.
Le castello immagazina un museo de un naufragio interessante. Estimate a haber 2.300 annos, iste naufragio es le plus ancian a haber jam essite recuperate ex le mar. Le blocos del amandola que le carcassa de nave portava son anque exponite.
St. Hilarion:
Situate in un valle alpin a un puncto dominante del catena Kyrenia (Girne), le castello de St. Hilarion offere un experientia plus stimulante. Le strata de asphalto conducera al castello.
Illo es 735 metros super le mar. Originalmente construite como un monasterio per le byzantinos in le seculo decime, St. Hilarion esseva postea convertite in un castello e serviva como un guarita a signalar piratas qui se approchava.
Magusa:
Magusa olim esseva le castello le plus importante del insula. Le districto ancian in le urbe central, circumferite per le massive muros venetian, es un loco somnolente ubi le tempore pare haber cessate ante seculos. Deambulante preter su stratos stricte, umbrate per le casas ottoman disintegrante se, on videra multe elegante ecclesias gothic con le minaretes saliente foras le celo. Non scrupulose super le function original de iste edificationes, le ottomanes los converteva in le locos islamic de cultoper adder le minaretes e blanchir le mosaicos interior con lacte de calce.
Lefkosa-Nicosia:
Nicosia es le capital dividite del insula dividite. Como Magusa, illo ha un belle citate interior que esseva fortificate per le muros. Su parve stratas populate son lineate per le parve magazines e le cafe, e a omne angulo on incontra le banios turc, le albergos, e naturalmente multe moscheas convertite ab le ecclesias. Le plus significante e elegante es le cathedrales gothic de St. Sophia (le moschea de Selimiye) e St. Catherine (le moschea de Haydar Pasha).
Karpas:
Nulle visita a Cypro del Nord esserea complete sin al minus un die complete passate sur le Peninsula de Karpas. Iste es le plus virgine e le plus belle parte del insula. Illo ha plagias auree, flores inculte, e le visitas ancian que es pauco discoperite.
(Per Kili publicate in Panorama, martio-april, 1996)
HOMINE DE PEKING MULTO PLUS VETERE
SUA: Le collection famose de fossiles cognoscite como le Homine de Peking es al minus 100.000 annos plus vetere que pensate.
Isto dice scientistas del Universitate de California Sud e le Universitate de Guizhou in China, suggerente que hominides primitive in Asia assi pote haber perite ante que humanos moderne existeva, o que illes forsan evolveva directemente como nostre ancestres. Le recercas essera publicate iste etate in le jornal scientific chinese Acta Anthropologica Sinica.
Le ossos se origina de un cavo in Zhoukoudian vicin a Beijing. Illos sembla esser al minus 400.000 annos vetere e forsan ancora plus, post que on los ha examinate con technicas sophisticate. Usque ora expertos ha pensate que le Homine de Peking co-existeva con le humanos moderne.
Le Homines de Peking esseva discoperite in 1921. Illos es considerate un exemplo de homo erectus e esseva inter le prime fossiles pre-human trovate in Asia; dunque lor rolo in theorias del developpamento human ha essite importante. Desde alora archeologos ha excavate altere 40 homines, le quales usava hachas de petra e poteva facer foco.
(Per Thomas Breinstrup, publicate in Panorama, maio-junio 1996)
VITA POSSIBILE SUR DUO NOVE PLANETAS
SUA: Scientistas statounitese Geoffrey Marcy e Paul Butler ha discoperite duo nove planetas sur que il ha conditiones in le quales le vita pote exister.
Ambe le planetas se trova a un distantia de 35 annos de lumine del Terra. Illos circula stellas in le constellationes de Virine e Ursa Major. Illos es plus grande que Jove. Le scientistas ha observate los per medio de un telescopio con le diametro de tres metros. Le temperatura sur le superficie de un del planetas es 85 grados. Secundo le opinion de Marcy il es possibile que il ha varie moleculas illac, anque le plus complicate moleculas organic. Ille assere que sur le planeta il pote pluver e que un parte de su superficie es forsan coperite per oceanos.
Sur le altere planeta, ubi il face plus de frigido, il ha forsan aqua in le forma de liquido. Le distantia inter le planeta e su stella es simile a illo inter le Terra e le Sol.
Le superficie de ambe le planetas non es dur. Assi le vita non poteva apparer sur illos mesme, ma sur lor lunas roccose. Un del planetas probabilemente ha tal lunas.
(Per Jerzy Dembicki, publicate in Panorama, maio-junio 1996)
JUPITER, UN PARVE SYSTEMA SOLAR
Le planeta le plus grande de nostre systema solar, Jupiter, es mesme un miniatura del systema solar. Informationes ab le sonda Galileo revela nove lateres del grande planeta.
Jupiter, Saturno, e Neptuno radia un energia que es le duple del amonta que illos recipe ab le Sol. Jupiter ha assi un fonte interior de energia de natura incognoscite. Altere planetas como Mercurio, Venus, le Terra, e Marte radia tote le calor que veni con le radios del Sol e es assi in balancia de energia.
Secundo Galileo le tempestas de Jupiter es multo plus forte que expectate, e il non ha tres ma solmente duo stratos de nubes. Il anque non ha tante aqua in le atmosphera como expectate, mesmo si le cadita del cometa Shoemaker-Levy 9 verso Jupiter in 1994 causava enorme explosiones e nubes de fango. Le atmosphera mesme es plus dense que expectate. Le sonda debeva secundo calculationes functionar 75 minutas post haber entrate in le atmosphera de Jupiter le 7 de decembre 1995, ma post 57 minutas illo esseva destruite a un pressura de 230 vices le atmosphera terrestre.
Jupiter es le gigante del planetas in nostre systema solar con un diametro equatorial de circa 142.800 km, 11 vices illo del Terra. Jupiter ha plure lunas, del quales le plus grandes es Io, Europa, Ganymedes, e Callisto.
Jupiter rota plus rapidemente circum su axe que ulle altere planeta. Un die sur Jupiter dura novem horas e 50-1/2 minutas. Quando illo es le plus proxime al Terra, le distantia remane totevia 591 milliones kilometros.
(Per Thomas Breinstrup, publicate in Panorama, maio-junio 1996)
300-E ANNIVERSARIO DE INSURRECTION
Brasil: Un serie de belle timbros postal era facite disponibile recentemente per le Posta brasilian commemorante le plus famose insurrection de sclavos in Brasil durante le periodo colonial.
Le "quilombo" era un sorta de village ubi viveva le sclavos fugitive que se trova in le stato moderne de Alagoas in le nord-est de Brasil. Establite in le 17-e seculo, illo se cresceva usque a un population de 20.000 ex-sclavos, multes del quales profitava del occupation nederlandese pro escappar del plantationes de sucro.
In 1694 un armea mercenari sub Domingo Jorge Velho destrueva Palmares e un anno postea Zumbi, le chef del quilombo, era arrestate e occidite per le autoritates portugese. Ille deveniva un symbolo del libertate contra le sclavitude in Brasil.
(Per Jorge Ricardo Raposo da Cara, publicate in Panorama, maio-junio 1996)
DUO CONTINENTES VA ESSER UNITE PER PONTE
Espania/Morocco: Le distantia es 14 km, ma un profundo de mar de 9.000 metros face impossibile construer un tunnel a iste loco. In vice le connexion habera le duple longor e ligara Puta Paloma in Espania con Ras Malabata in Morocco — forsan in anno 2010 o 2015.
Post 16 annos de preparationes un gruppo hispano-maroccan de labor tosto presentara su opinion super lo que esserea le plus grande obra de ingenieria in le historia mundial: un tunnel ferroviari sub le Stricto de Gibraltar.
Le costos al prime del duo tunnels essera plus que 50 milliardos pesetas (ca. 6 milliardos de dollars), ma isto es sin eventual complicationes durante le construction. Le ingenieros ancora non sape lo que on discoperira sur le fundo del mar. Ante cinque milliones annos le Atlantico obteneva accesso al Mediterraneo durante un catastrophe natural. Le profundo del mar in iste dominio es 300 metros, e le distantia inter le duo planificate terminales ferroviari essera 42 km. Trainos special de automobiles passara per le tunnels in medie hora.
Un singule tunnel es assatis pro le traffico expectate usque a 20 annos post su apertura, e solmente pois on besoniara un secunde tubo.
Le alternativa a un tunnel esserea un combination de un ponte basse e un ponte suspendite. Le pilas de illo totevia esserea placiate in un profundo de 300 m, e le tres sectiones del ponte haberea cata uno un longor de 3,5 km. Al comparation le section le plus grande de un ponte suspendite es illo a transverso del Grande Belt in Danmark, a saper de 1.624 m, placiate a un profundo del mar de solmente 20 m.
(Per Thomas Breinstrup, publicate in Panorama, maio-junio 1996)
NOSTRE VICINOS, LE NEANDERTHALES
Neandertales viveva simultaneemente con le ancestres del humanos moderne, qui les dominava pro 10.000 annos. E le neanderthales apprendeva le technicas del humanos. Isto revela un equipa de archeologos europee.
Fossiles excavate in Arcy-sur-Cure in Francia central indica que le neanderthales de iste region usava laminas in vice de silices e lanceas facite per ossos e cornos de cervo. Le excavation ha revelate utensiles de petra facite ante 35.000 annos. Evidentia indica que durante iste periodo le humanos moderne (cro-magnones) emigrava ex Africa e reimplaciava le neanderthales europee.
Le expertos crede que le neanderthales simplemente imitava le homines e forsan mesmo commerciava con illes. Le trovata de un osso ab le aure interior de un juvene neanderthal ha causate un debatto super le posibilitate que le neanderthales poteva parlar.
(Per Thomas Breinstrup, publicate in Panorama, julio-augusto, 1996)
NATURA MIRIFIC IN PAISAGE PICTORESC
Canada: Iste region elegante, situate alicun 80 km al est de Montreal, Quebec, e quasi 100 km al sud del citate de Quebec (appellate le Estria o le Cantones del Est), interprende alicun del plus pictoresc paisage del provincia de Quebec, tanto como le citates de Sherbrook e Magog. Un frontiera de 300 km con le Statos Unite forni opportunitates cultural unic. In addition, le cantones, occupante le region del provincia le plus al sud, gaude de un tempore un pauco plus calide durante le anno.
Le abenakis, le prime populo a discoperir e gauder del benedictiones del natura ci, lassava un marca indurante in le forma de nomines topographic: Memphremagog, Massawippi, Megantic, e Coaticook. Quando in 1776 le americanos declarava lor independentia de Grande Britannia, illes — ancora loyal al corona britannic —trovava lor position in le nation neonate multo tenue; e malgrado le reassecurantias american durante le negotiationes pro le pace, multe loyalistas esseva persequite per lor fratres american e acceptava sectiones de terra in Canada que Grande Britannia les offereva. Iste sectiones se appellava in anglese townships — cantones.
Milles de loyalistas se establiva in le cantones del est durante le 18-ve seculo, sequite per le mareas de irlandeses catholic in 1820 in un reaction al entrata de Irlanda in le union con Grande Britannia e ancora in 1840 a causa del fame de patatas.
Le composition del population, alora pro le major parte anglophone, se tornava dramaticamente post 1840. Le fortias primari del economia — le ferrovias, le industria forestal — empleava multe canadianos francese, qui eventualmente comprava terra local.
In le principio de nostre seculo le cantones habeva devenite predominantemente francophone, promovente le besonio de trovar un nomine francese pro le region.
Canton, que ha le mesme forma in interlingua, suggerite per le anglese township,veni del novellista A. Guein–Lajoie, autor de Jean Rivard, le Dericheur in 1858. Ante scriber le novella, Guein-Lajoie declarava que "mesmo si mi novella es situate in letownships, io non vole usar un parola estranier! In Switza, ubi on parla francese, on refere al divisiones similar como cantones (cantons in francese). Io ha le intention de sequer lor exemplo."
Assi pro le prime vice cantons-de-l’est (cantones del est) se appareva. Estrie (Estria in interlingua), pro su parte, esseva cuneate per Monsignor Maurice O’Bready in 1946 in su hymno regional "L’Estrie", significante "le regno del est", in 1951. Ben que ambe terminos continua in uso, Estrie gaude del stato official pro le region depost le 14 de augusto 1951, partialmente a causa del rationes politic de celar le colonisation original britannic.
Le natura ha benedicite le region con un abundantia. E le historia, non minus, ha facite le varie communitates dar a iste area un ric hereditage, un moda de vita e un mentalitate dissimilar a alicun altere. Vicos somnolente preter rivieras quiete retorna le visitator al 1900. Grande e prodige casas victorian, ronde stabulas curiosemente enigmatic, solide pontes coperite sta hodie como memorias del periodo colonial.
Longe cognoscite pro su minas de asbesto, su textiles, e su molinos de pappa e papiro, le cantones se torna de plus in plus al industrias alte-technologic. Nove sectores como automobiles, equipamento medical, computatores, microelectronicas, e machineria precision se developpa rapidemente in Sherbrooke, le Minas-Thetford, Bromont, e Granby. Mesmo le agricultura ha entrate in le etate computator. Ma on pote ancora gauder del paisage como on divaga preter nostre grande fermas ponite inter le colinas.
Un location ideal geographic ha ganiate pro le cantones del est un reputation como un destination excellente de ferias pro tote le anno. Le sonos estive de velas, ballas de golf, riso del plagias, ungulas de cavallos preter le tracia, e le racchettas de tennis certo vos attrahera.
In hiberno, on skia montanias excitantes, trencha trans un patinatorio, o va per un automobile de nive trans un campo nivee.
Le ric aere del autumno, equalite per le kaleidoscopio de colores, face le camminar o le conducer per le vias del campania a esser experientias inoblidabile.
Quanto al primavera, nostre saison le plus dulce pote transportar vos ab le haste del vita urban al calma ubi on prepara le sirop ex le succo del arbores de acere.
Malgrado haber essite le destination favorite de viagiatores a alicun tempore del anno, le cantones ha retenite fidelmente lor incantamento e lor ambiente. On essera specialmente felice con le nova que nostre population de mosquitos es parve (dice lo in junio).
Mesmo le plus belle paisage e le multitude de activitates es povre sin le hospitalitate. Ma on non habera querelas in Estria, recognoscite pro su albergamento exceptional e le dinar a su melior, frequentemente a base de productos a carne local. Quecunque le preferentia o le portafolio, on pote trovar accomodationes a placer: parve albergos in le campania, locos de lecto-e-jentaculo, moteles familial, hoteles de luxo, condos, e centros ferial.
Un scena varie del cultura e del artes reflecta le communitates differente del cantones. Le presentia anglese e francese es evidente in le multe theatros estive, includente le celebre "Piggery", galerias del arte, botecas de artisanos e de antiquitates, festas, salas de concertos, e multo plus.
Le cantones del est o Estria es a vos a discoperir per auto, bicycletta, canoa, skis, o automobile a nive; assi, prende le tempore pro experientiar su populo, moda de vita, e su multe attractiones.
(Per Richard W. Sorfleet, publicate in Panorama, novembre-decembre, 1996)
QUEBEC COLONISATE PER VIKINGS IN 1005
Canada: Sequente le viages de Leif Eriksson al west de Groenlandia, le islandeseArfinn Karlsefni navigava al novemente discoperite Vinlandia in 1003. Le vikings fundava un parve colonia a Anse-le-Meadows in Terra-Nove e un secunde in le primavera del anno 1005 in un terra appellate Skraingeland.
Hodie un historico quebechese, Napolon Martin, in su libro Les vikings dans le Saint-Laurent en l’an 1005, hypothesisa que lor secunde colonia era fundate presso de Baie-Comeau, Quebec, preter le Riviero Amee. Post haber studiate le sagas islandese, Napolon Martin ha traciate le viage de 1005 ab Groenlandia a Quebec.
Le vikings arrivava in le nove mundo con naves e 160 colonistas, qui faceva lor prime contacto con le indigenas (appellate skr?ings) post 15 dies. Le indigenas arrivava per canoas pro excambiar pelles. Illes partiva e le vikings passava le hiberno sin altere contactos.
In le primavera de 1006 le indigenas retornava pro excambiar de novo pelles pro utensiles de ferro e armas, le quales refusava le vikings. Le situation se deteriorava inter le gruppos. Post un altere conflicto super un bove il habeva un confrontation armate ubi duo vikings e plure indigenas moriva. A causa del grande numero de indigenas, le colonia era abandonate per le vikings.
Napolon Martin considera altere factores in le abandonamento final del colonias"american" post tres annos. Sub consideration es le fame e le controversias religiose inter le paganismo e le vikings christian. Le colonistas del expedition deArfinn Karlsefni retornava a Groenlandia e le essayos de colonisation scandinave in Skraingeland cessava.
Dunque le historicos identifica le nomines date in le sagas con Helluland (Insula Baffin), Markland (Labrador), Vinland (Terra-Nove), e Skraingeland (Quebec). Le mappa de Sigurd Stefansson de 1571, basate super le descriptiones ancian, se conforma al identificationes facite per Napolon Martin e alteres.
(Per Richard W. Sorfleet, publicate in Panorama, novembre-decembre, 1996)
LE CEREBRO FACITE PRO UN SINGULE LINGUA
Canada: Omnes qui in van lucta pro apprender un secunde o tertie lingua pote nunc relaxar. Un nove recerca monstra que le cerebro non esseva construite pro jocular con un o duo linguas estranier.
Homines qui quotidianmente parla duo linguas effortia plus le cerebro quando illes parla le secunde o tertie lingua. Brenda Milner apud McGill Universitate in Montreal ha studiate le activitate de cerebro apud un gruppo de canadianos qui ha anglese como lingua materne ma qui ha apprendite parlar fluentemente le francese ante que illes habeva septe annos. Le homines del recerca es exhortate parlar alternativemente anglese e francese dum le activitate de lor cerebros esseva mensurate con scandente PET.
Quando le participantes ora parlava lor secunde lingua, francese, occurreva activitate intense in certe partes del gangliones basal, que non esseva activate quando illes parlava lor lingua materne, anglese.
Le gangliones basal, que es locate sub le anterior parte del cerebro, es normalmente non activate in le processo del lingua, ma pro operar le secunde lingua le cerebro debe demandar assistentia ab un centro que alteremente non es involvite in le processo del lingua.
(Publicate in Panorama, novembre-decembre, 1996)
2.500 PAPIROS NOVE AB NAPOLEON
Russia: 2.500 pecias de papiro ab le mano del imperator francese Napoleon ha essite trovate in le archivos statal russe.
Le collection de documentos e notas manuscribite esseva incognite per scientistas, e on non sape como le papiros finiva in Moscova. Le conte russe Grigor Orlov, qui habitava in Paris in le annos 1820, colligeva le papiros.
Secundo le jornal britannic Sunday Times, le pensatas de Napoleon esseva scribite ante plus que 170 annos, quando le imperator cadite viveva su ultime dies in exilio sur le insula Sancte Helena.
"Un governamento que non sape admitter su errores es incapabile de reger", scribe Napoleon, qui in un altere documento consilia isto a omnes qui rege: "In vice de reprochar un homine, illes qui ha le poter debe plus tosto essayar ager mesme melio".
Le historicos russe ha — ultra le parolas super le vita scribite in margines in le libros de Napoleon, in documentos official, e a transverso le litteras ab alteres — trovate paginas disparite ab un romance amorose, scribite in le juvene dies del duce del armea. E Napoleon narra mesmo super le attacco fatal contra Russia in le hiberno 1812. Le imperator refusava usque al ultime puncto recognoscer que iste attacco esseva le error le plus grande de su vita. Ille non admitte que su armea esseva battite per "Rege Januario e Februario" ma clama que le inimico perdeva equalmente tante gente como ille mesme, e que "le hiberno totevia non esseva si dur, secundo mensuras russe".
(Per Thomas Breinstrup, publicate in Panorama, novembre-decembre, 1996)