TXINAKO LITERATURA ZAHARRA

TESTUAK - TXINAKO LITERATURA (VIII. mendea)

 Txinako literaturan garrantzitsuak dira bi poeta hauek: Li Po (Li Bai izenez ere ezagutua) eta Tu Fu (Du Fu), biak VIII. mendekoak. Li Po-ren mila poema inguru heldu dira gugana; poetaren obran taoismoaren eragina nabarmena da.

ILARGIPEAN EDATEN  -  Li Po

Zeruak ardoa maite ez balu,

ortzean ez legoke ardoaren izarrik.

Lurrak ardoa maite ez balu,

lurrean ez legoke ardoaren iturririk.

Hauek biek ardoa maite badute,

ez gaitezen gu ardoaz lotsa.

Ardo argia jakintsuarentzat,

ardo iluna adituarentzat.

Hauek biek ardoa edaten badute,

zertarako hilezkortasuna amets?

Hiru kopa, Tao-arekin harremanetan.

Upel osoa, naturarekin bat.

Ardotan baizik ez da lortzen plazera,

alferrik da neurritsuari deus esatea.

TOPA DEZAGUN  -  Li Po

Ez al dituzue ikusten

ibai Horiaren urak,

zerutik itsasoraino

azkar doazenak?

Inoiz ez dira itzuliko.

Ez al dituzue ikusten,

etxe dotoreetan, triste,

ile urdindunak

izpilu distiratsuei begira?

Goizaldeko zeta beltza zirenak

elur bihurtu dira

orain, iluntzean.

Atsegin har dezagun,

goza ditzagun bizitza honen plazerak,

ez ditzagun hutsik laga,

ilargipean,

gure urre-koloreko edontziak.

BI ADISKIDE  - Tu Fu (Li Po-ri)

Hiru gauez jarraian

zurekin egin dut amets.

Ate aurrean zinen

ile zuria eskuz astiro laztantzen,

nahigabe handi batek

arima garraztuko balizu bezala.

Hamar mila, ehun mila udazkenen buruan

sari ezdeus bat baizik ez duzu izango:

hilezintasuna.

ASEEZINA  - Tu Fu

Aseezina da enperadorea

handitzeko egitasmoetan

eta bere herriaren garrasia ez du entzuten.

Alferrik hartu dute emakume ausartek

pala eta goldea.

Nonahi karduek eta sasiek

lur mortua bereganatu dute.

Eta gerrak darrai,

eta sarraskiak ez du amaierarik.

Eta gizonen bizitzak ez du balio

oilaskoarenak edo zakurrarenak baino gehiago