FERNANDO PESSOA

Quando vier a primavera

Udaberria etor dadinean,

Ni hila banintz,

Gisa berean loratuko dira loreak

Eta zuhaitzen berdetasuna ez da aurreko Udaberriarena

baina ttipiagoa izango.

Errealitateak ez du nire beharrik.

Nire heriotzak bat ere inportantziarik ez duela pentsatzean,

Egundoko poztasuna dut sentitzen.

Bihar hil nintekeela jakingo banu

Eta udaberria etzi izan litekeela,

pozik hilgo nintzateke, etzi izango litzatekeelako.

Bere sasoia hori bada, noiz letorke bere sasoian ez bada?

Dena erreala izatea eta dena agerian egotea dut atsegin;

Eta atsegin dut horrela delako, nahiz eta gustatu ez.

Horregatik, orain hilgo banintz gustoz egingo nuke,

Dena erreala delako eta dena agerian dagoelako.

Nahi badute, latinez erreza dezakete nire zerraldoaren gainean.

Nahi izanez gero, dantza eta kanta egin dezakete beraren inguruan.

Preferentziarik ez daukat preferentziarik izango ez dudan ordurako.

Izango dena, izan dadinean, izan izango da.

******************************

Hilik datza gerizpean Kleopatra.

Euria da.

Ekibokatu egin ziren itsasuntziari bandera imintzean.

Euria da beti.

Zergatik begiratzen duzu zuk ziudade hurrina?

Zeure arima da ziudade hurrina.

Euri hotza ari da.

Eta seme hila altzoan laztantzen duen amaz,

Denok laztantzen dugu seme hil bat altzoan.

Euria da, euria da.

Zure ezpain nekatuetan sobera dagoen irribarre tristea

Dakusat zure hatzek zeure eraztuna ukitzen duteneko keinuan.

Zergatik ari da euria?

******************************

Amodio gutun guziak dira

Erridikuluak,

Ez lirateke amodio gutunak ez balira

Erridikuluak.

Neuk ere idatzi nituen ene denboran amodio gutunak

Erridikuluak,

Besteak bezala.

Amodio gutunak, amodiorik bada,

Erridikuluak

Izan behar dira.

Baina, finean,

Amodio gutunik

Sekula idatzi ez duten kreaturak soilik dira

Benetan

Erridikuluak.

******************************

Lo egiten dut. Amets eginez gero, esnatzean

Ez dakit zer amets egin dudan.

Lo egiten dut. Amets egin gabe lo eginez gero

Ezagutzen ez dudan espazio zabal batetara

Esnatzen naiz, oraindik ez dakidanerako

Esnatzen bait naiz.

Hobe da, amets egin edo amets egin gabe ordez,

Se depois de eu morrer, quisierem escrever a minha biografia...

Baldin eta ni hil ondorengoan, nire biografia idatzi nahi badute,

Ez dago ezer xumeagorik

Bi data bakarrik ditut: neure jaioteguna eta neure heriotzarena.

Bata eta bestearen artean egun guztiak nireak dira.

Mugaerreza naiz.

Kondenatu gisa bizi izan naiz.

Gauzak maite izan ditut bat ere sentimentaltasunik gabe.

Inoiz ez dut desio bat izan gauzatzerik ezin izan dudana,

inoiz itsutu ez naizelako.

Entzute hutsa ere ez da inoiz izan niretzat

ikustearen lagungarri baino.

Gauzak errealak direla eta guztiak elkarren ezberdinak

direla ulertu ere ulertu egin dut.

Begien bidez ulertu dut berau, inoiz ez pentsamenduaz.

Pentsamenduaz berau ulertzea denak berdintzat

jotzea litzatekeelako.

Behin batean loak hartu ninduen edozein gizaki bezala.

Begiak itxi eta lo egin nuen.

Honetaz gain, Naturaren poeta bakarra izan naiz.

******************************

Jainkoak zoriontsuak dira.

Sustraien bizitza bizi dute.

Fatuak ez ditu beren desirak zanpatzen;

Edo, zanpatu arren, gero

Bizi eternala ematen die.

Ez dute itzalik

Ez inor samintzen dituenik.

Eta, gainera, ez dira esistitzen.

******************************

Inscription X

euskaratzailea: Joseba Sarrionandia

Gu, hemen gautzanok, amoranteak ginen.

Geure egoerak ukatzen gaitu.

Ene esku galdua bere bularra

falta den lekuan desegiten da.

Ezaguna da amodioa, baina

anonimoa da amorante bakoitza.

Eder senditzen ginen. Mosuka zaitezte,

halantxe mosukatu ginen gu ere.

******************************

«Kaixo, ardi zaintzen zauden hori.

Hor, bide bazterrean,

Zer esaten dizu haizeak?»

«Haizea dela, eta iragaiten dela,

Eta lehenago ere iragan zela,

Eta geroago ere iraganen dela.

Eta zuri, zer esaten dizu?»

«Niri garbiago esaten dit.

Beste gauza askotaz mintzo zait.

Oroitzapenez eta saudadez

Eta sekula izan ez diren gauzez.»

«Ez duzu haizea iragaiten sekula entzun.

Haizeaz soilik mintzo da haizea.

Entzun diozun hori gezurra da,

Eta gezurra zeure baitan dago.»