Atma Gourava Bhavanam Hyderabad

https://www.ntnews.com/telangana/telangana-minister-gangula-kamalakar-comments-trs-gov-662873

Telangana  రాష్ట్రంలో ఆత్మగౌరవంతో బీసీలు

రాష్ట్రంలో ఆత్మగౌరవంతో బీసీలు 

July 9, 2022 / 04:12 AM IST

రాష్ట్రంలో ఆత్మగౌరవంతో బీసీలు

41 బీసీ సంఘాలకు రూ.వేల కోట్ల భూములు

వెనుకబడిన వర్గాల అభివృద్ధి ప్రదాత కేసీఆర్‌

బీసీ సంక్షేమశాఖ మంత్రి గంగుల వెల్లడి

కులాలు ఐక్యంగా ఉండాలి: శ్రీనివాస్‌గౌడ్‌

ఆత్మగౌరవాన్ని చాటేలా భవనాలు: వద్దిరాజు

6 కుల సంఘాలకు స్థల పత్రాలు అందజేత

హైదరాబాద్‌, జూలై 8 (నమస్తే తెలంగాణ): దేశ చరిత్రలో బీసీ కులాలకు ఏ ముఖ్యమంత్రి ఇవ్వని విధంగా ఆత్మగౌరవ భవనాల నిర్మాణానికి స్థలాలు, నిధులు అందిస్తున్నది ఒక్క సీఎం కేసీఆరేనని బీసీ సంక్షేమ శాఖ మంత్రి గంగుల కమలాకర్‌ కొనియాడారు. సీఎం కేసీఆర్‌ వెనుకబడిన వర్గాల అభివృద్ధి ప్రదాత అని, టీఆర్‌ఎస్‌ పాలనలో బీసీలు ఆత్మగౌరవంతో జీవిస్తున్నారని తెలిపారు. ఎంసీహెచ్చార్డీలో శుక్రవారం నిర్వహించిన కార్యక్రమంలో మంత్రి శ్రీనివాస్‌గౌడ్‌, ఎంపీ వద్దిరాజు రవిచంద్రతో కలిసి గంగుల పాల్గొన్నారు. ఏకసంఘంగా ఏర్పడిన మున్నూరు కాపు, పెరిక, తెలంగాణ మరాఠా మండలి, కుమ్మరి శాలివాహన, విశ్వబ్రాహ్మణ, నకాషా/ఆరేటి క్షత్రియ కుల సంఘాలకు ఆత్మగౌరవ భవన నిర్మాణానికి కేటాయించిన స్థల పత్రాలను అందజేశారు. ఈ సందర్భంగా గంగుల మాట్లాడుతూ.. 41 బీసీ కులాలకు రూ.వేల కోట్ల విలువైన 82.30 ఎకరాల భూమిని సీఎం కేసీఆర్‌ కేటాయించారని గుర్తుచేశారు. ఇప్పటి వరకు ఏకసంఘంగా ఏర్పడిన 24 కుల సంఘాలకు అనుమతి పత్రాలు అందజేశామని, మిగతా కులాలు కూడా వారంలోగా ఏక సంఘంగా ఏర్పడాలని పిలుపునిచ్చారు.

లేకపోతే ప్రభుత్వమే టెండర్లు పిలిచి ఆయా కులసంఘాల భవనాల నిర్మాణం చేపడుతుందని వెల్లడించారు. మంత్రి శ్రీనివాస్‌గౌడ్‌ మాట్లాడుతూ పూలే చేసిన రిసెర్చ్‌ ప్రకా రం కులాలన్నీ ఒకే ఇంటి నుంచి ఉద్భవించాయని, వృత్తుల పరంగా వేరుపడి కులాల రూపాన్ని సంతరించుకొన్నాయని తెలిపారు. సీఎం కేసీఆర్‌ ప్రోద్బలంతో ఒకే తాటిపైకి వచ్చిన వెనుకబడిన కులాలు ఇకముందు అదే స్ఫూర్తిని కొనసాగించాలని కోరారు. కుల ఆత్మగౌరవం ప్రతిఫలించేలా భవన నిర్మాణాలను చేసుకోవాలని ఎంపీ వద్దిరాజు రవిచంద్ర అన్నారు. ఎమ్మెల్సీ మధుసూదనాచారి మాట్లాడుతూ ఆత్మగౌరవ భవనాల కోసం కుల సంఘాలను ఏకతాటిపైకి తెచ్చిన ప్రభుత్వానికి, సీఎం కేసీఆర్‌కు ధన్యవాదాలు తెలిపారు. కార్యక్రమంలో బీసీ సంక్షేమశాఖ ముఖ్య కార్యదర్శి బుర్రా వెంకటేశం, ఎమ్మెల్యేలు దానం నాగేందర్‌, కోరుకంటి చందర్‌, సాహిత్య అకాడమీ చైర్మన్‌ జూలూరు గౌరీశంకర్‌, డబ్ల్యూఆర్‌డీసీ చైర్మన్‌ వీ ప్రకాశ్‌, బీసీ కమిషన్‌ సభ్యుడు ఉపేంద్ర పాల్గొన్నారు.

ఎమ్మెల్యే జీవన్‌రెడ్డి కృతజ్ఞతలు

ఉప్పల్‌ భగాయత్‌లో దేవాంగ సంఘ ఆత్మ గౌరవ భవన్‌ నిర్మాణానికి ప్రభుత్వం రూ.30 కోట్ల విలువైన 33 గుంటల స్థలాన్ని కేటాయించడంపై పీయూసీ చైర్మన్‌ జీవన్‌రెడ్డి.. ప్రభుత్వానికి, సీఎం కేసీఆర్‌, మంత్రి కేటీఆర్‌కు ధన్యవాదాలు తెలిపారు. స్థల కేటాయింపు నేపథ్యంలో మంత్రి గంగుల కమలాకర్‌ను కలిసి కృతజ్ఞతలు తెలియజేశారు. ఆగస్టు 14న క్షత్రియ సమాజ్‌ ఆత్మ గౌరవ భవన్‌ భూమి పూజకు మఖ్య అతిథిగా రావాలని ఆహ్వానించారు