baloncesto

Hai que diferenciar entre a normativa da FIBA (Federación internacional de Baloncesto) e a normativa da NBA (National Basketball League - EE.UU.) que son algo diferentes. Nas nosas clases sempre falaremos da normativa FIBA que é a que rixe a liga española e o resto das ligas a excepción da americana.

O obxectivo do xogo é introducir unha pelota dentro dun aro situado nun taboleiro a unha altura de 3.05 m. Para iso enfrontaranse na cancha dous equipos de cinco persoas cada un. Gaña o equipo que máis puntos anote ao final dos 40 minutos que dura o encontro (divididos en catro tempos de dez minutos cada un).

O terreo de xogo ten unhas medidas de 28 x 15 m. e dentro del podemos destacar:

a) Liña de triplos: situada a unha distancia de 6.75 m. do aro. Os tiros dende máis alá desta liña teñen un valor de tres puntos.

b) Liña de tiros libres: se se comete unha falta persoal e o árbitro indica lanzamento/s, tiraranse dende esta liña sen ningún tipo de oposición e terán unha validez dun punto.

c) Zona: Este espazo en forma de rectángulo delimita un espazo próximo ao aro, no cal ningún dos xogadores atacantes pode permanecer máis de tres segundos seguidos. Se é así, o árbitro sinalará "tres segundos na zona" e o balón pasará ao equipo que defende.

d) Liña de medio campo: delimita o campo de ataque e o de defensa. O equipo que ataca dispón de 8 segundos para pasar co balón ao outro lado. Unha vez que sexa traspasada (polo balón) non se pode volver atrás (sen que antes tocase o balón un xogador do equipo rival), sería o que denominamos "campo atrás".

e) Liñas laterais e fondo: estas liñas non poden ser pisadas co balón nas mans (sería "fóra"), pola mesma razón, o balón tampouco pode botar fóra delas. As liñas de saque son dúas pequenas marcas fóra do campo de xogo. Dende elas sacarán, nos últimos dous minutos do partido, os equipos que pidan tempo morto e teñan posesión do balón –do lado de ataque-)

Os lanzamentos a canastra poden ter tres valores distintos:

a) un punto: se se lanzan como consecuencia dunha infracción dendea liña de tiros libres.

b) dous puntos: se se lanzan dende unha distancia inferior aos 6.75 metros

c) tres puntos: se se lanzan dende unha distancia superior aos 6.75 metros

O equipo atacante ten un total de 24 segundos para intentar un lanzamento, se non é así, o balón pasará ao equipo rival.

A persoa co balón pode facer o seguinte: lanzar canastra, pasar ou avanzar. Para avanzar, o balón debe ser botado cunha man. Despois de botar, podémolo coller, pero unha vez collido, non o podemos volver botar, serían "dobres". Tampouco podemos avanzar co balón nas mans e sen botalo, serían "pasos" O que si nos permite o regulamento é a realización de "paradas" e "pivotes" que explicaremos un pouco máis adiante (no apartado da técnica).

Non está permitido o contacto físico. Nunca podemos roubar o balón ou obter unha situación vantaxosa golpeando o rival. Estas faltas denomínanse "faltas persoais" e pódense sancionar con tiros libres ou con saque dende a banda para o equipo que a sufriu. A persoa que comete cinco faltas persoais é expulsadoa do terreo de xogo e deberá ser substituída por outra.