Leiksýning

Ritun

Áður en hafist er handa þarf að vera á hreinu hvert viðfangsefnið er, á að skrifa frumsamda sögu eða gera endurgerð á eldri sögu? Mikilvægt er að byggja vel undir ritun barnanna og velta fyrir sér persónusköpun og uppbyggingu sögunnar. Ákveða þarf hvernig á að skrá söguna, á að gera handrit eða nota söguvef/sögukort og spinna í kringum það. Þegar kemur að því að forrita Dash og Dot til að leika í sögunni þarf að huga að leikmunum, búningum og bakgrunni sögunnar.

Grunnatriði ritunar

• Persónusköpun - eru persónurnar áhugaverðar?
• Hefur sagan byrjun, miðju og endi?
• Er sagan frumsamin eða er verið að endurgera sögu eftir aðra?

Handrit

• Sögurammar eða söguvegir geta verið gott tæki til að halda utan um sögugerðina (sjá dæmi hér fyrir neðan)
• Nemendur geta skrifað nákvæmt handrit eða nýtt söguveg/sögukort til að halda utan um söguþráðinn án þess að skrifa nákvæmlega niður allt sem gerist
• Á Krakkarúv og á Ritunarvef MMS er að finna ýmsar hagnýtar og góðar leiðbeiningar fyrir nemendur og kennara um skapandi skrif

Leikmunir og búningar

• Hvaða leikmuni og búninga þarf í sögugerðina?
• Hvernig er bakgrunnurinn, þarf einhverju að breyta þar?

Forritun

Í Blockly er hægt að forrita Dash og Dot til að leika hlutverkin sín, færa sig á milli staða, tala og nota bæði ljós og hljóð. Það getur verið krefjandi en skemmtilegt að nota nokkra róbóta og búa til fleiri en eitt forrit sem vinna saman. Hér er lykilatriði að prófa sig áfram, breyta og bæta.

Söguvegir

Söguvegir eru sniðug leið til að vinna með texta á myndrænan hátt. Nemendur skrá atburði sögunnar á söguveginn í ákveðinni tímalínu, með því fá þeir gott yfirlit yfir söguna og eiga auðveldara með að endursegja hana. Á sama hátt má búa til sögukort með því að skipta blaði niður í nokkra ferninga og skrá atburðina þar inn.

Áhugavert efni um ritun fyrir nemendur og kennara

Leiðbeiningar fyrir nemendur

1. Skrifaðu sögu. Þú getur notað sögukort eða söguveg til að skipuleggja atburðarásina. Veltu fyrir þér hvernig þú kynnir persónurnar til sögunnar, hvaða vandamál koma upp og hvernig þau leysast.
2. Umhverfi sögunnar. Hvar gerist sagan? Finndu efnivið til að búa til bakgrunn sögunnar og e.t.v. þarftu að nota einhverja leikmuni.
3. Búningar. Þurfa Dash og Dot búninga? Notaðu pappír, afgangs efnisbúta eða annað efni sem til er til að búa til búninga
4. Stilltu upp, þegar allt er tilbúið setur þú Dash og Dot á sinn stað í leikmyndinni.
5. Forritun. Notaðu Blockly til að stýra Dash og Dot, mundu að þú getur tekið upp hljóð.

Fyrir lengra komna - Dot stjórnar sýningunni!