Danspartý

Dash er nokkuð slunginn þegar kemur að dansi. Ef skólar eiga sílófón fyrir Dash (sem hægt er að kaupa sem aukahlut) er tilvalið að nýta hann í þessu verkefni.

Í verkefninu tvinnast saman forritun, tónlist, hreyfing, stærðfræði og sköpun! Einnig mætti auðveldlega tengja verkefnið samfélagsfræði.

Mynd af vefsíðu Wonder Workshop.

Markmið

Að nemendur:

Noti forritun til að leysa ákveðið verkefni
Hlusti á tónlist og greini tónlist
Fái að vinna í öruggu umhverfi sem hvetur þá til hreyfingar
Tengi hreyfingu inn í daglegt skólastarf
Tengi forritun daglegu lífi og námsgreinum á borð við samfélagsfræði
Skapi eitthvað nýtt og spennandi

Undirbúningur

Spjaldtölvur fullhlaðnar
Dash og Dot séu fullhlaðnir
Skipta nemendum upp í hópa
Kafa í viðfangsefni tengd þjóðdönsum, vinsælum dönsum, hreyfingu (hér tengir hver kennari verkefnið við viðfangsefni bekkjarins)
Upprifjun á því hvernig við búum til skipanir og röðum þeim saman
Kenna hvernig hægt er að nota endutekningar til að stytta forritin (sjá dæmi hér fyrir neðan)
Nemendur byrja að vinna
Í þessu verkefni er skemmtilegt að gefa nemendum tækifæri til að búa til búninga á róbótana

Umræðupunktar

Ræða við nemendur um dans:

Ræða hvað felst í hugtakinu samvinna
Hvað er dans?
Hvað vita þeir um dans?
Hafa þeir séð danskeppnir?
Hvað gerir dansinn fyrir fólk?
Þekkja þeir bíómyndir sem byggjast á dansi?
Hvernig hefur dans birst í okkar samfélagi?
Hvernig birtist dans í öðrum samfélögum?
Við hvaða tilefni er dans notaður (er það mismunandi eftir samfélögum hvernig hann er notaður, t.d. eins og í Afríku þar sem eru hefðir fyrir regndansi, USA þar á línudans á sterka sögu eða sem skemmtun, riverdans sem kemur frá Írlandi)?

Áskorun I - Róbótadans

Velja lag sem hentar vel fyrir dans
Hlusta á lagið og greina taktinn
Semja dans fyrir Dash
Passa vel upp á tímasetningar og að dansinn passi við tónlistina
Muna að hægt er að nota lykkjur (fyrir endurtekningar), ljós og hljóð
Láta nokkra róbóta dansa lagið í takti

Hér til vinstri er dæmi um forrit þar sem Dash dansar.

Áskorun II - Dansað með Dash

Velja lag sem hentar vel fyrir dans
Hlusta á lagið og greina taktinn
Semja dans fyrir Dash
Passa vel upp á tímasetningar og að dansinn passi við tónlistina
Muna að hægt er að nota lykkjur (fyrir endurtekningar), ljós og hljóð
Skrifa upp forritið á blað og dansa með róbótunum

Áskorun III - Samfélagsfræði

Skoða þekkta dansa, þjóðdansa, vinsæla dansa hverju sinni eða dansa sem tengjast því sem nemendur eru að vinna með samfélagsfræði
Endurútsetja dansinn með Dash í huga
Passa vel upp á tímasetningar, að dansinn passi vel við tónlistina og að hafi tengingar við þann dans sem nemendur eru að vinna með
Muna að hægt er að nota lykkjur (fyrir endurtekningar), ljós og hljóð
Skrifa upp forrit fyrir nemendur á blað og dansa með róbótunum, þarf ekki að vera nákvæmlega eins og dansinn fyrir róbótann

Hugmyndir og ábendingar

Það er alltaf gaman að byrja kennslustundina á forritunarleik þar sem nemendur forrita hver annan, þá eru tveir eða fleiri nemendur saman, annar framkvæmir forritið en hinn forritar. Markmiðið getur t.d. verið að komast frá einum stað á annan. Forritið má búa til með því að skrifa skipanir á blað, t.d. með því að nota örvar, liti eða myndir. Einnig er hægt að setja skipanirnar fram munnlega.
Í þessu verkefni er tilvalið að skoða myndbönd, horfa á bíómyndir og skoða ljósmyndir.
Auðvelt er að tengja verkefnið við samfélagsfræði, sköpun, tónlist og hreyfingu.