Grunnpakkinn

Cubetto eða Kubbur eins og hann er oft kallaður á íslensku hentar vel fyrir börn á leikskólaaldri og á yngsta stigi grunnskólans. Það sem fyrst vekur athygli við Kubb er vönduð hönnun sem minnir um margt á Waldorf leikföngin. Í grunnpakkanum er Kubbur, skipanaborð, teppi (ævintýraheimur), tvær bækur og skipanakubbar. Kubbur fæst t.d. hjá www.primotoys.com en einnig í stórum vefverslunum á borð við Amazon.

Kubbur er búinn til úr vönduðum efnum, hönnunin er einföld og mikið lagt upp úr hreinum línum og vönduðum efnum bæði í Kubbi, stjórnborðinu og teppinu sem fylgir. Kubbur sjálfur er vinalegur og aðlaðandi í einfaldleika sínum.

Bækurnar tvær eru annars vegar leiðbeiningabók sem gott er að hafa við höndina á meðan að lært er á skipanaborðið og hins vegar stutt forritunarsaga, Cubetto's First Day, sem fjallar um fyrsta dag Kubbs í skólanum. Í sögunni fylgja börnin Kubbi í gegnum skóladaginn og læra í leiðinni að forrita. Öll forritun fer fram án þess að nota skjá.

Kubbur notar 3 AA batterí og skipanaborðið þarf einnig 3 AA batterí. Sniðugt er að kaupa hleðslubatterí og eiga sett til skiptana.

Fyrstu skrefin

Bókin sem fylgir grunnpakkanum leiðir notendur í gegnum fyrstu skrefin í forritun. Það er sniðugt að byrja á að renna í gegnum leiðbeiningabókina (book O) og fara svo í sögubókina (book 1) og fylgja söguþræðinum í henni. Teppið er lagt á gólfið og Kubbur settur á reitinn efst í vinstra horninu. Kveikja þarf á Kubbi og stjórnborðinu og aðgæta að batteríin séu í lagi. Best er að lesa í gegnum bókina og fara eftir leiðbeiningunum. Á hverri síðu er stuttur texti og fyrirmæli um hvert Kubbur á að fara. Til að koma honum áfram þarf að raða skipunum í skipanaborðið.

Grænn kubbur stendur fyrir að fara áfram um einn.

Rauður kubbur stendur fyrir að beygja til hægri.

Gulur kubbur stendur fyrir að beygja til vinstri. 

Skipanirnar raðaðst frá vinstri eftir línunni sem skorin er ofan í skipanaborðið, pláss er fyrir 12 skipanir í einu en einnig er hægt að nota neðstu línuna til að fjölga skipunum til muna. Neðsta línan stendur fyrir röð aðgerða, þ.e. blái kubburinn táknar þær skipanir sem þar eru settar.

Þegar búið er að ákveða hvert Kubbur á að fara og raða skipunum á skipanaborðið er ýtt á bláa hnappinn til hægri á borðinu. Þá fer Kubbur á stað, hægt er að fylgjast með hvaða skipun hann er að framkvæma á borðinu en ljós kvikna fyrir neðan skipanirnar þegar þær eru framkvæmdar. Þetta er sniðugt að benda börnunum á, því að ef Kubbur fer ranga leið þá er hægt að sjá hvar forritunin fór úrskeiðis með því að fylgjast með ljósunum. Í framhaldi er auðvelt að betrumbæta forritið og reyna aftur.

Skipanir

Grænn kubbur - áfram um einn

Rauður kubbur - beygja til hægri

Gulur kubbur - beygja til vinstri

Blár kubbur - röð aðgerða (táknar allar þær aðgerðir sem settar eru í neðstu línuna)