பெருந்திரளான மக்கள் இயேசுவோடு சென்றுகொண்டிருந்தனர். அவர் திரும்பிப் பார்த்து அவர்களிடம் கூறியது, "என்னிடம் வருபவர் தம் தந்தை, தாய், மனைவி, பிள்ளைகள், சகோதரர் சகோதரிகள் ஆகியோரையும், ஏன், தம் உயிரையுமே என்னைவிட மேலாகக் கருதினால், அவர் என் சீடராயிருக்க முடியாது. தம் சிலுவையைச் சுமக்காமல் என் பின் வருபவர் எனக்குச் சீடராய் இருக்கமுடியாது".

"உங்களுள் யாராவது ஒருவர் கோபுரம் கட்ட விரும்பினால், முதலில் உட்கார்ந்து, அதைக் கட்டிமுடிக்க ஆகும் செலவைக் கணித்து, அதற்கான பொருள் வசதி தம்மிடம் இருக்கிறதா எனப் பார்க்கமாட்டாரா? இல்லாவிட்டால் அதற்கு அடித்தளமிட்ட பிறகு அவர் கட்டி முடிக்க இயலாமல் இருப்பதைப் பார்க்கும் யாவரும் ஏளனமாக, "இம்மனிதன் கட்டத் தொடங்கினான் ஆனால் முடிக்க இயலவில்லை" என்பார்களே.

"வேறு ஓர் அரசரோடு போர் தொடுக்கப்போகும் அரசர் ஒருவர், இருபதாயிரம் பேருடன் தமக்கு எதிராக வருபவரைப் பத்தாயிரம் பேரைக் கொண்டு எதிர்க்க முடியுமா என்று முதலில் உட்கார்ந்து சிந்தித்துப் பார்க்க மாட்டாரா? எதிர்க்க முடியாதெனில், அவர் தொலையில் இருக்கும்போதே தூதரை அனுப்பி, அமைதிக்கான வழியைத் தேட மாட்டாரா?

அப்படியே, உங்களுள் தம் உடைமையையெல்லாம் விட்டுவிடாத எவரும் என் சீடராய் இருக்க முடியாது. உப்பு நல்லது, ஆனால் அது உவர்ப்பற்றுப் போனால் எதைக் கொண்டு அதை உவர்ப்புள்ளதாக்க முடியும்? அது நிலத்துக்கோ எருக்குழிக்கோ பயனற்றது. அது வெளியே கொட்டப்படும். கேட்கச் செவியுள்ளோர் கேட்கட்டும்.

பெரேயாவில் பெருந்திரளான மக்கள் இயேசுவைப் பின்தொடர்ந்தார்கள். தம் சீடராக வாழ்வதற்கு வேண்டிய தகுதிகளையும், எதிர்படும் சோதனைகளையும் கூறி இயேசு அவர்களை எச்சரித்தார். தம் உடைமைகளை விட்டுவிடாத எவரும் தம் முழுநேரச் சீடராக இருக்கமுடியாது என்பதை அறிவிக்கவே இயேசு இந்த உவமைகளைக் கூறுகிறார்.

கோபுரம் கட்ட விரும்பினால், முதலில் உட்கார்ந்து, அதற்கான பொருள் வசதி தம்மிடம் இருக்கிறதா எனப் பார்க்கமாட்டாரா? மிகப்பெரிய கோபுரத்தை கட்டுவதற்கு மிகுந்த செல்வமும், கட்டுமானத் திறமைகளும், பல்லாண்டு கடின உழைப்பும் தேவைப்படும். அவ்வாறே, நாம் இயேசுவின் சீடராகுமுன், நமது வலிமையையும், திறமைகளையும் உணர்ந்து கொள்ளவேண்டும்.

போர் தொடுக்கப்போகும் அரசர் முதலில் உட்கார்ந்து சிந்தித்துப் பார்க்க மாட்டாரா? இயேசுவைப் பின்பற்றுவதால் நமக்கு ஏற்படும் சோதனைகளையும், இன்னல்களையும் நம்மால் எதிர்கொள்ளமுடியமா என்பதை முடிவு செய்யவேண்டும்

சிலுவையைச் சுமக்காமல் என் பின் வருபவர் எனக்குச் சீடராய் இருக்கமுடியாது. மேலே சொல்லப்பட்ட இரண்டு உவமைகளுக்கும் இதுவே இயேசுவின் விளக்கமாக இருக்கிறது. இயேசுவை கடைசிவரை பின்தொடர முடியாதவர்களுக்கு இறையாட்சியின் பணியில் பயிற்சி கொடுப்பதால் எந்த பயனும் இல்லை. இயேசுவின் முழுநேரச் சீடராக இருக்க நாம் விரும்பினால், தன்னலமற்றவர்களாகவும், சோதனைகளையும் இன்னல்களையும் எதிர்கொள்ளும் வலிமை உள்ளவர்களாகவும் இருக்கவேண்டும். சீடராக இருப்பவர்கள் மட்டுமே மீட்பைப் பெறுவார்கள் என்று இயேசு அறிவிக்கவில்லை. கடைசிவரை நிலைத்திருந்து, மற்றவர்களை வழிநடத்தும் தகுதி உள்ளவர்களே தம் சீடராகச் செயல்படமுடியும் என்று எச்சரிக்கிறார். தம் உடைமையையெல்லாம் விட்டுவிடாத எவரும் இயேசுவின் சீடராய் இருக்க முடியாது என்பதே இயேசு அறிவிக்கும் தகுதி.

திருத்தூதர் பவுல் தம்மை இயேசுவின் சீடராக அறிவிக்கிறார். "நான் குறிக்கோள் இன்றி ஓடுபவரைப்போல ஓடமாட்டேன். காற்றைக் குத்துபவரைப் போலக் குத்துச்சண்டை இடமாட்டேன். பிறருக்கு நற்செய்தியை அறிவிக்கிற நானே தகுதியற்றவனாக மாறிவிடாதவாறு என் உடலை அடக்கிக் கட்டுப்படுத்துகிறேன்".

இயேசுவைப் பின்பற்ற விரும்பியவர்கள்

இயேசுவின் பன்னிரு சீடர்கள் எல்லாவற்றையும் விட்டுவிட்டு, இயேசுவைப் பின்பற்றினார்கள். ஆனால், இறையாட்சியைப் பெற்றுக்கொள்ள விரும்பிய ஒரு செல்வரால் இயேசுவைப் பின்பற்றமுடியவில்லை. தம் செல்வத்தை அவர் இழக்க விரும்பவில்லை.

மறைநூல் அறிஞர் ஒருவர் இயேசுவை நோக்கி, ’நீர் எங்கே சென்றாலும் நானும் உம்மைப் பின்பற்றுவேன்’ என்றார். இயேசு அவரிடம், ’நரிகளுக்குப் பதுங்குக் குழிகளும், வானத்துப் பறவைகளுக்குக் கூடுகளும் உண்டு, மானிடமகனுக்கோ தலை சாய்க்கக்கூட இடமில்லை’ என்றார்.

வேறொருவர், ’ஐயா, உம்மைப் பின்பற்றுவேன்; ஆயினும் முதலில் நான் போய் என் வீட்டில் உள்ளவர்களிடம் விடைபெற்று வர அனுமதியும்’ என்றார். இயேசு அவரை நோக்கி, ’கலப்பையில் கை வைத்தபின் திரும்பிப் பார்ப்பவர் எவரும் இறையாட்சிக்கு உட்படத் தகுதியுள்ளவர் அல்ல’ என்றார்.

இயேசு தம் சீடருள் ஒருவரை நோக்கி, ’என்னைப் பின்பற்றிவாரும்’ என்றார். அவர், ’முதலில் நான் போய் என் தந்தையை அடக்கம் செய்துவிட்டுவர அனுமதியும்’ என்றார். இயேசு அவரைப் பார்த்து, ’இறந்தோரைப் பற்றிக் கவலை வேண்டாம். அவர்கள் அடக்கம் செய்யப்படுவார்கள். நீர் போய் இறையாட்சியைப் பற்றி அறிவியும்’ என்றார்.

என்னிடம் வருபவர் தம் தந்தை, தாய், மனைவி, பிள்ளைகள், சகோதரர் சகோதரிகள் ஆகியோரையும், ஏன், தம் உயிரையுமே என்னைவிட மேலாகக் கருதினால், அவர் என் சீடராயிருக்க முடியாது. இயேசுவின் கட்டளையைப் பின்பற்றுவதைவிட உலகில் உயர்ந்தது ஒன்றுமில்லை என்ற உறுதியான மனநிலை உடையவரே இயேசுவின் சீடராக இருக்கமுடியும். அவ்வாறு இல்லாத வெளிவேடக்காரர்கள் வெட்கத்தோடு திரும்பிச் செல்லவார்கள் என்று இயேசு அறிவித்தார்.

இயேசுவின் தாயும் சகோதரர்களும் யார்? இயேசுவின் தாயும் சகோதரர்களும் அவரைத் தேடிவந்தபோது, இயேசு தம் சீடரைச் சுட்டிக்காட்டி, "இதோ என் தாயும் சகோதரர்களும் இவர்களே" என்றார். தம் சீடர்களை, இயேசு தம் தாயாகவும் சகோதரராகவும் ஏற்றுக்கொண்டார். அவ்வாறே, தம் தாயையும் சகோதரர்களையும் தம் சீடராக ஏற்றுக்கொண்டார். இயேசு பேதுருவிடம், "என் பொருட்டும் நற்செய்தியின் பொருட்டும் வீடுகளையோ, சகோதரர்களையோ, சகோதரிகளையோ, தாயையோ, தந்தையையோ, பிள்ளைகளையோ, நிலபுலன்களையோ விட்டுவிட்ட எவரும் இம்மையில் நூறு மடங்காக வீடுகளையும், சகோதரர்களையும், சகோதரிகளையும், தாயையும், நிலபுலன்களையும், இவற்றோடுகூட இன்னல்களையும், மறுமையில் நிலைவாழ்வையும் பெறாமல் போகார்" என்றார்.

உப்பு உவர்ப்பற்றுப் போனால் எதைக் கொண்டு அதை உவர்ப்புள்ளதாக்க முடியும்? தம் சீடர்கள் உலகிற்கு உப்பாக இருக்கிறார்கள் என்று இயேசு அறிவித்தார்.

உணவைக் கெட்டுப்போகாமல் பாதுகாக்கவும், உண்பதற்கு ஏற்றதாக மாற்றுவதற்கும் உப்பு உதவுகிறது. அதுபோலவே, உலக மக்களின் உள்ளத்தில் இறையாட்சியின் அன்பு, பரிவு, இரக்கம், பொறுமை போன்ற உவர்ப்புத் தன்மையை தம் சீடர்கள் வளர்க்கவேண்டும் என்று இயேசு கூறினார். தம் சீடர்களிடம் உவர்ப்பு இல்லாவிட்டால் அவர்கள் இயேசுவின் சீடர்கள் அல்ல. அவர்களால் உலகிற்கு எந்த பயனும் இல்லை.