1. உப்பும் ஒளியும் Parable of the Salt and light

நீங்கள் மண்ணுலகிற்கு உப்பாய் இருக்கிறீர்கள். உப்பு நல்லது. உப்பு உவர்ப்பற்றுப் போனால் எதைக் கொண்டு அதை உவர்ப்புள்ளதாக்க முடியும்? அது வெளியில் கொட்டப்பட்டு மனிதரால் மிதிபடும். வேறு ஒன்றுக்கும் உதவாது. நீங்கள் உப்பின் தன்மை கொண்டிருங்கள். ஒருவரோடு ஒருவர் அமைதியுடன் வாழுங்கள்.

நீங்கள் உலகிற்கு ஒளியாய் இருக்கிறீர்கள். மலைமேல் இருக்கும் நகர் மறைவாயிருக்க முடியாது. எவரும் விளக்கை ஏற்றி மரக்காலுக்குள் வைப்பதில்லை. கட்டிலின் கீழ் வைப்பதுமில்லை. மாறாக விளக்குத் தண்டின் மீதே வைப்பர். அப்பொழுதுதான் அது வீட்டிலுள்ள அனைவருக்கும் ஒளி தரும். இவ்வாறே உங்கள் ஒளி மனிதர்முன் ஒளிர்க. அப்பொழுது அவர்கள் உங்கள் நற்செயல்களைக் கண்டு உங்கள் விண்ணகத் தந்தையைப் போற்றிப் புகழ்வார்கள்.

இயேசு மலைப்பொழிவில் தம் சீடரிடமும், திரளாயிருந்த மக்களிடமும் இந்த உவமையைச் சொன்னார். இயேசு தம்மை உலகத்தின் ஒளி என்று கூறினார். இந்த உவமையில் தம் சீடரையும், நற்செய்தியைக் கேட்பவர்களையும் உவர்ப்புள்ளவர்களாகவும், ஒளியாகவும், மலைமேல் இருக்கும் நகராகவும் இருக்கும்படி இயேசு அறிவுறுத்துகிறார்.

நீங்கள் மண்ணுலகிற்கு உப்பாய் இருக்கிறீர்கள்

ஆனால், உலகில் தன்னலத்தோடு வாழ்பவர்கள் வெளிவேடக்காரர்களாகவும் உவர்ப்பற்றவர்களாகவும் இருக்கிறார்கள். அவர்களால் உலகிற்கு எந்த பயனும் இல்லை. அவர்கள் உலகில் வாழ்வது வீண் என்று இயேசு அறிவித்தார். உவர்ப்பற்ற உப்பு வெளியில் கொட்டப்பட்டு மனிதரால் மிதிபடும் என்றும் எச்சரிக்கிறார். அவர்களுடைய உலக வாழ்வு வீணாக இருந்தபடியால், தீர்ப்புநாளில் அழிவுக்கு ஆளாவார்கள்.

நீங்கள் உலகிற்கு ஒளியாக இருக்கிறீர்கள்.