Вітаем вас у віртуальным музеі Васіля Віткі “Народжаны пад знакам паэзіі”!

Імя Васіля Віткі (сапраўднае імя – Цімох Васільевіч Крысько) – адно з самых прыкметных сярод літаратараў Беларусі. Наш зямляк удала праявіў сябе як паэт і празаік, драматург і перакладчык, казачнік і публіцыст, крытык і журналіст. Але перш за ўсё Васіль Вітка зарэкамендаваў сябе яркім і цікавым дзіцячым пісьменнікам. 

Случчане ганарацца тым, што менавіта ўраджэнец слуцкай зямлі быў першым галоўным рэдактарам адзінага беларускамоўнага часопіса для дзяцей “Вясёлка”, вакол якога згуртаваны лепшыя творцы краіны – пісьменнікі, паэты, мастакі.

Мэта праекта – стварэнне бясплатнага даступнага лічбавага рэсурсу, які папулярызуе творчасць Васіля Віткі і прыцягвае ўвагу да неабходнасці захавання памяці аб знакамітым земляку, а таксама можа быць выкарыстаны шырокай аўдыторыяй ў асветніцкіх, выхаваўчых і адукацыйных мэтах.

Праект складаецца з пяці раздзелаў. Матэрыялы кожнага ахопліваюць розныя бакі шматграннай жыццёвай, творчай і педагагічнай дзейнасці Васіля Віткі.

Шматлікія звесткі падмацаваны ўспамінамі Васіля Віткі, інтэрв’ю, архіўнымі дакументамі і матэрыяламі, фотаздымкамі.

У раздзеле “Аб творчасці” прадстаўлены бібліяграфічныя спісы твораў пісьменніка, літаратурна-крытычныя артыкулы і рэцэнзіі, лісты Васіля Віткі. Асобная рубрыка знаёміць з дзейнасцю Васіля Віткі на пасадзе галоўнага рэдактара часопіса “Вясёлка”. Педагагічная дзейнасць пісьменніка адлюстравана ў рубрыцы “Вітка-педагог”.

Падрабязна  разглядаецца літаратурная спадчына паэта і яго перакладчыцкая дзейнасць. Прадстаўлены поўныя тэксты твораў, публіцыстычных артыкулаў, аўдыязапісы, творы на замежных мовах.

Практычныя матэрыялы метадычнай скарбонкі ў раздзеле “Сцэнарыі” будуць карысныя для педагогаў, выхавацеляў, бібліятэкараў падчас арганізацыі мерапрыемстваў з нагоды юбілеяў паэта, або ў кантэксце папулярызацыі чытання ўвогуле. 

Выказваем шчырую падзяку дырэкцыі Дзяржаўнага музея гісторыі беларускай літаратуры за прадастаўленне і дазвол выкарыстаць ў праекце копіі фондавых архіўных дакументаў.

Віртуальны музей Васіля Віткі будзе папаўняцца новымі матэрыяламі. Плённая і цікавая праца па захаванні і папулярызацыі віткаўскай спадчыны несумненна паспрыяе выхаванню ў падрастаючага пакалення любові да беларускай мовы і Радзімы, павышэнню цікавасці да прыгожага літаратурнага слова і беларускай літаратуры.