Ayon pa sa sinaunang paniniwala mga Tsino, ang mundo ay binubuo ng 100 bansa, kung saan ang 25 nito ay napaliligiran ng karagatan, ang 45 ay nasa kabila ng karagatan at ang 30 naman nito ay nasa  kabila pa ng susunod na karagatan. Ang apat na karakter sa itaas, ibaba, at magkabilang gilid ng mapa ang nagtuturo ng direksiyon ang dalawang linya na animo'y sanga ng puno sa mapa ay ang Huang River na nasa hilaga at Yangtze River sa timog. 

Bukod sa heograpiya, buong tayog ding ipinagmamalaki ng mga sinaunang Tsino ang naabot nilang tagumpay na higit na nauna sa iba pang lupain sa daigdig. Buo ang kanilang paniniwala na ang kanilang mga tuklas tulad ng papel, pulbura, paraan ng paglilimbag, at magnetic compass ay higit na nakapagdulot ng pagbabago sa daigdig. Naniniwala rin ang mga Tsino na sila ay nakabuo ng isang kakaiba at walang kapantay na kultura sa loob ng mahigit na 3,000 taon. Bunga ng kaisipang ito, ang sinumang dayuhang mapayapang bumibisita sa China noong unang panahon ay malugod nilang tinatanggap sa imperyo upang mamulat sa kabihasnang kanilang naitatag. Gayunpaman, hindi naman naaayon sa kanilang kultura ang mangibang bansa upang palaganapin ang kanilang paniniwala at kabihasnan dahil naniniwala sila na ang kulturang Tsino ay maipagmamalaki at tiyak na tatanggapin at yayakapin ninuman nang walang pasubali anumang uri ng panghihikayat.