Supin – kaj pak je to?!
Neje stara i pozabljena reč nego glagolski oblik šteroga se ne vuči v školi zato jer ga standardni hrvatski nema. Ali ga zato ima međimorski. Či se vam je gramatika i zamerila v školi verjem da bo vam ipak interesantno prečitati o čemu se dela.
Gramatika je čudna reč od štere večina školašov ima težijav v želoco, bilo je plača a k tomu i hujši stvari, ali bom probal napisati tak ka bo vam interesanto. Idemo, pak kak bo, bo!
Infinitiv i supin
Nucamo ga saki den makar smo mortik za njega nigdar i ne čuli. Nikaj zato! Moči je živeti i govoriti či i ne poznamo vse zakone v jeziko. Ipak, kak bi naši stareši rekli – Vse je dobro znati.
Či so za njega znali išče i stari Rimljani, znajo denešnji Slovenci, red je nekaj povedati jer ga imamo i mi Međimorci kak i drugi kajkavski govori. Jednostavno povedano, či so glagoli v infinitivu npr. delati, vučiti, krasti, spati, jesti i gledati unda je supin bez završnoga „i“: delat, vučit, krast, spat, jest i gledat ili glet. Kak to zgledi v praksi? Rekli bi na priliko: - Treba delati či očeš jesti. Bolje se vučiti dok si mladi. Ne smeti krasti nego treba gledati ka si na pošten način zaslužiš za jesti. – to so rečenice z infinitivom. A rečenice z supinom bi zgedale ovak: - Zutra v jutro pem delat. Dojdi jest, obed je gotov. Idi se vučit. Či na drugač pemo krast. Išli smo samo gledat a v soboto pemo kupuvat.
Alternacija osnove ili menjanje izgovora
Či imamo glagole v infinitivo npr. brati, krasti, jesti, nesti… oni se v supino drugač zgovarjajo. Tak bodo ovi glagoli v supino: brot, krost, jiest/jejst, nest. (Tu bi nam pomogla fonetska abeceda, ali se nadjam da je lefko razmeti o čemo se dela).
Mesto naglaska
Ovi glagoli v infinitivo imajo naglaska na krajo: deli bomo ovo črkico ' : vuč'iti se, nos'iti, kos'iti, pelj'ati se… v supino treba naglasiti na prvomo slogo: v'učit se, n'osit, k'osit, p'eljat se…
Z supinom se dela imperativ ili zapovedni način
Imperativ za 1. lice množine se retko tvori kak v standardnomo hrvatskomo jeziko. V međimorskomo se imperativ slaže z 'idemo + supin'. Tak velimo: - Idemo delat! (radimo!); Idemo glet! (pogledajmo); Idemo plesat! (plešimo!)…
Jega išče situaciji de nucamo supina – izricanje namjere. Tak bomo rekli: - Ve nejpredi pemo jest unda pak si nekaj spijemo; Ja mu nam išel povedat; Što te poslal sem zvedat?; Pemo se peljat?
Supin ne treba brkati z govorom, obično štokavske osnovice kak se negda more čuti. Npr. - Šta ćemo radit večeras? Gledat ćemo TV. Prema standardu treba se reči v infinitivu 'raditi' dok je v drugoj rečenici ispravno povedano 'gledat ćemo' – bez završnoga „i“.
Nadjam se da ste zdržali i došli do ove zadnje rečenice i da ste zeznali nekaj novoga – zaprav staroga.
Tolnač:
težijav – mučnina
hujši – komp. od hudi; loš, zao, pokvaren; ovdje u tekstu znači: bilo je i gorih stvari
zvedati – saznavati novosti obično s namjerom otkrivanja nečijih tajni ili stvari koje se ne tiču drugih
supin – glagolski oblik, dolazi iza glagola kretanja ili glagola koji podrazumijevaju kretanje; redovito ga mogu imati samo nesvršeni glagoli
pem, pemo – glagol pojti ima posebni sinkopirani oblik prezenta koji se u kombinaciji sa supinom koristi za izricanje namjere u budućnosti: sg. 1. pem, 2. peš, 3. pe; mn. 1. pemo, 2. pete, 3. pedo, pejo
Literatura: Đuro Blažeka, Međimurski dijalekt