Steikt salat
Náttúran er full af fæðu og krökkum þykir spennandi að geta sjálf aflað sér matar. Hvönnin er bæði holl og góð og hægt að nýta á margvíslegan hátt. Við höfum tínt hvönn seint á vorin, þegar blómsveipurinn er enn lokaður í stórum laufkúlum sem við klippum af stönglinum. Þetta er tilvalin stund að kenna nemendum um hversvegna við rífum ekki plöntuna upp með rótum.
Á sama tíma er túnfífillinn gjarnan að blómstra og það er bæði fallegt og hollt að hafa hann með. Við notum einungis gulu hluta blómsins.
Hvönnin er skorin gróft og steikt á vægum hita í feiti. Þegar hún er farin að mýkjast stráum við gulum fíflablómum og grófu salti yfir og allir fá sér að smakka.
Efni:
skæri (til að klippa hvannarkúlur með blómsveip)
skurðarbretti
hnífur
feiti
sleif/steikarspaði
panna
salt
ílát fyrir nemendur að fá salat í - og áhöld ef þeir vilja ekki borða með höndunum.
hitagjafi (gas, bál, eldavél)