نامێت ڤینداران

بەندێت حەیرانوکان یێت کچک ولاوکان

 ل ژێری دڤان بەندێت حەیرانوکان ئەوێت دهاتن گڤتن وگوتن دناڤ بەرا لاوک وکچکا کوردا بڤی شێوێ هو یێ جان وتازە دبیتە جهێ فەخر وشانازیێ ل دەف مللەتێ بوڤێ حەژێکرنا پاقژ وبژین ب رەنگەکێ رەسن وپەتی ورەوان. بڤان پەیڤێت دلڤەکەر یێت پڕ ژهەلویستەکا بهێز وزاخ دناڤ بەرا ڤان هەردوک گەنجان کو دبیتە وینەکێ ڤینداری یێ دیار وتژی ژسوز وپەیمانان وبیر وباوەران. بئاخڤتنا روژانە، بێژ ووێژێت ساناهی ئەویت گرێداین ب سروشتێ ڤە، چ رەوەک یان بالندە وگیانەور. بڤێ شێوازا لێکدای هەردو ئەڤیندار شیاینە بڤێ سێ خشتیێ یان سێ رێزیێ ئو ب وێ سەروا یەکسانە بوان بەندێت کورت وخوگر وهژوک ل سەر هەستا ئەوی حەژێکەری یێ ڤیانا خو کریە نمونە بو هەر کەسەکێ هویێ دل پاقژ دا کو خو ب دانیت ل شوینا وان هەردو دلدارێت کەڤن دمێژویا ڤی رەنگێ دیروکی دناڤ تۆرێ کوردیدا.

 ئەڤ گڤتن من یا بەرهەڤ کری ب ڤی شێوێ بەند بەر بەندێ ژلایێ کچکێ ولاوکی ڤە وەک گڤت وگوت. هیڤیدارم جهێ دلخوشیێ بیت بو خویندەڤانێ ئو پێ شاد وبەختەوربن.

لاوک

کچکێ جانێ، دلبه‌رێ دینێ

به‌ژن منارا باژێرێ مێردینێ

ئه‌زێ ته‌ بخوازم ل ڤێ هاڤینێ 

کچک

لاوکۆ دینۆ، گه‌ر ته‌ نه‌بینم

باوه‌رکه‌ ده‌لالێ من، هارودینم

وه‌کی که‌وه‌کێ به‌ندا ئه‌ز دخینم

لاوک

کچکێ دینێ، شۆخ وشه‌پالی

ئه‌و رۆژا تو نه‌ ل مالی

دلکێ من ژبه‌ر ته‌ دنالی

کچک

دێ وه‌ره‌ لاوو، دێ تو وه‌ره‌

سێنگێ من سپی یه‌ وه‌ک مه‌رمه‌ره‌

ده‌ستێ ته‌ لاوکی دانم ل سه‌ر که‌مه‌ره‌

لاوک

کچکێ شڤانم تو ببه‌ بێری

ئه‌ز وتو ب هه‌ڤ روینن سه‌رێ کێری

ئه‌ز ده‌ستێ خو دانم سه‌ر گه‌رده‌نا ته‌ یا زێری

کچک

ئه‌زێ دو سێڤا بو ته‌ کەمه‌ خه‌لات

هه‌تا کو مه‌لا بده‌ت بانگ وسه‌لات

یان ژی هه‌تا رۆژ ل من وته‌ هه‌لات

لاوک

کچکێ دینێ من سویندا خاری

هه‌تا بچمه‌ قه‌برێ ته‌نگ وتاری

لێ ڤه‌ نابم، هه‌تا مرنێ هه‌ر تو یاری

کچک

لاوکۆ دینۆ، ئه‌ز ب گۆری

ئه‌ز خو دخه‌ملینم وه‌کی حۆری

تو به‌ر خانیکێ مه‌ ڕا ل من نانێری ل من دبۆری

لاوک

کچکێ دینێ ئه‌ز نه‌وێرم

ئه‌ڤینێ خه‌لک دکه‌ شه‌رم، ئه‌ز هو دنێرم

به‌ر هندی ئه‌ز ئه‌ڤینا خو‌ ڤه‌دشێرم

کچک

سێنگێ من کچکێ هێلینا ته‌یران

بخو‌دێ مێڤانێ ڤێ هێلینێ تو یی حه‌یران

دێ تو وه‌ره‌ لێ بکه‌ سه‌ما وسه‌یران

لاوک

کچکێ وه‌ یه‌، سه‌د جار وه‌ یه‌

نێ هه‌ر خه‌به‌ر خه‌به‌را ته‌ یه‌

ڕاستی رێکا خودێ مه‌ یه‌

کچک

لاوکو ما ده‌م هزرا ته‌ ئه‌ڤه‌

پشتی بانگێ مه‌غربێ ئه‌ڤ شه‌ڤه‌

چنگلێ من بگره‌، ژ خوڕا بره‌ڤه‌

لاوک

کچکێ، که‌وێ خو خوار ژقه‌بقه‌بێ

ئه‌زێ ئه‌ڤرۆ پشتی بانگێ ڤێ مه‌غره‌بێ

چنگلێ ته‌ بگرم بره‌ڤینم ببه‌م باژێرێ حه‌له‌بێ

کچک

به‌ژنا من گوله‌، دبه‌ر به‌حرا وانێ

په‌ز کیڤیێ مه‌ ل سه‌ر سیپانێ

خه‌یالا لاوکێ خو مه‌ ل نیڤا دیوانێ

٢٥- ١٢- ٢٠١٧ دهوک