سالوخەت

سالوخەت دحەیرانوکێدا

      ژن ب گشتی چ کچ، یار، دەستگر، خوشتڤی، ئەڤیندار، دلبەر یان ژنا ب مێر دکەڤنە دبن خانا ژنکێ دکەڤندا وحەتا نوکە ناهێتە گوهورین، ژن دمینیت ژن: یا جانە، خوشکوکە یا دل ڤەکێشە یا پڕ هەست وهەلویستە، زۆرا ب هێز زاخە بو ڤەکێشانا زەلامان ب نک خوڤە ودشێت ب فەند وفێلێت خو هەر کەسەکێ بیت بێختە دناڤ تەڤن وداڤێت خودا نەخاسمە هەکە ئەوێ ژنکێ چەند سالوخەت یان سالوقدانێت جێواز هەبن ژیێت دی کو وەل وی کەسی بکەت هەلبەست وهوزان وحەیرانوکان پێ بێژیت. نیشان وستایشێت ژنان گەلەکن وەک: بەژن وبال ، پرچ وکەزی وبسک وبن بسک، گەردەن، سێنگ،چاڤ، لێڤ، دەڤ، بری، ئەنی، دێم، روی ، ناڤتەنگ، دەست وپێ هتد...

      بەژن وبالایێ بلند یا زراڤ وراکێشای وشل ومل وتەرە وەک گول وروحانە یان وەک دارا سپیندارێ، پرچا درێژ ورەش و گولیێت ب سەر رەنگێ رەشی ڤە، كه‌زى زه‌ر وبسک خەلەک وشۆرن خولکێ رویباری وبن بسک تیلی، چاڤ رەش وبەلەک وسپیلکا سپی وڤەبی وکلدای ب رەنگێ رەشی، بری تاری وزراڤ وەک قەیتانێ، دێم سۆر وگەش ورون، ئەنیا وەکی هەیڤا چاردە شەڤی، دەڤ ولێڤ وددان هەمی پێگڤە ب سەرئێک ڤەبن دجان وتازەبن، گەردەن زراڤ وسپی ودرێژ وەک قرکا قازێ، دەستێت سپی وخەناکری، مەمک وەک خوخا، پاخلا پڕ ژروحان وگولا، سێنگ وەکی هەیڤا چاردە شەڤی.

بەژن دحەیرانوکێدا:  

        ل ژێری، ئەڤ حەیرانوکێت من کومکرین وجان وبەندکرین، دهەمیاندا پەیڤا (بەژن) یا تێدا هاتی ب شێوەکێ ئەشکرا. ئەڤ پەیڤە زۆربەی جاران یا هاتی ل دەستپێکێ ئانکو ل سەرەکیا حەیرانوکێ. ئو گەلەک جاران ژی یا هاتی دناڤ ناڤەرۆکێدا. دوان حەیرانوکاندا کچ وکور هەر دو پێگڤە یێت دبەشداربوین دڤەهاندنا واندا. ئەم دشێین بێژن هەڤرکیا وان حەتا رادەکێ یا یەکسانە، ئەڤ بەڤلاتی یە ئو ب ڤی رەنگێ هو یێ جان وتازە ورویەکێ رون وگەشا دایە ڤی چۆرێ زاردەڤێ ئەدەبی. ئەڤ پەیڤە یا بویە پێش ڤەکەرەک بو وان ئەڤینداران دەما پێدادچون وب ئیک ودو دگوتن. سالوخەتدانا ڤی پەیڤێ یا هاتیە دارژتن ب ڤی رەنگی: بەژنا بلند یان بەژن زراڤێ ئو راکێشای وشل ومل وشرین وەک رحانا خار ورویتە، یان شەنگە مینا تاکێت پیا یان وەک شتلا سپیندارا تەرە. ئەڤ نیشان وسالوغەرێت بەژنێ  یێت بوینە خسلەتەکا خوجهی دناڤ ڤان بەندێت حەیرانوکاندا ل دەف وان کچ وکوران.

بەژن: 

دو رێز

کورک دبێژیت

بەژنا بلند وەکی هێسترێ

ئەز ناگەهم بەژنا تە ئەگەر بچم سەر پێسترێ

سێ رێز

کچک دبێژیت

رەشاڤە ب دار وبارە

بەژنا لاوکێ من روحانا خارە

دێ من ب دەنێ بێ پارە

کورک دبێژیت

بەژنا زراڤ، بەژنا تەرە

شەڤ تاری یە، گوندێ کەرە

رابە ب چینە پەرێ گوندی تە برامیسم پاشی وەرە

کچک دبێژیت

بەژنا من گولە دبەر بەحرا وانێ

پەزا کیڤی مە، ل سەر سیپانێ

خەیالا لاوکێ خومە ل نیڤا دیوانێ

کورک دبێژیت

 به‌ژنا ته‌ زراڤه‌ لێ گرێدا قاویشا زێرا

 ئه‌نیا ته‌ ژی هه‌یڤا چارده‌یه‌ چاڤ ژستێرا

 ئه‌ڤرو ده‌رکه‌تیه‌ ژسه‌رێ چیا وژکێرا

کچک دبێژیت

بەژنا بلند بلندی

یێ دهەژینیت لەوەندی

من لاوکێ گرتی ژئەڤی گوندی

کورک دبێژیت

به ژنا بلند شل وملن

تژی پاخلێ روحان وگولن

باب ودای ژكورکی دسلن

کچک دبێژیت

 بەژنا من زراڤە وەك سپیندارا بەر کانیا

 کورکێت گوندێ مە یەك ب یەك ل من دگرن سەرێ ریا

 دێ تو وەرە من بخازە بەس نە بێژە من، هێشتا زییا

کورک دبێژیت

بەژنا بلند دارا درێرا

بەژن کورتێ هرچا شکێرا

ناڤنجیێ کوما زێرا  

کچک دبێژیت

بەژنا بلند یا زراڤە

من ژتەرا گوت، تە ل من داڤە

عەزیزێ دلێ منو، تە ئەزێ کریمە

پەپیک وگوهین بەردامە گوندێ رەشاڤە

کورک دبێژیت

بەژنا بلند، ل بن چیایێ

کەزی وبسکێت تە بادایێ

ئەز دێ هینگێ تەرکا تەکەم

حەتا من دبەنە ناڤ موغارا شێخ میسایێ

کچک دبێژیت

بەژنا بلند لبەر گوتنێ

لبەرکڕین وفروتنێ

دێ لێ دەم رحا شرین 

دگەڵ چەند مالێ دنێ

کورک دبێژیت

بەژنا بلند بەر شوباکێ

سەر قوندەرێ سەر قەبقابکێ

من دل سەر تە هەبوهێش تو ل بەر مەمکێ دایکێ

کورک دبێژیت

بەژنا بلند روحانا رویتە

ئەڤە سەرێ حەفت سالانە ئەز دگەریام ل دیف تە

من خەبەرک هەیە من شەرم کر بێژم ل رویتە

کورک دبێژیت

 بەژنا تە زراڤە مینا تاکێت شەنگە بیا

 تە کرمە لاوە كێ هار ودین بەردا مە دول وگەلیا

 من سویند خاری تو بو من بی یان نە چیە پشت چ پەریا

کورک دبێژیت

به‌ژنا بلند وه‌خته‌ بشكێ

ئه‌ز دێ چمه‌ زاخوكا ره‌نگين 

كه‌مه‌ره‌كا زێری چێكه‌م ل قايدا پشتێ 

ئينشه‌لا خودێ مالا وی خراب كه‌ت

يێ نه‌ هێلای بكه‌ڤمه‌ به‌ر كێله‌كێ ل به‌رته‌نشتێ

دناڤ ڤان مالکێت ژێری پەیڤا (بەژن) یا هاتی بئاشکرایێ ل ناڤەروکا حەیرانوکێدا:

سێ رێز

کچک دبێژیت

دلێ منو های سەرێ خەما

مەکتوبەکێ نڤێسم فرێ کەم ناڤ عەجەما

پشتی بەژنا بلند من قەدرێ خو نەما

کورک دبێژیت

يا دهيت ژخەندەکێ

بەژن بلندێ بسک خەلەکێ

خودێ خرابکەت مالا سەبەب کارا وڤێ فەلەکێ

کورک دبێژیت

چومە سەرێ چیایێ گنیێوو

من بەرێ خو دا گیایێ گویزیێوو

بلا ئەز چوتەکێ مازیا بام ل بەژن وپالا یارێوو

 کچک دبێژیت

سپیندارکێت ل بەر دەرێ مالا بابێ من هەمى شڤن

ل سەری دهەژن ژبنی دلڤن

من سەد حەیف ومخابن بەژن زراڤ پتنێ دنڤن

 کورک دبێژیت

کچکێ دینێ من تو دیتی ل بەر مزگەفتێ

فیستان سورە ژ بەژنا تە تێ

گریا دەر وجیرانا ژحالێ من وتە تێ

کچک دبێژیت

خانیێ لاوێ من ل پشتا چویێ

بەژنا بلند دهێت ژزاخویێ 

لاوێ من زاڤایە ببەن سەرشویێ

 کورک دبێژیت

ل سەر چیا را دهێم وتە نابینم

روندکێت من دهێن ئاڤ وخوین

پشتی بەژنا بلند یان دێ مرم یان دێ مینم

 کچک دبێژیت

تو ل سەر بانا یێ دمەشى

ژخالا خەلکێ ڤە نەخۆشى

ما نزانن تۆ نەخۆشێ بەژنا بلندو هەردو چاڤێت رەشى

 کورک دبێژیت

ئەز بلبلم بلبلەکی دینم

شەڤ دنڤم ب رۆژێ دخینم

ئەز عاشقێ بەژنا شرینم

کچک دبێژیت

ئێڤاری ب ناڤن، ئێڤاری ب ناڤن

قودیکیت قەدیفە تیرازێت ئارمیشی دناڤن

کچ ئاشقێ سمبێلێت رەشن کور ئاشقێ بەژنێت زراڤن

چار رێز

کچک دبێژیت

خوزیکا بارانەک هاتبا

 دێ بلا بارانەک هاتبا

خانێکێ بابێ تە رەخەک ژبن بربا

دا من تێر بەژنا لاوێ خۆ دیتبا

کورک دبێژیت

ئه‌ز حه‌یرانێ ئه‌وى ده‌ڤى

ته‌ سێنگ هه‌یڤا چارده‌ شه‌ڤى

ئه‌ز دێ هینگێ ته‌ركا به‌ژنا ته‌ یا بلند كه‌م

سه‌ر چیاكێ سیپانێ ببیت زه‌ڤى 

کچک دبێژیت

ئەز سەر بانی تو دحەوشێدا

دو گول شین بون دحەدیقێدا

یا ژخەلکی ڤە ئەزا دینم

وان نەزانی عاشقا بەژنا شرینم

کورک دبێژیت

ئەز کەوم کەوەکێ دینم

بەر مڵکا دەرێ دوڵکا دخوینم

خوزیا من ئەوە تە ببینم 

ئەز ئاشقێ بەژنا شرینم   

کچک دبێژیت

دلکێ منو ڤێرا ڤێرا

دەوسا میهێ ل دیف بزنێرا

خوزى ژخێرا خودێرا

 ببامە سەعەتەکا زێرى دبەژنێرا

کورک دبێژیت

ئه‌زێ ل به‌ر ‌په‌نجه‌رێ تو ل په‌نجه‌رێ

به‌ژن بلندێ كه‌زى زه‌رێ

تو دلێ خو قه‌د نه‌هێله‌ ئه‌ز وتو دێ بینه‌

له‌یل ومه‌جنونێت ده‌ورێ به‌رێ

کچک دبێژیت

ئەز ددەریدا تو دەریدا

گوشتێ حەلیای دسەر هەستیدا

ئەز هینگێ تەرکا بەژنا بلند بکەم

مری رابن دکفنێ سپیدا

 کورک دبێژیت

ئەڤینێ چ خۆش ئەڤینی

بدار وبەرا بکەڤی دحەلینی 

چ کەسێ ناڤ منو بەژنا بلند باخڤیت

یێ ژهەمیا عەزیزتر ئەو ب هەلینی

کچک دبێژیت

هەیڤا مە یا هاتیە چاردە شەڤی

چیاکێت گوندێ مە دبلندن، ڤ سەرناکەڤی

چومە بەر بەژنا بلند حەتا نیڤا شەڤێ

مودینکا کارەبانی، یا ل بەر دەڤی

 کورک دبێژیت

ئەم جیرانێت دەر ب دەرى ڤە

گوشتێ حەلیاى ب سەر هەستى ڤە

ئەز هینگێ تەرکا بەژنا بلند کەم 

حەتا مرى رادبن ب جانگێ سپى ڤە  

 کچک دبێژیت

ئەڤێ شەڤێ ل ڤێ شەڤێدا

ئەڤێ تەیری خو ل کەوێدا

دێ بلا مرادا من وبەژنا بلند حاسل ببا

دسەر وبنێت ڤێ هەیڤێدا

 کورک دبێژیت

چ سال سالە سالا ترى

خودێ مالا فەقیریێ خراب کرى

هەتا من کارێ خۆ کر وگوستیل کرى

خەلکێ بەژنا بلند ژبابێ خواست ونەخت ڤەبرى

کچک دبێژیت

خوزى ئەڤرو روژا خوتبە با 

رێکا تە ل بەر دەریکێ مالا مە با

دا من تێر بەژنا لاوێ خۆ دیتبا

پاشى بلا ڕۆژا قیامەتێ گورزەک زێدە با

 کورک دبێژیت

چ شەڤ شەڤە، شەڤە هەیڤە

بازنێ دەستێ یارکا من ئێک زێرە ئێک زیڤە

ئەز تەرکا بەژنا بلند ناکەم

ئەز ب خو دزانم کوشتنا ب دیڤە

کچک دبێژیت

چ دەم دەمێ جەهێت دروینا

بەژنا بلند یێ نساخە ل ناڤ نڤێنا

ئەڤینا من ولاوکێ دەلال

بو سماقا پێ کوچکا تام تێ نینا

کورک دبێژیت

ئەز ل سەر بانا تێم ودبورم

یا ژخەلکی ڤە ئەزێ کورم

خەلک نزانن ئە عاشقێ

بەژنا بلند ودیمێ سورم

کچک دبێژیت

من نه هێلە من نه هێلە

تڤەنگێ داگرە من ب کە کێلە

پشتی بەژنا تە یا بلند

ل من حەرام بن مال ومێرە

کورک دبێژیت

گولى ره شا گولى هويرا

ته چاڤ رەشن برهو ستويرا

خەمێت خه لك وعالەمێ ئێك و دونه

يێت من وبه ژنا بلند ل بنێت بيرا

کچک دبێژیت

من ژتە بەسکر تەژ من بەسکر

لایەکێ ئاقاری شینکر ئێکی کەسکر

سەر خاترا بەژنا بلند

من خو بێ رێ وبێ کەسکر

کورک دبێژیت

ئه‌زێ ل به‌ر ‌په‌نجه‌رێ تو ل په‌نجه‌رێ

به‌ژن بلندێ كه‌زى زه‌رێ

تو دلێ خو قه‌د نه‌هێله‌ ئه‌ز وتو دێ بینه‌

له‌یل ومه‌جنونێت ده‌ورێ به‌رێ

کچک دبێژیت 

چ سپێدەیە وەختێ چایێ 

بەفرا دباریت وەکى کایێ 

یارا من یا بەژن زراڤە 

ب خودێ دەق ژێ نایێ

کورک دبێژیت

تو یا ل من سلی ئەز نە ل خەمێ مە

تو ل مالکا بوشی، ئەزێ پتنێ مە

بەلێ شاهدێت من وبەژنەکا بلند

ناڤ تەنگا زراڤ مەلایکەتێت خودێ نە

کچک دبێژیت

گەلی ل بەر گەلی

باکەکێ دهێتو دلێ من دکەلی

هەچیێ یارکا من نە نیاسیت

چاڤ رەشە بەژن بلندە یا ل تاخێ گەلی

کورک دبێژیت

دێ چینە زوزانا پێگڤە

کەپرەکێ چێکەین شەقلکا ب سەرێکڤە

هەکو من وبەژنەکا زراڤ وبلند ساربو

دا خو ب کێشینە پالێکڤە

کچک دبێژیت

کورکو لاوو بەرواری

دێ تو وەرە ژوی واری

کچکا جانا ژمالێ ژوری

بەژن شتلا سپینداری

دیم گەشا بری تاری

من ب خازە ژ ڤی واری

دا کەیف خوەش بی ل ڤی واری

شەش رێز

کورک دبێژیت

کانین وچری بە من سێنە

برەکا تەیرک وتەوالا

ل گەلێکێ مال خراب دا تێنە

چ کەسێ سێ شەڤان وسێ رۆژان

دەستێ خو دبەژنا بلند وەرینیت

ئەو مەلکێت خودێنە

حەفت رێز

کورک دبێژیت

کانین وچری بە من چوتن

برەکا نێری وبزنا ل دەرێ گەلیکا دا دگوتن

هەتا ئەز گەهشتمێ

گیاکێ گیابەندێ کولیلکا مویژانێ ل من کەلوتن

چ کەسێ سێ شەڤان وسێ رۆژان

دەستێ خو ل بەژنا بلند وەرینیت

لەشێ وی ل ئاگرێ جەهنەمێ نا هێتە سوتن

هەشت رێز

کورک دبێژیت

کانین وچری بە من چارن

برەکا نێری وبزنا ل بەلەکا میرا

ل دەرێ گەلیکا دا دبارن

حەتا ئەز گەهشتمێ

گیاکێ گیابەندێ کولیلکا مویژانێ ل من خارن

چ کەسێ سێ شەڤان وسێ رۆژان

دەستێ خو ل بەژنا بلند وەرینیت

ب نەشویشتی دێ هێتە ڤەشارتن

چاڤ:

     سالوخەتێت چاڤی ب رەنگەکێ جان وتازە یێ هاتیە نیشانکرن دناڤ حەیرانوکێت کوردیدا. چاڤ یێ بویە نێزیکترین هەست دناڤ بەرا ئەڤیندارێت ڤی رەنگێ هەلبەستێ بتایبەت. ئەڤ ناڤ ونیشان وخەسلەتێت داینێ وەک: چاڤ بەلەک، چاڤ رەش، چاڤێت گلدای، چاڤێت ب روندک وگرین، ئاورێت چاڤا ئو چەند رەنگێت دی.

کورک دبێژیت

ئەز ل سەر بانا تێم ودروینم

ژخەلکەیڤە ئەێ دینم

خەلک نزانیت عاشقێ چاڤێت رەشم

کورک دبێژیت

 ئەز ل سەر بانا تێم ودروینم

ژخەلکەیڤە ئەێ دینم

خەلک نزانیت عاشقێ چاڤێت شینم

دو رێز:

کورک دبێژیت

ئەڤ زڤستانە چەندا ب ئێش وژانە گەلەک

یا خەریبیێ دبارینیت سەر من وچاڤێت بەلەک

سێ رێز

کچک دبێژیت

گوندێ مە بەردا ئاڤە

یێ بێ هرو بێ دەراڤە

یێ ل من بەرزەبوی ئەو بەلەک چاڤە

کچک دبێژیت

 ئەز بو تەمە

عاشقا چاڤیت تەمە

خو تو چ بکەی هەر بوتەمە

کورک دبێژیت

ئەزکەوم کەوەکێ نێرم

بەرملکا ژوردا  گیا دبژێرم

ئاشقێ چاڤێت ژنکێت بمێرم

کچک دبێژیت

ئەزا سلم ئەز سل نابم

عەردێ تو لێ ئەز لێ نابم

ژچاڤ وبرهێت تە تێر نابم

کورک دبێژیت

ئێڤاری دخوشن

دو زەری ئەسمەر دئاڤێدا دمەشن

داخازا کورکا کچکێت چاڤ رەشن

کچک دبێژیت

ئەز ل سەر بانا تێم ودمەشم

یا ژخەلکی ڤە ئەز نە خوەشم

خەلک نزانیت ئەز عاشقێ چاڤێت رەشم

کورک دبێژیت

بسکا بادە بادینە

چاڤا گلدە ب گلدینە

کچک سوتن کورکا هاژێ نینە

کچک دبێژیت

ئێڤاریە روژ چو ئاڤا

هند یێ ل سەرێ سویکا هند ل ناڤ ئاڤا

کورە لاوکێ دەلال ئەڤرو ئەز کوشتم ب ئاورێت چاڤا

کورک دبێژیت 

حه ودا سپيندارا هه می شڤن

سەری دهەژن ژبنی دلڤن  

مانه مخابن چاڤێت ره ش  پتنێ بنڤن

کچک دبێژیت

ئەی خابیرو تو بادایێ

تە بەرێ ل دەشتێ پشتا ل چیایێ

من حەیف ومخابن چاڤێت رەش وبەلەک ئەز هێلایێ

کورک دبێژیت 

خەمێت دلا ئەم پیرکرین

رەنگێت چاڤا کورە کرین

قاچاخا خاستین خرابا برین

کچک دبێژیت

خەمێت دلا ئەم پیرکرین

روندکێت چاڤا کورە کرین

قەنجا خاستین، خرابا برین

 کچک دبێژیت

لاوێ منولاوێ زراڤ

تە چاڤ رەشو بری ل هنداڤ

تە ل من سوتن جەرگ وهناڤ

کچک دبێژیت

عەورەک هاتو پنی پنی

ل سەر سەری من سەکنی

خوزیکا من زانیبا  توعاشقێ چاڤێ منی

کچک دبێژیت

غەمێت دلا ئەم پیرکرین

رەنگێت چاڤا کورە کرین

قاچاخا خاستین خرابا برین

چار رێز

کچک دبێژیت

ژهەشتێ حەتا هەشتێ

چاڤێت من کچکێ کلێ رەشتێ

ئەزێ چەوا چمە زوزانا

لاوکێ خو هێلم ل دەشتێ

کورک دبێژیت

گولی رەشا، گولی بەردا

تە چاڤ رەشێ برو ب سەردا

تە دلێ من کرە بەحرا خوینێ

مەسکەنێ کول ودەردا

کورک دبێژیت

تە چاڤ رەشێ چاڤ ب خێلی

خەوکا من رەبەنێ خودێ  دهێت تو ناهێلی

ترسا من ئەو ترسە تو ب چیە

وەلاتێ غەریبا من ب هێلی

کچک دبێژیت

ئێڤارە درەنگە روژ چو ئاڤا

تە قەلەمێ رەشە ل باسکێ چاڤا

ئینشەللا هندێ ئەز کچ بم دمالا بابێ خودا

تو ل مالا بابێ خو نە بیە زاڤا

کورک دبێژیت

ئێڤاری دخوشن

دو زەری ئەسمەر دئاڤێ دا دمەشن

دا خوازا کەرکا کچکێت چاڤ رەشن

کەزی وبسک وبەربسک وپرچ وگولی

کچک دبێژیت

چوم بالاڤێ ل کانیا گەزی

من بالاڤکر ب دەستێ لەزی

دێ هنگی تەرکا چاڤێت بەلەک کەم

هەتا کەڤر دحەلیێت وهێستر دزی

کورک دبێژیت

چ سپێدەیە وەختێ چایێ

تە چاڤ رەشێ دەرمان دایێ

کچا خەلکیئەزێ سوتیم

حەلاندیم ل سەر دونیایێ

کچک دبێژیت

گەلی ل بەر گەلی

باکەکێ دهێتو دلێ من دکەلی

هەچیێ یارکا من نە نیاسیت

چاڤ رەشە بەژن بلندە یا ل تاخێ گەلی

پێنج رێز

کورک دبێژیت

من زەریەک دیت بەلەک چاڤە

من لێ کر جوتەک سلاڤە

سلاڤا من ب سستی داڤە

دەلالێ دلێ من وەرە دەستێ خو ل سەر دانە

دا ژنویکا ببیت دەرمانە

کورک دبێژیت

گولێ جانێ تە چاڤ رەشێ، برو دسەردا

کەزی وبسکێت گولا دەلال

شوربوینە دسەر قوتکێ قەدیفەیدا

راموسانێت گولا دەلال دخوشن

ل هەمی جهو هەمی عەردا

کورک دبێژیت

دلێ منو نزانی خەما تێکەی

ئەز دێ چمە سەرێ گرەکی

زیارەتەکی بو خو چێکەم

پشتی چاڤێت رەش وبەلەک

دێ گازندێت خو بو کێ کەی

کورک دبێژیت

ئەز ل سەر بانا دهێم ودنالم

ل بەر بانا دهێم ودنالم

یا ژخەلکی ڤە ئەز عەبدالم

بەلێ ئەز رەبەنێ خودێ عاشقێ

چاڤ وبریا ودێمێ ب خالم

بری وئەنی:

       ل هەمی دەما دهوزانادا بری زۆربەی جاران یا گرێدایە ب چاڤانڤە. سالوخەتێت وان ئەڤەنە: زراڤە وەک کڤانی، رەش تارینە دسەردا ب خال ونیشانن دەما دکەڤن سەر ئەنیێ یا ل کوژیێ چاڤی.

کچک دبێژیت

ل رێکا رەزا ئەم دئێک تەشقلین

ل چاڤ وبریێت ئێک فوکرین

خودێ کارێ فەسادا راست نە ئێنیت

نەهێلان ئەز ولاوکێ خو ل ئێک بحەسلین

کورک دبێژیت

ئەز ل سەر بانا دهێم ودنالم

ل بەر بانا دهێم ودنالم

یا ژخەلکی ڤە ئەز عەبدالم

بەلێ ئەز رەبەنێ خودێ عاشقێ

چاڤ وبریا ودێمێ ب خالم

کچک دبێژیت

گارە ب سونبلە

بورهێت حەیران بینە ڤ گونتلە

من لاوکێ خو دڤێت ئیجاخ یا سلە

کورک دبێژیت

وەرە وەرە ئەی چاڤ شینێ

چاڤ وبری ل من هولینێ

جەرگ ومێلاک ل من حەلینێ

کچک دبێژیت

لاوێ منولاوێ زراڤ

تە چاڤ رەشو بری ل هنداڤ

تە ل من سوتن جەرگ وهناڤ

ئەنی

کورک دبێژیت

 به‌ژنا ته‌ زراڤه‌ لێ گرێدا قاویشا زێرا

 ئه‌نیا ته‌ ژی هه‌یڤا چارده‌یه‌ چاڤ ژستێرا

 ئه‌ڤرو ده‌رکه‌تیه‌ ژسه‌رێ چیا وژکێرا

كه‌زى وبسک وبن بسک وپرچ وگولی 

        ئەڤان پارچێت بەر چاڤ ب سەری ڤە هەمی گشت پێگڤە یان جودا جودا یێت بوینە پێخارنا هوزانڤانێ حەیرانوکێ دهەمی دەماندا. جهێ وان یێ هاتی ل دیف بەژن وچاڤان ودگەهتە پلەکا بلند وبەرز. بڤان سالوخەتان یا هاتی وەک: پرچا درێژ ورەش وگولیێت ب سەر رەنگێ رەشی ڤە وكه‌زى زه‌ر وبسک خەلەک وشۆر وتیلی خولکێ رویباری وبن بسکێت بادای وخەناکری وچغێن ل سەر ئەنیێ. دڤان مالکێت ژۆریدا کورکێ ئەڤیندار پتنێ یێ بەشداربوی دڤەهاندنا واندا ب شێوەکێ تایبەت. سالوخەتێت وان یێت دیار وبەر چاڤکرن ب وێنەک وشێوازەکێ تازە.

سێ رێز

کور دبێژیت

ئەز چوم ناڤ رەزی

من کچەک دیت یا ب بسک وکەزی

من دای دیت دلێ من ژکچێ تەزی

کورک دبێژیت

کچکێ دینێ کچا مەتێ

بسکێت تە دشۆرن ل سەر مەمکێت تەتێ

تەرکا تە ناکەم هەتا رۆژا قیامەتێ

کورک دبێژیت

بسکا بادە بادینە

چاڤا گلدە ب گلدینە

کچک سوتن کورکا هاژێ نینە

کورک دبێژیت

دهێت ژبالاڤێ دکەتە کەنی

خوهێ گرتن بسک وئەنی

یار خولامە، مێرک بەنی

کورك دبیژیت 

کچکێ دینێ رەشێ

ریحانێ ته کەزی رەشێ بسک بادایێ

ته ئەز دین کرم بەردام دونیایێ

کورك دبیژیت 

کەزیێت بەسنایی چل وچارن

ل گه را دیلانی من هه ژارم

لێ ئەز چ بکه م خەما خارم

کورک دبێژیت

ئەز دێ بێژم ئەز دێ بێژم

دێ بتلەکێ گولاڤێ ل سەر کەزی وبسکێت تە دارێژم

ل نک دلێ من ئیجاخا مالا بابێ تە هەمی جوینە، ریهه درێژن

کچک دبێژیت

ئەزا ل زینیێ تو ل زینیی

ج کەسێ ب دەتە من مزگینیێ

ئەز دێ دەمێ بسک وچغێن سەر ئەنیێ

چار رێز

کورک دبێژیت

سنجانێ ئەردێ هشکە

کەزیا سنجانێ تژى رشکە

یا ژخەلکی ڤە کەڤشکە

هەمجا سنجان سەر پشکە 

کورک دبێژیت

بسکێت تە دشۆرن خولکێ رویباری

وەردەکا پۆرا وەردەکا چیایێ

هەکە روح ب هێتە گوهورینی

من یا خو شوینا یا تە دانایێ

کورک دبێژیت

کچکی دینێ بسک تێلێ

تە نان سوت ل سەر سێلێ

بەس وان روندکا بینە خار

ب هێجەتا وی ئاگری ڤێ دێکێلێ

کورک دبێژیت

کچێ دینێ چاڤکێت تە نادرن

بسکێت تە دشورن مەما دا دبرن

خودێ کارێ کورکێت ڤی زەمانی راست نەهینیت

خو ل سەر چ قەول وقەرارا ناگرن

پێنج رێز

کورک دبێژیت

کچکێ تو یا دینی

تو ل سەر سویک وبانا

بسکێت خو ل من من دهژینی

من بوخو ئێکا دیتی

یێت وەکی تە نا دەم بمزگینی

کورک دبێژیت

کچێ دینێ رەش ریحانێ

بەژن شتلێ چاڤ جوانێ

بسک زەرێ بری قەیتانێ

دێ تو بدە من راموسانێ

ل بەر دەرێ وێ دکانێ

کورک دبێژیت

تە چاڤ رەشێ ل بەر گلدانێ

بسک سۆرێ ل بەر بادانێ

دوهی پشتی بانگێ ئێڤاری

چاڤێ منێ ب مەمکێ تەکەت

یێ داکەتی ل بەر دەست ڤەدانێ

کورک دبێژیت

گولێ جانێ تە چاڤ رەشێ، برو دسەردا

کەزی وبسکێت گولا دەلال

شوربوینە دسەر قوتکێ قەدیفەیدا

راموسانێت گولا دەلال دخوشن

ل هەمی جهو هەمی عەردا

ل ڤان بەدێت ژێریدا کور وکچ هەردو دبەشدار دبن دڤێ گڤت وگویێ دا:

کورک دبێژیت

بەژنا بلند، ل بن چیایێ

کەزی وبسکێت تە بادایێ

ئەز دێ هینگێ تەرکا تەکەم

حەتا من دبەنە ناڤ موغارا شێخ میسایێ

کچک دبێژیت

ئەز ل گه لیا تو ل گه ليكا

ئەز دی بيژم سترانا تو ڤەدە تەویکا

ئەز دێ دمه ته جوتی بەربسکا

تو بده من ئێكێ تەمەریکا

کورک دبێژیت

ئەز دێ بێژم ئەز دێ بێژم

دێ بتلەکێ پڕ ژگولاڤێ

ل سەر کەزی وبسکێت تە دا رێژم

ل نک دلێ من ئیجاخا مالا بابێ تە

هەمی جوهی نە ریهێت درێژن

کچک دبێژیت

گوندێ مە ب نهێلە

خەلک درەڤن تو من نەهێلە

ئەز دێ دەمە تە قەفتەکا هویردە بسکان

تو بدە من ئێکا هویردە سمبێلە

سمبێل:

       دناڤ ڤان بەندان دا کچک ب تایبەت بەشداربیت ب گوتنا ڤان حەیرانوکان ب یارێ خو دبێژیت. ڤان سالوخەتا ب سمبێلێت وی بو وی پێش چاڤدکەت: سمبێل سوسن ورەش وزەرە.

کچک دبێژیت

حەیران کورێ بیژنێ

تە سمبێل سوسنو ل بەر دفنێ

کچک دبێژیت

حەیران کورێ بێ ژنێ

تە سمبێل سویسن یێ ل بەر دفنێ

ما دێ ل ژڤانا تە بم هەتا مرنێ

کچک دبێژیت

ئەزا ل زینیێ تو ل زینیی

ج کەسێ ب دەتە من مزگینیێ

ئەز دێ دەمێ بسک وچغێن سەر ئەنیێ

کچک دبێژیت

حه‌یران کورێ حه‌سێ 

ته‌ سمبێل سویسن دکه‌ڤنه‌ به‌ر ده‌ڤێ مقه‌سێ 

راموسانێت من ولاوکی دخوه‌شن 

به‌ر سیلێ به‌ر به‌روکا ره‌سێ 

کچک دبێژیت

کانیا گوندێ مە یێ ب سرکە

ئاڤا ڤێدا دهێتو، چپک چپکە

هەچیێ حەیرانێ مالێ نە نیاسیت

سمبێل زەرە وهێشتا کوڕکە

کچک دبێژیت

کانیا گوندێ مە یێ ب سرکە

ئاڤا ڤێدا دهێتو، چپک چپکە

هەچیێ حەیرانێ مالێ نە نیاسیت

سمبێل زەرە وهێشتا کوڕکە

کچک دبێژیت

وەرە دەرێ ژناڤ خولاما

سمبێل رەش وپەرێت ناما

دێ گوری تە کەم روحکا شرین

جوتێ برا، حەفت پسماما

گەردەن:

       دڤان مالکێت ژێری کچ وکور ڤان سالوخدانا سەر ڤێ پارچا لەشی دبێژن: گەردەن زراڤ وسپی ودرێژ وەک قرکا قازێ، خرت وخال نیشانێت وێ گەردەنێنە، دەما خرخالا موری ومەرجانا دکەڤتە سەر وێ گەردەنێ ب وێنەکێ چان وتازە.

کچک دبێژیت

بيسته كى ل مالا مه رينه

 ده ستا دگەردەنێ وەرينه

 ده رد وژانا بكه وينه

خه ميت دلى بره ڤينه

کچک دبێژیت

بیستەکێ ل مالا مه روینه

ده ستا دگه رده نى ورينه

کوچک خالیه وچێ تی نینه

وه ختی دهێی تشتەکێ دگەل خو بینە

 كورک دبێژیت

ب شه‌ڤێ دنڤم خه‌ونا دبینم

ده‌ستا ل دور گه‌رده‌نا یاركا خو دوه‌رینم

پوسیدە سپێدێ رادبم شه‌رمزار ودره‌وینم

کچک دبێژیت

روژ هەلات ل تەرەفێ ڤێ یەمەنێ

شەوقێ دایە خرت وخالێت ونیشانێت ڤێ گەردەنێ

کورکێ خەلکی ئەز حالاندم دێ من ب دەنێ

 كورک دبێژیت

کچکێ دینێ ئەزێ ب لەزم

گەردنا زراڤ ب هەلینە دا بگەزم

هەکە تو مریدى شێخێ تە ئەزم 

کچک دبێژیت

رەزکێ بەتەنێ رەزکێ بابێ ل بەتەنی

خرخالا موری ومەرجانا کەڤتە گەردەنێ

من کورە لاوێ خو خوش دڤێت دێ من بدەنێ

سێنگ ومەمک وپاخل:

      ئەم دشێین بێژن کو ئەڤ هەر سێ پارچێت لەشی ب سەر ئێکڤە دگرێداینە دهوزان وهەلبەستادا، نەخاسمە دبابەتێ مەدا حەیرانوکان. سالوخەت ئەڤەنە: سێنگێ سپی  جەنه‌ته‌ وەک هێلینا تەیران، مەمک وەک سێڤە سۆرا دخرن قەدارێ چەنگی نە، یان وەک خیارێت ناڤ بەلگانە یان مینا هێکێت کەوان دبچێکن، دکەڤنە دناڤ پاخلێ وەک شەماموکان سور وسپینە، تژی وان پاخلا ریحان وگولن ژهەمی رەنگان.

سێنگ:

کچک دبێژیت

دێ وه‌ره‌ لاوو، دێ تو وه‌ره‌

سێنگێ من سپی یه‌ وه‌ک مه‌رمه‌ره‌

ده‌ستێ لاوکی دانم ل سه‌ر که‌مه‌ره‌

كورك دبێژیت

كچێ دينێ ناڤێ ته‌ ب قيمه‌ته‌

سێنگێ ته‌ عه‌بدالا خودێ جەنه‌ته‌

ماچاته‌ چه‌ندا خوشه‌ چ له‌زه‌ته‌

کچک دبێژیت

سێنگێ من کچکێ هێلینا تەیران

ب خودێ مێهڤانێ ڤێ هێلینێ تو یێ حەیران

دێ تو وەرە لێ بکە سەما وسەیران

کچک دبێژیت

ناڤ نهێلێ یا ب گوهیشکە

دسەرسێنگێ را بێم یا ب قامیشکە

چەند جارا من دگوتە بابو برکێت خو

من ب دەنە لاوکێ من یێ بێ خویشکە

مەمک:

کورک دبێژیت

ژبەر بادانێ دوهی پاش بانگی

ئێڤاری چاڤێ من یێ ب مەمکێت تە کەتین

ژبەر دەستا وتێگڤەدانێ

کورک دبێژیت

کچکێ دینێ هەتا کەنگێ

مەمک خرن قەدارێ چەنگی

مال خرابێ دێ ب ژڤانا تە بم هەتا کەنگی

کورک دبێژیت

ئێڤارە ئەزێ ب لەزم

دێ وەرە دا رویکێ تە ماچی بکەم مەمکێ تە بگەزم

هەکە تو مریدا شێخی بی، شێخێ تە ئەزم

کورک دبێژیت

گنیێ زوزانە

مەمکێت یارکا من خیارێت ناڤ بەلگانە

من بو خو لێکرن، بو من نەمانە

کورک دبێژیت

مەمک خرێ هێکێت کەوا

تە کورکێ خەلکی حەلاند

ب چیر وچەپا ب ڤان درەوا

کورک دبێژیت

چوم سەر کانیێ لدانگا مالا

من یا کولای ب گوپالا

مەمکێت تە عەبدالا خودێ

بینە سێڤە سۆرێت ل دەست بەقالا

کورک دبێژیت

عەڤرا ل من تیرکر

ئەز چومە ناڤ دەرێ یارکا من هەڤیر دکر

هەکو چاڤێ من ل مەمکا کەتی

من سلاڤا خودێ ژبیرکر

کورک دبێژیت

تە چاڤ رەشێ ل بەر گلدانێ

بسک سۆرێ ل بەر بادانێ

دوهی پشتی بانگێ ئێڤاری

چاڤێ منێ ب مەمکێ تەکەت

یێ داکەتی ل بەر دەست ڤەدانێ

کچک دبێژیت

مە کالو دیت ل رێکا رەزی

سەرێ کالو یی سپیە وەکی نەنکێ دەزی

نێ تە خو ددان نە ماینە مەمکا بکەزی

پاخل:     

کورک دبێژیت

چو بالاڤێ شل وملبو

تژی پاخلێ ریحان وگولبو

هندی دگەل دئاخڤم یا ژمن سلبو

کچک دبێژیت

تژی گوندێ مە زەرینە

پاخلێت وان پری شەماموکێت سور وسپینە

کەسێ ڤی دەوری یارکا خو نەبیت چاڤ ل کچیت خەلکینه

کورک دبێژیت

كچكى دينى با دل هه‌وا

ته‌ ل پاخلێ هێکێت كه‌وا

مانه‌ به‌سه‌ ته‌ مالا من 

خراب كر ب ڤان دره‌وا

کورک دبێژیت

به ژنا بلند شل وملن

تژی پاخلێ روحان وگولن

باب ودای ژكورکی دسلن

دل:

     دل پارچەکا نهینە دناڤ گیانێ مروڤیدا بو پالدانا خوینێ یە، بەلێ ل نک دلداران جهێ خەم وکەسەر وفیغانا یە. جهێ ئێش وئازارا یە. چاڤ ب یارێ دکەڤن بەلێ ڤین خو ل دلی دەت وئاکنجی دبیت ل وێرێ وشوین وشوپێت خو لێ دکەت.

کورک دبێژیت

کچێ دینێ رەش ئەسمەر

تو چوکێ خو دانە دا سەرێ خو دانمە سەر

تو ژدلێ خو بینە دەر کوڤانا

ئەز ژدلێ خو بینمە دەر کەسەر

کورک دبێژیت

خوزی هەر رۆژ یا غەیری با

کولانا مالا مە هەر یا تاری با

دلێ من ب خەنجەرێ هنجنی با

نە کو یارکا من ل مالێت خەلکی با

دێم وروی ودەڤ ولێڤ 

     ئەڤ پارچە خر پێگڤە دهێنە بەر نیاس کرن ب ڤا سالوخەتان: رویێ کەش ورون وسپی ب سەر ئەسمەریڤە وەک خورمێنە، بری تاری وزراڤ وەک قەیتانێ دێم سۆر وگەشێ ب خال، دەڤ ولێڤ شرین، هەمی پێگڤە ب سەرئێک ڤەنە دجان وتازەنە.   

دێم:

کورک دبێژیت

ئەز ل سەر بانا دهێم ودنالم

ل بەر بانا دهێم ودنالم

یا ژخەلکی ڤە ئەز عەبدالم

بەلێ ئەز رەبەنێ خودێ عاشقێ

چاڤ وبریا ودێمێ ب خالم

 کورک دبێژیت

ئەز ل سەر بانا تێم ودبورم

یا ژخەلکی ڤە ئەزێ کورم

خەلک نزانن ئە عاشقێ

بەژنا بلند ودیمێ سورم

روی:

کچک دبێژیت

کورکو دینو ئەزا شوخم

رویکێت من خۆرمەنە مەمک خوخم

دێ بهن کەڤن تە ل بەر بسکا خوینم

لێڤ:

کورک دبێژیت

ئەز قەری، قەرێ دینم

ب شەڤێ دنڤم ب روژێ دخوینم

ئەز عاشقا لێڤێت شرینم

ددان:

کورک دبێژیت

من تو ديتی ل سه‌ر بێده‌رێ 

ددان مه‌زنێ دفن كه‌رێ 

هه‌كو توحه‌فت مالو مێرا بكه‌ی

دێ هه‌ر بێژی خوزيكێت مێرێ به‌رێ

دەست:

کورک دبێژیت

کچێ دینێ من تو دیتی سەر کەڤری

تە دەست سپینە خەنا کری

وەختێ چاڤێ من ب تەکەتی علمێ خودێ من ژبیرکری

ناڤتەنگ:

کچک دبێژیت

ئامێدیێ ب کەلاتە

بەردا رویبارە وپشت دا وەلاتە

عەزیزێ دلێ من دێ تو دەستێ خو

دناڤ تەنگا زراڤ وەرینە

ستێرا سپی ل مە هەلاتە

   پاش گوتن: چنکی بابەتێ سالوخەتان گەلەک بەر فرەهو وناڤ ئێک چویە، یا ب ئیزایە ئێک بشێت هەمیا ژێک جوداکەت ژبەر ڤێ چەندێ ئەگەر چەند پارچە مابن یێت دهاتن دناڤ هندەک حەیرانوکێت دیدا. ئو هندەک من دانە پاش ژبابەتی ژبەر هندەک ئەگەران نە جهێ گوتنێ یە ل ڤێرێ.

١٥-١-٢٠١٨ دهوک – ئەحمەد عەلی

 چچک ومەمک دحەیرانوکێدا:

مەمک: چچک: الثدي: النهد, الصدر: breast, bosom

    کاملانا ژنێ ب گشتی چ کچ، یار، دەستگر، خوشتڤی، ئەڤیندار، دلبەر یان ژنا ب مێر دکەڤنە دبن خانا ژنکێ دکەڤندا وحەتا نوکە ناهێتە گوهورین، ژن دمینیت ژن: یا جانە، تازەیە، خوشکوکە یا دل ڤەکێشە یا پڕهەست وهەلویستە، زۆرا ب هێز زاخە بو ڤەکێشانا زەلامان ب نک خوڤە ودشێت ب فەند وفێلێت خو هەر کەسەکێ بیت بێختە دناڤ تەڤن وداڤێت خودا نەخاسمە ئەگەر ئەوێ ژنکێ چەند سالوخەت یان سالوقدانێت جێواز هەبن ژیێت دی کو وەل وی کەسی بکەت هەلبەست وهوزان وحەیرانوکان پێ بێژیت. نیشان وستایشێت ژنان گەلەکن وەک: بەژن وبال ، پرچ وکەزی وبسک وبن بسک، گەردەن، چاڤ، لێڤ، دەڤ، بری، ئەنی، دێم، روی ، ناڤتەنگ، دەست وپێ. دسەر ڤان هەمیانرا دهێن ب گرنگی ئەڤە: مەمەک، چچک یان سێنگ.  

      ئەم دشێین بێژن کو ئەڤ هەر سێ پارچێت لەشی ب سەر ئێکڤە دگرێداینە دهوزان وهەلبەستادا، نەخاسمە دبابەتێ مەدا حەیرانوکان. سالوخەت ئەڤەنە: سێنگێ سپی  جەنه‌ته‌ وەک هێلینا تەیران یان وەکی بەرێ مەرمەرە، مەمک وەک سێڤە سۆرا دخرن قەدارێ چەنگی نە، یان وەک خیارێت ناڤ بەلگانە یان مینا هێکێت کەوان دبچێکن، دکەڤنە دناڤ پاخلێ وەک شەماموکان یان هناروکان دسور وسپینە، تژی وان پاخلا ریحان وگولن ژهەمی رەنگان.

پەیڤێت یەکسان دگەل مەمکی:

مەم: مەمە، مەمک، مەمگ، مەمەکە، مەمێو مەمی

چچک: چچ، چچە، چیچک، چیچە، چچی، چیچی

سێنگ: سینگبەر، بەرسینگ

پاخڵ: پاشڵ: هنگل: بن پاخل: بن هنگل

گوهان: پستان: بو ژنێ ژی دهیت وهندەک گیانەورێت مێ

پەیڤێت نێزیک ئەوێت دهێن وەک داخازا رامانی( metaphor ) ل رەخ ودۆرێت وان پەیڤێت ژۆری:

(هناروک، سێڤەلوک، شەماموک، خیاروک، هێکێت کەوان)

پەیڤێت گرێدای ب وان پەیڤان ڤە:

بشکوژک: سەرمەمک

مەمک: خڕ، گر وڤر، زل

مەمک: بچیک، کچکوک، مازن، گەورە

مەمک: مێژ، مێژتن، مژین

مەمک: گەزین، لەقدان، ئالیستن

مەمک: گرتن، گڤاشتن، پەرخاندن، تێکڤەدان، دەستڤەدان

مەمکدار: شیردەر، شیردان، بەچکشیر، گوهاندار

سێنگ دناڤ مالکێت حەیرانوکێ:

کچک دبێژیت

دێ وه‌ره‌ لاوو، دێ تو وه‌ره‌

سێنگێ من سپی یه‌ وه‌ک مه‌رمه‌ره‌

ده‌ستێ لاوکی دانم ل سه‌ر که‌مه‌ره‌

كورك دبێژیت

كچێ دينێ ناڤێ ته‌ ب قيمه‌ته‌

 سێنگێ ته‌ عه‌بدالا خودێ جەنه‌ته‌

 ماچاته‌ چه‌ندا خوشه‌ چ له‌زه‌ته‌

کچک دبێژیت

سێنگێ من کچکێ هێلینا تەیران

ب خودێ مێهڤانێ ڤێ هێلینێ تو یێ حەیران

دێ تو وەرە لێ بکە سەما وسەیران

کچک دبێژیت

ناڤ نهێلێ یا ب گوهیشکە

دسەرسێنگێ رابێم یا ب قامیشکە

چەند جارا من دگوتە بابو برکێت خو

من ب دەنە لاوکێ من یێ بێ خویشکە

مەمک دناڤ مالکێت حەیرانوکێ:

کورک دبێژیت

ژبەر بادانێ دوهی پاش بانگی

ئێڤاری چاڤێ من یێ ب مەمکێت تە کەتین

ژبەر دەستا وتێگڤەدانێ

کورک دبێژیت

کچکێ دینێ هەتا کەنگێ

مەمک خرن قەدارێ چەنگی

مال خرابێ دێ بژڤانا تە بم هەتا کەنگی

کورک دبێژیت

ئێڤارە ئەزێ ب لەزم

دێ وەرە دا رویکێ تە ماچی بکەم مەمکێ تە بگەزم

هەکە تو مریدا شێخی بی، شێخێ تە ئەزم

کورک دبێژیت

گنیێ زوزانە

مەمکێت یارکا من خیارێت ناڤ بەلگانە

من بوخو لێکرن، بو من نەمانە

کورک دبێژیت

مەمک خرێ هێکێت کەوا

تە کورکێ خەلکی حەلاند

ب چیر وچەپا ب ڤان درەوا

کورک دبێژیت

چوم سەر کانیێ لدانگا مالا

من یا کولای ب گوپالا

مەمکێت تە عەبدالا خودێ

بینە سێڤە سۆرێت ل دەست بەقالا

کورک دبێژیت

عەورا ل من تیرکر

ئەز چومە ناڤ دەرێ یارکا من هەڤیر دکر

هەکو چاڤێ من ل مەمکا کەتی

من سلاڤا خودێ ژبیرکر

کورک دبێژیت

تە چاڤ رەشێ ل بەر گلدانێ

بسک سۆرێ ل بەر بادانێ

دوهی پشتی بانگێ ئێڤاری

چاڤێ منێ ب مەمکێ تەکەت

یێ داکەتی ل بەر دەست ڤەدانێ

کچک دبێژیت

مە کالو دیت ل رێکا رەزی

سەرێ کالو یی سپیە وەکی بەنکێ دەزی

نێ تە خو ددان نە ماینە مەمکا بکەزی

پاخل دناڤ مالکێت حەیرانوکێ:

کورک دبێژیت

چو بالاڤێ شل ومل بو

تژی پاخلێ ریحان وگول بو

هندی دگەل دئاخڤم یا ژمن سل بو

کچک دبێژیت

تژی گوندێ مە زەرینە

پاخلێت وان پری شەماموکێت سور وسپینە

کەسێ ڤی دەوری یارکا خو نەبیت چاڤ ل کچیت خەلکینه

کورک دبێژیت

كچكى دينى با دل هه‌وا

ته‌ ل پاخلێ هێکێت كه‌وا

مانه‌ به‌سه‌ ته‌ مالا من

خراب كر ب ڤان دره‌وا

کورک دبێژیت

به ژنا بلند شل وملن

 تژی پاخلێ روحان وگولن

 باب ودای ژكورکی دسلن

 ١٦-٨-٢٠١٨ دهوک – ئەحمەد عەلی حەسەن