Embedded Files
خەریبی ودویرکەڤتن ونەدیتن دحەیرانوکێدا
حەژێکرنا پاقژ وبژینا ژدل دگەهتە ئاستەکێ بلند ل دەف هەر دو دلداران ب وی شێوێ جان وتازە کو وەل وان کری ب هەلبەستا هوزانی بەندێت جان ب هاڤێنە بەر ئێک دو بشێوازەکێ رێگرتی ئو تێدا دیارکەن وان هەستێت نهینی وڤەشارتی یێ پڕ ژڤین وئەڤینا پەنگی بدەم وسالان. ئەڤ رەنگە پێگوتن ژهەر دو لایاڤە جهێ خو یێ تایبەتێ کری دناڤ بەرا واندا کو ئەڤە یا بویە نامەکا ئەڤینێ یا پەیوەندی ودهێتە ڤەگوهازتن ژدەڤی بو دەڤی بو هەر ئەڤیندارەکی دوی کراسیدا وکەڤتیە وی دراڤی ئو ل سەر وی رێکێ دچیت.
دڤان مالکێ ژێریدا ئەوێت من جان وبەندکرن ونژنین دا بیتە نمونەک بو وان حەژێکەران یێت ژیانا خو تەرخانکرین درێبازا ڤینا خودا یا هەڤبەش ئو ماین سوزدار وپەیماندەر بو وێ ڤینا پاراستی دناڤ بەرا واندا دژێ وان ئاستەنگ وپێلانێت دکەڤتینە درێکا واندا. بمالکێت سێ رێزی وچار رێزییا کورت ئەو شیان ڤان نامان ب دارێژن وب ڤەهینن ب کێش وسەروەکا سڤک ورەوان یا لێکدای ژهەمی لایاڤە. هەست وهەلویستێت خو پێش چاڤکرن ب ئاشوبەکا یا پڕ هیز، بو ڤی گەلی دا کو ببن نیشان ونمونە بو وان کەسان یێت دڤێن ل سەر ڤێ شوپێ بچن.
من ئەو مالک ژڤی پاخچێ حەیرانوکان یێ بەر فرەهو ڤەدای ژێگرتن چنکی سەروا وان یا یەکسانە ئو تایبەت مەندیا خو یا هەی ژهەر دو ئالاڤە : چ کچک یان کورک. هەر دو لایان خەریبی ودویرکەڤتنا خو یا ئاشکرا کری ب چەند پەیڤێن رەسەن وپەتی ژسروشتێ وەلاتی وەک: چیایێت بلند، رێکا کانیێ، ملک ودولکان ئو ل سەر بانان ئو ئەڤە یا هاتیە دارژتن ب روندک وفرمێسکان وەک ئاڤا چوک وکانی وریباران. وان خو ئینان مینا بولبول وکەوێت بەندان ئەوێت ئاوازێت خوش ودلڤەکەر دبێژن ل سەر گر وملان ودار وباران. خو ئینان رێزا شێت وهار ودینان دئەڤینێدا ئەوێت ب چول وچیا دکەڤن بێ هش وسەودا شپتی مەندەهوشان. ئەڤ رادا ئەڤێنی خو نەگرتیە ل پلا هشیاربونێ پتنێ بەلێ یا خو کێشایە سەر شەڤێ ڤە بنک خەوناڤە ل دەمێ نڤستنێ، دەما یار دهێتە دەف یارێ وڤێک دکەڤن بەس دەما هشیاردبن دەمێ سپێدێ دمینن پوسیدە ورادبن شه‌رمزار ودره‌وین.
وەکی من ل گەلەک جهان نڤێسی وگوتی کو مالکێت حەیرانوکان ژێک جودانە ژئێک ودو چنکی هەر ئێک یا هاتیە ڤەهاندن ژلایەکی ڤە یان ل دەمەکێ تایبەت یان ل جهەکێ جودا وڤاڤێر ژیێ دی. ژبەر ڤێ چەندێ من ئەڤ مالکێت ژیری کرنە گڤت وگوت ناڤ بەرا ڤان ئەڤینداراندا دا ببیتە پێگوتن ب شێوەکێ روی بروی وبەرانبەر. دا سود ژێ ب هێتە وەرگرتن ب درستی یا لێکدای وڤەبستی ب سەر ئێکڤە.
کچک دبێژیت
چیا دبلندن ئەز قەت تە نا بینم
حەودێت گولا دسۆرن ئەزا شینم
پشتی دەلالێ دلێ خو ئەز نەمینم
کورک دبێژیت
ئەز بلبلم، بلبلەکێ دینم
شەڤ دنڤم، برۆژێ دخینم
ئەز عاشقێ بەژنا شرینم
کچک دبێژیت
لاوکۆ دینو، گه‌ر ته نه بینم
باوه‌رکه ده‌لالێ من، هار ودینم
وه‌کی که‌وه‌کێ به‌ندا ئه‌ز دخینم
کورک دبێژیت
ئەز قەرو مە، قەرێ دینم
بشەڤێ دنڤم ب روژێ دخوینم
ئەز عاشقێ لێڤێت شرینم
کچک دبێژیت
ئەزا دينم، ئەزا دينم
ئەز نزانم ل كيڤه روينم
دەما عەزیزێ من دهێت دا ببینم
کورک دبێژیت
ب شه‌ڤێ دنڤم خه‌ونا دبینم
ده‌ستا ل دور گه‌رده‌نا یاركا خو دوه‌رینم
پوسیدە سپێدێ رادبم شه‌رمزار ودره‌وینم
کچک دبێژیت
چیا دبلند تە نابینم
کاغزەکێ بنڤێسە دا بخوینم
پشتی تە ما ئەز سەبرا خو ب کێ بینم
کورک دبێژیت
چیا دبلندن تە نا بینم
نامەکێ فرێکە دا بخوینم
دونیا مەرگ ومرنە دترسم بمرم تە نە بینم
کچک دبێژیت
چومە رێکا کانیێ هێدی هێدی ڤەدمینم
هاتمە رێکا کانیێ هێدی هێدی ڤەدمینم
ئەز ژبابکێ خو دل مایمە ژخالا خەلکیڤە ئەزا دینم
کورک دبێژیت
ئەز ل مالاخو نارینم
گوتنێت خەلکی لدویف تە نا برینم
ئەز ھنگی دراوستم تە ژبابێ خراب بستینم
کچک دبێژیت
چێا دبلندن تە نابینم
نامەکێ فرێکە ئەز ب خوینم
هەکە تو نەساخی ئەز نەمینم
هەکە تو برینداری، ئەز حەکیمم
کورک دبێژیت
ل سەر بانا تێم ودروینم
روندکا ژچاڤا دوەرینم
خالا خەلکى درەوینم
ئەز ئاشقێ چاڤێت شینم
کچک دبێژیت
دلێ منو، ئەزێ ب کول وبرینم
روندکێت من تێن رویبار وخینم
دلکێت خوش بهارە ناڤدا روینم
دلکێت نە خوش خەم وهاڤینم
کورک دبێژیت
ئەز کەوم کەوەکێ دینم
بەرمڵکا دەرێ، دوڵکا دخوینم
خوزیا من ئەوە تە ب بینم
ئەز ئاشقێ بەژنا شرینم
٢١- ١- ٢٠١٨ دهوک
Page updated
Google Sites
Report abuse