پیتا چێ

حەیرانوک

لێکدان وخرڤەکرن وبەرهەڤکرنا: ئەحمەد عەلی حەسەن

دیوانا دێوانێت دلینی

پیتا چ

ریبار

کچک دبێژیت

چومه ریباری ریبارێ شینه

یێت ڤێداتێن جانی ومەهینە

هەکە من شویکر توژی ژنێ بینه

کورک دبێژیت

چومه رویباری رویبارێ بەلەکە

یێت ڤێدا دهێن پور ووەردکە

هەکە ته شوی کر مایێ خو دمن نەکە

نزار

کچک دبێژیت

چومە نزارى نزارى تارى

کەڤوتا شینکر ل ناڤ دار وبارى

لاوکێ من یێ چویە کەزاخا رەزى

وەیلا ل منێ کورێ ئەز نە چومە هارى

کورک دبێژیت

چومە نزاری نزار یێ دێمە

من زێرەک دیتو مسقالەک کێمە

من نەزانی بۆ یارێ بکەمە بازن یان بکەمە خزێمە

کچک دبێژیت

چومە نزارا، نزارێ تاری

کەڤوکێ شین کر دناڤ دار وباری

هێسترا کورە لاوکێ دەلال

جەحشە خو نا دەتە بەر باری

هەکە من شەرما دەیک وبابا نەکربا

دا چم هاری، گرم دەستە باری

کانی

کچک دبێژیت

چومە کانیێ هەر وەبو

هێدی هێدی رێ نە بو

ئەز ژلاوێ خو دل مای بوم

یا ژمالێ ڤە، چێ نەبو

کورک دبێژیت

چومە سەر کانیێ ل دانگا مالا

من یا کولای ب گوپالا

مەمکێت تە عەبدالا خودێ

بینە سێڤە سۆرێت ل دەست بەقالا

چیا

کچک دبێژیت

چومە چیایێ هاتە چیایێ

جگارە کێشا دابو بایێ

ئەز فەرق ناکەم ڤی خولامی ژڤی ئاغایێ

کورک دبێژیت

چومە سەرێ چیایێ گنیێوو

من بەرێ خو دا گیایێ گویزیێوو

دێ بلا ئەز چوتەکێ مازیا بامە ل پالا یارێوو

زوزان

کچک دبێژیت

چومە زوزانا ل مێرگە زەرا

ئەز دێ گولەکێ کەمو ژگولە زەرا

ئەز دێ بو لاوێ خو هنێرمە سەر بێدەرا

کچک دبێژیت

چومە زوزانا ل مێرگێت سوتی

ئەز دێ دەستکێ هەلالو بەیبینا

کەمو بەرخکا نە کوتی

ئەز دێ بو لاوێ خو هنێرمە

دەشتا ژۆری ل سەر خەتا جوتی

چەم

کچک دبێژیت

چومە چەما چەم پەسارن

چومە گولا بشکوژ خوارن

من نە زانی کورکێت ڤی دەوری

چ بێ قەولن بێ قرارن

کورک دبێژیت

چومە چەما چەم دسارن

باغێت گولا مشک ومارن

قەدا ب کچکێت ڤی زەمانی ب کەڤن

چ دبێ قەولن ودبێ قەرارن

کچک دبێژیت

چومە چەما چەم چ پەسارن

بهێن دکەم گولا گول بژارن

من نەدزانی کورکێت ڤی وەختی

چ دبێ قەولن دبێ قرارن

کورک دبێژیت

چومە چەما چەم دشینن

چومە گولا بشکوژ نینن

من نەزانی کچکێت ڤی دەمی

لسەر چ قەول وقەرارا نینن

کچک دبێژیت

چومە چەما چەم چ دسارن

د نێرمە گولا گولا گول بژارن

کورکێت ڤێ دەوری دبێ قەولن، دبێ قەرارن

کورک دبێژیت

چومە چەما چەم چ دشینن

چومە گولا بشکوژ نینن

من نەزانی کچکێت ڤی دەور وزەمانی

ل سەر چ سوز وقەول وقەرارا نینن

کچک دبێژیت

چومە چەما چەم پەسارن

چومە گولا بشکوژ خارن

من نەزانی کورکێت ڤی زەمانی

چ دبێ قەولن، دبێ قەرارن

کورک دبێژیت

چومە چەما چەم چ دهینن

دنێرمە گولا گول نەخشینن

کچکێت ڤی دەوی دبێ قەولن درەوینن

کچک دبێژیت

چومە چەما چەم دشینن

دەست دەم گولا گول سولینن

من ژنوی زانی لاوکێت ڤی زمانی

چ دبێ بەختن ودرەوینن

بالاڤ

کچک دبێژیت

چومە بالاڤێ ل کانیا گەزێ

من بالاڤ کر ب دەستێ لەزێ

لاوکێ من یێ چویە کاروانی

وەیلا ل منێ کورێ ئەزێ

کورک دبێژیت

چو بالاڤێ شل وملبو

تژی پاخلێ ریحان وگولبو

هندی دگەل دئاخڤم یا ژمن سلبو

کچک دبێژیت

چومه‌ بالاڤێ من بالاڤ نه‌كر

هات مه‌ ڤه‌ ژبالاڤێ من كار نه‌كر

لاوكێ من هه‌ل بوری گۆری ئه‌زێ سلاڤ نه‌كر

کچک دبێژیت

چومە بالاڤێ ل سەر کانیا خیزی

من جل شیشتن هاڤێتن سەر فریزی

لاوکێ دەلال عەسکەرە دهێت ژناڤ ئنگلیزی

کچک دبێژیت

چومە بالاڤێ ل کانیا کەڤزێ

من بالاڤکر بدەستێ لەزێ

لاوکێ من عەسکەرە وەیلا ل منێ کورێ ئەزێ

کچک دبێژیت

چومە بالاڤێ ل كانيا مالا

من بالاڤ كر ل گه‌ل هه‌ڤالا

خوزی ئه‌ز وتو بباينه‌ بيك وزاڤا ل ئه‌ڤان سالا

کچک دبێژیت

چومە بالاڤێ ل کانیا گەزێ

من بالاڤ کر ب دەستێ لەزێ

لاوکێ من یێ چویە کاروانی

وەیلا ل منێ کورێ ئەزێ

کچک دبێژیت

چومە بالاڤێ ل کانیا گەزێ

من بالاڤ کر ب دەستێ لەزێ

پانێ لاوکێ من ل هیڤیا منە

رەق وپیتی، ژارێ ئەزێ

کچک دبێژیت

چومە بالاڤێ ل کانیا گەزێ

من بالاڤ کر ب دەستێ لەزێ

دێ هینگێ تەرکا چاڤێت بەلەک کەم

هەتا کەڤر دحەلیێت وهێستر دزێ

گوند وباژێر

کچک دبێژیت

چومە میسل سەرێ چەمى

دسەردا پرە ودبندا گەمى

ئەز گورى هەر سێ تبلێت گرتین قەلەمی

کورک دبێژیت

چومە مویسلێ ل سەرێت رێکا

من پرسیار کر ژمەزن وبچیکا

کێ دیتیە خەنا نەچیت، ژدەستێت زاڤا وبیکا

کچک دبێژیت

چومە میسل بەر دوکانا

من پسیارکر ژدەرگەهڤانا

ئێکێ خێر خواز نەبو بێژیت

لاوکێ تە یێ ل خەستەخانا

کورک دبێژیت

چومە میسل ودیار بەکر

دەرگەهڤانا دەرگەه ڤەکر

برینێت دەلالێ دلێ من گەلەک دکویرن

چ نوژدار وچ حەکیما دەرمان نەکر

کچک دبێژیت

چومە ئامێدیێ ب لەڤەنە

سەرێ ڤان لەڤەنا ب کولتەنە

هەکە مروڤی پسمام هەبن کورێت خەلکی ژخونە

کورک دبێژیت

چومە ئامێدیێ ياب لەڤەنە

سەرێ ڤان لەڤەنا بێم گولتەنە

ئەگەر مروڤی دوتمام هەبن

ژڤانێ كچکێت خەلکێ يا ژخوەیە

کچک دبێژیت

چومە ئامێدیێ ل سیکا سەری

من سیندەکا خاری ب یونس پێغەمبەری

هەکە لاوکێ من دبیتە زاڤا

ئەز پێش هەمیا ڤە ب چمە سەری

کورک دبێژیت

چومە موشێ موش بەیارە

برنجێ موشێ بویە دارە

خوزیێت وی، دوتمام لێ دبیتە یارە

کچک دبێژیت

چومە ئامێدیێ کورسی کورسی

هەچیێ هاتو من ژێ پرسی

ئەز یا تە مە خودێ نڤێسی

کچک دبێژیت

چومە زاخویێ چەندا هینە

دبەردا دهێت خابیرێ شینە

کورو وەرە من ژبابێ بخوازە

هەکە ئەز نەدام من ب رەڤینە

کچک دبێژیت

چومە زاخوکێ چەندا هینە

دبەردا دهێت خابیرێ شینە

کورکو دینو وەرە من ب خازە

ئەگەر ئەز نەدام، من ب رەڤینە

کچک دبێژیت

چومە زاخویێ چەندا هوینە

دبەردا دهێت بخابیرێ شینە

کورو وەرە من ژبابی ب خوازە

هەکە ئەز نە دام من ب رەڤینە

کچک دبێژیت

چومە باژێری قەسرا سپی کر

ئەز چوم رێکێ رێ ب نیڤی کر

عەزیزێ دڵێ من ب هیڤی بو

خەلکێ فەساد بێ هیڤی کر

مەخلیت

کچک دبێژیت

چومە بەروکێ ئەز وچار بێری

دو تەیرێت دخوینن دگەل تەیرێ کێری

لاوک شڤانێ بیست بزنا ونێری

کورک دبێژیت

چومە گەلى ، گەلى كويرە

من گازی كر گازيەك دويرە

نێ دوستا من ژ مالێت ميرە

کچک دبێژیت

چومە بەر پەزی، بێریمە

ل ناڤ بزن وکارا، ل هیڤیا شیری مە

ب رێڤە دێ لاوکێ خو بینم دێ بێژمێ بێریڤانم

بەلێ ژتە یا بێ هیڤی مە

کورک دبێژیت

چومە رێکا هات وباتێ

من کانیەک دیت ئاڤا سارتێ

من خو گرت بو حەتا یارتێ

یار هاتو خو گەڤزاند

شیشا دلێ من دەرزاند

کچک دبێژیت

چومە گارەی، گارە دێمە

دێ ئاڤێ بەردەمێ وکەمە لێمە

خوزی من زانیبا، ئەز عەڤدالا خودێ رزقێ کێمە

کچک دبێژیت

چومە گارەی، گارە دێمە

ئاڤێ بەردەمێ،کەمە لێمە

خوزی من زانیبا

ئەز عەڤدالا خودێ رزقێ کێمە

کچک دبێژیت

چومە گوندێ تژی بە رە

یێ دکنە غارهه سپ وکە رە

هە کەروژێ سێ جارا لاوێ خو

نە بینم هێتینە کایێ بومن فە رە

کچک دبێژیت

چومە ئاقارى ديار نه بو

جاڤێ من ل به ژنا ته بو

كوهێ من ل ده نكێ ته بو

عه شقا دلا روژ بو روژێ هەر زێدەبو

ما ئەز چ بکەم ژنوکە وپێڤە فایدە نەبو

چیا

کچک دبێژیت

چێا دبلندن تە نابینم

نامەکێ فرێکە ئەز ب خوینم

هەکە تو نەساخی ئەز نەمینم

هەکە تو برینداری، ئەز حەکیمم

کچک دبێژیت

چیا دبلندن، دچیا وەربوم

حەودکێت گول وریحانا سور وزەربون

ئەشق وئەڤینا خەلکی یا خوش بو

یا من ودەلالێ دلێ من کول ودەردبون

کورک دبێژیت

چیا دبلندن دمزێ وەربون

حەودکێت گولا سۆر وزەربون

کچکێ دینێ تنێ دەڤێ خو

ب هاڤێمە سەرێ مەمکێت تە

دو چپکێت خوینێ سەری دەربون

کچک دبێژیت

چیا دبلندن ب تە دفوکرم

روندکێت من تێن خوار خو ناگرن

پشتی چاڤێت رەش وبەلەک

یان دێ دین بم یا دێ مرم

کورک دبێژیت

چیا دبلندن بێ دارنابن

شیڤ ونەهال دبێ دیپشک ومارنابن

کچ ژحەفت سالیێ پێڤە دبێ یارنابن

کچک دبێژیت

چیا دبلند تە نابینم

کاغزەکێ بنڤێسە دا بخوینم

پشتی تە ما ئەز سەبرا خو ب کێ بینم

کورک دبێژیت

چیاکێ گوندێ مە ب دار مازى

قاز وقولنگ لێ دکەن گازى

حەیفا چاڤێت رەش بەلەک

ئەڤرو کەتینە بەرمەزادێ وخەلک دخوازى

کچک دبێژیت

چیا دبلندن تە نا بینم

نامەکێ فرێکە دا بخوینم

دونیا مەرگ ومرنە

دترسم بمرم تە نە بینم

کورک دبێژیت

چیا دبلندن دمژێ وەربون

حەودێت گولا سۆر وزەربون

کچێ دینێ تنێ ئەز دەڤێ خو

پاڤێمە سەرێ مەمکێ تە

دو چپکێت خوینێ ژسەری دەربون

کچک دبێژیت

چیا دبلندن تە نا بینم

ناما فريكە دابخينم

ترسم بمرم تە نە بینم

کچک دبێژیت

چیا دبلندن بێ رێ نابن

گەلی دکویرن بێ ئاڤ نابن

کچ دوازدە سالی ل مال بابێ بێ یار نابن

کچک دبێژیت

چیاکێت ژورى ب کور ونەقەبن

دەشتا خوپان هەمى عەرەبن

خوزی کافر دحالێ منو تەدا نەبن

کچک دبێژیت

چیاکو بلندو ب دار مازی

قاز وقولنگا کرە گازی

کێ دیتیە دەورێ حەفت زەمانا

کچکێت ب دەزگر خەلک ب خوازی

کچک دبێژیت

چیا هەمی چیانە

چیایێ گنیێ سەردارێ هەمیانە

عەزیز خودێ یە، سەربار حەیرانە

کچک دبێژیت

چیا دبلندن تە نابینم

حەودێت گولا دسۆر وشینن

پشتی دەلالێ دلێ خوئەز نەمینم

کچک دبێژیت

چيا دبلندن بێ دار نابن

گەلی دكویرن بێ ئاڤ نابن

كچكێت ژحه فت ساليێ وێڤە

ل مال بابێ بێ يارنابن

چاڤ

کورک دبێژیت

چاڤێت تە درەشن وکل سەبەبە

مالا خۆ بارکە ل گوندێ مە نەبە

هەکە تە شوى دڤێت شوی بکە ول هیڤیا من نەبە

کچک دبێژیت

چاڤێت تە درەشن ما شەلا

سێنگێ تە قودیان وسەلا

ئەز هینگێ تەرکا لاوکێ خو بکەم

ل بالگێ من بخوینن دوازدە فەقی ودوازدە مەلا

کورک دبێژیت

چاڤ کڤکێت تە نادرن

بسکێت تە دشۆرن ژمەمادا دبرن

خودێ کارێ کورکێت ڤی زەمانی راست نەهینیت

خو ل سەر چ قەول قەرارا ناگرن

کچک دبێژیت

چـــاڤێ تەیێ ل مەمو چچا

ئەوان زەریێت وەکی هرچا

ئــــەگەر تـــویێ هـــوبی

نەهــــێ دەف مـــــن چجـــا

کورک دبێژیت

چاڤا کلدە، کل تێنە

بسکا بادە، با تێنە

کچک سوتن، کورکا های ژێنە

چ یان چێ

کانیک

کورک دبێژیت

چ کانیکا ل دانگا لاتێ

مە کولا بو، ئاڤ نەهاتێ

کچکێ دینێ رابە دا دەستێ تە بگرم برەڤینم

بچینە زوزانێت ژۆری ل ناڤ وەلاتێ

کچک دبێژیت

چ کانیکا ل دەڤێ خیزی

مە کولا بو، ئاڤ لەیزی

دێ وەرە چنکلێ من بگرە برەڤینە

ببە ناڤ وەلاتێ ئنگلیزی

کورک دبێژیت

چ کانیکە کەڤزێ کرتی

چ نێرگزە خوناڤێ گرتی

خوزی من زانیبا کا پشتی من

تو بو کێمای وکێ تو گرتی

سپێدە

کورک دبێژیت

چ سپێدەیە وەختێ چایێ

تە چاڤ رەشێ دەرمان دایێ

کچا خەلکی ئەزێ سوتیم حالاندیم ل سەر دونیایێ

کچک دبێژیت

چ سپێدەیە ستێرا سپێدی ل مە گەشکر

هەڤال هوگرێت من ل سەر سینگی، خەوەکا خوش کر

مادەم تە دزانی ناڤێ تە ل ناڤ دەفتەرا حوکمەتێ دایە

تە بو تالع وبەختێ من کچکێ رەش کر

کورک دبێژیت

چ سپێدەیە وەختێ چایێ

بەفرا دباریت وەکى کایێ

یارا من یا بەژن زراڤە

ب خودێ دەق ژێ نایێ

دارەک

کچک دبێژیت

چ دارەکا دحەوشا مەدا

ئەڤێ دارێ بەلگ وەراندن دخەملا خودا

خوزی مرادا من وتە حاسل ببا

دناڤ لحێف ودوشەکێت قەدیفەیدا

کچک دبێژیت

چ دارەکا ل بانیا چەما

باکەکێ دهێت ودهژینیت هەمى دەما

ئەشق وئەڤینا من ولاوێ من

بوسماقا شویشتى وتام تێ نەما

کچک دبێژیت

چ دارەکا سبانیا چەما

خو دهەژینیت هەمی دەما

ئەشق وئەڤینا من لاوکێ دەلال

بویە سماقا شویشتی تام تێ نەما

کچک دبێژیت

چ دارەکا دبانیا چەما

خو دهەژینیت هەمی دەما

ئەشق وئەڤینا من ولاوکێ دەلال

بویە سماقا شویشتی تام تێ نەما

ئێڤار

کورک دبێژیت

چ ئیڤارە ئێڤارەکا خێرا

مەلا چونە مزگەفتا قەشە چونە دێرا

راموسانەکێ بدە من

ژ بابێ تەرا مننەتە ژ دەیکا تەرا خێرا

کورک دبێژیت

چ ئیڤارە ئێڤارا خێرا

مەلا چونە مزگەڤتا، قەشە چونە دێرا

دێ تو وەرە راموسانەکێ بدە من

ژبابێ تەرا مننەتە ژدایکا تەرا خێرا

خەم

کورک دبێژیت

چ خەمەکا دسەر خەمێ دا

سورگول بشکڤین دحەودێ دا

من حەیف وسەد مخابن

کچکێت گوندى پیربون دمالا بابێ دا

کورک دبێژیت

چ خەمەکا دسەر خەمێدا

سورگول بشکڤین دحەودێدا

من حەیف وسەد مخابن

کچکێت گوندى پیربون دمالا بابێدا

داخ

کچک دبێژیت

چ داخە ل سەر داخێ

باکەکێ ل من دهێت ودگەل ئاخێ

سەد ئەهد وقەرار ل من کەتبن

ئەز بو تە بم ژکەرب ورکێت ئیجاخێ

سال

کورک دبێژیت

چ سال سالە سالا ترى

خودێ مالا فەقیریێ خراب کرى

هەتا من کارێ خۆ کر وگوستیل کرى

خەلکێ بەژنا بلند ژبابێ خواست ونەخت ڤەبرى

کچک دبێژیت

چ سال دەم س دەمێ جەهێت دروینا

بەژنا بلند یێ نساخە ل ناڤ نڤێنا

ئەڤینا من ولاوکێ دەلال

بو سماقا پێ کوچکا تام تێ نینا

ریبار

کورک دبێژیت

چ رێبارە رێبارەک گەلەکە

یێ پێدا دهێنو گەمی وکەلەکە

مانە تە شیکر، بەلا خو ژمن ڤەکە

پائیز

کچک دبێژیت

چ خوش پائیزە، خوش پائیزە

مێڤانەک هاتیە مالا بابێ من یێ عەزیزە

دێ بو لێنم برنجێ قەرە داغێ، دونێ هیزە

هەکە قایل بو یان قایل نەبو

دێ بو ئینم کاکلکێت گویزە

هەکە قایل بو یان قایل نەبو

ژنیڤ شەڤ پێدا وەرە لسەر سینگێ من بلەییزە

شەڤ

کچک دبێژیت

چ شەڤ شەڤا لەیلەت و ئەل قەدری

ئەز دێ سەرکی کەمە خێرئێکی دەم نەدر

بەس جابەک بهێت بێژیت ژنا حەیرانی مر

کورک دبێژیت

چ شەڤ شەڤە شەڤا منە

لفکا چارچەڤێ هەلنە وەرە بنە

شەرێ خەسی وخەزیرا خەما منە

کچک دبێژیت

چ شەڤە شەڤە شەڤا منە

تاکێ لحێفێ راکە و وەرە بنە

کورو دینو نە تڕسە

یان گرتنە یان کوشتنە

یان فەرمانا سەرێ منە

کورک دبێژیت

چ شەڤ شەڤە، شەڤە هەیڤە

بازنێ دەستێ یارکا من ئێک زێرە ئێک زیڤە

ئەز تەرکا بەژنا بلند ناکەم

ئەز ب خو دزانم کوشتنا ب دیڤە

هاڤێن

کورک دبێژیت

چ هاڤینە قەولێ تویا

ئێشەکا کەتیە سەری، ئێکا کەفتیە بنێ پیا

عەشق وئەڤینا خەلک وعالەمێ یا کەتیە دلی

یا من یا کەتیە کومکێت ڤان هەستیا

کچک دبێژیت

چ هاڤینە وەختی تیا

ئاخینکەک هاتبو ژبنێ پیا

خوزی من زانیبا

کا تە کی ژمن خوشتر دڤیا

کورک دبێژیت

چ شەڤ شەڤە، شەڤ هەیڤە

بازنی دەستێ یارکا من ئێک زێرە ئێک زیڤە

ئەز تەرکا تە ناکەم، ئەز ب خۆ دزانم کوشتنا ب دیڤە

کچک دبێژیت

چ هاڤينه وەختێ تيا

ئاخینکەک هاتبو ژبنێ پیا

خوزی من زانيبا

كا ته كی ژمن خوشتر دڤيا

کورک دبێژیت

چلکێت يارا من سۆره

گەردەن زەرە، بری مۆرە

خەما نە خو، هەرە ژۆرە

کچک دبێژیت

چ هاڤینە دونیا کەلی

ئەز گەهشتمە لاوکێ خو ل ناڤ گەلی

کورکو دینو ئەزا ب خەمم تو یێ دکەنی

کورک دبێژیت

چ هاڤینە قەلێ تویا

ئێشەکا کەتیە سەر، ئێکا کەتیە بنێ پیا

عەشق وئەڤینا خەلک وعالەمێ یا کەتیە دلی

یا من یا کەتیە کومکێت هەستیا

١-٨-٢٠٢٠ - دهوک - ئەحمەد عەلی

پیتا چێ