پیتا م
حەیرانوک
لێکدان وخرڤەکرن وبەرهەڤکرنا: ئەحمەد عەلی حەسەن
دیوانا دێوانێت دلینی
پیتا ( م )
کچک دبێژیت
مالا کورکی دسەر مەدا
دەیک وبابێت من
کوینەکێ عەرەبا ل بەر من ڤەدا
دەلالێ ڤی دلی گەلەکێ نساخە من سەرا نەدا
کورک دبێژیت
مالا بابێ تە ل سەرێ گری
شکەلکەکێ خوەلیێ من پێ وەرکری
دێ هەرە من گرتی تو یا مری
کچک دبێژیت
مالا لاوکێ من کەیف خوشی یە
مالا بابێ من بەهی یە
ئەڤ دلێ من هەرێ ب خوزی یە
کورک دبێژیت
مالکێت مە یێ ل سەرێ گرى
من لەپەکێ خۆلیێ ب سەرێ تە وەرکرى
مەگرتى ئەڤە حەفت سال تۆیا مرى
کچک دبێژیت
مالا مەوو ل مەحەلا شێلێوو
ئەزێ چم خو هاڤێمە
تور بەختێت ئامر سریێ ڤێ جەیشێ یو
بەلکی سەر خاترا من کچکێ
چار روژا ب دەنە لاوکێ من ئیجازێیوو
کورک دبێژیت
مەمک خرێ هێکێت کەوا
تە کورکێ خەلکی حەلاند
ب چیر وچەپا ب ڤان درەوا
کچک دبێژیت
مالکێت مە ل چاربیا
چ رێ نا چنێ ژبەلگێت تەڤریا
پشتی لاوکێت نهێلیا
حەرامە ل من چوخێت سپیا
کورک دبێژیت
ماچەکێ بدە من ئەسمەر
دا خەما دلێ من بێتە دەر
دا ژبیرا من نەچیت هەروهەر
کچک دبێژیت
مازی چنێت گوندێ مه چونه مازيا
به‌ر بون ده‌ر وپشتێت ڤان گه‌ليا
ئه‌ز وده‌لالێ دلێ خو چوينه شكه‌فته‌كا تاری
كه‌تينه حه‌نه‌ك وياری ولاقرديا
کورک دبێژیت
لو تە من سلاڤ هنارتن
چیا ب سەر ئێخستن، ل گەلیا دابارتن
شوینا دیاری وسلاڤا، تە گەف هنارتن
کچک دبێژیت
مێرگا لاوکێ منی بەیارە
ئالیەک پوش وپەلە یەک دارە
چێ بکەم باڤێ من ئەز نەدام
چاڤ تژی هێسر، دل ب ئاخ وزارە
ل ڤان نامێت ژێری دەستپێکا مالکان ب ڤان پەیڤێت کەسانی دهێن پێش چاڤکرن وەک: (من، منێ، مە، ما تو ...)
کورک دبێژیت
من جانەک دیت ل ئەیوانا ژۆری
شەمالکەک هەلبی ب هنگۆری
ئەز چ بکەم جانا منێ عەمر بۆری
کچک دبێژیت
من کالو دیت ل رێکا رەزی
سەرێ کالوی یێ سپی بوی وەک داڤا دەزی
تە ددان نەماینە مەمکا بگەزی
کورک دبێژیت
من یارەک دیت ل پشتا بانى
ئیشارەت دا من ب فیستانى
دێ لەزکە بدە من راموسانی
تۆ یا بلەزى وئەز کاروانى
کچک دبێژیت
من یا زانى تە ژنەکا خاستى
ل حەوشا بابێ کوڕکی دیلانەکا بەستى
ئەز دێ چمە داوەتا لاوکێ خۆ
دەڤ بکەنى ودل شکەستى
کورک دبێژیت
من رەزەک هەبو ژملا وێڤە
هەمی وەختا تری پێڤە
ئەشق وئەڤینا یارا من گەلەک ژدل بو
خەلک وعالەم سەبەبن، هێلا ب رێڤە
کچک دبێژیت
من بەرێ خۆ دایێ خفشێت غەزالا دا ب دەشتێ دا
دێ بلا خودێ خراب بکەت مالا خەلکێ گوندێ مەدا
چەوا وان دەستێت پسمامێ من ئێخستنە د کەلامچێ دا
کورک دبێژیت
من قه‌ت هاش وێ چه‌ندێ نه‌بوو
کراسێ ته ل به‌ر دلێ من قه‌دیفه‌بوو
ئەز دا سلاڤێ ل تە کەم
چاڤێ دۆژمن ونەیارا ل من وتە بو
کچک دبێژیت
من زانی تە یێ گرتی یارەک
هەکە ژمن چێتر بیت تە پیروز وموبارەک
هەکە ژمن چیتر نە بیت
ئینشەلا ب دەڤەدەن حەفت دویپشک وکورەمارەک
کورک دبێژیت
من تو ديتی ل سه‌ر بێده‌رێ
ددان مه‌زنێ دفن كه‌رێ
هه‌كو توحه‌فت مالو مێرا بكه‌ی
دێ هه‌ر بێژی خوزيكێت مێرێ به‌رێ
کچک دبێژیت
من تو دیتی دناڤ دارا
رابە بچین جهکێ جارا
شەیتانێت گوندێ مە جاسیسن ل بەر دیوارا
کورک دبێژیت
من قەت هاش وێ چەندێ نەبو
كراسێ ته ل به ر دلێ من قه ديفه بو
بەس چاڤێت گەلەک فەسادێت گوندێ مە ل مەبو
کچک دبێژیت
من ژتە بەسکر تەژ من بەسکر
لایەکێ ئاقاری شینکر ئێکی کەسکر
سەر خاترا بەژنا بلند
من خو بێ رێ وبێ کەسکر
کورک دبێژیت
من زەریەک دیت بەلەک چاڤە
من لێ کر جوتەک سلاڤە
سلاڤا من ب سستی داڤە
دەلالێ دلێ من وەرە دەستێ خو ل سەر دانە
دا ژنویکا ببیت دەرمانە
کچک دبێژیت
من یاری کر تە یاری کر
قولپا سینگا مەمکا سپی کر
من راموسانەک بو کورە لاوکێ خۆ ئەختیار کر
خەلک وعالەمێ ل دەوروبەرا گوهداری کر
کورک دبێژیت
من حالێ زوزانا نینە
نە من هەسپە ونە ماهینە
نە من سەێە ئو نە تاژینە
کچک دبێژیت
من حەز دکر تە حەز دکر
دار وباری ل من وتە کەس دکر
ئەگەر تە دزانی ب دلێ دایبابێت تە نینە
بو چی تە بەختێ من رەشکر
کورک دبێژیت
من گوت دێ چمە دەولەتا
دەربازکەم سنور وخەتا
بەحسێ کوردستان وڤان نیعمەتا
جهێ خوشیێ وبەرەکەتا
ئەز ناهێلم حەتا حەتا
کچک دبێژیت
من نه هێلە من نه هێلە
تڤەنگێ داگرە من ب کە کێلە
پشتی بەژنا تە یا بلند
ل من حەرام بن مال ومێرە
کورک دبێژیت
من نە ژئەوێ چەندێ بوو
کراسێ تە لبەر من ئەتلەسێ شامێ بوو
به‌س چاڤێت گه‌له‌ک فه‌ساد ونه‌یارا ل من و ته بوو
کچک دبێژیت
من نە دەنە کاروانیا دپیسن
رایێخستنا وان سەرجلن
بالگێت وان قەد وەریسن
دەما نیڤا شەڤێ دچنە دەرڤە
ب دەلنگ ودەهمەنێت خوڤە دمیزن
کورک دبێژیت
من یار دیتو ل سەر بالاڤێ
جلک دشویشتن دانە تاڤێ
من گوت ئەزێ بچمە سلاڤێ
بەلێ روحکا من چو بو وێ گاڤێ
کچک دبێژیت
من یا زانی تە یا خاستی
ل حەوشا بابێ تە کورکا دیلانەکا بەستی
ئەز دێ چمە دەواتا لاوکێ خو
دەڤ ب کەنی ودل شکەستی
کورک دبێژیت
من تو دیتی دناڤ دارا
رابە بچین جهکێ جارا
شەیتانێت گوندێ مە جاسیسن ل بەر دیوارا
کچک دبێژیت
منێ دل ب خەمێ
رستکا مەرجانا، نا کەڤیت گەردەنێ
یان دێ من کوژن، یان دێ من دەنێ
کورک دبێژیت
من کێلەکا خو داڤێ کێلەکێ
هەچیێ ژنەکا جوان هەبیت
یێ سیارە ل کەحێلەکێ
هەچیێ ژنەکا کرێت هوبیت
یێ سیارە ل ماکەرەکێ
کچک دبێژیت
مە هیڤی کرن، هیڤی براندن
مە دەرمان رێتن وکلچیڤ شکاندن
مە نوی گرتن، یێت کەڤن حەلاندن
کورک دبێژیت
ما تو یا کورەی من نا بینی
شەڤەکێ ژ عەدەتێت دنێ، من نا حەوینی
خوزی من زانیبا تو یا ژدلی
یان تە دڤێت هەستیکێت من ب حەلینی
کچک دبێژیت
مە کالو دیت ل رێکا رەزی
سەر یێ سپی بوی وەکی داڤا دەزی
وی ددان نەماینە مەمکا ب گەزی
کورک دبێژیت
من تو دیتی ل سەر کانیێ
تیتا رەشە لسەر ئەنیێ
تە مالا من خراب کر
ب گرێدانا رەش پوشیێ
کچک دبێژیت
من نەزانی من نەزانی
من شال گرێدا ب زاخویانی
پشتی تە من حەرام بیت
ماڵ و مێرێت ڤی زەمانی
کورک دبێژیت
من ژبەر تە نەبیت
تژی گوندێ مە زەرینە
تژی پاخلێت ڤان زەریا
شەماموکێت سور وسپینە
ژنا ب دلێ مێری نەبیت
هەتا مرنێ دل حەلینە
کچک دبێژیت
من نەزانی، من نەزانی
دەرسوک گرێدا ب زاخویانی
پشتی تە ل من حەرام بیت
ماڵ و مێرێت ڤی زەمانی
کورک دبێژیت
من دیتو من ناس نەکر
من رەڤاند ومن خلاس نەکر
من برە کەچکا حاجی بەدریا
ل رەمەزانا ل من مار نەکر
کچک دبێژیت
من نەزانی تە نەزانی
سەر مەرا هاتی پەشیمانی
ئەزێ گوری تە بکەم
روحکا شرین، عەمر وجانی
کورک دبێژیت
من یارەکا هەی چەندا عەجیبە
گەردەن شیشەیە تێدا دیار دکەن مەغریبە
شەڤێ نیڤ باری شەڤێ
چومو تەوافا خال وگەردەنا
جوتێ مەمکا ژمن بویە توخیبە
کچک دبێژیت
مە هيڤی كرن هيڤی براندن
مە كلدانكێت خۆ رێتن، كلچيفك شكاندن
ياركێت نوی گرتن، يێت كەڤن شەپلاندن
کورک دبێژیت
من نەزانی
هەکە ئەز چومە کاروانی
دێ بو تە کرم کلی دگەل دەرمانی
کچک دبێژیت
من لاوک دیت ل سەر کانیا ئاڤێ
من بژی لێ هەژاند ل وێ دەم وگاڤێ
هەر دو پێ لێ سەقەتبون کەتە داڤێ
من سلاڤکرێ قەت نەشیا بدەت سلاڤێ
پیتا م.pdf