حەیرانوکیت سێرێز

حەیرانوک: دێوانێت ئەڤینێ

نڤێسین وکۆمکرن وبەرهەڤکرنا: ئەحمەد عەلی حەسەن

دهوک / ٢٠٢١

حەیرانوک: دێوانێت ئەڤینێ

حەیرانوکیت سێرێز

ئەم دشێین بێژن وچ گومان تێدا نینە کو حەیرانوکیت سێ رێز یێت سەروەدار ب ئێک ڤەکێشڤە ئەوا یەکسان دیاردبیت مشەترین جۆرە دناڤ بوارێ حەیرانوکێدا. هەر وەسا ب هێزترە ژئەڤێت دی نەخاسمە یێت ژپێنجا وێڤە. لڤینێ وهژینێ دئێختە هش وهەستێ مروڤی ل دەمێ گوتنێ. وب زویترین دەم دهێتە ژبەرکرن وگوتن ودمینیت دهزرێدا ونا هێتە ژبیرکرن. ژبەر کورتیا وێ وجوان لێکئینانا وێ وسڤکیا وێ وئاواز وسەلیقا وێ زۆربەی ڤەهینەرێت ڤی بابەتی یێت خۆ ڤەکێشاینە ل سەر ڤی رەنگی. بو وان ببو نێزیکترین رێک کو ناما خۆ یا ئەڤینداری ب درستی ب گەهینن یارێ ویاری.

بو خویندەڤانێ هێژا ئەڤ رستا درێژ ژڤان جۆرە حەیرانوکان منێت بەرهەڤکرن وەک گڤ وگو دناڤ بەرا هەردو یارێت دلینی وئەشقدار.

کچک دبێژیت

لاوكێ دلێ من كه‌وێ له‌نگه

به‌ژنا بلند شوخو شه‌نگه

وه‌رن داوه‌تا لاوكێ من بكه‌ن لمه‌ دره‌نگه

کورک دبێژیت

هەی کچکا، ل سەر بانی

یا دبژێریت، ئەوی دانی

من تو دڤێی، ما تو نزانی

کچک دبێژیت

ئو کورکێ ل بەر دەری

تو ب زڕە وەکی کەری

ما هەمی کولاڤ دچنە سەری

کورک دبێژیت

ب شه‌ڤێ دنڤم خه‌ونا دبینم

ده‌ستا ل دور گه‌رده‌نا یاركا خو دوه‌رینم

سپێدێ رادبم شه‌رمزار ودره‌وینم

کچک دبێژیت

بهار هات وبهارا لینگی

بزنەکا سەرئاڤێ دهێت کارێ ل بەر سینگی

خوزی من لاوکێ خو دیتبا ب رویڤنگی

کورک دبێژیت

کچکێ دینێ، خەما نەخو دا پیر نەبی

تو کەمەرێ ب شدینە، دا ستویر نەبی

ما تو نزانی بابکێ تە تو یا دایە من، لێڤە نەبی

کچک دبێژیت

ئەز دێ چمە سەڕێ هەر سێ گرا

ئەز دێ بەرێ خو دەم رێزێت کەپرا

ئەز نەمینم بو خویشکێت بی برا

کورک دبێژیت

كچێ دينێ ناڤێ ته‌ ب قيمه‌ته‌

سینگێ ته‌ عه‌بدالا خودێ جەنه‌ته‌

ماچاته‌ چه‌ندا خوشه‌ چ له‌زه‌ته‌

کچک دبێژیت

هه‌رێ مێڤانو مێڤانێ مێ خێرێوۆ

هه‌كه‌ تو مێڤانی هه‌ره‌ كوچكا مێ مێوۆ

هه‌كه‌ تو رێڤينگی هه‌ره‌ به‌ر ريتكێوۆ

کورک دبێژیت

ئه‌ز نه‌ مێڤانم ناچمه‌ كوچكا مێ مێوۆ

ئه‌ز نه‌ رێڤێنگم نا چمه‌ به‌ر ريتكێوۆ

ئه‌ز مێڤانێ سنگ به‌رێت ته ‌زه‌ريێوۆ

کچک دبێژیت

چومه گه‌لی گه‌لیێ كه‌مه‌كا

ژوردا دهێن وبرێت وه‌رده‌كا

من حه‌یرانێ خو دڤیت ژكه‌ربێت گه‌له‌كا

کورک دبێژیت

ئەزکەوم کەوەکێ نێرم

بەرملکا ژوردا گیا دبژێرم

ئاشقێ چاڤ ژنکێت ب مێرم

کچک دبێژیت

ل سەربانا مەشە مەش نەکە

ئاگرێ جگارا خۆ ل من خۆش نەکە

ئەز یا تە مە خۆ شاش نە کە

کورک دبێژیت

کچکێ دینێ دێ بلا بلا

هەرە ناڤ حەودا گولا

دیتنا سەربانا تەناهیا دلا

کچک دبێژیت

بەژنا بلند بلندی

یێ دهەژینیت لەوەندی

من لاوکێ گرتی ژئەڤی گوندی

کورک دبێژیت

دەردێ دلا بلا ژدل بیت

شوینا خزیمێ بلا قەرەنفل بیت

شوینا کەمەرێ بلا تەنگا کەڤل بیت

کچک دبێژیت

دێ چینە زوزانا پێکڤە پێکڤە

دێ کەپروکا چێکەین شەقلە ب سەرئێکڤە

دێ حەفت نیڤەکێت شەڤێ خۆ کێشین ب نک ئێکڤە

کورک دبێژیت

من حالێ زوزانا نینە

نە من هەسپە ونە ماهینە

نە من سەێە ئو نە تاژینە

کچک دبێژیت

نە تەبتی نە تەبتى

کورکۆ دینۆ نە تەبتى

تە چی یە ل دەرێ خانیێ بابێ من دخەبتى

کورک دبێژیت

چیا دبلندن بێ دارنابن

شیڤ ونەهال دبێ دیپشک ومارنابن

کچ ژحەفت سالیێ پێڤە دبێ یارنابن

کچک دبێژیت

هەکە تە نەخەت نەبیت من پێ بینى

هەکە تەعەشیرەت نەبى من ب رەڤینى

ماتۆ بۆچى ل کلێسا بابێ خۆ ناروینى

کورک دبێژیت

شکارێ بەهدینا ب کور وکەندە

هیڤیا من ژخودێ وشێخێ نەخشەبەندە

ئێدى نەمینن قەید وبەندە

کچک دبێژیت

رێکا حەدێ دەست بەروارە

میرهات ل هەسپى سویارە

دوتمام لێ یا بریندارە

کورک دبێژیت

بەژنا بلند دارا درێرا

بەژن کورتێ هرچا شکێڕا

ناڤنجیێ کوما زێڕا

کچک دبێژیت

دەرسوکا خۆ ل من خوار نەکە

شیشا کولاڤێ ب سەردا نەکە

ئەز یا تەمە خۆ دین نەکە

کورک دبێژیت

کچێ دینێ گل وگشتێ

پارزینى پاڤێژە پشتێ

ئەڤینا دلێ من گەهشتێ

کچک دبێژیت

هەرێ شڤانوو شڤانێ بزنى

نەتۆ کورتى ونەمەزنى

تۆ ب قایدا بەژن وبالا منى

کورک دبێژیت

کچێ دینێ نیڤ ژنى

تژى زەندا بازنى

بیکا میرێ مەزنى

کچک دبێژیت

حەیرانو بەزنە بەزنە

روندکێت من تێن قەنتار ووەزنە

من حەیران دڤێت وحەیرانی ئەز نە

کورک دبێژیت

کچی دینێ نێ بچیکى

تژى زەندا موریکى

بیکا میرێ بچیکى

کچک دبێژیت

ئەز سەر بانى تۆ ل سەر بانى

تە دەرسوک گرێدا فەلەکانى

ئەز یا تەمە تە نە دزانى

کورک دبێژیت

ها یارکا ل سەربانى

یا دە یە باى دانى

ئاشقێ تەمە تۆ دزانى

کچک دبێژیت

سلاڤکێت ئێڤارا

بکەنە قودیکەکێ، ئەمانێت عەتارا

فرێکەنە زوزانا، بو خودانێت یارا

کورک دبێژیت

کچکێ دینێ ئەزێ ب لەزم

گەردنا زراڤ ب هەلینە دا بگەزم

هەکە تو مریدى شێخێ تە ئەزم

کچک دبێژیت

چوم نزارى نزارێ دێمه‌

من زێڕه‌ک دیت مسقاله‌كا كێمه‌

نزا بو یارى بكه‌مه‌ بازن یان بكه‌مه‌ خزێمه‌

کورک دبێژیت

هه‌رێ به‌سنا یێ شه‌ڤێ شه‌ڤێ

خزێما زێرا ل که‌پێ ته‌ دا لێڤێ

جهێ شه‌ڤێ تو ل کیدەرێ دنوڤێ؟

کچک دبێژیت

ئەوا دهێت ژخەندەکێ

بەژن بلندێ بسک خەلەکێ

خودێ خراب ب کەتن مالا سەبەبکارا وڤێ فەلەکێ

کورک دبێژیت

دەرگنى یا ب به‌ر و‌گڕه‌‌

به‌ردا بیستانن پشتێ كه‌ڤره‌

لاوكێ من فه‌له‌یه‌ ژپیسمیره‌كى چێتره‌

کچک دبێژیت

کچکێ ئه‌ز وتو دمقابلین

چاڤێت مه‌ شل بون هندی ئێک دفکرین

هه‌که‌ تو یا خه‌ریبی ئه‌ز وتو ژخه‌ریبیا مرین

کورک د بێژیت

که‌زیێت به‌سنا من چل وچارن

ل گه‌را دیلانێ ئەز هه‌ژارم

لێ ئه‌ز چ بکه‌م خه‌ما خارم

کچک دبێژیت

حه‌یران شڤانێ به‌رخا

تو لێده‌ دورانا ئه‌زێ لێده‌م چه‌رخا

ئه‌ڤینا من وحه‌یرانی وه‌ک ستی وفه‌رخا

کورک دبێژیت

من تو ديتی ل سه‌ر بێده‌رێ

ددان مه‌زنێ دفن كه‌رێ

هه‌كو توحه‌فت مالو مێرا بكه‌ی دێ هه‌ر بێژی خوزيكێت مێرێ به‌رێ

کچک دبێژیت

بارانەکا ب شەپی تێ

پێژنا حه‌یرانی ده‌رێ خانی تێ

هه‌کە دایکا من گوت ئه‌و کی یه‌ دێ بێژمێ کتکه‌ دیف بێهنا گوشتی تێ

کورک دبێژیت

سیبەرێت ئێڤاریا دشورن

رەوشا چەما وەردەک دسورن

سەد قەدا وبەلا ب یارکێت ڤی زەمانی ب کەڤن چەند بێ سوزن یار گوهورن

کچک دبێژیت

نه‌چه‌ شامێ شام مرنه‌

نه‌چه‌ حه‌له‌بێ مێركوشتنه‌

وه‌ره‌ بچینه‌ زۆزانێت قه‌ره‌داغێ رزقێ ته‌ خه‌ما خودێ وته‌شیا منه‌

کورک دبێژیت

به‌سنایێ ژدلێ منرا هه‌ره‌ هێزلێ

به‌ژنا ته ‌بلنده‌ گه‌رده‌ناته‌ کێلێ

کچێ دینی مال خرا بی ته‌ بوکێ خو گرتی یه من دهێلێ

کچک دبێژیت

حه‌یران جوتیارێ سێمێلێ

قه‌لینێ تێکه‌ باده‌ سمبێلێ

ئه‌ز بو ته‌ چێترم ژ یا ده‌ڤه‌را نهێلێ

کورک دبێژیت

به‌سنا یێ به‌سنا خه‌لیلا

به‌ژنا ته‌ بلنده‌ قرکا ته‌ قه‌ندیلا

مال خرا بێ ب خوه بکره‌ به‌س کورب که‌ ڤان برینا

کچک دبێژیت

حه‌یران دهێت ژچه‌ما

کیسکێ حه‌یرانی تویتن تێ نه‌ما

چ خه‌ما نه‌خو ئه‌ز هه‌ریا ته‌مه‌

کورک دبێژیت

کێلا رەشێ شینە

خەملا هێتوتێ چنار وبینە

مرن ئەمرێ خودێ یە ڤێرێ جهو مەوتنێ مە نینە

کچک دبێژیت

حه‌یران مال ل ڤێرێ بوو

حه‌تا کێریکێ چاڤێ من لێ بوو

وێرێ وێڤه‌ هیڤیا خودێ بوو

کورک دبێژیت

من قه‌ت هاش وێ چه‌ندێ نه‌بوو

كراسێ ته‌ به‌ر دلێ من قه‌دیفه‌بوو

به‌س چاڤێت گه‌له‌ك فه‌ساد ونه‌یارێت گوندێ مە ل من وتە بوو

کچک دبێژیت

حه‌یران شڤانه‌، په‌زکێ خوه‌ بگێڕینه‌‌

عه‌ردێ مە یێ ب چه‌روانه‌

بلا بچیت په‌ز، بخێر بێت شڤانه‌

کورک دبێژیت

ئەز ل مالاخو نارینم

گوتنێت خەلکی لدویف تە نا برینم

ئەز ھنگی دراوستم تە ژ پیسە مێرێ خراب بستینم

کچک دبێژیت

حه‌یران ژ ڤى بانى حه‌تا وى بانى

هه‌مى مه‌لانه‌ ، قورئان سه‌ر ڕانى

كه‌س ناگه‌هته‌ گوزه‌کا حه‌یرانى

کورک دبێژیت

چومە چەما چەم چ دشینن

چومە گولا بشکوژ نینن

من نە زانی کچکێت ڤی دەوری ل سەرچ قه‌ول وقرارا نینن

کچک دبێژیت

حه‌یرانو ئێڤاری یه‌ دره‌نگه‌

که‌وکێ مه‌سه‌بێ هه‌لاند وده‌نگه‌

من له‌وا حه‌یرانکێ خو دڤێت ڕاپێچ شه‌نگه‌

کورک دبێژیت

كچكى دينى با دل هه‌وا

ته‌ ل پاخلێ هێکێت كه‌وا

مانه‌ به‌سه‌ ته‌ مالا من خراب كر ب ڤان دره‌وا

کچک دبێژیت

حه‌یران جوتیارێ نهێلێ

قه‌لینێ تێکه‌ باده‌ سمبێلێ

ڕاموسانێن حه‌یرانێ ده‌لال ناده‌م ده‌برا سێمێلێ

کورک دبێژیت

ئه‌ز حه‌یرانێ ئه‌وى ده‌ڤى

ته‌ سنگ هه‌یڤا چارده‌ شه‌ڤى

ئه‌ز دێ هینگێ ته‌ركا به‌ژنا ته‌ یا بلند كه‌م سه‌ر چیاكێ سیپانێ ببیت زه‌ڤى

کچک دبێژیت

حه‌یران کورێ حه‌سێ

ته‌سمبێل سویسن دکه‌ڤنه‌ به‌ر ده‌ڤێ مقه‌سێ

راموسانێت من ولاوکی د خوه‌شن به‌ر سیلێ به‌ر به‌روکا ره‌سێ

کورک دبێژیت

ئه‌زێ ل به‌ر ‌په‌نجه‌رێ تو ل په‌نجه‌رێ

به‌ژن بلندێ كه‌زى زه‌رێ

تو دلێ خو قه‌د نه‌هێله‌ ئه‌زو تو دێ بینه‌ له‌یل ومه‌جنونێت ده‌ورێ به‌رێ

کچک دبێژیت

هەی تیلمەزێ هەی تیلمەزێ

باران هاتو ل رەخێ دزێ

نە مرم ساخ بم دێ تە کەمە دەیکا بزێ

کورک دبێژیت

من قه‌ت هاش وێ چه‌ندێ نه‌بوو

کراسێ ته‌ لبه‌ر دلێ من قه‌دیفه‌بوو

ئەز دا سلاڤێ ل تە کەم چاڤێ دۆژمن ونەیارا ل من وتە بو

کچک دبێژیت

من جانەک دیت ل ئەیوانا ژۆری

شەمالکەک هەلبی ب هنگۆری

ئەز چ بکەم جانا منێ عمرێ بۆری

کورک دبێژیت

کچێ دینێ خو ب شه‌لینه‌

ئه‌وی له‌شی هێرڤه‌ بینه‌

له‌شێ من یێ بویه‌ ئاگر ب ئاڤا خو ب ڤه‌مرینه‌

کچک دبێژیت

لاوێ منولاوێ زراڤ

تە چاڤ رەشو بری ل هنداڤ

تە ل من سوتن جەرگ وهناڤ

کورک دبێژیت

ئەڤێ شەڤێ خو ل شەڤێدا

ئەڤێ تەیری خو ل کەویدا

خوزی مرادا من وکچکا دەلاڵ حاسڵ ببا وەلا بابو دڤێ مەهێدا

کچک دبێژیت

حەیرانو جوتیارێ جوتی

چ بەند وەنینن من ب تە ناگوتی

بەندا دوماهیکێ تە دلێ منێ سوتی

کورک دبێژیت

ژارا هەی ل من ژارا

لمن سور بون کولیل کێت دارا

من پەزێ خۆ برە چەروانى دوتمام من دیت لوان وارا

کچک دبێژیت

ئەز دێ چمە میسل سریچ خانێ

دێ خۆهاڤێ مە سەر بەختێ سوڵتانێ

دا لاوێ من بەردەت ژ قەید وزیندانێ

کورک دبێژیت

بەژنا بلند لبەر گوتنێ

لبەرکڕین و فروتنێ

دێ لێ دەم رحا شرین دگەڵ چەند مالێ دنێ

کچک دبێژیت

ئەرێ دایێ تۆ دەى نەکە

بەختێ خۆ د گەل من خراب نەکە

ئەڤینا دلێ من بەرزە نەکە

کورک دبێژیت

باکەکێ دهێتو ل هەمى دەما

یێ دهەژینیت کولیلکێت چەما

پشتى چاڤێت رەش وبەژنا بلند سۆتم وحەلیام چێ دمن نەما

کچک دبێژیت

بسمام ڤان نێرگزا بەلگ وەراندن

ڤان نێریا شاخ ئالاندن

بسماما دووتمام رەڤاندن

کورک دبێژیت

چاڤێت تە درەشن وکل سەبەبە

مالا خۆ بارکە ل گوندێ مە نەبە

هەکە تە شوى دڤێت شوی بکە ولهیڤیا من نەبە

کچک دبێژیت

چومە میسل سەرێ چەمى

د سەردا پرە و دبندا گەمى

ئەزگورى هەرسێ تبلێن گرتین قەلەمی

کورک دبێژیت

کچێ دینێ تو چوی ئەزێ مایێ

تە خاتر خاست من جاب نە دایێ

تە ئەزێ کریمە ماسیکەکا بنێ حەفت بەحران ودەرمان دایێ

کچک دبێژیت

خانیکێ لاوێ من ل پشتا چویێ

بەژنا بلند دهێت و ژزاخویێ

لاوێ من زاڤایە ببنە سەر شویێ

کورک دبێژیت

ئەز چوومە ڤى چیاکى چەندێ هوینە

گوهێ خۆدا بو قەب قەبا کەوینە

من پرسیارکر ژهەڤال وهوگرا گوتن یارکا تە دگەل مە نینە

کچک دبێژیت

چیاکێت ژورى ب کور ونەقەبن

دەشتا خوپان هەمى عەرەبن

خوزی کافر دحالێ منو تەدا نەبن

کورک دبێژیت

چومە چەما چەم دشینن

چومە گولا بشکوژ نینن

من نەزانی کچکێت ڤی دەوری سەر چ قەول وقەرارا نینن

کچک دبێژیت

باکەکى دهێت هەمى دەما

یێت هەژینیت بەلگێن چەما

پشتى بەژنا بلند ئەز حەلیام وچ دمن نەما

کورک دبێژیت

مە رەزەک هەبو ژملا وێڤە

هەمی وەختا تری پێڤە

ئەشق وئەڤینا یارا من گەلەک ژدل بو خەلک وعالەم سەبەبن، هێلا ب رێڤە

کچک دبێژیت

ئەو کییە ژ وێڤە تێ یو

شالا رەش ل پشتێ یو

دێ بتە زاڤایێ مالێ یو

کورک دبێژیت

کچێ دینێ نەزانێ

هەرە میسلێ خو ب دە رەڤانێ

عەزیزا دلێ منێ نە ئێنە سەر خو ناڤێ بەردانێ

کچک دبێژیت

ئەرێ لاوو لاوێ خازی

تو سەفیلی ، بەلنگازی

بو چی کچکێت خەلکی د خازی

کورک دبێژیت

فیستان سورێ با دل هەوا

تە پاخلێ هێکێت کەوا

تە ئەز کوشتم لاقەردیا ب حەنەکا ب ڤان درەوا

کچک دبێژیت

هەرێ کورو کورێ خەلکی

رەش روحانو ، دو بەلگی

لهیڤیا تە بم حەتا گەنگی

کورک دبێژیت

چ ئیڤارە ئێڤارەکا خێرا

مەلا چونە مزگەفتا قەشە چونە دێرا

راموسانەکێ بدە من ژبابێ تەرا مننەتە ژ دەیکا تەراخێرا

کچک دبێژیت

هەرێ کورو، کورێ مامێ

خەنجەر زیڤو شولێ شامێ

من کورێ مامێ خو ڤییا بو چی هەوە ئەز نە دامێ

کورک دبێژیت

چ خەمەکا د سەر خەمێ دا

سورگول بشکڤین د حەودێ دا

من حەیف وسەد مخابن کچکێن گوندى پیربون د مالا بابێ دا

کچک دبێژیت

هەرێ کورو کورێ مەتێ

خەنجەر زیڤو ل بەر قامەتێ

عەشق ئەڤینا من وتە کەتە روژا حەشرو قیامەتێ

کورک دبێژیت

چیاکێ گوندێ مە ب دار مازى

قازوقولنگ لێ دکەن گازى

حەیفا چاڤێت رەش بەلەک ئەڤرو کەتینە بەرمەزادێ وخەلک دخوازى

کچک دبێژیت

کورکو دینو ته‌ بو وه‌کر؟

تو ل به‌ر ده‌رێ خانیکێ مالا بابێ منرا بورى سلاڤ نه‌کر

ئه‌ز دزانم کراسێ من عه‌بدالا خودێ یێ دڕیایى بوو من شه‌رم ژخو کر

کورک دبێژیت

چ سپێدەیە وەختێ چایێ

بەفرا دباریت وەکى کایێ

یارا من یا بەژن زراڤە ب خودێ دەق ژێ نایێ

کچک دبێژیت

لێ به‌سێ به‌سنایێ

خزێمه‌ کا زێرێ ل که‌پو لێڤیت ته‌ قوتایێ

ئه‌ز داکه‌هم لاوکێ خوعه‌ڤدالێ خودێ من نه‌ وێرا ژبه‌ردایێ

کورک دبێژیت

دنیا گەرمە یا د کەلژیت

هێکێ دانە دێ بهوژیت

دەردێ ئەشقێ چەند گرانە ئەڤیندارا د کوژیت

کچک دبێژیت

وه‌ره‌ وه‌ره‌ مال ئه ڤه‌ نه‌

شونا ره‌زا پرێزه‌ نه‌

کورکو دینو ئه‌زێ ساخ بم ئه‌ز نه‌ مرم ئه‌ز یا ته‌مه‌

کورک دبێژیت

ئەم جیرانێت دەر ب دەرى ڤە

گوشتێ حەلیاى ب سەر هەستى ڤە

ئەز هینگێ تەرکا بەژنا بلند کەم هەتا مرى رادبن ب جانگێ سپى ڤە

کچک دبێژیت

کرو دینو پاله‌و پاله‌ بل بولو

بکه‌ دورینێ ئه‌زێ بکه‌مه‌ ملو

دا ساخ بیت ئه‌و برینا‌ کولو

کورک دبێژیت

ل من هاڤینە وەختێ بانا

خەلک وعالەم مژیلن ب کەپروتانا

هندى سور گول هەبن قەت بێهن ناکەمە گول شیلانا

کچک دبێژیت

دێ وه‌رن دلێ من ڤه‌كه‌ن

قوديكه‌ كا تێدا پێشا مه ‌نه‌كه‌ن

گه‌لی خه‌لكو عاله‌مێ برينێت دلێ من دكولن كه‌س لومه‌ی من نەکەن

کورک دبێژیت

وەرە وەرە جانا منێ

شەڤ وروژا ل مالا منێ

خوشیا خەلکی تەعلیا منی

کچک دبێژیت

دێ وه‌رن دلێ من ڤه‌كه‌ن

قوديكه‌ كا تێدا ده‌رمانی لێه‌كه‌ن

گه‌لی خه‌لكو عاله‌مێ ئاگرێ ئه‌ڤينێ زورە كه‌س لومه‌ی مه ‌نه‌كه‌ن

کورک دبێژیت

هەرێ گولێ گول بهاری

تو ب هەلینە لڤکا جاری

دا بەری خۆ بدمە دینداری

کچک دبێژیت

دێ وه‌رن دلێ من عبدالا خودێ بكه‌لێشن

قوديكه‌ كا تيدا ره‌خه‌ك سه‌يدن ئێك مه‌لانه ‌ويێت دی ده‌روێشن

برينێت دلێ من چه‌ندێت كولن وێ ژبنێ خو دئێشن

کورک دبێژیت

گوندێ مە یێ ب گومبەتە

یێ لێ دگەرن دو سەد مللەتە

ئەڤینا من ودوستێ بویە هزرەتە

کچک دبێژیت

سندريكه‌ كێ بو لاوكێ من چێكه‌ن ژدارێت له‌ڤه‌نا

ره‌خه‌كی ب دانن‌ سه‌ر ملێت سێ زه‌ريا ئێكی بادنه‌ سه‌رملێت سێ ره‌به‌نا

پاشی ب به‌نه‌ زوزانێت ژوری ل پيره‌ مه‌وته‌نا

کورک دبێژیت

من تو دیتی دخەوێدا

بو مە رێڤینگ کەتمە درکێدا

تو بویە رەڤەند ددەرێ رێدا

کچک دبێژیت

ئه‌ز دگه‌لیدا تو دگه‌لیدا

بایه‌ك هات وسینگێ سپیدا

كورو دینو ئه‌ز بو ته‌مه‌ ژكه‌رب وركێت ڤی گوندیدا

کورک دبێژیت

دایکا جانێ جیرانا مە یە

دائم شولا وێ فتنەیە

جەهنەما بن دونیایێ جهێ وێ یە

کچک دبێژیت

ئەڤان دلا گوتە دلا

ئاگر بەربو زنجا ورەزا، باغێ گولا

دێ بلا خودێ حاسڵ بکەت مرادا نەزانا وبێ عاقلا

کورک دبێژیت

بەژنا تە زراڤە لێ گرێدا قایێشا زێرا

ئەنیا تە ژهەیڤا چاردەێ یە چاڤ ژستێرا

ئەڤرو دەرکەڤتی یەژسەرێ چیا وشکێرا

کچک دبێژیت

چ دارەکا دحەوشا مەدا

ئەڤێ دارێ بەلگ وەراندن دخەملا خودا

خوزی مرادا من وتە حاسل ببا دناڤ لحێف ودوشەکێت قەدیفەیدا

کورک دبێژیت

ل ناڤ بەرا من وتە زێ یە

نە کەلەکە نە گەمی لێ یە

قاسدی من وبەژنا بلند مەلا ئیکرتێ خودێ یە

کچک دبێژیت

چوم باژێری قەسرا سپی کر

ئەز چوم رێکێ رێ ب نیڤی کر

عەزیزێ دڵێ من ب هیڤی بو خەلکێ فەساد بێ هیڤی کر

کورک دبێژیت

دلبەرێ دینێ

من دا باژێرێ میردینی

ئەز دێ تە خازم ل ڤێ هاڤینێ

کچک دبێژیت

شەڤا تاڕی بو، روهنی نەبو

چومە پشتا دەری دەرفەت نە بو

من نەزانی لاوکێ من کاروانی یە ل ماڵ نوبو

کورک دبێژیت

ئێڤارە ئێڤاری دبەلاڤن

رستکێت مەرجانا بەغدایێ ل ناڤن

کجکا گەفن یێت کورکا سلاڤن

کچک دبێژیت

چومه‌ بالاڤێ من بالاڤ نه‌كر

هات مه‌ ڤه‌ ژبالاڤێ من كار نه‌كر

لاوكێ من هه‌ل بوری كۆری ئه‌زێ سلاڤ نه‌كر

کورک دبێژیت

دەیکێ وەنینە، بێ بەختێ وەنینە

تژی جەرگێ مە مێویژێت میرانینە

هەکە بو دەهواتا من بو خەلکی بینە

کچک دبێژیت

هه‌رێ شڤانو شڤانێ په‌زی

ئاگره‌كی هه‌لكه‌ ده‌ستێت من ته‌زی

دابچینه‌ كانیكا دانگا مالا ده‌ڤێ خو پاڤێژه‌ روكێت قورمزی

کورک دبێژیت

هەرێ نازێ سەربارا هەمی نازک ونازدارا

گەردەن شیشەیە خۆ دهاڤێتە سەر دار وبارا

خوزی نازک گەهشتبا من چار شەڤێت پائێزا سێ روژێت بهارا

کچک دبێژیت

ژهەشتێ حەتا هەشتێ

چاڤێت من کچکێ کلێ رەش تێ

ئەزێ چەوا چمە زوزانا لاوکێ خو هێلم ل دەشتێ

کورک دبێژیت

تو یا دینی ما تو یا دینی

تو دبەر دەرێ مالا بابێ منرا دهی و خۆ دلەقینی

من سێ یارکێت هەین ئەز تە نا دەم ب مزگینی

کچک دبێژیت

لاوێ من سڵ بو ژڤان گونديا

گرتبو رێكا پشت خانيا

ئه‌زێ لاوكێ خو زڤرينم ب حه‌نه‌كو و لاقرديا

کورک دبێژیت

وەرە بەر پەنجەرێ، نە راوستە

ئەزێ تە ئاخێڤم ب تبل ودەستە

کچک ئەشقی یە، کورک مەستە

کچک دبێژیت

چوم بالاڤێ ل كانيا مالا

من بالاڤ كر ل گه‌ل هه‌ڤالا

خوزی ئه‌ز وتو بباينه‌ بيك وزاڤا ل ئه‌ڤان سالا

کورک دبێژیت

بەژنا بلند من دیتو ناڤ جنیکا

یا خەملی ژتەرزێ بویکا

دنیا یا بویە کافرستانی دەورێ سەنانیکا

کچک دبێژیت

دایکا منێ، تویا پێ گوتی

ل هنداڤ سەرێ من، وەک بزوتی

تو ب خودێ کەی تو نە بە سەبەبا دلێ منێ سوتی

کورک دبێژیت

نا چمە زوزانا زوزان دسارن

سیسن وهەلال وبەیبین خویسار بارن

یارکێت ئەڤی دەوری دبێ سوز وقەرارن

کچک دبێژیت

دایکا منێ، تو یا عادلێ

ل هنداڤ سەرێ من، وەک بلبلی

تو ب خودێ کەی تو نەبە سەبەبا، ئەڤی دلی

کورک دبێژیت

بەژنا بلند چو بالاڤی

ل هەمی کوچکا دانا کوچکی ناڤێ

تە ئەز سوتم وحەلاندم، چاڤ رەشێ دێم زراڤێ

کچک دبێژیت

هازێ ل من هازێ

دەنگێ قولنگی، فرینا قازێ

راموسانێت من ولاوکێ من دخوشن ل ناڤ نهێلیا ل چەلکێ پیڤازێ

کورک دبێژیت

کچی دینێ دێ بلا بلا

هەرە ناڤ حەودێت گولا

دیتنا سەر بانا سوتنا دلا

کچک دبێژیت

ئەم چو ینە گوندى گوندێ ڤال

ئەم نەچار بوین بوینە هەڤال

خەلکی گوتن ئەڤە چییە ؟ مە گوت ئەم بوینە مال

کورک دبێژیت

تو بەس بگری ب چاڤێت رەش

یا دبەر تەدا حەماهیلا بنەخش

گورگی پەزێ من خار، سەرێ تە خوەش

کچک دبێژیت

ئەز دێ مرم وەرە دەف من

کراسێ خۆ بکە قەل قەلە بکە بەرمن

هەکو خەلک وعالەمێ گوتى: بێژە ئەمرێ خودێ یە هاتیە سەرمن

کورک دبێژیت

چیاکێ گوندێ مە ب دار ومازی

قازی وقولنگ لێ دکەن گازی

مخابن چاڤێت بەلەک کەتینە بەر مەزادی خەلکێ دخوازی

کچک دبێژیت

چوم بالاڤێ ل کانیا گەزێ

من بالاڤ کر ب دەستێ لەزێ

دێ هینگێ تەرکا چاڤێت بەلەک کەم هەتا کەڤر دحەلیێت وهێستر دزێ

کورک دبێژیت

کچێ باشێ

تە کراس کتانێ کورتەک قوماشێ

راموسان دخوشن سەر برکا گرگاشێ

کچک دبێژیت

هەکە تۆ مازى چنى تۆ خول سەرا بەر نەدە

ئەز دێ گازى تەکەم جابا من نەدە

وەرە دانگا گوندى سینگ وبەرێ من عەبدالا خودێ ژجانێ خۆرا تێک ڤەدە

کورک دبێژیت

هەمی دارێت دمالا مەدا

بەلک وەراندن دخەملا خۆدا

چونە کچکێ، بابێ نەدا

کچک دبێژیت

چومە چەما چەم پەسارن

چومە گولا بشکوژ خارن

من نەزانی کورکێت ڤی زەمانی چ دبێ قەولن، دبێ قەرارن

کورک دبێژیت

ئەز ل سەر ئاڤێ تو ل هنداڤێ

خوزی عەورکێ رەش هاتبا ل هنداڤێ

هەکو یارکا من دهێت، دا نە رەش ببا ل بەر تاڤی

کچک دبێژیت

چومە رویباری رویباری شێنە

یێ ڤێداتێن جانی وماهینە

هەکە من شویکر، تو ژی ژنێ بینە

کورک دبێژیت

چومە رویباری رویباری بەلەکە

یێت ڤێداتێن پۆر ووەردەکە

هەکە تە شویکر، نایێ خۆ دمن نەکە

کچک دبێژیت

نەهێ مالا مە دوەختێ خۆدبێدا

خەلک خائینە دێ کەڤیتە درێدا

نیڤ شەڤێ وێڤە ژنوی وەرە سەرخەم و خیالێن یارێ دا

کورک دبێژیت

گەلیێ سەرگەلێ ب خڕ وبەرە

یێ ڤێرا دهێن هێستر وکەرە

یارا من ل ڤی گوندی یا مسوگەرە

کچک دبێژیت

چ داخە ل سەر داخێ

باکەکێ ل من دهێت ودگەل ئاخێ

سەد عەهد وقەرار ل من کەتبن ئەز بو تە بم ژکەرب ورکێن ئیجاخێ

کورک دبێژیت

عەورەک هاتو پنی پنی

ب عەلاماتا تو یارکا منی

خوزی من زانیبا کا تو کچی یان بیژنی

کچک دبێژیت

دلکێ منۆ ل ڤێ هەیهەتێ

چیاکێ ژۆرى قرپێن کەتێ

خودێ خراب بکەت مالا سەبەب کارا دیتنا من لاوکێ من چو روژا قیامەتێ

کورک دبێژیت

چیاکێ نێچیرڤانا

مەمکێت یارکا من قەهوا ل فبجانا

هندی ڤەدخوم نا گەهنە چ کوڤانا

کچک دبێژیت

جومە گەرێ، گەرێ کوخە

دسەردا سێڤە دبن دا خوخە

مەرگێ من گوری گوگێت خەنجەرا ملێ ب چوخە

کورک دبێژیت

فیستان سورێ عەبا مشتی

تو ل بەر دەرێ بابێ من راهاتی نە روینشتی

قەس وخەبەرێت خەلک وعالەمێ نەکە بار وپشتی

کچک دبێژیت

حەیران دهێت ژکەمەکا

تەقینا شمکێ یە هڕێنا چەکا

تە چاڤێ ل من، دلێ ل گەلەکا

کورک دبێژیت

کچێ دینێ تە دل یێ ل هەوا

کەزی دشورن دەهمەن هەوا

تە کورکێ خەلکی کوشت ب حیلا وڤان درەوا

کچک دبێژیت

هەمى دلا دڵ حەباندن

هەمى مێرا ژن ئیناندن

چ بکەم سوعیدا مال خراب بۆ پیسە مێرى ڤە گوهاستن

کورک دبێژیت

هەرێ جانێ جانا زێدە

تە سینگ هەیڤێ، ئەنێ سپێدە

تە خەسی گوری، خەزیرێ زێدە

کچک دبێژیت

چ دارەکا ل بانیا چەما

باکەکێ دهێت ودهژینیت هەمى دەما

ئەشق وئەڤینا من ولاوێ من بوسماقا شویشتى وتام تێ نەما

کورک دبێژیت

ئەمان ئەمان، هەی دلبەرێ

تو من ب کوژی ب خەنجەرێ

ژپاخلا تە نا هێم دەرێ

کچک دبێژیت

کورکو دینۆ حەیران شکاکە

دێ تو رابە تشتویرا بەردە بەرخا داکە

کەنگى تە یارەکا دى گرت من ئێخسیرێ بدەستێت خۆ بن ئاخ کە

کورک دبێژیت

پشتا خانیێ مە قچو بچە

بەرێ خانیێ مە قچو بچە

مەمکێت یارێ، کسل گێچە

کچک دبێژیت

کورکۆ دینۆ ئێڤارى دهینن

کراسێ کتانى سەرێ مەمکا دخورینن

خۆى وخیانى تەحلن خەلکێ بیانى دشرینن

کورک دبێژیت

هەی کچکێ بشکۆژێ

کەرەکێ عەوری هات کەڤتە بەر رۆژێ

خوها ل گەردەنێ، دەرمانێ بەرسۆژێ

کچک دبێژیت

کانیا گوندێ مە ب رەونەقە

قەسرا بابێ لاوکێ من دو تەبەقە

خوزى مرادا دلێ من حاسل ببیت پاشى مرن رێکا هەقە

کورک دبێژیت

بێریا ل دیف بێریا ڤەمای

شیرمەشکا گرانە، پالا خۆ ڤەدای

خوزی من زانیبا کا ل سەر چبی دلێ تە ژمن مای

کچک دبێژیت

کانیا گوندێ مە یێ ب سرکە

ئاڤا ڤێدا دهێتوو چپک چپکە

هەچیێ حەیرانێ مالێ نە نیاسیت سمبێل زەرە وهێشتا کوڕکە

کورک دبێژیت

هەرێ گولێ گول بارینێ

زوزان دخوشن ل فەرەشینێ

ئەز وگولکا دەلال، دا ب چینێ

کچک دبێژیت

ل دەرێ خانییێ بابێ من سنگە بەرە

کالکێ بێخە و بگورێ وەرە

ئەگەر دریا دێ ڤەچنم ب ئارمیشێ سورو زەرە

کورک دبێژیت

هەرێ گولێ گولا رەزی

ژبەر ڤە ببسکی، ژپشتڤە کەزی

خوزی گول ببا بویکا مالا بابێ من سەد جارا خوەزی

کچک دبێژیت

من یا زانى تە ژنەکا خاستى

ل حەوشا بابێ کوڕکا دیلانەکا بەستى

ئەز دێ چمە داوەتا لاوکێ خۆ دەڤ بکەنى ودل شکەستى

کورک دبێژیت

کچی دینێ ئەز ل وەلاتێ غەریبیا

من سەعەتەک کری ژدەولەتێت ئەجنەبیا

من کر دیاری بو وێ ئەڤا ئەز چەند ل هیڤیا

کچک دبێژیت

یا شەرمینم تۆ دزانى

تە ئاگر بەردا ڤى جانى

خەلک هەمى فەسادن لڤی دەورى لڤى زەمانى

کورک دبێژیت

وەرە وەرە کچا مەلایێ

یا بێ شەرمێ یا بێ حەیایێ

راموسانەکێ بدە من چ ل تە نایێ

کچک دبێژیت

تو ل سەر بانا یێت مەشى

ژخالا خەلکێ ڤە نەخۆشى

ما نزانن تۆ نەخۆشێ بەژنا بلندو هەردو چاڤێت رەشى

کورک دبێژیت

چ شەڤە شەڤە هەیڤە

بازنێ دەستێ یارکا من ئێک زێرە ئێک زیڤە

ئەز تەرکا تە ناکەم دزانم کوشتنا ب دیڤە

کچک دبێژیت

رێکا رەزا ب هاتن وچونە

تە شەل شینو، شەپک جونە

وەیلا ل منێ کۆرێ ئەزێ من نەزانی غەریبی دهونە

کورک دبێژیت

دلکێ منو، ب دل مایی

پنیەکا عەوری یا کەتی بەر ساهی

لەوا من خویشک دڤێت ژشرینێت برایێ

کچک دبێژیت

ناڤێ تەیرێ من سەفەرە

پەرەک سۆرە ئێکێ زەرە

هەچیێ ناڤ بەینا مە نە خوش کەت وی نە خودێ یە نە پێغەمبەرە

کورک دبێژیت

چیاکێت مە نە چیانە

چاڤێت رەش وبەلەک ل مە بەلانە

مە یارێت نوی گرتن یێت کەڤن تەرکدانە

کچک دبێژیت

وەیلا ل منێ ل من بێ ئاڤێ

کاغەزا دەلالێ دلێ من هات کەتە ئاڤێ

خەلک وعالەم ل مە خائین بون نە ئینا دەرێ نە دا تاڤێ

کورک دبێژیت

تە چاڤ درەشن وەکی مارا

ل سەر کانیکا ئورەمارا

ل هیڤیا من بە جار وبارا

کچک دبێژیت

کورو دینو کۆرێ بەختا

ئەزا ل گوندی تو ل مشەختا

وەرە من ژبابێ من بخازە بابێ من شێخ تاهرە نا خوت نەختا

کورک دبێژیت

من نە دزانی من نە دزانی

رەشیشەکا بارانێ هاتو شینکر مێرگ وکانی

کچێ جانێ بو من مان ئاخینک وپەشیمانی

کچک دبێژیت

رێکا دویردا رێکا دویردا

کول وکوڤان ددلێ کویردا

لاوکێ دەلال هات وهەلبۆری من ژدل دەستویردا

کورک دبێژیت

دهێت ژبالاڤێ شڵ وملە

یێت کەتن پاخلێ رحان وگولە

کچک هات ویا ژمن سلە

کچک دبێژیت

من بەرێ خۆ دایێ خفشێن غەزالا دا ب دەشتێ دا

دێ بلا خودێ خراب بکەت مالا خەلکێ گوندێ مەدا

چەوا وان دەستێت پسمامێ من ئێخستنە د کەلامچێ دا

کورک دبێژیت

دارەکا دحەوشا مەدا چەندا درێژە

من وکچکا دەلال ل بن کر نڤێژە

من عەبدالێ خودێ نە دزانی ناڤێ کچێ گەلاڤێژە

کچک دبێژیت

خوزی شەڤێت مە هەمی تاڤە هەیڤ بان

روژێت مە هەمی جەژن و عەید بان

دا ئەز و لاوکێ خو ب دلێ خوبان

کورک دبێژیت

دهێت ژبالاڤێ دکەتە کەنی

خوهێ گرتن دسک وئەنی

یار خولام بیت مێرک بەنی

کچک دبێژیت

ته‌ شال شین وشال مه‌ره‌زا

تو ل به‌رده‌رێ خانیكێ مالا بابێ منرا هه‌ره‌ وه‌ره‌ ب له‌زو به‌زا

ئه‌گه‌ر تو نێچیرڤانی، غه‌زال ئه‌زا

کورک دبێژیت

من بو تە سلاڤ هنارتن

ل چیا سەر ئێخستن ل گەلیا دابارتن

شوینا دیاری وسلاڤا تە بو من گەف هنارتن

کچک دبێژیت

هندى ئه‌ز ل ڤێ دنیایێ هه‌مه‌

دلێ من یێ پڕكوڤان وخه‌مه‌

تو دلێ خو نه‌هێله‌ یان بو ئاخێمه‌ یان بو ته‌ مه‌

کورک دبێژیت

کچکی دینێ ئەزێ بلەزم

دا رویکێ تە ماچیکەم مەمکێت تە بکەزم

هەکە تو مریدا شێخی بی شێخێ تە ئەزم

کچک دبێژیت

ره‌شو وه‌كی ته‌نیا سێلێ

چ كانیكه‌ ره‌خ سێمێلێ

خه‌لك وعالمێ گوت كرێته‌ من گوت حاجی ئاغا یه‌ لبه‌را عێلێ

کورک دبێژیت

تو نە کورتی نە بلندی

ل بەر دلێ من عەبدالێ خودێ چەندا رەندی

ئەڤینا مە یا کەتی سەر ئەزمانێ خەلکێ گوندی

کچک دبێژیت

چومە چەما چەم پەسارن

چومە گولا بشکوژ خوارن

من نە زانی کورکێت ڤی دەوری چ بێ قەولن بێ قرارن

کورک دبێژیت

کچکا ل سەر بانی

یا پاقژ دکەت هەڤرانی

من تو دڤی خودێیوو تو پێ دزانی

کچک دبێژیت

دێ تو ل مالا بابێ خو روینە

مادەم تە دل ل سەر مار کرنا من نینە

گوتنێت خەلکی ل دویف من ب برینە

کورک دبێژیت

ئێڤاری دهوینن

کراسێ کتانی سەر مەمکا دخورینن

کچێت مالبابێ دهار ودینن

کچک دبێژیت

عەورێت مە شوربون ل هنداڤی میردینی

دەنگێ ڤێ مێ کەوێ خوش دهێت سەر هێلینێ

خوزی مرادا مە حاسل با ل جزیرا بوتا سەرزیارەتێ مەم و زینێ

کورک دبێژیت

ل من هاڤینە وەختێ بانا

خەلک وعالەم دمژیلن ب کەپر وتانا

هندی گول موحەمەد هەبن بیهن ناکەم گول شیلانا

کچک دبێژیت

کورو دینو ئه‌ز وتو پێش مقابلین

سەرەکی بده‌ بخێرا پیرێ بابلین

ئه‌زو تو ل ئێک ب حاسلین

کورک دبێژیت

من تو دیتی ل سەر کانیێ

تیتا رەشە ل سەر ئەنیێ

تە مالا من کورکی خرابکر ب گرێدا رەش پوشیێ

کچک دبێژیت

کورو دینو پاله‌هیێ نه‌که‌ پالەهی به‌لایه‌

نه‌ چه‌ به‌ر بێده‌رێ ب غه‌برو کا یه‌

ئه‌مێ ب چین زوزانێت ژوری یا بکه‌یف وسه‌مایه

کورک دبێژیت

کچکێ زراڤێ

تو رستکا زێری سەر سینگ وبەری زەردا پاڤێ

سینگێ تە کەڤیێت بەفرێنە دێ ل بەر ڤەخوم لێلاڤێ

کچک دبێژیت

ناڤێ لاوکێ من حەسەنە

سەر مەزنە لێڤ لەگەنە

هەکو تو دبەر دەرێ مەرا دبوری ب من نە کەنە

کورک دبێژیت

کچێ دینو ئێڤاری دهوینن

رستکێت مەرجانا دبنیدا زەیتینن

هەکە من ژبەر تە نەبیت ئیجاخا مالا بابێ من تژی خاتینن

کچک دبێژیت

مازی چنێت گوندێ مه‌ چونه‌ مازيا

به‌ر بون ده‌ر وپشتێت ڤان گه‌ليا

ئه‌ز وده‌لالێ چوينه‌ شكه‌فته‌كا تاری كه‌تينه‌ حه‌نه‌ك وياری ولاقرديا‌

کورک دبێژیت

دلکێ منو بەحرا خەما

بەر دەرێ مالا مە دسەردا بۆرە دبەردا چەما

من کچک دیت ژوێڤە دهێتو عەقل دسەرێ مندا نەما

کچک دبێژیت

دلکێ منو بەحرا خەما

رەخەک دەردە ئێک ژئەلەما

لاوکێ من یێ ل عەسکەریێ چ خەبەر نەما

کورک دبێژیت

چومە ئاقاری ئاقرێ تاری

کەڤوتێ شینکر ل ناڤ دار وباری

خوزی من دوستا خۆ ئینابا بەر سیبەرا داری

کچک دبێژیت

دێ لەزکە هەرە ژوێرێ

ما تو نزانی ئەز نە وێرم ب هێمە دەری

برایێ من یێ ب دەبانجەیە ل ناڤ دەری

کورک دبێژیت

من کچک دیت ل بەر پەنجەرێ

تە چاڤ درەشن کەزی زەرێ

پێت من رەقبون وەرە دەرێ

کچک دبێژیت

وەرە دەرێ وەرە دەرێ

عەزیزێ دلی وەرە دەرێ ژبەر پەنجەرێ

ئویجاخا بابی دێ تە کوژن ب خەنجەرێ

کورک دبێژیت

کچی دینێ بسک ب تێلێ

نانکێ تە سوت ل سەر سێلێ

تو بەس روندکا ب وەرینە ب حێجەتا دوکێلێ

کچک دبێژیت

ئەز ل تاخەکی تو ل تاخەکی

مە گول چاندن ل ناڤ باغەکی

سەد خوزیکێت هینگێ ئەز وتو دچین وارەکی

کورک دبێژیت

تێت ژخەندەکێ تێت ژخەندەکێ

بەژن بلندێ کەزی خەلەکی

وەیلا ل منێ ل ڤێ فەلەکێ

کچک دبێژیت

رەزکی مە یێ ل بەتەنێ

موری ومەرجانا پالدا گەردەنێ

دایکێ من دڤێتو، بابو من ب دەنێ

کورک دبێژیت

چەلێ مایێ چەند قەدەرە

سەر چوخینا بەرامبەرە

دوستکا من بەژن بلندە کەزی زەرە

کچک دبێژیت

حەیرانو لێلە لێلە

بەژنا من بلندە، گەردەن کێلە

ئەز یارکا تەمە من نەهێلە

کورک دبێژیت

هەیلا ل منێ ژارێ کەفیکێت سەرا بازن

کولیلکێت چەما هەمی هەلال وسوسنن

شاهدێ من وکچکا دەلال چاڤکۆکێت منن

کچک دبێژیت

حەیرانو مە هیڤی هەنە

چاڤکێت مە ب رێکاڤە بونە مەنگەنە

ما هەکە خویانی هەبن، بیانی چ سەنە

کورک دبێژیت

ئەز ل سەر بانا تێمو دبۆرم

یا ژخەلکی ڤە ئەزێ کۆرم

نزانن ئەز عاشقێ بەژنا بلند ودێمی سۆرم

کچک دبێژیت

لاوکێ منو خۆ نەکە بێ بەخت

دێ تو گرێدە فیشەک ورەخت

من ل ڤێ دونیایێ نەکە مشەخت

کورک دبێژیت

هەرێ کچێ کچکۆکێ

پارزینی هەلگرە دا بچین تڕشۆکی

هەکە تڕشۆک نەبیت بکەڤە سەر چۆکێ

کچک دبێژیت

گولی رەشا گولی بەردا

تە چاڤ رەشن بری ب سەردا

تە دلێ من کرە بەحرا خوینێ مەسکەنێ کول ودەردا

کورک دبێژیت

کچی دینی توا چوی ئەزێ مایی

تە خاتر خاست ومن نە دایی

تە ئەز کرم ماسی ل بن حەفت بەحران ودەرمان دایی

کچک دبێژیت

ئەز پیربوم من قەدەم نەما

دەڤ وددان کەڤتن بونە شەما

ئەڤە حەفت سال تەمامن ئەز ل هیڤیا تەما

کورک دبێژیت

زوزانێت گوندێ مە سێ نە

سێ بەهرێت سالێ کەڤیێت بەفرێ نە

چ بکەم کچێت ڤی زەمانی دبێ ئولن دبێ خودی نە

کچک دبێژیت

رەزکی ل پشتا گری

من سەلک هەلگرت چومە تری

بەهرا دوستی ل سەر رێکا خۆ من یا بری

کورک دبێژیت

دونیا دکەلیت یا دکەلژیت

هێکی دانە یا دبهژیت

دەردێ ئەشق ئەڤینێ یێ گرانە مروڤی دکەژیت

کچک دبێژیت

مشەختی های مشەختی

تڤەنگێ دانە سەر رەختی

تە ل کچکێ کرە بی بەختی

کورک دبێژیت

ئەز ل سەر بانا، تو ل سەر بانا

تە جاڤ سوتن، ژبەر دەرمانا

تە چاڤ سوتن ژبەر دەرمانا

تە کورێت خەلکی کوشتن ب کول وکوڤانا

کورک دبێژیت

کچی دینی مالێت مە رێز ب رێزن

کورکێت گوندێ مە ب بەرگیزن

کچکێت گوندێ مە قەیات وتەڤرێزن

کچک دبێژیت

ئێڤارا رۆژ زڤری

ژمەترلیوزا راد بیت گوری

تبلا حەیرانێ مالی یا دلەولەبکی ژبنی فری

کورک دبێژیت

هەری یارێ شڤی شڤی

خەزێمەکا زێری ل کەپێ تە دا لڤی

جهکێ شەڤێ تو ل کیرێ دنڤی؟

کچک دبێژیت

هەی ژارێ ل من ژارێ

توکێ ل من دخیند ل چیایێ زێبارێ

لاوکێ من نە هات هەیلا ل من دین وهارێ

کورک دبێژیت

ئەز بلبلم بلبلەکێ لالم

ب شەڤی دنڤم روژێ دنالم

ئەز مێڤانێ بەژنا شەپالم

کچک دبێژیت

های تاری تاری ئاقارێ تاری

خەملا ئاقاری دڕ ومراری

خوزی ئەز هنگوستیرەک بام دتبلا یاری

کورک دبێژیت

تاخێ یا لی تاخێ یا لی

ئێکا تێڤە چاردە سالی

من ب جاڤا دیت دل بو نالی

کچک دبێژیت

رەزکی ل بەرروژی

تو ب شەڤێ گولی ب روژێ بشکوژی

ما من شویکریە تو هویێ دلسوژی

کورک دبێژیت

ئەز بلبلم بلبلەکێ دینم

ب شەڤی دنڤم روژێ دخوینم

ئەز مێڤانێ بەژنا شرینم

کچک دبێژیت

وەرە سەر شویرهی جلکێت خۆ پاڤێ

دێ یێت خەلکی شوم ب ئاڤێ

یێت لاوکێ خۆ شوم ب ئاڤا گولاڤێ

کورک دبێژیت

ئەز بلبلم بلبلەکێ گێژم

ب شەڤی دنڤم روژێ دبێژم

ئەز مێڤانێ بەژنا درێژم

کچک دبێژیت

حەیرانو حەیرانێ دلی

تە فێس سۆرە، دبەردا تێن گولی

هەکە تە نە دڤیام، دا بێژی ژروژا ئەولی

کورک دبێژیت

ئەڤینی خوش ئەڤینی

خودی نەکە کەس ببینی

ب دار بەرا ب کەڤیت دحەلینی

کچک دبێژیت

چاڤی من ل ریکا تە قەرمی

خەوا شەڤی ل من ڤەهەرمی

خوزی من زانیبا، چ هاتیە سەری، ج قەومی

کورک دبێژیت

ل دەێ بابێ تە سنگ بەرە

شمکێ بێخە ب گۆرێ وەرە

ئەگەر دڕیا دێ ڤەچنم ب ئاڤرمێشێ سۆر وزەرد

کچک دبێژیت

من نەهیلە، من نەهیلە

تڤەنگی داگرە من بکە کیلە

پشتی بەژنا بلند ل من حەرامە مال ومێرە

کورک دبێژیت

چومە گەلی گەلیێ کویرە

من گازی کر گازیەک دویرە

نێ دوستا من ژمالا میرە

کچک دبێژیت

گازیا ل سەر گازیێ

بەفرێ لێکر ل سەر سوریازێ

ئەز یا تە بوم، بو ئێکا دی چوی جهازێ

کورک دبێژیت

ئەم جیرانن دەر ب دەرین

زێرینگرین خزێم چیکەرین

خودان یارن، دل کەسەرین

کچک دبێژیت

باران باری عەرد تەڕنەبو

تاڤێ لیدا زوها نەبو

ناڤ بەینا من ولاوکێ دەلال خوینداریبو، قەد چێ نەبو

کورک دبێژیت

مالا بابێ تە ل سەرێ گری

شکەلکەکێ خولیێ من پێ وەرکری

دێ هەرە من گرتی تو یا مری

کچک دبێژیت

ئێڤاری یە روژ زڤڕی

عەزیزێ دلێ من ل پالێت خۆ خوڕی

دەلالێ دلێ من سەر پالەیە تل خۆ بڕی

کورک دبێژیت

لی دوتمامێ هویر وگرێ

نە راوستە ل بن کەپرێ

هندی ساخبی بەر نە گری

کچک دبێژیت

چومە میسل ل بەر دوکانی

من پسیارکر لاوکێ من کانێ؟

گوتن ل مال نینە یێ ل تەهرانێ

کورک دبێژیت

ئەز ل گوهەرزێ تو ل بالندا

ئەز خولامێ گەردەنێ وئەوان زەندا

ئەڤە سەرێ سێ سالانە نیشانا تە یا دپاخلا مندا

کچک دبێژیت

ئەزی ل گوندی تو ل باژێری

بەرگیزێ شین تە ل بەرکری

ئەز گوری وێ دایکێ بم تو بو من خودان کری

کورک دبێژیت

ئەزکەوم کەوەکێ نێرم

بەرملکا ژوردا گیا دبژێرم

ئاشقێ چاڤ ژنکێت ب مێرم

کچک دبێژیت

ل سەربانا مەشە مەش نەکە

ئاگرێ جگارا خۆ ل من خۆش نەکە

ئەز یا تە مە خۆ شاش نە کە

کورک دبێژیت

کچکێ دینێ دێ بلا بلا

هەرە ناڤ حەودا گولا

دیتنا سەربانا تەناهیا دلا

کچک دبێژیت

بەژنا بلند بلندی

یێ دهەژینیت لەوەندی

من لاوکێ گرتی ژڤی گوندی

کورک دبێژیت

دەردێ دلا بلا ژدڵ بیت

شوینا خزیمێ بلا قەرەفڵ بیت

شوینا کەمەرێ بلا تەنگا کەڤڵ بیت

کچک دبێژیت

دێ چینە زوزانا پێکڤە پێکڤە

دێ کەپروکا چێکەین شەقلە ب سەر ئێکڤە

دێ حەفت نیڤەکێت شەڤێ خۆکێشین ب نک ئێکڤە

کورک دبێژیت

من حالێ زوزانا نینە

نە من هەسپە ونە ماهینە

نە من سەێە ئو نە تاژینە

کچک دبێژیت

رێکا حەدێ دەست بەروارە

میرهات ل هەسپى سویارە

دوتمام لێ یا بریندارە

کورک دبێژیت

بەژنا بلند دارا درێرا

بەژن کورتێ هرچا شکێڕا

ناڤنجیێ کوما زێڕا

کچک دبێژیت

دەرسوکا خۆ ل من خوار نەکە

شیشا کولاڤێ ب سەردا نەکە

ئەز یا تەمە خۆ دین نەکە

کورک دبێژیت

کچێ دینێ گل وگشتێ

پارزینى پاڤێژە پشتێ

ئەڤینا دلێ من گەهشتێ

کچک دبێژیت

هەرێ شڤانوو شڤانێ بزنى

نەتۆ کورتى ونەمەزنى

تۆ ب قایدا بەژن وبالا منى

کورک دبێژیت

کچێ دینێ نیڤ ژنى

تژى زەندا بازنى

بیکا میرێ مەزنى

کچک دبێژیت

حەیرانو بەزنە بەزنە

روندکێن من تێن قەنتار ووەزن

من حەیران دڤێت وحەیران ئەز نە

کورک دبێژیت

کچی دینێ نێ بچیکى

تژى زەندا موریکى

بیکا میرێ بچیکى

کچک دبێژیت

ئەز سەر بانى تۆ ل سەر بانى

تە دەرسوک گرێدا فەلەکانى

ئەز یا تەمە تە نە دزانى

کورک دبێژیت

کجک تێت ژکانیکا

تە پشتی گرانە ژکمکمێت نێریکا

دبەر خۆدا بنێرە کا رسکا مۆریکا

کچک دبێژیت

چومە رێکا هات وباتێ

من کانیەک دیت ئاڤا سارتێ

من خو گرتبو حەتا یارتێ

کورک دبێژیت

کجێ دینێ رەش ئەسمەرێ

دەستتێ خۆ دانە دا سەرێ خپ دانمە سەرێ

کول وکوڤانێت من گەلەکن دا بینمە دەرێ

کورک دبێژیت

ج شەڤە شەڤا شەمبی

مختاری کرە گازی، کرە تەمبی

وەنەکر ئەز ودوستا خۆ ب چینا ئادا رەزی، خەپارا پەمبی

کورک دبێژیت

رێکا گەلی رێکا مەیە

ل تڕیی رەزی بالەتەیە

قەولێ من ویارێ ئەڤ هەیڤەیە

کچک دبێژیت

ئەڤینێ چ خۆش ئەڤینی

بدار وبەرا بکەڤی دحەلینی

چ کەسێ ناڤ منو بەژنا بلند باخڤیت یێ ژهەمیا عەزیزتر ئەو ب هەلینیت

کورک دبێژیت

رێکا گەلی رێکا مەیە

سەرو کانی بێهنا مەیە

سەر ئاستەنگێ کەیفا مەیە

کچک دبێژیت

دلێ منو نزانی خەما تێکەی

دێ چمە سەرێ گرەکی زیارەتەکی بو خو چێکەی

پشتی چاڤێت رەش وبەلەک دێ گازندێت خو بو کێ کەی

کورک دبێژیت

دلکێ منو دلکێ بەندە

سپنێ بەهدینا ب کور وکەندە

کچک دێ بیتە کوجەر ئەز ژێرا بم رەڤەندە

کچک دبێژیت

خوزیکا بارانەک هاتبا دێ بلا بارانەک هاتبا

خانێکێ بابێ تە رەخەک ژبن بربا

دا من تێر بەژنا لاوێ خۆ دیتبا

كورك دبێژيت

کجی دینێ من نە ترسینە

باب وبراکێت تە من دیتینە

هەمی رەش عەگال وکەفی سپینەل من قیزێت دو کەزینە

کچک دبێژیت

دلێ منو کاشا مێرا

دانا سەرسینگێ من تەڤر وبێرا

حەیفا جوتێ مەمکاب کەڤن دەستێت پیرەمێرا

كورك دبێژيت

کچێ دینێ منتو دیتی ل سەر کەڤری

تە دەست سپینە خەنا کری

وەختێ چاڤێ من ب تەکەتی علمێ خودێ من ژبیرکری

کچک دبێژیت

عەورەک چێبو فرتی فرتی

چەمێ ژێری مژێ گرتی

بەرێ سمبێلا دەلالێ دلێ من گیرهێ گرتی

Ċ