Embedded Files
بنوکا پەیڤا حەیرانوک ژچێ هاتی یە؟
واتە وبنوکا حەیرانوکێ دناڤ زمانیدا:
واتا "حەیران" دفەرهەنگا زمانێ عەرەبیدا وەسا یا هاتی: حَيْرَان : الَّذِي يَجْهَلُ وَجْهَ الاهْتِدَاءِ إلَى سَبِيلِهِ، أَوْ مَنْ أصَابَهُ قَلَقٌ جَعَلَهُ فِي حَيْرَةٍ مِنْ أمْرِهِ. ئانکو ئەو کەسە یێ نزانیت بەرف چونا رێکا خو، یان ئەو کەسە یێ خەمگینیەک کەتیە بەرێ وی ئو هێلای شاش وحێبەتی دکار وکوکێت خودا.
دزمانێ کوردیدا پەیڤا"حەیران" دهێت بڤان رامان ومەبەستان:
حەیران: قۆربان: تە ئەز حەیران ببم. من حەیرانێ خو بکە وی کاری نەکە.
حەیران: مەندەهوش: ئەو شولێ وی کری دەمەکێ خوش هێلام حەیران نە شیام چپکەم.
حەیران: خوشتڤی: ئەوێ نەکە حەیرانێ بابێ. حەیرانێ من بو من هەرە دارا.
حەیران: ئالوز: مویەکێ دخو نەقەلزە، ئو خو قەت حەیران نەکە.
حەیران: گەلەک دل: نەئاکنجی: بریارا خو ب جهبینە وخو حەیران نەکە.
حەیران: حەیرێ: شاش: کورد دبێژن: دل غەیری، خودان حەیری. ما بو حەیران. نە زانی چ بکەت.
حەیران: ناڤە بو کەسان، نێر یان مێ: حەیران مروڤەکێ زیرەکە. حەیرانێ شویکر.
حەیران: یار: دەزگر: حەیرانێ من یێ ل بەر پەنجەرێ. ئەز حەیرانێ خو نادەمە ب مالێ دنێ.
حەیران: حەیرانوک: ستران: هوزان: هەلبەست: کورد دبێژن : حەیرانکێ حەموی کرە ئاڤ. ئانکو سترانا حەموی کرە ئاڤ. بو مە حەیرانەکێ بێژە.
ل ڤێرێ بو مە دیاردبیت ژوان واتە ورامانێت ژۆری چ یێت عەربی یان کوردی ئو خر پێگڤە دبنە ئێک واتە ومەعنا بو یەک پەیڤ ئو ئەو ژی ئەوە" حەیرانوکە". ئانکو ئەڤ پەیڤە دهێت بو وان هەمی پەیڤان بگشتی چنکی حەیرانوک: سترانەکە یان هوزانەکا لێکدایە ژلایێ حەیرانی یان حەیرانێ ئانکو یاری یان یارێ ڤە، ئەو کەسین یێت خو دکەنە قۆربان درێکا ئەڤینێدا، ئو ئەو کەس ژدل وئێقین بونە خوشتڤیێت ئێک ب سوز وپەیمان دگەل ئێک ئو دڤیانا خودا هەرێت ماین ئالوز وشاش ومەندەهوش ئو درێبازا ڤیانا خودا ئەوا پاقژ وبژین ماین حەیرێ وشاش لوی دەمێ کو نەدگەهشتنە ئێک ژبەر گەلەک ئەگەرا کو دکەتنە درێکا واندا زۆربەی جاران. ئەڤ حەرانوکێت ژێری بو هەوە دیاردکەت کو کچک یارێ خو بناڤدکەت وداخازێ ژێ دکەت ب "حەیران یان حەیرانو" برەنگەکێ تازە وجوان وپڕ رەوشت.
زۆربەی جاران پەیڤا (حەیران) یا هاتی ل دەستپێکێ ئانکو ل پێشیا بەندا حەیرانوکێ ب شێوەکێ دیار دبن ناڤێ یاری یان ناڤێ تایبەت یان شاش وحێبەتی. ئو هندە جارا دهێت دناڤ ناڤەروکا حەیرانوکێ ئەو ژی ب وان رامانان یان ب هندەکێت دی وەک قوربان یان گەلەک دلێ نە ئاکنجی سەر سوزەکا موکم.
حه‌یرانێ من
حه‌یران دهێت ژ چه‌ما
کیسکێ حه‌یرانی تویتن تێ نه‌ما
چ خه‌ما نه‌خو ئه‌ز هه‌ر یا ته‌مه
حه‌یران جوتیارێ سێمێلێ
قه‌لینێ تێکه باده سمبێلێ
ئه‌ز بو ته چێترم ژ یا ده‌ڤه‌را نهێلێ
حه‌یران مال ل ڤێرێ بوو
حه‌تا کێریکێ چاڤێ من لێ بوو
وێرێ وێڤه هیڤیا خودێ بوو
حه‌یران شڤانێ به‌رخا
تو لێده دورانا ئه‌ز لێده‌م چه‌رخا
ئه‌ڤینا من وحه‌یرانی وه‌ک ستی وفه‌رخا
حه‌یران شڤانه، په‌زکێ خوه بگێڕینه
عه‌ردێ مە یێ ب چه‌روانه
بلا بچیت په‌ز، بخێر بێت شڤانه
حه‌یران ژ ڤى بانى حه‌تا وى بانى
هه‌مى مه‌لانه ، قورئان سه‌ر ڕانى
كه‌س ناگه‌هته گوزه‌کا حه‌یرانى
حه‌یرانو ئێڤاری یه، دره‌نگه
که‌وکێ مه‌سه‌بێ هه‌لاند وده‌نگه
من له‌وا حه‌یرانکێ خو دڤێت ڕاپێچ شه‌نگه
حه‌یران جوتیارێ نهێلێ
قه‌لینێ تێکه باده سمبێلێ
ڕاموسانێت حه‌یرانێ ده‌لال
ناده‌م دەڤەرا سێمێلێ
حه‌یران کورێ حه‌سێ
ته‌سمبێل سویسن دکه‌ڤنه به‌ر ده‌ڤێ مقه‌سێ
راموسانێت من ولاوکی د خوه‌شن
به‌ر سیلێ به‌ر به‌روکا ره‌سێ
حه‌یران تێت ژ کانیکا
ئه‌ڤینا من وته یا ستی وزینکا
ته پشتی گرانه ژکمکێت نێزیکا
ل به‌ر خودا بنێره کا رستکا موریکا
حەیرانو دابچینە ئاڤسک
ئەز دێ دەمە تە قەلپان
توژى ب دەمن گەڤسک
تو بدە من چوتێ سمبێل
دێ دەمە تە چوتێ بن بسک
حەیران شکاکە
دێ تو رابە تشتویرا بەردە بەرخا داکە
کەنگى تە یارەکه دى گرت
من ئێخسیرێ ب دەستێت خۆ بن ئاخکە
حەیران حەسەنە
وەرە مالا مە ب روینە ونەکەنە
خەلکی شەیتانە شکا ژ مە دبەنە
حەیران شڤانێ بزنکا زای
کوتانا ل دەشتێ هەڤێزا ل چیای
نە تە ئەز خاستم نە ئەز هێلای
حەیران شڤانە شڤانێ شەکا
تە رەخت گرێدا ل سەر کێلەکا
تە دلێ من ل من، چاڤێ ل گەلەکا
حەیران عەبدولا
وەرە ناڤ حەودا نە شکێنە گولا
هەکە خەلکی گوت یێ کرێتە دێ بێژمێ بلا
حەیران هاتە زاخویێ
یێت پاخلا حەیرەنی توڤێ هێرویێ
کچکا شیکر بیژنا دل چویێ
حەیران حەیری، حەیران حەیری
هاتە کولانێ، رەنگ لێ غەیری
ما من شیکریە، تو هوی قەهری
حەیرانو رەشو
هەرە سەر کانیێ چاڤێت خو نەشو
دا ل تە نە چیتن ئەو بێهنا خوەشو
حەیران جوتیارێ نهێلی
قەلینێ تێکە بادە سمبێلێ
ئەز چێترم ژیا دەڤەرا سێمێلێ
حەیرانو لیسی لیسی
تە ڤەهاندی قەیتانا کیسی
ئەز یا تە بوم خودێ نە نڤێسی
کێری ل بەر کێری
شەل شەپکێت حەیرانی مەرزێ نێری
کچک بەرچیە، کورک سکێری
هەی ژارو حەیرانی
ئەزێ ب کولێت تە بمرم
چاڤێت من درەشن ل کلێ سوبحانی
یارکێت ڤی زەمانی ب دەڤی دوستن ژ دلی کافرن
هەی ژارو حەیرانی
ئەزێ ب کولێت تە بمرم
چاڤێت من درەشن ل کلێ سوبحانی
یارکێت ڤی زەمانی ب دەڤی دوستن ژ دلی کافرن
هشتی هشتی، حەیرانو هشتی
دەر قوین دریایو بەحنی کەلشتی
روژێ حەفت جارا چمە زوزانێت ژۆری
ل نک دەلالێ دلێ خو ب هێجەتا بەنشتی
ئه‌ز حه‌یرانێ ئه‌وى ده‌ڤى
ته سێنگ هه‌یڤا چارده شه‌ڤى
ئه‌ز دێ هینگێ ته‌ركا به‌ژنا ته یا بلند كه‌م
سه‌ر چیاكێ سیپانێ ببیت زه‌ڤى
هەی ژارو حەیران
هەکە تو مازی چنی خو ل نزارا بەر نە دە
هەکە تو ب هەڤال وهوگری بەرسڤێ ل من نەدە
هەکە تو یی بێ هەڤال وهوگری
وەرە تەوافا سێنگ وبەرا
هەتا نیڤا شەڤێ بەر نە نەدە
١٣-١٠-٢٠١٧ دهوک
ئەڤ گوتارە ب شێوی ( PDF) یا هەی ل ژیری دمەلەفیدا:
Page updated
Google Sites
Report abuse