جهـ وشوین

جهـ وشوین دحەیرانوکێدا

     جهـ: دحەیرانوکاندا (جهـ) شوینەکا تایبەت یا کری دڤەهاندنێدا. ئەڤ جهێت ئاکنجی بونێ چ بچیک وەک گوندا یان مەزن وەک شار وباژێران ورێزا خو یا هەی ل نک دانەرێ ڤی رەنگێ ئەدەبی. گرنگیا وان شوپ ودەڤەران مەبەستا خو یا کری ل نک وان ئەڤینداران چنکی یێت بوینە سەدەم بو ڤێک کەڤتنێ یان ڤەگەرین وبیرهاتن ویادکارێت چێبوین دناڤ بەر واندا ل دەمێ حەزێ وئەڤینیێ.

      شوینێ: شوینێت ڤێک کەڤتن ودیتنێ زۆرن دحەیرانوکێدا، کێم نەبن ئەگەر ئێک یان دو نە هێن دناڤ بەندێدا یان مالکێدا. ژبەر ڤێ چەندێ من نەڤێت ئەڤ بابەتە گەلەک درێژبیت ئەز دێ وان دەمە بەر چاڤکرن بەس بناڤێت وان  پتنێ، دا خویندەڤان ب زانیت گرنگیا وان ل دەف دانەرێ ڤی رەنگێ هەلبەستێ وەک: گرا، رێزێت کەپرا، بەرملکا، دگه‌لیدا، سەر بانى، ڤى چیاکى، ل دەشتێ، ل ناڤ باغی، دحەوشێدا، ل به‌ر ‌په‌نجه‌رێ، ل تاخەکێ، ناڤ وارەکی، مالا بابێ، ل ناڤ نڤینا، ناڤ رەزی، ددەرێدا، ژخەندەکێ، بن خیڤەتێ، ل عولیا ناڤێ، نزارى، بەروکێ، چەما، سەر کانییێ، زوزانا، رێبارە، شیڤ ونەهال، خاني، کولان، ل بن بیستانێ، رێکا حەدێ، رێکا رەزا، رێکا گەلی، چەروانى، شکارێ، قەسر، ل ئەیوانا ژۆری، ژئاقاری هتد...

١- گوند دحەیرانوکێدا:

       چ گومان تێدا نینە ئەگەر ئەم بێژن گوندێ کوردا جهێ بونا حەیرانوکێ یە، تێدا یا بەرز وبلند بوی، ل وێرێ جهێ گەشبونا خو یا دیتی، دوی جهێ تایبەت دا ئەڤیندار ودلداران یێ دڤێک کەڤتن. ئەو جهە یێ ئاشوپ وهزران خو ب سەر واندا گرتین ودەلیڤە دایێ کو شیابن ڤان مالکێت حەیرانوکان بو خو ب ڤەهینن و ب ئێک ودو بێژن ب ڤی شێوێ هویێ خن وجان رێک وپێک.

        رەوشا وان گوندان بڤان پەیڤێت تازە داینە پێش چاڤ ب رەنگەکێ سروشتی یێ پڕ ژدیمەن ووێنێت خوشکوک ودلڤەکر. ئو بڤان سالوخەتان: گوندێ خێرێ، گوندێ ب هرمیە، بێ دەراڤە، رەوشا گوندی دار وبینە، یێ ب گومبەتە، دبەردا ئاڤە، کانیا گوندی ب سرکە، گیایێ ب گوپکە، یێ ب نهێلە، گوندێ ل بەر گوندا، چیاکێ گوندی ب دار مازى یە، کانیا گوندی ب حەراجە، گوندێ ل پشتا چیا، گوندێ پانە یێ لێ دگەرن ودچەرن کەڕیت میهانە، بێلاکا گوندی یا هوینە، بەر وپشتێت گوندی ب نوکە هتد...

      گوند ب دو جۆران  یێ گەهشت یە مە دبەندێت حەیرانوکاندا: گشت یان تایبەت. دڤان مالکێت ژێریدا (گوند) یێ هاتی وەک پەیڤ ب رەنگەکێ گشتی، بێ ناڤێ گوندەکێ بتایبەت ب هێتە ناڤکرن ژلایێ هەردوکان ڤە چ کچ یان کور، ل ڤێرێ ناڤێ گوندی یێ نهین و ڤەشارتی یە دبیت ژبەر هندەک ئەگەران وەنەکریە بەر نیاسبیت ل نک جڤاکێ. بەلێ دهندەک حەیرانوکاندا ناڤێ گوندی بتایبەت یێ هاتیە گوتن وبەرنیاس وناڤ نیشان کرن. دڤان حەیرانوکێت گشتیدا زوربەی وان یێت دەست پێکرن ب ڤان دو پەیڤان:"گوندێ مە..."  بێ ناڤێ گوندی ب هێتە ب ناڤکرن...

 پەیڤا گوند یا سادە:

سێ رێز:

کچک دبێژیت

گوندێ مە کەردە

بەژنا دەلالێ من ریحانا حەودە

تە دلێ من سوت ومێلاکێت من کەردە

کورک دبیژیت

گوند ل بەر گوندا

خودێ خرابکەت ڤان کاڤلە گوندا

هەرە گوندێ مە، بەری خو بدە بەژن زراڤ وبەژن بلندا

کچک دبێژیت

گوندێ مە گوندێ خێرا

ئیجاخا بابێ منە کوما مێرا

من حەیف ومخابن کچا بدەن پیرەمێرا

کورک دبیژیت

گوندی مە ب گومبەتە

یێ لێ دگەرن دو سەد مللەتە

ئەڤینا من ودوستا من یا ل مە بویە هزرەتە

کچک دبێژیت

گوندێ مە ب هرمیە

یێ ل پشتا لاوکێ من شالا ب رویشیە

خەلکی بو خو خواست، من بو خو دیتیە

کورک دبێژیت

گوندێ مە بەردا ئاڤە

یێ بێ بۆر وبێ دەراڤە

یێ ل من بەرزەبوی ئەو بەلەک چاڤە

کچک دبێژیت

داواتەک هاتە گوندێ مە ب چەپ وراستی

ئەزا چومێ ب چاڤێ کورە ب ملێ شکەستی

دا من لاوکێ خو دیتبا بەری لەشێ من ببیتە هەستی

کورک دبێژیت

گوندێ مە گوندێ موسلمانا

دێ بلا توپا خودێ بێتو ل ئەسمانا

ب کوژیت پیرا، ب هێلیت جانا

کچک دبێژیت

تژی گوندێ مە زەرینە

پاخلێت وان پری شەماموکێت سور وسپینە

کەسێ ڤی دەوری یارکا خو نەبیت چاڤ ل کچیت خەلکینه

کورک دبێژیت

زەڤیێت گوندێ مە ب هنارن

سەردا لاتن، دبندا هەمی خیارن

مخابن بەژنێت بلند، نە یێت دیارن

کچک دبێژیت

کانیا گوندێ مە یێ ب سرکە

ئاڤا ڤێدا دهێتو، چپک چپکە

هەچیێ حەیرانێ مالێ نە نیاسیت سمبێل زەرە وهێشتا کوڕکە

کورک دبێژیت

های تێرمەزێ های تێرمەزێ

کانیکا گوندی مە ب حەلانە ناگریت کەڤزێ

دێ تێرمەزێ رەڤینم ب رێکا ئاڤێ ل بایێ بەزێ

کچک دبێژیت

سپیندارێت گوندێ مە شڤن

ژسەری دلەقن، ل بنی دلڤن

من حەیفا کچکا، ل بانێت بلند پتنێ دنڤن

کچک دبێژیت

ڤان ژارا لە من ژارکر

تەڕگەکا هاتو منێ پرسیارکر

مالکەکا مشختا ل گوندێ مە بارکر

کچک دبێژیت

خەمێت سالا ئەز پیتکرم

جەحێلێت گوندێ مە ئەز خواستم

خرابێت خەلکی ئەز ژخورا برم

چار رێز:

کچک دبێژیت

گوندێ مە ب نهێلە

خەلک درەڤن تو من نەهێلە

ئەز دێ دەمە تە قەفتەکا هویردە بسکان

تو بدە من ئێکا هویردە سمبێلە

کورک دبێژیت

گوندێ مە ل بەر گوندا

سه برا من نا هێت ل ڤان کاڤلا گوندا

ئەز دێ چمە سەر بانێ مزگەفتێ

بەرێ خو دەمە ناڤ تەنگ زراڤا وبەژن بلندا

کچک دبێژیت

بهار شینبو دکاڤلە گوندا

گەنم زەربو، جەهی گولدا

مراد ومەخسەدێت خەلک وعالەمێ حاسل بون

یێت من ولاوکێ دەلال مانە ژدلدا

کورک دبێژیت

خنێ دخوشن میشە ل بەردان

سێ حاکمێت عادل هاتبانە دگوندێ مەدا

دا ئەڤ ژنێت جوان ژدەستێ ڤان

 پیرەمێرێت پیس وگوری دابان بەردان

کچک دبێژیت

کانیا گوندێ مە ب حەراجە

هەچی کاروانێ هات ولێدا باجە

ئەگەر دلا دل حەباندن

نزانیت ئاغایە یان کرمانجە

کورک دبێژیت

چیاکێ گوندێ مە ب دار مازى

قاز وقولنگ لێ دکەن گازى

حەیفا چاڤێت رەش بەلەک

ئەڤرو کەتینە بەرمەزادێ وخەلک دخوازى

کچک دبێژیت

گوندێ مە یێ ل پشتا چیا

دگەل هەڤال وهوگرا ئەم چوینە گول وگیا

ئەز تەرکا بەژنا بلند ناکەم

ژبەر کەیف وحەنەک وخوشیا

کورک دبێژیت

گوندی مە گوندینە

رەوشا گوندێ مە دار وبینە

بەردا کانی ودپشدا دکان وقەیسەرینە

دو گەلن، ئێک فەلەنە، ئێک ئێزدینە

کچک دبێژیت

گوندی مە یێ پانە

یێ لی دگەرن کەڕیت میهانە

هەچیێ لاوکێ من نەنیاسیت

ئەو ل ڤێ دونیایێ یێ بێ ئەزمانە

کچک دبێژیت

بێلاکا گوندێ مە یا هوینە

شەڤ باکێ شەڤێ لێدا بویە ستوینە

دەلالێ دلێ من ل مال نینە

خەوا من ناهێت هێجەت پێشینە

کچک دبێژیت

ئەم چوینە گوندى گوندێ ڤال

ئەم نەچار بوین بوینە هەڤال

خەلکی گوتن ئەڤە چییە ؟

مە گوت ئەم بوینە مال

کچک دبێژیت

کەسپا گوندێ مە ب زەحمەتە

سەر چیا بەفرە دناڤ چیا جەمەدە

هەچی کەسێ ناڤێ کورە لاوکێ من نەزانیت

ئەوعەمەرە کورێ محەمەدە

کچک دبێژیت

دارەکا دگوندێ مالا بابێ من وێڤە دار کنێرە

کورکو بەرخێ دلێ من کەرم بکە وەرە ڤێرە

سینگ وتەرێت من بو تە مێرگ وجەلال وکانی

هەردو چاڤێت منێت رەش وبەلەک بو تە گەلاڤێژ وستێرە

کچک دبێژیت

دارەکا دگوندێ مالا بابێ من وێڤە دار بەروینە

عەزیزێ دلێ من کەرم بکە وەرە روینە

سینگ وبەرێت من بو تە مێرگ وجەلال وکانی

بەر وبەدەنێت من عەبدالا خودێ بو تە جوت هرمینە

پێنج رێز:

کچک دبێژیت

پشتا گوندێ مە ب نوکە

بەرێ گوندێ مە ب نوکە

بەژن وبالا لاوێ من خشکوکە

سەد خوزیکێت وێ رۆژێ

لاوێ من دبتە زاڤا ئو ئەز دبمە بوکە

کورک دبێژیت

ئەز کەوم کەوێ نێرم

دێ چمە سەرێ چیایەکی

ل گوندێ مالا بابێ خو هەلنێرم

خەلک وعالەم عاشقێ زێر ومالێ دنێ نە

ئەز عاشقێ ژنکێت مال ومێرم

ناڤێت گوندێت تایبەت

کورک دبێژیت

گاڤێ ل بەر گاڤێ

پێنگاڤا خو پاڤێ گەلیێ رەشاڤێ

بێهنا یارکا من خوشترە ژگولاڤا ل بن دەریێ ئاڤێ

کچک دبێژیت

رەشاڤە، بەلاڤە

هێتیتا مال خراب کەڤتی یە هنداڤە

بژیێت لاوکێ من ئارمیشێ خاڤە

کورک دبێژیت

رەشاڤە دکورێدا

حەودەکا گول وریحانا کەڤتینە تێدا

یارکا من کیژە، بەلێ یا دمال بابێدا

کچک دبێژیت

رەشاڤە ب دار وبارە

بەژنا کورە لاوکی من روحانا خارە

دێ من ب دەنێ بێ پارە

کچک دبێژیت

هەی شێلادزێ گوندێ مەزن

سەردا جویە، دبندا رەزن

دوستا لاوکێ خو هەر ئەزم

کورک دبێژیت

باگێرا چیانە

بەردا دەشتە پشتدا چیانە

مخابن تەرمێ لاوکێ من هێلا دجهێ خەریبیانە

کچک دبێژیت

هەی شێلادزێ یا ب کەڤرە

سەردا جویە، دبندا پرە

ناڤێ لاوکێ من طاهرە

کورک دبێژیت

حوجاڤا یا دکۆرێدا

مالا کچکێ دسەرێ رێدا

من کچکا دەلال خاست فەلەکێ دەورانەک لێدا

کچک دبێژیت

حەیران تێت ژکەمەکا

تەقینا شمکێ یە وهرێنا چەکا

تە چاڤێ ل من، دلێ ل گەلەکا

کورک دبێژیت

راڤینا پێش ئورمانا

مەمکێت یارکا من قەهوا فنجانا

هندی ئەز ڤەدخوم، ناگرن شوینا کوڤانا

کچک دبێژیت

دێ هێن ژباشکالا

زنجیرا سەعەتێ شوربو سەر شالا

ئەڤینا من وکورە لاوکی، بو یا مەم وزینا ئالا

کورک دبێژیت

زێوکێ بێما ، یا دکورێدا

روژ هەلات وشەڤێ لێدا

خوزی حەماهیلا زێری بامە دبەر بەژنێدا

کچک دبێژیت

ژئیسیا هەتا مێرتەکێ

تاژیا دابو ل دیف وەردەکێ

وەیلا ل منێ ل مالا بابێ

 بێ تالعێ ل مالا مێرێ بێ فەلەکێ

کورک دبێژیت

بهارە ل گوندێ پێدا

هەوای ل تاکێ روحانێدا

خوزی من زانیبا سێنگ وبەرێت تە بو کێنە درێدا

کچک دبێژیت

ناڤێ گوندێ مە گوندکە

گیایێ گوندی مە ب گوپکە

ئاڤا گوندی مە ب سرکە

ناڤێ کورێ مەختارێ گوندێ مە کورکە

کورک دبێژیت

کێلە رەشێ شینە

خەملا هێتوتێ چنار وبینە

مرن ئەمرێ خودێ یە

ڤێرێ جهو مەوتنێ مە نینە

کچک دبێژیت

بەرچیایێ دینن

مال ومێر وەرن چیایێ ب هەلینن

ئەز گەلەکا خەریبم، دا دەلالێ دلێ خو تێر بینم

کورک دبێژیت 

زێوکێ بێما ، یا دکورێدا

روژ هەلات وشەڤێ لێدا

خوزی ئەز حەماهیلا زێری بامە دبەر بەژنێدا

کچک دبێژیت

دێرەلوکی بەروبایە

چوار دەروێشا دەف لێ دایە

هەچیێ کورە دەلالێ دلێ من نە نیاسیت

یێ بەژن بلندە رەنگ ئاغایە

کچک دبێژیت

هەرێ شاخکێ تو چەندا شینی

تو گیایێ مێرگا دحەلینی

بەروژ ونزارا دکوزرینی

ما تو ژخودێ وپێغەمبەرا ناترسی

تو ڤان لاو وجحێلا دحەوینی

کچک دبێژیت

حه‌یران جوتیارێ سێمێلێ

قه‌لینێ تێکه‌ باده‌ سمبێلێ

ئه‌ز بو ته‌ چێترم ژیا ده‌ڤه‌را نهێلێ

کورک دبێژیت

گوندێ سارکێ چەندێ هینە

چیایێ کورە ژارێ دار وبینە

هەر کەسێ یارکا من ناس نەکەت ناڤێ وێ ئاخینە

کچک دبێژیت

هەی منێ باشێ

دێ بلا ئەز خاتینەک بام سەر پرا گرگاشێ

جلک شویشتنا من کتان با

ئامان شویشتنا من شوینا نیسک وماشێ

کورک دبێژیت

چومە موشێ موش بەیارە

برنجێ موشێ بویە دارە

خوزیێت وی یێ دوتمام لێ دبیتە یارە

کچک دبێژیت

لاوکێ منو لاوکێ ئەتروشی

تو ب شەڤێ گولی، روژێ بشکوژی

ما من گەنگی شویکریە تو هندێ دلسوژی

٢- باژێر دحەرانوکێدا:

    دەما دانەرێ حەیرانوکێ ژشوپا گوندێ گشت وتایبەت دەردکەڤیت بەرێ خو دەتە وان باژێرێت رەخ ودۆرا. چنکی ئەڤ حەیرانوکێت مە یێ دپەیدابوین ل دەڤەرا بادینان وب زاراڤێ کرمانجی ناڤێت وان باژێرێت نێزیک یێ دهاتین دناڤ ناڤەروکا وان حەیرانوکاندا. ئەو باژێر جهێ سویک وبازارن بو، جهێ کرین وفروتنێ بو، جهێ کاری بو، چونا عەسکەریێ بو ل دەڤ جحێل وتولازان. ل ڤان جهان خەریبیێ جهێ خو دکرە ناڤ هش وخەیال وهزرێت وان دا کو چەند مالکێت حەیرانوکان ب ئێک ودو بێژن. زۆربەی وان باژێر ئەڤەنە: ئامێدیێ، دهوک، زاخو، مێردین، حەبانیێ، ئو مویسل وچەند باژێر ووەلاتێت دی.

کچک دبێژیت

کورە لاوکێ من تێتن، تیت باژێرا

سەعەت زێرە کەڤتیە بەرگەرا ڤێ شالێرا

دێ بلا پیرە مێرکێ من مربا

دا من خورتەکێ ژحینێ خوەرا بەردابا بەر مالێرا

کچک دبێژیت

ئامێدیکێ ل سەر بەری

دێ وەرن بچینە سەرشویری

بەرێ خو بکەین پێغەمبەری

دەلالێ دلێ من زاڤایە تێت سویلاڤێ

هەوارا من خودێ هەمی بچینە سەری

کورک دبێژیت

کچێ جانێ خوشی دخوشن ل ئامێدیێ

تە چاڤ رەشێ بری سپیێ

بلا رۆژێ سیهو سێ جارا

ئەز گۆری وان کەزی وبسکان ببم

یێ دکەڤنە سەر کێلەکێ سەر پانیێ

کچک دبێژیت

ئامێدیێ ب کەلاتە

بەردا رویبارە وپشت دا وەلاتە

عەزیزێ دلێ من دێ تو دەستێ خو

دناڤ تەنگا زراڤ وەرینە

ستێرا سپی ل مە هەلاتە

کورک دبێژیت

من کچک دیت ل بەر عولیێ

دەرسوک ئالاند ل بەر قودیێ

وەزێ چنگلێ دەلالا دلێ خو بگرم ب رەڤینم

حەفت قویناغا ژوێڤە ل ئامێدیێ

کچک دبێژیت

هەی منێ بێ هیڤیێ

دێ بلا وەزێ خاتینەک بام

ل سەر بەرێ ئامێدیێ

جلک شویشتنا من کتان با

ئامان شویشتنا من سوینا قابلیێ

کچک دبێژیت

فیستان سۆرێ کچکا ئامێدیێ

کاغەزەکێ فرێکەمە حەبانیێ

ئەڤە حەفت سالە لاوکێ ل عەسکەریێ

کچک دبێژیت

کەلا ئامێدیێ دەربەندە

سپنێ بادینا کور وکەندە

کچک کوچەرە کورک رەڤەندە

کچک دبێژیت

ئامێدیێ ب شیرە

پشتێ فشێشە بەردا خابویرە

دێ تو وەرە دەستا ل گەردەنا زەر وەرینە

عەزیزێ دلێ من وستێرا سپێدێ یا لمن وتە نە دویرە

کچک دبێژیت

کچکا ئامێدیێ

کا فیستانێ سۆرێ حەدادیێ

ئەز دێ کاغزەکێ فرێکەمە حەبانیێ

ئەڤە حەفت سالە کورە لاوکێ من ل عەسکەریێ

کورک دبێژیت

دهوکێ یا بێ بنە

ئینشەلا ب سەردا بهێت بەرکێ مەزنە

خودێ بەس ب هێلیت یارا منە

کچک دبێژیت

ڤێ دهوکێ سەر نشیڤە

خەنجەرا فەرماندێ من کاڤلان زیڤە

بەلێ سەد حەیف ومخابن

ئەڤروکە ئەم هێلاین ب خافلە تیڤە

کورک دبێژیت

چومە دهوکێ سەرێ چەمی

سەردا جسرە، دبندا گەمی

پشتی دوستا من عەبدالا خودێ

خویشکێت منن ژنک هەمی

کچک دبێژیت

ڤێ دهوکێ یا دکورێدا

بەفر وباران کەتنە تێدا

ئەڤینا من وکورە لاوکێ من

سالا ئەڤ سالە چو ب ئاڤێدا

کورک دبێژیت

هوکێ ل بەر هوکێ

خودێ خراب کەت مالا دوژمنێت ڤێ دهوکێ

یێ ل مە دکەن تەدریبا سەر چوکێ

کورک دبێژیت

چومە دهوکێ یا ب لەڤەنە

سەرێت وان هەردو لەڤەنا دو گولتەنە

بنێت وان لەڤەنا توز گەڤزکێت من وتەنە

کچک دبێژیت

حەیران هاتە زاخویێ

یێت پاخلا حەیرەنی توڤێ هێرویێ

کچکا شیکر بیژنا دل چویێ

کورک دبێژیت

به‌ژنا بلند وه‌خته‌ بشكێ

ئه‌ز دێ چمه‌ زاخوكا ره‌نگين 

كه‌مه‌ره‌كا زێری چێكه‌م ل قايدا پشتێ 

ئينشه‌لا خودێ مالا وی خراب كه‌ت

يێ نه‌ هێلای بكه‌ڤمه‌ به‌ر كێله‌كێ ل به‌رته‌نشتێ

کچک دبێژیت

خانیێ لاوێ من ل پشتا چویێ

بەژنا بلند دهێت ژزاخویێ

لاوێ من زاڤایە ببەن سەرشویێ

کچک دبێژیت

چـوومـە  زاخـو يـێ  چـەنـدا هـينـه

دبـەردا دهێت(خـابـير)ێ شـینـە

ڪوركـو ديـنـو وەرە مـن ژ بـابـێ مـن بـخـوازه

هـەڪه ئــەز نـە دام مـن بـرەڤـينـه

کورک دبێژیت

دلبەرێ دینێ

من دا باژارێ مێردینێ

ئەز دێ تە خازم ل ڤێ هاڤینێ

کورک دبێژیت

حەبانیێ دار وزەیتونە

یێ ل بن ڤەداین چادر وخیڤەتێت عەسکەرێ عیراقێنە

ئەم غەریبین غەریب دارین روخسەت نینە

کورک دبێژیت

چومە مویسل ل جسری دهێمە

من زیرەک دیت مسقال کێمە

ئەز نزانم بو یارکا خو بکەمە

هونگوستیرکا تلێ یان بکەمە خزێمە

کچک دبێژیت

چومە مویسل جسرێ بەستی

من زیرەک دیت ومسقال شکەستی

من نەزانی دێ بو کورە لاوکێ خو

کەمە رەختێ سەرملی یان تڤەنگا دەستی

کورک دبێژیت

چومە مویسل ل بەر دوکانا

مە پرسیارکر دقودیکا ونەینیکا ئەڤێت جانا

خودێ بەختێ نەیار ودوژمنێت مالا بابێ من

نەئینیت هەمی گاڤا، جاسیسن ل کولانا

کچک دبێژیت

چومە مویسل ل بەر دوکانا

منێ پرسیارکر ژدەرگەهڤانا

ئێکێ خێر خواز نەبو بێژیت

لاوکێ تە یێ نەساخە ل خەستەخانا

کورک دبێژیت

شەتێ مویسل ب کەلەک وکەوسەرە

خاتینێت میسلیا هاتن  بزەند وبازنێت خوە دایە سەرە

گەلی عەرەبا دێ هوینێ عەزەتا مە کوردا  بکەن

ل مالکێت خوڤە دویرین، یارکێت خوڤە دل کەسەرە

کچک دبێژیت

چومە مویسل کورسی کورسی

عەسکەر هات ومن لێ پرسی

هەچی کەسێ لاوکێ من نە نیاسیت

کولاڤ سۆرە عەبا نڤسی

کورک دبێژیت

شەتێ مویسل یا ب کەلەک وگەمینە

کچکێت میسلیا هاتن  بزەند وبازنێت خوڤە سۆر وسپینە

گەلی عەرەبا ئەمێ کەفتینە سەر بەختێ وە هوینێ عزەتا مە بکەن

ئەمێت دمالکێت خو ب دویرکەڤتن

ل دەیبابێت خو دبێ هیڤینە

کچک دبێژیت

ئەز دێ چمە مویسل سریچ خانێ

دێ خۆهاڤێ مە سەر بەختێ سوڵتانێ

دا لاوێ من بەردەت ژ قەید وزیندانێ

کورک دبێژیت

چوم مویسلێ ل سەرێت رێکا

من پرسیار کر ژمەزن وبچیکا

کێ دیتیە خەنا نەچیت، ژدەستێت زاڤا وبیکا

کچک دبێژیت

حەیران حەدادە

هەرە میسلێ کورتەکا رادە

وەرە ناڤ دەرێ، تە چ مرادە

کورک دبێژیت

هەرە میسلێ خو ب دە رەڤانێ

عەزیزا دلێ منێ

نە ئێنە سەر خو ناڤێ بەردانێ

کچک دبێژیت

چومە موسل، ل دیاربەکر

دەرگەڤانا دەرگە ڤەکر

برینێت دەلالێ دلێ من گەلەکێت کویرن

چ دختور وچ حەکیما دەرمان نەکر

٣٠-١-٢٠١٨ دهوک - ئەحمەد عەلی

 جهو شوین دحەیرانوکێدا: PDF