Poesìe 1
An Paradis
Com a l’é ch'i soma ancora ansem
se dovèisso dite lo sai nen
ti l'has fam-ne tante e tante dj’èite ëm në faras
ma mi son nen bon a andemne via
quand la neuit arives da për lì
e të cóges sì davsin a mi
mi dovrìa rusete e ciamete spiegassion
ma fon finta ëd deurme e mando giù
përchè quand mi son con ti mi më sento ën Paradis
përchè quand mi son con ti mi a l’hèi pì gnun sagrin
e dësmentio tut ël mal che l’has fame e më faras
përchè quand mi son con ti mi më sento viv
com a l’é ch'i soma ancora ansem
se dovèisso dite lo sai nen
con ij tradiment e ij dëspiasì che t'am fas passé
mi dovrìa odiete ma ët veuj ben.
_________________________________________________________
Davanti a ca
E më càpita ëd vòte quand i viagio e son lontan
ëd pensé al me pais e a la mia stra
ai dumìniche matin quand la mëssa l'é finìa
e la gent së treuva an piassa për parlé
e im vego ancó masnà mentre coro an pressa a ca
e mia mare ch'a prepara da mangé
e më vego ancó masnà coj gënoj sgarognà
mentre gieugo con me frel davanti a ca, davanti a ca
E ripenso ai bialere con ij pere për lavé
e ij fomne con ij man ansavonà
ai locande piene 'd fum ai partìe al tressèt
a j'ansian con ël vin drinta ai bicer
E am càpita ëd vòte quand i viagio e son lontan
d'avèj veuja ëd core an pressa a ca.
_________________________________________________________
Con ti
Se l'infern a esist e s'a fussa pròpi sì
mi 'm lamentarìo nen, son sigur
se an tut lòn ch'i chërdo i fussa gnente ëd ver
m' anteresserìa gnanca 'n po'
se la lun-a fussa mach ën quàder pendù an cel
e ij stèile fusso mach ëd cer
se tut lòn ch'i vego fussa n'ilusion
më starìa anche bin parèj
Se chësta vita-sì l'é mach ën seugn për mi
mi veuj sogné për sempre se andrinta al seugn ti seus co ti
se chësta realtà l'é mach na fantasìa
mi pregarìo Nosgnor përchè 'm fasèissa mai dësvijé
Ma se la realtà l'é che mi son nen ben finì
e che ti seus mach na mia anvension
se mi son un mat ch'a dev cure-se për varì
veuj resté malavi ma con ti.
__________________________________________________________
Nervos
Fòrse l'é mach colpa dël cafè o dël travaj che më pias nen
fòrse l'é anche la monotonìa ëd chësta vita che ògni di l'é istessa
fòrse l'é sta veuja ch'am pija ëd fé ogni còsa sempre 'n pò pì ampressa
fòrse l'é anche an pò colpa mia che 'm contento mai ëd lòn che l'hèi
i son servos, son nervos, si! son nervos, son nervos
i son servos quand l'é ancó matin prest
son nervos quand a riva mesdì
i son nervos quand l'é ora 'd cogeme e deurme
saro j'euj ma deurmo nen, deurmo nen, deurmo nen
Ma esse sensa sòld al di d'ancheuj l'é 'n pò na mesa maladìa
a-i é tanta ròba che më pias chë dev catela për portemla via
përchè quand i cato i ston bin e më sento pròpi arlassà e felice
ma se veuj ij sòld për tut dev travajé da la matin a sèira
Serte vòlte 'm sento pròpi stanch e 'm fermerìo volënté
më ven veuja ëd lassé perde tut e andé a vive ansima na montagna
ma peui vardo j'èiti antorn a mi chë resisto e continuo a andé avanti
taco torna a core ansema a lor e capisso che an fond an fond më pias
esse nervos.
__________________________________________________________
Persian-e
Tira giù ij persian-e lassa mach un fil ëd sol
'stà 'n pò lì an pé fate vardé
ti sas lòn che 'm pias ti sas 'ma feme an-namoré
quand të butes chëlla sottoveste mi sai pì cò fé
e më pias l'odor ëd la toa pel dël tò sudor
la toa schina lùcida e bagnà
lassa fòra a j'èiti chësta istà co 'l sò calor
pijoma ansema chësta stra chë 's pòrta ai confin dël mond.
__________________________________________________________
La còsa pì pressiosa
A-i é 'd vòte chë 'm dësmentio chë seus sì
chë seus mia e chë 'm veus ben
e më lasso ambrojé da chësta vita
che më pòrta via da ti
quante ocasion për sté an pò ansema che l'hèi nen savuje pijé
quante ore a vardé la tele sensa dite gnanca " Beh ! "
sensa sté con ti
Ti che për mi seus ùnica
ti chë seus la còsa pì pressiosa
ti chë të stofies mai ëd mi
e aspetes che 'm ricòrdo chë seus sì
A-i é 'd vòte chë sai gnanca mi cò l'hèi
son con ti ma penso a d'àut
e më perdo dinta a mila folescas
che më porton via da ti
passo tut ël temp a travajé për vagné quat sòld an pì
coro coma 'n mat ma se i penso lo sai gnanca mi përchè
i ston nen con ti.