1.3.1. Nola kalkulatu inflazioa?
Lehendabizi, kontuan hartu behar dugu zer ondasunen prezioak aztertuko ditugun. Milioka ondasun daude, baina normalean erosten ditugun ondasunen eta zerbitzuen prezioak dira interesgarrienak guretzat.
Horrela, inflazioa neurtzeko, Kontsumo-Prezioen Indizea erabiliko dugu. Inflazioa KPIaren aldakuntza-tasa da. Formula honen bitartez kalkulatzen da:
INFLAZIOAt = [(KPIt – KPIt-1) / KPIt-1] * 100
Formula honetan, t aldi jakin bat da, eta t-1, aurreko aldia.
KPIa kalkulatzea ez da erreza. Kontsumo-ondasunak hainbat taldetan sailkatzen dira, kontsumitzaileek erostean hartzen dituzten erabakien arabera. Ondasun-talde bakoitzak pisu bat izango du besteen aldean, pertsonek ondasun-multzo bakoitzean zenbat gastatzen duten begiratuta. Horrela, ondasun-talde bakoitzaren pisuaren arabera eta haien prezioen arabera kalkulatzen da aldaketa horien batez besteko indizea. Horixe da, hain zuzen ere, Kontsumo-Prezioen Indizea.