Enpresa batek baliabideak behar ditu bere produktuak fabrikatzeko. Baliabide horiek –ekoizpen-faktoreak– lurra, lana, kapitala eta ekimena dira, eta, zenbat eta handiagoa izan ekoizpen-maila, orduan eta kantitate gehiago beharko dugu.
Beraz, enpresak ekoizpen-faktoreak behar ditu, eta, horiek kontratatzeagatik, prezioa ordaindu behar du. Ekoizpen-faktoreak aportatzen dituztenek diru kopuru bat –errenta– kobratzen dute horrela. Eta, errenta horri esker, errentadunek bere bizitzarako behar dituzten kontsumo-ondasunak lortzen dituzte.
Herrialde batean dauden enpresa guztiak hartzen baditugu kontuan, haien ekoizpenaren balioa da BPGa. Eta balio hori, errenta moduan, herritarren artean banatzen da. Beraz, balio hori handiagoa baldin bada, herritarrek, batez beste, diru gehiago izango dute gastuetarako.