1- پێويسته‌ خوێندنى (ئێواران) له‌ بەشە (زانسته‌ مرۆڤایەتییەکان) ى زانكۆ و په‌يمانگه‌ (حكومييه‌كان)  بكرێته‌وه‌. 

2- پلانى وەرگرتنى خوێندنى (ئێواران) نابێت لە ڕێژەى (100%) ى پلانى پەسندکراوى بەشەکانى (بەیانیان) زیاتر بێت.

3- دەزگاى سەرپەرشتى و دڵنیایى جۆرى بە دواداچوون دەکات بۆ دڵنیایى لە ئاستى زانستى و کوالێتى بەشەکان.

4- پێشکەش کردن بە شێوازى (ئۆنڵاین) دەبێت لە هەمان لاپەڕەى ئەلیکترۆنى تایبەت بە پێشکەش کردنى           (زانکۆلاین ، پارالێل). 

5- بۆ زیاتر دەستە بەرکردنى کوالێتى و دڵنیایى جۆرى ، تاقیکردنەوە کۆتاییەکان لە خوێندنى (ئێواران) لەگەڵ خوێندنى (بەیانیان) بەیەکەوە ئەنجام دەدرێت و بە هەمان پرسیار دەبێت.

6- کاتژمێرەکانى دەوامى خوێندنى (ئێواران) دەبێت بە هاوتاى کاتژمێرەکانى خوێندنى (بەیانیان) بێت لە (8 کاتژمێر کەمتر نەبێت).

7- لە زانکۆکاندا هەر بەشێک لە (کۆلێژ و پەیمانگەکان) ئەگەر لە خوێندنى (بەیانیان) قوتابى/ خوێندکارى نەبێت ،          ئەوا بۆى نییە لە دەوامى (ئێواران) قوتابى/ خوێندکار وەربگرێت.

8- کۆنمرەى وەرگرتن بۆ کۆلێژ لە (60%) کەمتر نەبێت وە بۆ پەیمانگە لە (55%) کەمتر نەبێت ،                                           ئەم مەرجە دەرچووانى ئامادەییە (پیشەییەکانیش) دەگرێتەوە کە تەنها مافى  پێشکەش کردنیان بۆ پەیمانگە                  هەیە بە ڕەچاوکردنى هاوپسپۆرییان. 

9-کۆنمرەى وەرگرتن لە قەزاو ناحییەکان و ئەو شوێنانەى کە زانکۆى (ناحکومى - ئەهلى) یان لێ نییە بە هەمان کۆنمرەى زانکۆ (ناحکومى - ئەهلى) یەکان دەبێت.

10- بۆ وانە پەیوەندیدارەکانى پسپۆرییەکان ڕەچاوى (کریدت) دەکرێت.

11- پێشینە (ئەولەویەت) بۆ دەرچووانى ئامادەیى ساڵى خوێندنى (2022-2023) دەبێت تا ڕێژەى (80%) ، وە لە کاتى پڕ نەبوونەوەى ئەو ڕێژەیە بە دەرچووانى ساڵانى ڕابردوو  و دەرەوەى هەرێم پڕ دەکرێتەوەو ڕەچاوى تەمەن ناکرێت ، جگە لە کۆلێژ و بەشەکانى (پەروەردەى وەرزش) کە تەمەنیان نابێت لە (30) ساڵ تێپەر بکات.  

12- ئەو قوتابى/ خوێندکارەى کە دەرناچێت (ڕاسب) دەبێت و خوێندنى (ئێواران) لەو قۆناغەدا نامێنێت ،                 ئەوا بە میواندارى دەچێتە خوێندنى (بەیانیان) بە سیستەمى (پارالێل) بە تەواوى کرێی خوێندنى (پارالێل) ،                        وە بڕوانامەکەى بە (ئێواران) دەبێت.

13- گواستنەوە بۆ وەرگیراوان لە خوێندنى (ئێواران) بۆ بەشى هاوشێوەى (بەیانیان) ناکرێت لە بەر جیاوازى کۆنمرە. 

14- بە مەبەستى هاندانى خوێندن ئەگەر قوتابى/ خوێندکار کە بە سیستەمى (ئێواران) وەرگیراوە  لە هەر ساڵێک یەکەم بوو لە سەر سەرجەم قوتابیان/ خوێندکارانى بەشەکەى ئەوا لە (75%) ى کرێى خوێندن دەبەخشرێت و ئەگەر دووەم بوو لە (50%) وە سێیەم لە (25%) ى کرێى خوێندن دەبەخشرێت لە قۆناغى دواتر.

15- سەبارەت بە کرێى خوێندنى (ئێواران) لە لایەن ئەنجومەنى زانکۆوە دەست نیشان دەکرێت و بە پێى تێچووى بەشەکە و  پێداویستییەکانى ، بە مەرجێک ڕێژەکە کەمتر نەبێت (70%) ى نرخى خوێندنى بەش و کۆلێژى هاوشێوەى زانکۆ (ناحکومی - ئەهلى) یەکان لە لایەن وەزارەتەوە پەسەند دەکرێت ، بۆ ئەم مەبەستە زانکۆکان دەبێت کرێى خوێندن                  لە بەشەکانى کە خوێندنى (ئێوارانیان) هەیە ڕەوانەى وەزارەت بکەن.