1- بۆ ئەمساڵى خوێندنیش سیستەمى کریدت (وحدات) پەیڕەو دەکرێت لە سەرجەم زانکۆ (حکومى و ناحکومى - ئەهلییەکان) جگە لە (کۆمەڵەى پزیشکى).

2- لەم سیستەمە ئەژمارکردنى (کریدت) بۆ وانە پەیوەندیدارەکانى هەر بەشێک پەیڕەو دەکرێت ، واتە کۆنمرەى کۆتایى قوتابى/ خوێندکار  (70%) ى لە سەر کۆنمرەى پۆلى دوانزە دەبێت و (30%) ى نمرەى لە سەر وانە پەیوەندیدار        بەو پسپۆرییەى کە پێشکەشى دەکات ، بۆ نمونە / وەرگرتن لە بەشى ماتماتیک (کریدتى وانەى بیرکارى لە وانەکانى تر زیاترى پێدەدرێت).

3- ئەم جۆرە وەرگرتنە بە پرۆگرامێکى تایبەت لە لایەن وەزارەتەوە ڕێکخراوە وە قوتابى/ خوێندکار داواکارى خۆى پێشکەش بەو بەش و کۆلێژانە دەکات کە ئارەزوویەتى ، دواى داخل کردنى (ناوى بەکارهێنەرو ووشەى تێپەر) لە لایەن قوتابى/ خوێندکار لاپەڕەیەکى تایبەتى بۆ دەکرێتەوە کە هەموو کۆلێژ و بەشەکانى (زانکۆلاین ، پارالێل ، ئێواران)              لە خۆ دەگرێت ، واتە قوتابى/ خوێندکار سەر پشکە لە هەڵبژاردنى هەر جۆرە سیستەمێکى خوێندن. 

4- داواکار مافى پێشکەش کردنى بۆ چەند بەش و زانکۆى جیاواز هەیە ، بە مەرجێک لە (50) هەڵبژاردن کەمتر نەبێت ، ئەگەر کەمتر بوو ئەوا پێشکەش کردنەکەى سەرکەوتوو نابێت.

5- کەمترین کۆنمرەى پێشبڕکێى وەرگرتن بۆ خوێندنى (بەیانیان) بریتى دەبێت لە (65%) بۆ کۆلێژ وە (60%)                 بۆ  پەیمانگە ، جگە لە کۆلێژەکانی (کشتوکاڵ ، زانستە ئیسلامییەکان) کەمترین کۆنمرەى پێشبڕکێى وەرگرتن بۆ خوێندنى (بەیانیان) بریتى دەبێت لە (60%) وە بۆ سیستەمى (پارالێل) (55%).

6- دەرچووانى ئامادەییەکانى هەرێمى کوردستان لقى (زانستى و وێژەیى) بۆ ساڵى خوێندنى (2022-2023) دەتوانن داواکارى پێشکەش بکەن بۆ پێشبڕکێ لە دەرچووانى خولى (یەکەم و دووەم)دا ، هەروەها دەرچووانى ساڵى خوێندنى (2021-2022)کە لە هیچ زانکۆیەکى (حکومى و ناحکومى - ئەهلى) وەرنەگیراون مافى پێشکەش کردنیان دەبێت. 

7- بۆ بەشەکانى (وەرزش ، هونەرە جوانەکان) وەرگرتن بە شێوەى (چاوپێکەوتن وتاقیکردنەوە) دەبێت و بە هەمان شێوەی ساڵی ڕابردوو لە زانکۆکان ئەنجام دەدرێت.