-1ڕێژەى (40%) ى پلانى وەرگرتن لە کۆلێژەکان وە (50%) ى پلان لە پەیمانگەکان بۆ سیستەمى (پارالێل) تەرخان دەکرێت ، جگە لە کەس و کارى شەهیدان و ئەنفالکراوان و زیندانیانى سیاسى ، بەڵام سەبارەت بە زانکۆکانى دەرەوەى شارە گەورەکان کە خوێندنى تایبەتیان تێدا نییە ئەگەر پلانیان پڕ نەبووەوە ئەوا دەکرێت چەند نمرەیەک کەمبکرێتەوە ، بە مەرجێک (10) نمرە تێپەر نەکات.

2- تەمەنى پێشکەشکار نابێت لە (35) ساڵ زیاتر بێت بۆ کۆمەڵەى پزیشکى (پزیشکى ، پزیشکى ددان ، دەرمانسازى)       وە (40) ساڵ بۆ کۆلێژ و پەیمانگەکانى تر وە (30) ساڵ بۆ (کۆلێژى وەرزش).

3- پێشکەش کردن بۆ خوێندنی (پارالێل) بە هەمان شێوەى سیستەمەکانى (زانکۆلاین ، ئێواران) دەبێت. 

4- سەبارەت بە هەر کێشەیەکى تر کەیسەکان لە لایەن زانکۆوە بەرز دەکرێتەوە بۆ وەزارەت بۆ چارەسەر کردنیان         بە شێوەیەک کە لە بەرژەوەندى ئاستى زانستى قوتابى/ خوێندکار بێت.

5- کۆنمرەى پێشبڕکێ بەم شێوەیە دەبێت:

* لە کۆلێژەکانی (پزیشکی ، پزیشکی ددان ، دەرمانسازی) ڕەچاوی (30) نمرە کەمتر لە کۆنمرەی وەرگیراو لەو ساڵەى خوێندندا دەکرێت.

* لە کۆلێژەکانی ئەندازیاری و یاسا ڕەچاوی (35 ) نمرە کەمتر لە کۆنمرەی وەرگیراو لەو ساڵەى خوێندندا دەکرێت.

* بۆ کۆلێژەکانى زانستە تەندروستییەکان و هەر بوارێکی تر ڕەچاوی (45) نمرە کەمتر لە کۆنمرەی وەرگیراو لەو ساڵەى خوێندندا دەکرێت.

6- کرێی خوێندنی (پارالێل) لە لایەن ئەنجومەنی زانکۆوە دەستنیشان دەکرێت بە پێی تێچووی بەشەکە و پێداویستییەکانى لە لایەن وەزارەتەوە پەسەند دەکرێت ، بۆ ئەم مەبەستەش زانکۆکان دەبێت کرێى خوێندن لە هەر  بەش و کۆلێژێک رەوانەى وەزارەت بکەن.

7- بە مەبەستى هاندانى خوێندن ئەگەر قوتابى/ خوێندکار کە بە سیستەمى (پارالێل) وەرگیراوە لە هەر ساڵێک یەکەم بوو لە سەر سەرجەم قوتابیان/ خوێندکارانى بەشەکەى ئەوا لە (75%) ى کرێى خوێندن دەبەخشرێت و ئەگەر دووەم بوو لە (50%) وە سێیەم لە (25%) ى کرێى خوێندن دەبەخشرێت لە قۆناغى دواتر.

8- لە بەر زۆری ڕێژەی دەرچووانی پۆلى دوانزەی ئامادەیی بۆ ئەمساڵی خوێندن کورسی خوێندنی (پارالێل) لە زانکۆکان   بۆ ساڵى خوێندنى (2023-2024) تەرخان دەکرێت بۆ دەرچووانی ئەمساڵ و ساڵی پێشترى خوێندن ، وە ئەگەر  کورسى بە تاڵ مایەوە ئەوا بەو پێشکەشکارانە پڕ دەکرێتەوە کە (5) ساڵ بە سەر دەرچوونیان تێپەر نەبووە.

9- دەرچووی کۆلێژ بۆیان هەیە داواکاری پێشکەش بکەن و لە سەر بنەمای کۆنمرەی ئامادەیی پێشبڕکێ دەکەن ،           بە مەرجێک کۆنمرەى قوتابى/ خوێندکار لە (60%) کەمتر نەبێت بۆ کۆلێژ وە (55%) بۆ پەیمانگە ، جگە لە           (پەیمانگە تەکنیکییە پزیشکییەکان) کە دەبێت نمرەیان لە (60%) کەمتر نەبێت.

10- ڕەچاوی وانە پەیوەندیدارەکان دەکرێت (دروس المفاضلە) لە کاتى پێشبڕکێ لە سەر کورسییە کۆتاییەکانى وەرگرتن.

11- بە مەبەستى هاندانى داواکارى خوێندن بۆ دەرچووانى ئامادەییەکانى ووڵاتەکانى دەوروبەرى هەرێمى کوردستان و بیانى و نێودەوڵەتى دەکرێت ڕێژەیەک لە دەرەوەى پلانى وەرگرتن دیارى بکرێت بۆ وەرگرتنیان بە سیستەمى (پارالێل) ، لەگەڵ چاوپۆشى کردن لە هەندێ مەرج وەکو (تەمەن ، ساڵى دەرچوون ، کۆنمرە) ئه‌م بڕگەیە ئه‌و قوتابى/ خوێندكارانه‌ش ده‌گرێته‌وه‌ كه‌ به‌ ڕەچەلەک عێراقين بەڵام هەڵگرى ڕه‌گه‌زنامه‌ى بيانين ، به‌ مه‌رجێک كه‌ پۆله‌كانى       (10 ، 11 ، 12) ى له‌ ده‌ره‌وه‌ى ووڵات ته‌واو كردبێت.

وەزارەتی پەروەردە  دەبێت لیستێک بە ناوی ئەو پێشکەشکارانە دوای یەکسان کردنی بڕوانامەکانیان ڕەوانەی ناوەندی وەرگرتن بکات بۆ دابەش کردنیان بە سەر کۆلێژ و پەیمانگەکاندا. 

12- ئەو قوتابى/ خوێندکارانەى بە سیستەمى (پارالێل و ئێواران ) وەردەگیرێن لە گشت بەشەکانى زانکۆى (کۆیە)                 مافى گواستنەوەیان نیە تەنانەت ئەگەر سەرجەم مەرجەکانى گواستنەوەشیان هەبێت.