کار وژیان

کێلان وچاندن

پێشی

دکەڤندا حەتا نوکە جوتیارێ کوردێ چەلەنگ جوت وکێلانا کری ل سەر ئاخ وخاکا خو ب شێوەکێ پەیت ورێک وپێک وجان. ئو شیایە قویت ودکاکێ خو بەرهەڤ کەت ب هێزا خو یا ئێکانە وتایبەت و بهاری کاریا کەس وکارا دا کو نەمینن برسی و هەوجەی چ لایێت دی نەبن. ژبەر ڤێ چەندێ یێ ب دەست خوڤە یێ ئینای گەلەک ئامیرەت بوڤی کاری چ ژلایێ خوڤە یان ب چێکرنا چەند لایێت دی. ئەڤە یێ هاتیە وەرگرتن وزانین ژ باب وباپیر وباب کالا ب رەنگەکی درست وتازە. هەر ئێکی ژلایێ خو ڤە یێ هەولدای بو پێش ڤەبرنا چەکسازیا ڤان ئامیرەتا وکارێت ئیشی ژکێلانێ بگرە حەتا دگەهتە چاندنێ وئاڤدانێ وڤەکێشانێ ودروین وچنینێ و کومکرن وجەماندن وعومبارکرنێ.

دیڤ زانین وشیانێت خو ئەز دێ هندەک پێ زانینا دەمە بەر چاڤیت خویندەڤانێ هیژا ئو ئەز جهێ لێ بورینێ ژێ دکەم ئەگەر کێم ولەنگی هەبن. ئومید ورامانا من ئەوە ئەڤ پەیڤێت کەڤنێت کەلپوری بمینن ساخ ونەهێنە ژبیرکرن ئو نەیا دویرە زور یێت هاتینە ونداکرن وچووینە دەر ژفەرهنگا زمانی کوردی. ئو نوکە زوربەی ژوان ناهێنە ب کارهینان ژبەر گەلەک ئەگەرا چ لایێ پێش کەڤتنا جڤاکی یان تەکنولوجی بەس مانا وان جهێ شانازیێ یە وسەر بلندیێ یە ل نک مللەتێ مە یێ کورد.

ئەڤە چەند سالوقدان وناڤێت خاک وئاخ وعەردینە :

· زەڤیا بەیار: ئەو پارچە عەردە یێ کو چوت لێ نەکری ونەهاتیە چاندن ب چێ رەنگا.

· زەڤیا دێم : ئەو عەردە یێ کو نە هێتە ئاڤدان ژلایێ جووتیاری ڤە. بەلێ دهێتە ئاڤدان ب رێکا بەفرو باران ڤە.

· زەڤیا ئاڤی : ئەڤ جورە عەرد دهێتە ئاڤدان ب ئاڤا کانیا وجوکێت رویبارا وئاڤێت گولا.

· چول ودەشت : ئەڤە عەردەکێ ب زاخە بەس بەر ب چاندنێ ڤە نە ئێخستی یە، یێ بێ دار وبارە ئو نە هاێتە ئاڤدان.

· میری : ئەو عەردە یێ نەهاتیە ئفرازکرن یێ هەمیانە، خەلکێ گوندەکی یان گەلەک گوندا یان گەلەک خێزانا.

· ئاقار: ئەو پارچیت عەردی نە ب تەنشتا چیاڤە بوهەمی خەلکێ گوندی.

· لات : ئەو پارچا عەردی یە ئەوا دهێتە چاندن ب زەرزەواتی ودرامەتی دی.

· رەز ونزبە : دێم وئاڤی نە ، دارێت هژیر وباهیڤ وتری لێ دهێنە چاندن.

· پارچیت عەردی ئەوێت رەخ گوندی ئو لناڤ خانیو مالا بو چاندنا چەند رەنگێت زەرزەواتێ وەختانە.

· شویرهـ : دهێتە دانان وئاڤاکرن ب بەر وکەڤرا وەک توخیب وسنورو تەعان وپەرژان دناڤ بەرا چەم وبستان ورەزا بو ژێک جوداکرنێ وبەرنیاسینی ب رەنگەکێ جان وبەند وتایبەت، پلا بلنداهیێ نێزیکێ نیڤ بەژنێ یە.

· رێک : رێکێت ئاخێنە دزراڤن بو هاتن وچونێ دناڤ رەز وچەم وبستانا.

· کولک وکوتان : ئودەکا بچیکە بو خودان کرنا چەند گیانەوەرێت مالوفی.

· کوخ : ئەو جهە بو جەماندنا قرش وریسی ودارێت سوتنێ ئو تشتێت کاری.

· کەپر : دهێتە لێکدان ژ چار ستوینێت ستویر ودرێژ، بگاریتا وشەقلا دهێتە بانکرن دگەل چولی. ب دارا یان بەرو لبنا دهێتە دیوارکرن. ئەڤە جهێ بهن ڤەدانێ ونڤستنێ یە بو خودانی دەما چاڤدان وسەخبێریێ دکەت ل هەمی وەرزێت سالێ.

کێلان:

عەرد کێلان کارێ سەرەکی یە بو بەرهەڤکرنا ئاخێ ب شێوەکێ راست ودرست د بیتە ئەگەر بو لاو ئینان وچاندنا درامەتی ئو زێدەبونێ. ئەڤ کارە دبیتە ئەگەر بو ژێک ڤەکرن و هویربون وپلوخیا ئاخێ دا توڤ جهێ خو بکەت بو شین بونێ. ئەڤە دهێتە کرن یان ب هنجاری ئەگەر عەرد یێ خوش وراست بیت ئو بێ بەر وکەڤر بیت، بەروڤاژی دهێتە کولان ب مەرا وتەڤرا وقەزما و تەفشکا یان مجرەفا ئو هندەک ئامیرەتێت دی یێت تایبەت.

دکەڤندا جوتیاری عەردی خو یێ کیلای ب هاریکاریا گیانەورا ب هنجار وگێسنێ داری. ئەو گیانەور ئەڤەبون: کەر، هێستر، چێل یان گابون...، یەک یان جوت بەس بارا پتر جوت بون چنکی ناڤێ کیلانێ یێ هاتی ژ جوتی. عەردێ شێڤێ دهێتە کێلان ل دەست پێکێ پشتی بارانا ئێکێ ل مەها دەهێ ویازدێ. پشتی هنگێ توڤ دهێتە بژاندن ئو دهێتە کێلان، جارا دووێ بو بنئاخکرنا وبەرزەکرنا توڤێ گەنم وجەهی یە. ئو هندەک جارا عەرد دهێتە کێلان بەری بارانا. دناڤ بەینا شین بونێ ئو دروینێ، هندەک جوتیار دەرمانا درەشینن ژبەر کوژتنا وان ئافاتێت تویشی دەخلی دبن ئو بەر نەهێلانا چەند رەنگێت دەغل وگیایێت نەباش وغەریب وەک زیوانی وتولکی وداسیێ وستری مشکا وخەندەلکێ ئو هندەک جوریت دی د بیژنە ڤێ ئادەکرن. پشتی چەند مەهێت بارانا بدویماهی دهێن ئو دەخل دگەهیت وزەردبێت وحشک ورەق دبیت ل مەها گولانێ وخزیرانێ وی دەمی جوتیارێ مە دێ خو بەرهەڤکەت بو دورینێ.

ئەڤێت ژێری چەند ئامیرەتن ئەوێت دهێنە بکارهینان ژلایێ جوتیاراڤە بو کێلان وکولانا خاک وعەردێت راست وب کەڤر ل دەڤەرێت کوردا:

§ هنجار یان همجار : دارێ جوتیاری بو کێلانا عەردی، دهێتە راکێشان ل دیڤ دەوارەکێ پتنێ یان جوت : جوتێ کەرا، هێسترا، چێلا یان گا، دهێتە چێکرن ژ داریێت موکم. ئەڤ هنجارە یێ لێکدایە ژڤان پارچێت سەرەکی:

١- نیرک ئەگەر جوتبن، دەپەکێ درێژە یێ کونکریە ژ هەردوو ئالا ئو دهێنە گرتن ب دوو قوتە دارکێت ستویر بو شداندنێ ل سەرملێت گیانەوەرا ژرەخێ سەرڤە ل دور حەفکێ ئو دکەڤنە سەر بالیڤکەکا کەڤلی ژسەرڤە ئو یا پڕە ژ بیشی وەکی توقێ یە.

٢- گێسن : دارە یان ئاسنە. یێ گرانە وسەر تیژە ئو یێ دوو رەخە. بڤی عەرد دهێتە کێلان وکەلشتن. ژبەر سەنگا وێ وسەرتیژیا وێ ئو شداندانا جوتیاری ل سەر گێسنی دگەل هێز وزاخێت دەوارا. ئەڤ گێسنە دهێتە گرێدان دگەل وی دارێ دهێت ژنێرکی ژبەر لڤین و چەب وخاریێ.

٣- دەستک : ئەڤە کورتە دارەکە وەک دەستکی هاریکاریا جوتیاری دکەت دا گێسنی پتر ب چیتە خار دعەردیدا.

٤- گەهک : ئەڤ پارچە، گێسنی دگەهینتە نێرکی. ئو هەردوو دارن.

٥- دوو وەریس یان کنف دهێن ژرەخێت گیانەوەرا بو کێشانا گێسنی.

٦- دارێ هاژوتنێ وپاقژکرنا گێسنی. دارەکێ درێژە جوتیار دەوارا پێ دهاژوت دەما دراوستن، ئو گێسنی پێ پاقژدکەت ژ تەقنێ.

§ بڤر : یێ دوو سەرە ژپیلای یێ هاتیە چێکرن، سەرکێ پەحنە ئو ئێک دەڤ تیژە، ئو یێ دی دەستکێ بڤری یە ئەو ژ داری یە. بو داربرینی وکەلاشتنێ.

§ قەزمە: ئەڤە وەک بڤرەکێ مازنە بو عەرد کولانێ.

§ تەڤرک : یێ سەر ئاسنە بو کولانا وان عەردێت گێسن نەگەهیتێ.

چنکو جوت وکێلانێ جهێ خو یێ گرنگی گری د ژیان مللەت کوردا ژبەر ڤێ چەندێ زور گوتن وئاخڤتن وچیروک وسەرهاتی وستران ولاوک وحەیرانوک یێت هاتینە پێ گوتن وڤەهاندن بو نمونە ئەڤە چەند گوتن وبێژەنە :

چ ب چینی دێ وی هەلینی

جوتیاری جوت نەکر، مرێبای منێکر

ما گا دکەت ئو گا دخوت

فلانکەس گایێ جوتی

خەتا خار ژ گایێ پیرە

جی جوت، عەرب لاکوت

بلا شەرێ شێڤێ بیت، نە قەرقەشا پرێزێ بیت

شیژنێ دچاڤێ مندا دبینیت بەلێ گێسنی دچاڤێ خودا نابینیت

سەر خاترا رپنەکا دەخلی، سەد بنێت جەهی ئاڤێ ڤەدخون

گوتن جوتیارو ئەو چییە دچینی گوت: هەکە شین بو دێ بینی

سێ تاڤیێت بارانێ، ناڤ به‌ینا نیسان وگولانێ، چیتره‌ ژ باگردانێ زێری ل نیڤه‌کا دیوانێ

دورین و کومکرن

دەما دەخل حشک وزەردبیت وەک رەنگێ زێری ئو دندکا گەنمی رەق دبیت، وی دەمی یا فەرە جوتیار خو بەر هەڤکەت بو دوررینێ، دڤێت ئەڤە نەهێتە کرن بەری باش وچاک چێبینا دەخلی ئو نەمینێت پشتی هنگێ ژبەر گەلەک ئەگەرا. ل دەڤەرێت مەیێت کوردا دەست پێدکەت ل هەیڤا گولانێ ئو دچیتە بەرف خزیرانێ ڤە پشتی پێنج شەش هەیڤێت زڤستان وبهارێ پێگڤە.

بەری روژا دورینێ شەنگە پالە خو ئامەدە دکەن ئو کار وکوکێ خو دکەن ب شێوەکێ راست ودرست ژهەمی لایاڤە، داس وشالوکا دهسن ومڤرەدکەن ئو تبل وقەیناغا بەرهەڤ دکەن، سپێدەکا زوی دگەل ژنکێت مەلوکدار دچنە ناڤ وەرزێ دەخلی بو دورینێ، چنکی ل دەمێ سپێدا زوی خوناڤ بستیکا دەخلی دگریت نا هێلیت بشکێت ل دەمێ دورینی ئو ئەڤ دەمە دەلیڤە یە بو بالا چنکی یا هوینە. ژنکیت مەلوکدار زادێ فراڤینێ وجەرک وکەدینێت ئاڤێ دگەل خو دبەن. پالە رێز دبن بەر بەروکێ دگەل سەر کێشی دا دەست ب کارێ دورینێ بکەن، ئو دبەرا ستران ولاڤژا دبێژن ودڤەگێرن. ل دیڤ وان مەلوکدار د‌هێن ئەو قەفتێت گەنمی یێت پالا هاڤێتن پشت خو، رادکەن ب دەستا ب شالوکەکا یان ب مەگزونا ئو دکەنە گدیشە، سەرێت گولیێت گەنمی دبنە ژناڤدا ئو بنی دهینە ژدەرڤە وەک کومەکا گروڤر لێ دکەن دا تەیر وگیانەوەر نەخون ئو یا ب سانەهی بیت دەما دکەنە شخرە ل دەمێ ڤەگهوازتنی بو سەر بێدەرێ. ئەو بنێت دکەڤن ( کو دبێژنێ ئیشی ) ژدەستێت پالا دگەل دورینێ دهێنە ڤێدان د بنە رزقێ فەقیرا وژارا یێت بێ دەخل وگەنم. پشتی دورینا هەر بەروکەکێ یان دووا پالە بهن ڤەدانەکێ دکەن بو خوش کرنا داس وشالوکا و جگار کێشانەکێ وئاڤ ڤەخارنەکێ. ئەڤ رەنگە کارە بەر دەوام دبیت گەلەک روژا حەتا دورینا دەخلی ب دویماهی دهێت.

ل دەمێ بەرێ ئەڤ کارە دهاتە کرن ل گوندا ب رەنگێ زبارا، هەمی گەنج وتولازێت گوندی بەشدار دبون حەتا هەمی دەخل وجەهێت گوندی هات بانە دورین. پشتی دەمەکێ کورت ئەڤ دەخلێ هاتیە دورین دهێتە کێشان بو سەر بێدەرا. ئەڤ رەنگە کارە دهێتە کرن ب هندەک کەسێت شارەزا وب زاخ وشیان. دەوار وەک هێسترا وکەرا بەشدار دبن بو برنا ڤی دەخلێ دوری، دبێژنە ڤی کاری شخرە کێشان. ئەڤ رەنگە کارە دەمێ چەند روژەکا ڤەدکێشیت حەتا هەمی ب دویماهی دهێت ودهێتە کومکرن ل جهێ تایبەت یێ هەر جوتیارەکی دبێژنێ بێدەر( با دەر ). پشتی ڤی کارێ دورا قوتانێ دهێت ل سەر وێ بێدەرێ.

ئەڤە چەند ئامیرەتن ئەوێت دهێنە بکار هینان دگەل دورینێ:

ئەڤان ئامیرەتێت ژێری رولەکێ بەرز وبلند هەبو دکار وژیانا جوتیاریدا، بێ وان نە دشیا ڤی کاری بکەت بدرستی، ئەڤە ئەون یێت بەرز وسەرەکی:

· داس : ئەڤە دوو جورن: داسا دورینێ ئو داسا دار برینێ. داسا دورینێ دوو رەنگن : داسا مازن ئو داسا بچیک. یا مازن بو دەخل دورینێ، یێت بچیکتر بو چەهـ دورینێ ئو هندەک کارێت دی وەک شالوکێ نە. داس دوو پارچە، دوەستک دارە ئو چهێ دی یێ دورینێ یە یێ چەمیایە، ژئاسنی یان ژپیلای یێ هاتیە چیکرن، رەخێ ژناڤدە یێ زراڤ وتیژە ئو یێ پشتی یێ ستورە.

· شالوک: شالوک وەک داسێ یە بەلێ کوچکوک ترە بو دورینا جەهێ ونیسک ونوکا ئو بو راکرنا مەلوک وقرشا.

· قەیناغ : تبلکێت ئاسنی نە دورینەکەر دکەتە تبلێت دەستێ چەپێ بو پارەستنا دەستێ خو ژداسێ ل دەمێ دورینێ، ئو دا قەفتەکا پتر ب دەست خو ڤە بینیت. ئو هندەک جارا زەنگلەکا بچیک پێڤە دکەن دا خشوکا راتەقینیت.

· بەرستە : بەرەکێ ئازا یە یێ سورە یان یێ رەشە بو هسین وتیژکرنا داسێ.

· شاخک یان دهندانک : شاخەکێ گەیەکی یێ ژناڤدا هاتیە رەنین دهنێ خومال دکەنێ بوهسینا داسا.

ئەڤە چەند گوتنێت و بێژەیێت مەزنا نە ل سەر دورینێ:

هندێ بدە بەر داسێ، نە مینیت ئاسێ

ب وەریسێ خەلکی نە چە ئاقاری

شخرە کێشێ ل دیڤ مەلوکانە

پێ پی ل بەر مەلوکا ڤە دهێت

گولیا دەخلی یا سەر نوخینە

ئەڤ گەنمە یێ خاری یە

شالوکا وی یا شکەستی

داسێ ژ پالا دزیت

پالێ پێشی یە

قوتان و جەنجەرکرنا دەخلی لسەر بێدەری

پشتی دورینا دەخلی بدویماهی دهێت ئو دکەنە گدیشە ل ناڤ پرێزا ب دەستێت مەلوک دارا. گەلەک روژ پێ ناچن کارێ شخرە کێشا دەست پێدکەت. دەوارا بەر هەڤ دکەن بو ئینانا ڤی درامەتی ب شێوەکێ راست ودرست بێ زیان لێ بیت ئو ب گەهینە سەر بێدەرا وەک کومێت مەزن یێت ژێک جودا وڤاڤێرکری. سەر بێدەرێ کارێ خودانێ دەخلی دەست پێدکەت.

ب ڤان رەنگا گەنم دهێتە ڤاڤێرکرن ژ قرشی:

§ قوتان : ئەگەر دەخل یێ کێم بیت ئو بەر جەنجەرێ نەکڤیت، خودان ڤی دەخلی دقوتیت ب بەرا یان بدارا یا ب هندەک رەنگێت دی.

§ گێرە یان گێران : ئەگەر ئێکی جەنجەر نە بیت دێ قرشی بەلاڤ کەت ب رەنگەکێ پەحن، دڤێت دەوارا بینیت چ کەر،چێل، گا، یان هێستر دا لێ پکەن گێرێ وەک زڤروکێ حەتا دان خو ژقرشی بەردەت بدرستی، ئەڤە د هیتە کرن ب سێ چار دەوارا.

§ جەنجەرکرن : پشتی جەنجەر پەیدابوی زوربەی جوتیارا بەرێ خو دایێ، چنکی کار پتر ب سانەهی کەت، ئو زیان کێم تر لێ هات ژلایێ دەخل وجەهیڤە. دوو دەوارا یان سێا دئێخنە بەر جەنجەرێ ئو دور کومێ دزڤرێن. بچیکەک یێ ل سەرڤێ جەنجەرێ یێ سویارە دا نەهێلیت دەوار راوستن جار جار لێ دخوریت یان ب شفکەکا تەر دهاژوت. کنەفەک دکەڤتە دارێ دنیڤا کوما قرشیدا ئو دگەهتە ملێت دەوارا دا دەرنەکەڤن ژ چەرخا کوما قرشی. تشتەکێ وەک کەڤلی ددانن بەرچاڤێت وان دەوارا دا نەترسن ژپێژنا هاتن وچونی ئو دا دەخلی گەلەک نەخون. مروڤەکێ دی هەرێ بەرهەڤە دا ئەو دەخلێ هاتیە هویرکرن وپرت پرتکرن بدەتە ئالەکی ئو قرشی نوی دانتە شوینێ ب ملهێبا ئاسنی، ئو جار جار وان دەوارا ئاڤدەت دەما تهنی دبن. ئەڤ کارە یێ بەردەوامە حەتا کوم هەمی دهێتە هویرکرن ئو دبیتە دان وکا.

دانە بای

دەما زوربەی جوتیارا ل سەر بێدەرێ ژکاری قوتان وجەنجەرکرنێ ب دویماهی دهینن، قویناغا دانە بای دهێت. ئەڤە چێدبیت دەما با هەبیت، ب هاری کاریا ملهێبا داری ئەو دەخلێ هاتیە هویرکرن ددەنە بەر بای دا کا ب چیتە لایەکی ئو ڤاڤێربیت ژدانی. پشتی هنگێ ڤی دانی پاقژدکەن چ ل سەر بێدەرێ یان ل مال ب گەلەک رەنگێت بێژنگا دا گەنم پاک وخاوێن بیت ژ هەمی رەنگێت قرش وکایێ وئاخ وبەرا ئو خررەنگێت کلێشا. ڤی گەنمی دکەنە گوینیکا ئو ب دەوارا دبەنە مال. پارچەک ژڤی درامەتی عومباردکەن دکەنە کارا بو پاشە روژێ ئو توڤێ سالا دهێت، هندەک بو هەڤرانا، هندەک بو دان ودکاکا ئو یێ زێدە بو فروتنێ. ئەو کایا ل سەر بێدەرێ دکەنە خرار وگوینیکا وشلیڤا ئو دکەنە کادینا بو دەوارا یان ژی بو فروتنێ. ب ڤی رەنگێ مە دیتی یێ دویر ودراز ئو پر ژئیزای وماندی بونێ ژ هەمی لایاڤە، جهێ خوشی وشانازیا جوتیاری بو دئەڤی کاریدا، یێ سود وقازانج ب خو ژێ وەردگرت ئو پێ دژیا، ژیانەکا سەر بلند وسەرفەراز.

چەند ناڤێت ئامیرەت و تشتێت کار بوان دهێتە کرن ژ شخرە کێشانێ حەتا دگەهتە قویناغا دیماهیێ:

§ شخرە : دەپێت دارینە وەک پائیسکێ نە دهەر دوو رەخێت دەوارا دانن. ژ لایێ بنیڤە یێ نتیڤ گروڤرە ئو ژلایێ سەری ڤە یێ گرتیە، دارەکێ راست ژوردا دهێت دا قەفتێت گەمی بگرن دا نەکەڤن. ئو پشتی هنگی دهێتە شدادندن وگرێدان ب وەریسی دا باش بیتە موکمکرن.

§ جەنجەر : یا پێک هاتی یە ژدەپێت داری ژهەمی ئالێت ژدەرڤە، بەر وپشت، هەردوو رەخ دگەل بانی بو روینشتنا بچیکەکی یان دووا. ئو یا پێگڤە لێکدای بسمارێت سەر پەحن، ئو دبنڤە خر دەڤێت بالتانە ژئاسن وپیلاینە دوو رێز، دەڤێت وان تیژ وپەحنن، قرش ودەخل وجەهی هویردکەت. ئەڤ جەنجەرە دهێتە گرێدان ب دارەکێ درێژ سەرێ وی دگەهتە سەر نیرکێ دەوارا ئو یێ دی ب جەنجەرێ ڤە دگرێدەن ب خەلەکێت ئاسنی ئو دهێنە گرێدان ب کنف ووەریسا.

§ ملهێبا ئاسنی : دەستکێ وێ ژدارییە، ئو بنێ وێ ژ ئاسنێ چار تپلە بو کومکرنا قرشێ دەخلی ل سەر کومێ ئو ل بەر جەنجەرێ.

§ ملهێبا داری : یا چێکریە ژ دارێت سپیندارێ، ئو تپلێت وێ دهاتینە گرێدان ب چەرمێ پەزی، کا وگەنمی ب ڤێ دەنە بای، دەمێ با دهێت دا دان وکا ژێک جودابن.

§ بێژنک : مازن وبچیک ژ گەلەک رەنگ وجورێت موخلکا بو پاقژکرنا وجوداکرنا گەنمی ژکایا مای وگلێش و ئاخ وبەرا ئو گەلەک تشتێت بیانی دناڤ گەنمیدا.

§ گینیک وخرار وجوهال وتەلیس وشلیفە بو داگرتنا گەنمی وجەهی وکایێ ژسەر بێدەرێ بو مال وکادینا.

ئەگەر هات وخودانێ گەنمی چهێت باش نەبن بو عومبارکرنا دەخل ودانی مال، عەردەکی دکولن وبەرهەڤدکەن ئو گەنمی دکەنێ، پشتی هنگی دنخێڤن ب گەلەک شێوێت درست دا ب هێتە پاراستن ژبەفر وبارانێ ژگیانەورا.

ئەڤە چەند گوتنێت مەزنا ل سەر ڤێ قویناغی:

کا چو ما دان

چەوا با دهێت وەسا بێدەرێ بدە بای

ما کا ژتەیە، کا دوین ژی ژتەیە

گرارا رون ژ کێم دانی یە

١٢-١٢ – ٢٠١٦ دهوک نڤێسین وبەرهەڤکرنا

ئەحمەد عەلی

E_mail : ahmed_ali_h@yahoo.com