Mae’r pedwar diben wrth wraidd Cwricwlwm i Gymru. Maent yn cynrychioli ein dyheadau a’n huchelgeisiau ar gyfer pob dysgwr yng Nghymru, er mwyn iddynt allu dod yn:

• ddysgwyr uchelgeisiol, galluog sy’n barod i ddysgu trwy gydol eu hoes

• cyfranwyr mentrus, creadigol sy’n barod i chwarae eu rhan yn llawn yn eu bywyd a’u gwaith

• dinasyddion egwyddorol, gwybodus yng Nghymru a’r byd

• unigolion iach, hyderus sy’n barod i fyw bywydau gan wireddu eu dyheadau fel aelodau gwerthfawr o gymdeithas.

Yr Egwyddorion Allweddol

• Mae’r pedwar diben yn sbarduno’r newid ar bob lefel yn ein hysgol, gan ddarparu’r weledigaeth fewnol ar gyfer dylunio a datblygu ein cwricwlwm.

• Dylai pob aelod o gymuned yr ysgol rannu dealltwriaeth o sut a pham y mae’r pedwar diben yn gosod sylfaen gadarn i’r holl weithgareddau dysgu yn yr ysgol.

• Mae’r pedwar diben yn golygu bod angen datblygu ymagwedd holistaidd at ddysgu ac felly maent yn annog cydweithio, cydweithredu a rhannu profiadau ac arferion.

Ystyriaethau allweddol:

1. A yw’r pedwar diben yn cael eu hadlewyrchu yn ein gweledigaeth?

2. A ydym wedi darparu cyfleoedd i’n staff, ein dysgwyr a’n cymuned ymgysylltu â’r pedwar diben er mwyn deall y goblygiadau i’r dysgu yn ein hysgol?

3. I ba raddau y mae ein staff yn defnyddio’r pedwar diben fel man cychwyn wrth gynllunio ar gyfer dysgu a chynnydd?

4. I ba raddau ydym yn deall holl nodweddion y pedwar diben?

5. A ydym wedi ystyried y sgiliau cyfannol sy’n hanfodol i’r pedwar diben?