Anghenion Dysgu Ychwanegol (ADY)
“Mae’r Ddeddf Anghenion Dysgu Ychwanegol a’r Tribiwnlys Addysg (Cymru) 2018 yn creu fframwaith deddfwriaethol i wella’r broses o gynllunio a chyflawni darpariaeth ddysgu ychwanegol, drwy ddull sy’n canolbwyntio ar yr unigolyn i ganfod anghenion yn gynnar, rhoi cymorth a monitro effeithiol ar waith, ac addasu ymyriadau i sicrhau eu bod yn cyflawni’r deilliannau a ddymunir.Bydd y fframwaith cyfreithiol a sefydlir gan y Ddeddf hon yn chwarae rhan hanfodol wrth alluogi’r cwricwlwm i ddarparu ysgolion cryf a chynhwysol sydd wedi ymrwymo i ragoriaeth, tegwch a lles. Mae’r Fframwaith yn ceisio rhoi cyfle i ehangu dysgu, gan sicrhau bod pob dysgwr sydd ag anghenion dysgu ychwanegol (ADY) yn cael cymorth i oresgyn rhwystrau i ddysgu a chyflawni ei botensial llawn.”
Canllawiau Cwricwlwm i Gymru Ionawr 2020
Egwyddorion allweddol
Bydd Sefydliadau Dysgu Effeithiol sy’n gynhwysol yn gwneud y canlynol:
Nodi ac archwilio nifer y dysgwyr sydd ag ADY, ynghyd â’r mathau o ADY.
Defnyddio ymarfer sy’n canolbwyntio ar yr unigolyn i sicrhau bod dysgwyr wrth galon y dysgu er mwyn cyflawni’r hyn ‘sy’n bwysig iddynt ac ar eu cyfer’.
Meddu ar weledigaeth glir o ran y modd y mae’r cwricwlwm yn bodloni holl anghenion y dysgwyr, yn seiliedig ar y pedwar diben. Meddu ar ddealltwriaeth gytunedig o’r hyn y maent yn ei olygu ar gyfer dysgwyr ag ADY.
Defnyddio amrywiaeth o addysgeg briodol yn seiliedig ar y deuddeg o egwyddorion addysgegol. Darparu cyfleoedd dysgu sydd wedi’u gwahaniaethu mewn modd addas ac sy’n cyd-fynd ag anghenion y dysgwyr.
Cydweithredu â phartneriaid i greu ymagweddau cyfannol at ddysgu, gan gynnwys ysgolion eraill, asiantaethau perthnasol a gweithwyr proffesiynol ehangach.
Sicrhau profiad ymarferol a chyd-destunau dysgu dilys sy’n arwain at ddysgu ystyrlon.
Darparu manylion am amrywiaeth gyfoethog o ymyraethau targededig yn eu map darpariaeth, gan gynnwys y rheiny sy’n barhaus dros amser (nad ydynt yn gysylltiedig â disgybl/charfan benodol) ac sy’n debyg i’r rhai mewn ysgolion eraill. Ystyrir darpariaeth o’r fath yn rhan o’r broses wahaniaethu ar lefel yr ysgol/y dosbarth.
Ystyriaethau allweddol:
Pa dystiolaeth sydd ar gael bod ein holl staff yn rhannu dealltwriaeth o Ymarfer sy’n Canolbwyntio ar yr Unigolyn a sut i lunio Proffiliau Un Dudalen?
Sut y mae ein staff yn cyfrannu at y broses o adeiladu’r Cwricwlwm ac yn gwerthfawrogi eu dylanwad ar y broses honno?
Sut yr ydych yn sicrhau bod gan bob dysgwr fynediad at bob MDPh, er enghraifft:
Dysgwyr â nam ar y golwg, disgyblion â nam ar y clyw, disgyblion byddar-ddall?
Dysgwyr ag Anhwylder y Sbectrwm Awtistiaeth (ASD)?
Dysgwyr ag Anhwylder Diffyg Canolbwyntio a Gorfywiogrwydd (ADHD)?
Dysgwyr ag anawsterau cyfathrebu, lleferydd ac iaith?
Dysgwyr ag anawsterau dysgu dwys a lluosog?
Beth y mae’r pedwar diben yn ei olygu ar gyfer ein dysgwyr ag ADY? Sut y gallwn feithrin dealltwriaeth o hyn sy’n cael ei rhannu ymhlith y disgyblion a’r staff?
Sut yr ydym yn sicrhau bod yr holl staff yn deall bod asesu yn rhan annatod o’r broses o gynllunio’r cwricwlwm, ac mai ei ddiben trosfwaol yw cefnogi pob dysgwr i wneud cynnydd?
Sut yr ydym wedi meithrin dealltwriaeth o’r 12 o egwyddorion addysgegol, ac i ba raddau y mae’r staff yn cydnabod bod y rhain yn darparu tegwch ar gyfer yr holl ddysgwyr?
Sut yr ydym yn sicrhau bod gan y staff yr wybodaeth a’r sgiliau sy’n berthnasol i’r modd yr ydym yn darparu cymorth ymarferol yn yr ystafell ddosbarth er mwyn diwallu amrywiaeth o anghenion ymhlith y dysgwyr?
Sut yr ydym yn sicrhau bod penderfyniadau strategol yn berthnasol i’r hyn sy’n gweithio/nad yw’n gweithio o ran ein map darpariaeth – ymyraethau ar gyfer amrywiaeth o ddysgwyr?
Pa gyfleoedd dysgu proffesiynol yr ydym wedi eu darparu ar gyfer y staff er mwyn cymryd rhan mewn ymchwil i wella eu sgiliau i ddarparu profiadau addysgu a dysgu cynhwysol?
Resources:
🌐 Mwy o wybodaeth am yr amryw ffyrdd i’w defnyddio i helpu dysgwyr ag nam ar y golwg.
🌐 Mwy o wybodaeth am yr amryw ffyrdd i’w defnyddio i helpu dysgwyr ag nam ar eu clyw.
🌐 Mwy o wybodaeth am yr amryw ffyrdd i’w defnyddio i helpu dysgwyr ag nam amlsynnwyr.
🌐 Sut y bydd Deddf ADY yn effeithio ar feithrinfeydd ac ysgolion a gynhelir.