Materi Basa Jawa Kelas 8: Pasinaon 5

Cakepan Serat Wulangreh Pupuh Gambuh

Pada 1

Sekar gambuh ping catur,

kang cinatur polah kang kelantur,

tanpa tutur katula-tula katali,

kadaluwarsa katutuh

kapatuh pan dadi awon.

Gancaran pada 1:

Tindak-tanduk kang ora gelem ngrungokake pituture wong liye, tindak-tanduk kang ora becik kaemot ing sekar Gambuh iki. Tindak tanduk ala kang ora ana rampunge lan ora ana kendhaline bakal ala asile lan ngrugekake manungsa dhewe.

Pada 2

Aja nganti kebanjur,

barang polah ingkang nora jujur,

yen kebanjur sayekti kojur tan becik,

becik ngupayaa iku,

pitutur ingkang sayektos.

Gancaran pada 2:

Aja nganti manungsa iku kulina nglakoni samubarang kang ora jujur, yen wis kasep/ kebanjur bakal agawe cilaka. Mesthi wae iku ora becik. Mangka saka iku para manungsa supaya mbudidaya ajaran/ paugeran kang sejati.

Pada 3

Pitutur bener iku,

sayektine apantes tiniru,

nadyan metu saking wong sudra pepeki,

lamun becik wurukipun,

iku pantes sira anggo.

Gancaran pada 3:

Ajaran kang bener iku wajib dinut/ ditiru, senajan ajaran iku asale saka wong pidak pedarakan (kaum rendah, pangkate cilik), nanging yen ajaran utawa piwulang iku mau becik, patut ditiru.