News
1.
លោកស្រីយីងឡាក់ នាយករដ្ឋមន្ត្រីថៃគ្រោងមកស្រុកអារញ្ញ នៅថ្ងៃស្អែក
លោកស្រីយីងឡាក់ នាយករដ្ឋមន្ត្រីថៃគ្រោងមកស្រុកអារញ្ញ នៅថ្ងៃស្អែក
ថ្ងៃ សុក្រ ទី ២៩ ខែ មីនា ឆ្នាំ ២០១៣ ម៉ោង ១៥:១២
ក្រុងប៉ោយប៉ែត ៖ ស្របពេលដែលមានប្រភពព័ត៌មានថា នៅថ្ងៃស្អែក (៣០ មីនា ឆ្នាំ២០១៣) នាយករដ្ឋមន្រ្តីថៃ គឺលោកស្រី យីងឡាក់ ស៊ីណាវ៉ាត្រា នឹងធ្វើដំណើរមកបំពេញទស្សនកិច្ចមួយនៅស្រុកអារញ្ញ ខេត្តស្រះកែវ ដែលមានព្រំប្រទល់ជាប់ នឹងក្រុងប៉ោយប៉ែត ខេត្តបន្ទាយមានជ័យ នៅព្រឹកថ្ងៃទី២៩ មីនា ២០១៣ នេះ នៅចំណុចច្រកទ្វារអន្តរជាតិខ្លងលឹកឈម នឹងច្រកទ្វារអន្តរជាតិប៉ោយប៉ែត គេសង្កេតឃើញមានសមត្ថកិច្ចថៃ បានរៀបចំសណ្ដាប់ធ្នាប់ដែលអ្នកខ្លះថា ជាការសមជាមុនក្នុងការត្រៀមលក្ខណៈ ដើម្បីពង្រឹងការពារសន្តិសុខសម្រាប់ថ្ងៃស្អែក។
ក្នុងពេលរៀបចំ សណ្ដាប់ធ្នាប់ខាងទឹកដីថៃនេះ ច្រកទ្វារអន្តរជាតិប៉ោយប៉ែត ខ្លងលឹកត្រូវបានបិទការឆ្លងកាត់ជិតកន្លះម៉ោងមិនថា អ្នកដំណើរថ្មើរជើង ឬរថយន្តនោះទេ ហើយខាងទឹកដីថៃគេឃើញមានរថយន្តទំនើបៗជាច្រើនគ្រឿងអម ដោយរថយន្តស៊ីរ៉ែនការពារមុខក្រោយដោយមិនដឹងថា ថ្នាក់ណាមកនោះទេ ក្នុងនោះមានទាំងតម្រួតថៃមួយចំនួនមកធ្វើសណ្ដាប់ធ្នាប់លើស្ពានមិត្តភាព កម្ពុជា-ថៃទៀតផង។ បង្កាន់ដៃស្ពានមិត្តភាពខាងទឹកដីថៃគេឃើញមានរៀបចំចងលម្អដោយ ក្រណាត់ក្បាច់ក្បូរយ៉ាងស្រស់សង្ហារ។ មិនតែប៉ុណ្ណោះសូម្បីតែស្មៅ និងកូនឈើតូចៗតាមអតីតផ្លូវរថភ្លើងចាស់របស់គេក៏ត្រូវបានជួលកម្មករយក ម៉ាស៊ីនកាត់ជម្រះផងដែរ។ ក្នុងអំឡុងពេលបិទការឆ្លងកាត់មួយរយៈតូចនេះគេឃើញភ្ញៀវជាតិ និងអន្តរជាតិ រទេះកម្មករ និងរថយន្តតូចធំបានកកស្ទះនៅច្រកទ្វារតែម្ដង៕
2.
កសិករ និយាយពីការប្រើក្បាលបូមទឹក ម៉ាក ហ៊ុន សែន
កសិករ និយាយពីការប្រើក្បាលបូមទឹក ម៉ាក ហ៊ុន សែន
កសិករប្រើសាកល្បងក្បាលបូមទឹកម៉ាកហ៊ុនសែន
ថ្ងៃ សៅរ៏ ទី ៣០ ខែ មីនា ឆ្នាំ ២០១៣ ម៉ោង ១១:១៣
ភ្នំពេញ: ប្រជាកសិករបានទទួលស្គាល់ថា ក្បាលបូមទឹកម៉ាកហ៊ុនសែនខ្លាំង បូមទឹកបានច្រើនក្នុងរយៈពេលខ្លី និងចំណាយលើថ្លៃប្រេងអស់តិច ប្រជាកសិករជាច្រើនដែលបានឃើញការប្រើសាកល្បងរបស់កសិករមួយចំនួន មានការចាប់អារម្មណ៍និងសួរដេញដោលអំពីតម្លៃរបស់វា។
កសិករ ឈ្មោះ ទេព គីមឡែក នៅភូមិស្វាយខ្នី ឃុំរោងដំរី ស្រុកបាភ្នំ ខេត្តព្រៃវែង ដែលទទួលបានក្បាលបូមទឹកម៉ាកហ៊ុនសែនមួយគ្រឿងពីមន្ទីរធនធានទឹក ខេត្តព្រៃវែង និយាយឲ្យដឹងនៅថ្ងៃទី២៩ ខែមីនា ឆ្នាំ២០១៣ថា ក្បាលបូមទឹកពណ៌លឿងម៉ាកហ៊ុនសែន ស្រួលបូមណាស់ ល្អបូមទឹកបានច្រើន ក្នុងរយៈពេលខ្លី និងចំណាយតិច ស្រួលដឹកជញ្ជូន អ្នកភូមិដែលបានមកឃើញមានការចាប់អារម្មណ៍ខ្លាំង និងលាន់មាត់ថាវាខ្លាំងដូចឈ្មោះ។
កសិករ ទេព គីមឡែក បានបញ្ជាក់ថា ស្រែទំហំ៣០អា របស់គាត់ ពីមុនបូមដោយម៉ាស៊ីនសាំងប្រើក្បាលបូមទិញមកពីផ្សារទំហំ ០,១៥ ម៉ែត្រ បូមរយៈពេលបួនម៉ោង ត្រូវចំណាយលុយទិញប្រេងអស់ ២៨.០០០ រៀល ទើបបានទឹកពេញស្រែ តែនៅពេលប្រើក្បាលបូមទឹកម៉ាកហ៊ុនសែន ទំហំ ០,១៥ ម៉ែត្រនេះ ស្រែដដែលនេះ ចំណាយពេលបូមតែប្រហែលមួយម៉ោងបានទឹកពេញស្រែ និងចំណាយលើថ្លៃប្រេងម៉ាស៊ូតអស់តែជាងមួយលីត្រ ប្រហែល ៦.០០០ រៀលប៉ុណ្ណោះ។ ក្បាលបូមនេះ ប្រើជាមួយនឹងម៉ាស៊ីនកាឡេថងកម្លាំង១៥សេស។ ឥឡូវអ្នកភូមិបានខ្ចីវាយកទៅបូមបន្តទៀតហើយ។ ប្រជាជនមានការចាប់អារម្មណ៍ខ្លាំងណាស់ចំពោះក្បាលបូមទឹកម៉ាកហ៊ុនសែន នេះ ព្រោះវាបូមទឹកបានច្រើនក្នុងរយៈពេលខ្លី ប្រជាជនចង់ដឹងបំផុតពីតម្លៃរបស់វាបើថោក ឬប្រហែលនឹងក្បាលបូមនៅលើទីផ្សារសព្វថ្ងៃ គឺមានប្រជាជនត្រូវការច្រើនហើយ។
កសិករមួយរូបផ្សេងទៀត ឈ្មោះ ឈុន គឹមហួរ នៅភូមិស្រះកែវ ឃុំមេលំ ស្រុកបរិបូណ៌ ខេត្តកំពង់ឆ្នាំង និយាយឲ្យដឹងនៅថ្ងៃទី២៩ ខែមីនា ឆ្នាំ២០១៣នេះថា ក្បាលបូមទឹកម៉ាកហ៊ុនសែនបូមល្អ បូមខ្លាំងមែនទែន បានទឹកច្រើនជាងក្បាលបូមដែលធ្លាប់ប្រើទិញមកពីផ្សារ។
លោក ខ្មូរ សារួន ប្រធានសហគមន៍ផលិតស្រូវប្រាំងតេជោសែនពីរ នៅឃុំមេលំ ស្រុកបរិបូណ៌ ខេត្តកំពង់ឆ្នាំង និយាយឲ្យដឹងនៅថ្ងៃទី២៩ ខែមីនាឆ្នាំ២០១៣នេះថា សហគមន៍ផលិតស្រូវប្រាំងតេជោសែនទីពីរ មកទល់ពេលនេះទទួលបានអំណោយពីសម្តេចតេជោសែនតាមរយៈលោកតាលឹម គានហោ មានគោយន្តចំនួនប្រាំគ្រឿង ម៉ាស៊ីនបូមទឹកម៉ាកហ៊ុនសែនដែលមានបំពង់ទំហំ៣តឹកមួយគ្រឿង និងក្បាលបូមទឹកម៉ាកហ៊ុនសែនទំហំ០,១៥ម៉ែត្រចំនួន១០គ្រឿង។
លោក ខ្មូរ សារួន បាននិយាយឲ្យដឹងទៀតថា គោយន្តម៉ាស៊ីនបូមទឹក និងក្បាលបូមទឹក មិនមាននៅសល់ក្នុងឃ្លាំងទេ ប្រជាកសិករបានខ្ចីយកទៅប្រើអស់គ្មានសល់។ ក្បាលបូមទឹកម៉ាកហ៊ុនសែន បូមទឹកមានប្រសិទ្ធភាពល្អណាស់។
លោក ចាន់ យុត្ថា អ្នកនាំពាក្យ និងជានាយកខុទ្ទកាល័យក្រសួងធនធានទឹក និងឧតុនិយម និយាយឲ្យដឹងនៅថ្ងៃទី២៩ ខែមីនា ឆ្នាំ២០១៣នេះថា ក្បាលបូមទឹកម៉ាកហ៊ុនសែនចំនួន ៥០០ គ្រឿង ដែលជាអំណោយរបស់សម្តេចអគ្គមហាសេនាបតីតេជោ ហ៊ុន សែន ផ្តល់ជូនប្រជាកសិករយកទៅប្រើប្រាស់សាកល្បងតាមរយៈក្រសួងធនធានទឹក កាលពីពេលថ្មីៗកន្លងទៅនេះ ឥឡូវបានទៅដៃរបស់ប្រជាកសិករ ហើយនិងកំពុងប្រើប្រាស់សាកល្បងនៅក្នុងខេត្តមួយចំនួន។
លោក ចាន់ យុត្ថា និយាយឲ្យដឹងទៀតថា ក្បាលបូមទឹកម៉ាកហ៊ុនសែន ដែលមានបំពង់ទំហំមួយតឹកកន្លះនេះ កំពុងធ្វើការផលិតបន្ត មិនទាន់មានចេញលក់នៅលើទីផ្សារសេរីទេ។ ក្រសួងមានគម្រោងផលិតដល់ចំនួនរាប់ពាន់គ្រឿង ព្រោះទីផ្សារប្រាកដជា ត្រូវការវា ដោយសារវាចំណាយតិច បានទឹកច្រើនក្នុងរយៈពេលខ្លី។ ចំពោះតម្លៃមិនទាន់កំណត់បានទេ តែទោះជាយ៉ាងណាក៏ថោកជាងរបស់នាំចូលដែរ។
គួររម្លឹក ឲ្យដឹងថា កាលពីពាក់កណ្តាលខែមីនាកន្លងទៅនេះ ក្រសួងធនធានទឹក និងឧតុនិយម បានប្រគល់ក្បាលបូមទឹកម៉ាកហ៊ុនសែនចំនួន ៥០០ គ្រឿង ដែលជាអំណោយរបស់សម្តេចអគ្គមហាសេនាបតីតេជោ ហ៊ុន សែន ជូនដល់ប្រជាកសិករ ដើម្បីយកទៅប្រើប្រាស់សាកល្បង ដែលជាផលិតផលកើតចេញពីគំនិតច្នៃប្រឌិតរបស់មន្ត្រី និងវិស្វករក្រសួងធនធានទឹកនិងឧតុនិយម៕
3.
ប៉ូលិសឃាត់ឡានដឹកគោអត់ច្បាប់ រួចដោះលែងវិញ ក្រោយការចរចាស្ងាត់ៗ
ប៉ូលិសឃាត់ឡានដឹកគោអត់ច្បាប់ រួចដោះលែងវិញ ក្រោយការចរចាស្ងាត់ៗ
ថ្ងៃ សៅរ៏ ទី ៣០ ខែ មីនា ឆ្នាំ ២០១៣ ម៉ោង ១១:១៧
កំពង់ឆ្នាំង: រថយន្តម៉ាក IZUSU ដឹកសត្វគោចំនួន ៦ ក្បាល ដែលគ្មានច្បាប់អនុញ្ញាត ត្រូវបានប៉ូលិសក្រុងកំពង់ឆ្នាំងឃាត់ទុកនៅត្រង់ចំណុចផ្លូវលំ ក្បែរមជ្ឈមណ្ឌលហ្វឹកហ្វឺនស៊ីម៉ាកកំពង់ឆ្នាំង កាលពីវេលាម៉ោង៨យប់ ថ្ងៃទី២៩ ខែមីនា ឆ្នាំ២០១៣។ ឡានដឹកគោមួយគ្រឿងនេះត្រូវបានគេដោះលែងទៅវិញ បន្ទាប់ពីមានការចរចាគ្នារវាងម្ចាស់គោ ប៉ូលិស និងមន្ដ្រីពេទ្យសត្វខេត្ដកំពង់ឆ្នាំង នៅព្រឹកថ្ងៃទី ៣០មីនា ឆ្នាំ២០១៣នេះ។
ទាំងរថយន្ដដឹកគោ ទាំងម្ចាស់ ត្រូវបានគេនាំមកអធិការដ្ឋានក្រុងកំពង់ឆ្នាំងទាំងយប់ ទំនងជាចរចាគ្នាមិនត្រូវ ទើបនៅព្រឹកឡើងថ្ងៃទី ៣០មីនានេះ ប៉ូលិសទូរស័ព្ទហៅអ្នកកាសែត អ្នកទូរទស្សន៍ ទៅថតព្រោងព្រាត ធ្វើឲ្យមន្ដ្រីជំនាញភ្នែកនៅកញ្ចឹងក។
បុរសឈ្មោះ ជា ដែលជាអ្នកបើករថយន្ដដឹកគោ បាននិយាយថា ការរកស៊ីដឹកជញ្ជូនសត្វគោនេះ គាត់មិនដែលមានច្បាប់ទេ នៅពេលដែលរៀបដឹកចេញ ទូរស័ព្ទទៅប្រាប់មន្ដ្រីពេទ្យសត្វខេត្ដតែពីរ-បីម៉ាត់ គឺចប់ហើយ ទើបតែលើកនេះទេដែលត្រូវប៉ូលិសឃាត់សួរនាំរកច្បាប់នោះ។
បច្ចុប្បន្ន អ្នករកស៊ីដឹកជញ្ជូនសត្វគោ-ក្របី មិនខ្លាចសមត្ថកិច្ចឡើយ ដោយសារតែមានមន្ដ្រីពេទ្យសត្វជាខ្នងបង្អែក ហើយការឃាត់រថយន្ដដឹកគោមួយគ្រឿងនេះ ក៏ត្រូវបានមជ្ឈដ្ឋាននានានិយាយថា ជាវិធីគោះទឹកបង្អើលត្រីរបស់សមត្ថកិច្ចផងដែរ នៅពេលណាត្រីចូលស៊ងហើយ គឺស្ងាត់ឈឹងដូចតែគ្នា៕
4.
សម្ពោធអគារសម្ភព មន្ទីរពេទ្យបង្អែកស្រុកអន្លង់វែង អំណោយសប្បុរសជន ជនជាតិស្វ៊ីស
លោក សៀង ណាំ, លោក សាលាអង់រីកូ, លោក លី ស៊ីណា កាត់ខ្សែបូរសម្ភោធអគារសម្ភព នៅ មន្ទីរពេទ្យបង្អែកស្រុកអន្លង់វែង
ថ្ងៃ សៅរ៏ ទី ៣០ ខែ មីនា ឆ្នាំ ២០១៣ ម៉ោង ១១:០៨
ឧត្តរមានជ័យ: អគារសម្ភពមួយខ្នង ដែលជាអំណោយរបស់លោក សាលាអង់រីកូ និងសប្បុរសជនស្វ៊ីស ត្រូវបានសម្ពោធដាក់ឱ្យប្រើប្រាស់ជាផ្លូវការនៅព្រឹកថ្ងៃទី២៩ ខែមីនា ឆ្នាំ២០១៣នេះ។ អគារសម្ភពនេះមានទីតាំងស្ថិតនៅមន្ទីរពេទ្យបង្អែកស្រុកអន្លង់វែង ខេត្ដឧត្ដរមានជ័យ ដែលមានការចូលរួមពីលោកឧកញ៉ា សៀង ណាំ តំណាងរាស្ដ្រមណ្ឌលសៀមរាប, លោកបណ្ឌិត លី ស៊ីណា ទីប្រឹក្សាផ្ទាល់សម្ដេចតេជោ ហ៊ុន សែន, លោក សាលាអង់រីកូ ម្ចាស់អំណោយ និងលោក យឹម ផាន់ណា អភិបាលស្រុកអន្លង់វែង។
លោកសាលាអង់រីកូ បានមានប្រសាសន៍ថា អគារសម្ភពថ្មីដែលផ្ដល់ជូនមន្ទីរពេទ្យបង្អែកស្រុកអន្លង់វែង ចំណាយអស់ទឹកប្រាក់ចំនួន ៤៨.១២០ដុល្លារ។ នេះជាអគារសម្ភពទី២ ដែលផ្ដល់ដោយលោកសាលាអង់រីកូ និងសប្បុរសជនជនជាតិស្វ៊ីសដល់ខេត្ដឧត្ដរមានជ័យ។ អគារសម្ភពទី១ បានសម្ពោធដាក់ឱ្យប្រើប្រាស់កាលពីថ្ងៃទី៣ ខែមីនា ឆ្នាំ២០១៣កន្លងទៅ។
លោកសាលាអង់រីកូ បានឱ្យដឹងផងដែរថា រហូតមកដល់ពេលនេះ លោកបានផ្ដល់មណ្ឌលសុខភាពចំនួន ១៣ កន្លែង ដល់ខេត្ដសៀមរាប និងអគារពេទ្យស្ថិតក្នុងមន្ទីរពេទ្យបង្អែកជាង១០ខ្នង រួចមកហើយ។
លោកឧកញ៉ា សៀង ណាំ តំណាងរាស្ដ្រមណ្ឌលសៀមរាប បានមានប្រសាសន៍ថា នេះគឺជាសមិទ្ធផលថ្មីមួយមិនអាចកាត់ថ្លៃបាន ហើយមិនអាចវាយតម្លៃបានចំពោះទឹកចិត្ដ និងថវិកាដែលលោកសាលាអង់រីកូ បានជួយដើម្បីទ្រទ្រង់នូវវិស័យសុខាភិបាល ក្នុងការបម្រើសេវាសាធារណៈជូនប្រជាពលរដ្ឋនៅក្នុងស្រុកអន្លង់វែង ក៏ដូចជានៅស្រុកដទៃទៀតដែរ។
លោកឧកញ៉ា សៀង ណាំ បានថ្លែងថា លោកសាលាអង់រីកូ គឺជាសប្បុរសជនជនជាតិស្វ៊ីសមួយរូប ដែលបានបរិច្ចាគធនធានផ្ទាល់ខ្លួនជាច្រើន ជាពិសេសលោកបានធ្វើការអំពាវនាវទៅសប្បុរសជនជនជាតិស្វ៊ីសដទៃទៀត ដើម្បីយកថវិកាជួយកសាងអគារសិក្សា ជាពិសេសមណ្ឌលសុខភាព, អគារមន្ទីរពេទ្យ ដើម្បីបម្រើឱ្យសេវាសាធារណៈជូនប្រជាពលរដ្ឋកម្ពុជា៕
5.
ចោទមេភូមិម្នាក់ ពីបទប្រើប្រាស់លុយរួម ដោយគ្មានតម្លាភាព នៅខេត្តកំពត
ទីតាំងស្តុកទឹកសម្រាប់អ្នកភូមិព្រៃត្នោតដែលប៉ះពាល់ដោយការធ្វើប្រឡាយ
ថ្ងៃ សៅរ៏ ទី ៣០ ខែ មីនា ឆ្នាំ ២០១៣ ម៉ោង ០៨:៥៧
កំពត: ប្រជាពលរដ្ឋប្រមាណពីររយនាក់ ស្ថិតក្នុងភូមិព្រៃត្នោត ឃុំកំពង់គ្រែង ស្រុកទឹកឈូ កាលពីថ្ងៃទី២៤ ខែមីនា ឆ្នាំ២០១៣ បាននាំគ្នាផ្តិតមេដៃលើពាក្យបណ្តឹងដាក់ជូនសម្តេចអគ្គមហាសេនាបតីតេជោ ហ៊ុន សែន ក្នុងកម្មវត្ថុចោទប្រកាន់លោកមេភូមិ ថាបានប្រើប្រាស់ថវិការួម បានមកពីការដោះស្រាយផលប៉ះពាល់គម្រោងទឹកស្អាត ដោយគ្មានតម្លាភាព។ ពាក្យបណ្តឹងនោះ ក៏បានទាមទារឱ្យផ្លាស់ប្តូរមេភូមិរូបនោះផងដែរ។
បណ្តឹងដែលអមដោយស្នាមមេដៃចំនួន ១៩១ មានខ្លឹមសារថា ប្រជាពលរដ្ឋទាំងអស់កើតទុក្ខ មិនសុខចិត្តចំពោះលោក ម៉ម លីដា មេភូមិព្រៃត្នោត ដែលបានយកប្រាក់ដោះស្រាយផលប៉ះពាល់ គម្រោងទឹកស្អាតចំនួន ១៣.៣០០,៩៣ ដុល្លារ ទៅចាយវាយអស់ ៧.២៥៥ ដុល្លារ ពុំឱ្យដំណឹងដល់ប្រជាពលរដ្ឋក្នុងភូមិបានដឹង គ្មានតម្លាភាព គ្មានការឯកភាព និងគ្មានវិក្កយបត្រត្រឹមត្រូវ។
ពាក់ព័ន្ធនឹង រឿងរ៉ាវខាងលើ លោក ស៊ឹម វុទ្ធា នាយករងរដ្ឋបាលសាលាខេត្តកំពត រៀបរាប់ឱ្យដឹងកាលពីព្រឹកថ្ងៃទី២៩ ខែមីនា ឆ្នាំ២០១៣ នេះថា ការណ៍ដែលប្រជាពលរដ្ឋដាក់បណ្តឹងទៅសម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានោះ លោកមិនបានដឹងទេ ប៉ុន្តែកន្លងមកបណ្តឹងដូចគ្នានេះបានដាក់ចូលសាលាខេត្ត ដោយលោកអភិបាលបានចារចាត់តាំងឱ្យលោក ហេង វន្ថា អភិបាលរងខេត្តចុះដោះស្រាយហើយ លទ្ធផលយ៉ាងណាមិនទាន់ដឹងនៅ ឡើយទេ។ រឿងប្រជាពលរដ្ឋដាក់បណ្តឹងជូនទៅសម្តេចនាយករដ្ឋមន្ត្រី និងអង្គភាពប្រឆាំងអំពើពុករលួយដូចការអះអាងនោះជាសិទ្ធិរបស់ពួកគាត់ តែខេត្តបាន និងកំពុងខិតខំដោះស្រាយហើយ។
ប្រជាពលរដ្ឋបាន រៀបរាប់ពីប្រវត្តិ នៃប្រឡាយគម្រោងទឹកស្អាតភូមិព្រៃត្នោតថា កាលពីអំឡុងដប់ប្រាំឆ្នាំមុន ព្រោះតែមើលឃើញនូវការខ្វះខាតទឹកប្រើប្រាស់ កាកបាទក្រហម និងអង្គការ SAWA បានជួយជីកប្រឡាយ ព្រមទាំងរៀបលូបញ្ឈរ ដើម្បីទទួលទឹកស្តុកសម្រាប់ចែកប្រជាពលរដ្ឋក្នុងភូមិ ប្រើប្រាស់ជាសហគមន៍។ លុះដល់ពេលមានគម្រោងធ្វើប្រឡាយទឹកចិន(អំណោយសាធារណរដ្ឋប្រ ជាមានិតចិន និងបដិភាគរាជរដ្ឋាភិបាលកម្ពុជា) ចំទីតាំងគម្រោងទឹកស្អាត ទើបមានការដោះស្រាយ រាល់ការខាតបង់ផលប្រយោជន៍ទាំងអស់សម្រាប់ប្រជាពលរដ្ឋក្នុងភូមិ។
នៅអំឡុងខែធ្នូ ឆ្នាំ២០១២ លោក សំ សាន ជាអនុប្រធានភូមិបានឡើងទៅយកលុយ ចំពោះផលប៉ះពាល់ ចំនួន ១៣.៣០០,៩៣ ដុល្លារ តែហាក់ដូចជាស្ងាត់ព័ត៌មានឈឹង។ រហូតដល់ថ្ងៃទី១៦ ខែកុម្ភៈ ឆ្នាំ២០១៣ ប្រជាពលរដ្ឋបាន ហៅលោកមេភូមិ លោកស្រីមេឃុំ ស្មៀនឃុំ មកបំភ្លឺ ទើបដឹងថា លុយនោះនៅសល់តែ៦.០៤៥,៩៣ ដុល្លារប៉ុណ្ណោះ។
ជាការបកស្រាយចំពោះ ប្រជាពលរដ្ឋជាងមួយរយគ្រួសារ លោកមេភូមិ រៀបរាប់ថា លុយ ៧.២៥៥ ដុល្លារ បានចំណាយលើៈ ១. ក្រសួងចំនួន១.០០០ដុល្លារ, ២. ក្រុមការងារ ខេត្ត ២.០០០ ដុល្លារ, ៣.លោកស្រីមេឃុំ ៣០០ ដុល្លារ, ៤.លោកអនុប្រធានភូមិ ៣០០ ដុល្លារ, ៥.លោកជំទប់ទីមួយឃុំ កំពង់គ្រែង ១០០ ដុល្លារ, ៦.ជប់លៀងបាយសាមគ្គីថ្នាក់ខេត្ត និងក្រសួង ៣០០ ដុល្លារ, ៧.លោកមេភូមិ ដោះស្រាយបាយ បារី កាហ្វេ សាំង ៣០០ ដុល្លារ, ៨.ដោះស្រាយផលប៉ះពាល់ការធ្វើប្រឡាយ ក្នុងភូមិ ២.៩៥៥ ដុល្លារ។
ទាក់ទិននឹងការចំណាយដែលគ្មានវិក័យបត្រ គ្មានការដឹងឮនេះ ប្រជាពលរដ្ឋស្នើសុំ ឱ្យបង្វិលទឹកប្រាក់ចំនួន ១៣.៣០០,៩៣ ដុល្លារមកវិញ ដើម្បីរក្សាទុកជារបៀបធនាគារភូមិ សម្រាប់ប្រើប្រាស់ក្នុងកិច្ចអភិវឌ្ឍន៍រួមតទៅថ្ងៃមុខ។
គួរ បញ្ជាក់ថា ក្រោមជំនួយចំនួនទឹកប្រាក់ ៤២ លានដុល្លារ របស់សាធារណរដ្ឋប្រជាមានិតចិន និងប្រាក់ចូលរួមបដិភាគ ៨ លានដុល្លារ របស់រាជរដ្ឋាភិបាលកម្ពុជា សម្រាប់ដោះស្រាយផលប៉ះពាល់ប្រឡាយមេ និងមែកធាង១៧ខ្សែ ប្រវែងសរុប ៨៨ គីឡូម៉ែត្រ នឹងសម្រេចរួចរាល់ក្នុងអំឡុងឆ្នាំ២០១៤ ខាងមុខ។
ប្រឡាយនេះ ចាប់ផ្តើមស្ថាបនានៅថ្ងៃទី២០ ខែធ្នូ ឆ្នាំ២០១០ ដោយភ្ជាប់ពីស្ទឹងកែវ ចំណុចព្រំប្រទល់ស្រុកឈូកនៃទឹកដីឃុំត្រពាំងភ្លាំងលាតសន្ធឹង ពង្រាយសាខាជាប្រឡាយមេ ប្រឡាយកូន ក្នុងភូមិសាស្ដ្រនៃស្រុកទឹកឈូ។
ប្រឡាយចាក់ក្រាលបាតដោយបេតុងនេះ នឹងផ្តល់សារប្រយោជន៍ បីយ៉ាងជាសំខាន់ រួមមានៈ បញ្ចៀសពីបញ្ហាជំនន់លិចលង់ ក្រុងកំពត ដែលតែងកើតឡើងជារឿយៗនាពេលកន្លងមក ជាប្រព័ន្ធស្រោចស្រព បម្រើដល់វិស័យកសិកម្ម សម្រាប់កសិករក្នុងស្រុកទឹកឈូ ដែលអាចឱ្យពួកគាត់ដាំដំណាំ និងធ្វើស្រែស្រូវក្នុងរដូវប្រាំង ព្រមទាំងជាផ្នែកមួយនៃការផ្គត់ផ្គង់សេវាទឹកស្អាតដល់ប្រជាពលរដ្ឋ ជនបទ ព្រោះចាក់ក្រាលបាតដោយបេតុង ងាយស្រួលក្នុងការរក្សាអនាម័យ៕
6.
កូរ៉េខាងជើង "ស្ថិតក្នុងសង្គ្រាម" ជាមួយកូរ៉េខាងត្បូង
ថ្ងៃ សៅរ៏ ទី ៣០ ខែ មីនា ឆ្នាំ ២០១៣ ម៉ោង ១១:៥១
កូរ៉េខាងជើងបានប្រកាសនៅថ្ងៃសៅរ៍នេះថា ខ្លួនបានចូលក្នុង "ស្ថានភាពសង្គ្រាម" មួយជាមួយកូរ៉េខាងត្បូង ហើយនឹងដោះស្រាយជាមួយរាល់បញ្ហាអន្តរកូរ៉េឲ្យខាងតែបាន។
កូរ៉េខាងជើងបាននិយាយក្នុងសេចក្តីថ្លែងការណ៍រួមមួយផ្ញើទៅកាន់គ្រប់ ស្ថាប័ន និងក្រសួងរដ្ឋាភិបាលទាំងអស់ថា "បច្ចុប្បន្ននេះ ទំនាក់ទំនងអន្តរកូរ៉េចូលក្នុងស្ថានភាពសង្គ្រាមមួយ និងរាល់បញ្ហាទាំងអស់រវាងកូរ៉េទាំងពីរនឹងត្រូវដោះស្រាយផ្អែកតាម អនុសញ្ញាអំឡុងពេលកើតសង្គ្រាម"។
សេចក្តីថ្លែងការណ៍ចេញផ្សាយ ដោយទីភ្នាក់ងារព័ត៌មានកណ្តាលកូរ៉េផ្លូវការ (KCNA) បាននិយាយថា "ស្ថានភាពដែលពុំមានសន្តិភាព និង សង្គ្រាមជាយូរមកហើយនៃឧបទ្វីបកូរ៉េ ទីបំផុតបានចប់ហើយ"។
កូរ៉េទាំងពីរជានិច្ចកាលតាមន័យបច្ចេកទេសនៅតែស្ថិតក្នុងសង្គ្រាមនៅឡើយ ព្រោះសង្គ្រាមកូរ៉េឆ្នាំ ១៩៥០-៥៣ បានបញ្ចប់ទៅដោយយុទ្ធសន្តិភាព (ឬបទឈប់បាញ់) ជាជាងសន្ធិសញ្ញាសន្តិភាព។
កូរ៉េខាងជើង បានប្រកាសកាលពីដើមខែនេះថា ខ្លួនបានហែកចោលនូវបទឈប់បាញ់ និងកិច្ចព្រមព្រៀងសន្តិភាពទ្វេភាគីដទៃទៀតដែលចុះហត្ថលេខាជាមួយ រដ្ឋាភិបាលក្រុងសេអ៊ូលដើម្បីជំទាស់នឹងសមយុទ្ធយោធារួមគ្នារវាង កូរ៉េខាងត្បូង និងអាមេរិក។
តាមទ្រឹស្តី ការទុកជាមោឃៈនូវបទឈបបាញ់បានបើកផ្លូវដើម្បីបន្តអរិភាពនានា ទោះយ៉ាងណាក្រុមអ្នកអង្កេតការណ៍បានកត់សម្គាល់ថា វាមិនមែនជាលើកដំបូងបង្អស់ដែលកូរ៉េខាងជើងបានប្រកាសលុបចោលបទឈប់បាញ់ នោះទេ។
បទឈប់បាញ់ត្រូវបានអនុម័តដោយមហាសន្និបាត អង្គការសហប្រជាជាតិ ហើយទាំងអង្គការសហប្រជាជាតិ និងកូរ៉េខាងត្បូងបានបដិសេធមិនទទួលស្គាល់ការដកខ្លួនជាឯកតោភាគីរបស់ កូរ៉េខាងជើងនោះទេ។
សេចក្តីថ្លែងការណ៍កាលពីថ្ងៃសៅរ៍ក៏បាន ព្រមានដែរថា ការបង្ករឿងខាងយោធាណាមួយក្បែរព្រំដែនគោក ឬសមុទ្ររវាងកូរ៉េខាងជើង និងកូរ៉េខាងត្បូង អាចនឹងកើតទៅជា "ជម្លោះទ្រង់ទ្រាយធំ និងសង្គ្រាមនុយក្លេអ៊ែរ"៕
7.
ជីវិតកុមារីវ័យ៨ឆ្នាំដែលឪពុកត្រូវគេសម្លាប់លើទូកថៃ រីឯម្តាយបាត់ពីផ្ទះ
Posted about 4 days ago | 5 comments
Tuesday, 26 March 2013
ស៊ូ វុទ្ធី
កុមារី ធិន ចន្នី អង្គុយកាន់សៀវភៅ ទោះបីជារូបនាងមិនបានចូលសាលា។ រូបថត ស៊ូ វុទ្ធី
តាកែវៈ ដោយសារជីវភាពក្រីក្រ និងកាលៈទេសៈបង្ខំ បានជម្រុញឲ្យកុមារី ទើបតែវ័យ៨ឆ្នាំកំព្រាឪពុកម្តាយម្នាក់បោះបង់ចោលការសិក្សា ទាំងខ្លួនមិនទាន់នឹងចេះចាំស្រះ២១តួ និងព្យញ្ជនៈទាំង៣៣តួ ដែលជាគ្រឹះមូលដ្ឋានចំណេះដឹងទូទៅផង ហើយត្រូវរ៉ាប់រងលើជីវភាពគ្រួសារទាំងស្រុង ចិញ្ចឹមប្អូនៗចំនួនបីនាក់ និងជីដូនមានជំងឺប្រចាំកាយ។
កុមារី វ័យ៨ឆ្នាំដែលបោះបង់ការសិក្សាត្រឹមថ្នាក់ទី១ និងក្លាយជាម្តាយទីពីរចិញ្ចឹមប្អូនៗ មានឈ្មោះ ធិន ចន្នី នាងជាកូនទី២ក្នុងចំណោមបងប្អូន៤នាក់ ដែលឪពុកស្លាប់ និងម្តាយបោះបង់ចោល តាំងពីនាងមានអាយុ៥ឆ្នាំ។ កុមារីរូបនេះរស់នៅក្នុងភូមិនៀល ឃុំគុស ស្រុកត្រាំកក់ ខេត្តតាកែវ ជ្រកក្រោមដំបូលខ្ទមដ៏តូចមួយជាមួយជីដូននៅជិតជើងភ្នំដំរីរមៀល។
ក្មេងស្រីដ៏កម្សត់ឈ្មោះ ធិន ចន្នី បានឲ្យដឹងថា៖«ខ្ញុំមានបងប្អូន៤នាក់។ ខ្ញុំជា កូនទី២។ បងប្រុសរបស់ខ្ញុំឈ្មោះ ធិន ចំរើន អាយុ៩ឆ្នាំ ប្អូនបន្ទាប់ខ្ញុំឈ្មោះ ធិន ចន្នា អាយុ៦ឆ្នាំ និងប្អូនពៅ ឈ្មោះ ធិន ណេតអាយុ៣ឆ្នាំ។ ពួកខ្ញុំកំព្រាឪពុកម្តាយរស់នៅជាមួយជីដូនតាំងពីខ្ញុំអាយុ ៥ឆ្នាំម្ល៉េះ។ តែពួកខ្ញុំមុននេះរស់នៅជាមួយជីដូន តែបងប្រុសខ្ញុំគាត់នៅឯវត្តជម្ពូវ័នក្រុងភ្នំពេញឯណោះ ទើបតែមកនៅជុំគ្នាវិញមុននេះទេ»។
រំឭកពីខ្សែជីវិតដ៏កម្សត់ ជាមួយនឹងទឹកភ្នែករលីងរលោងដោយដៃត្បាញបង្គីបណ្តើរកុមារី ចន្នី បានបន្លឺសំឡេងទាំងអន្តឺតអន្តក់ថា៖ «ជីវិតពួកខ្ញុំអភ័ព្វតាំងពីមិនទាន់ដឹងក្តីម្ល៉េះ ខ្ញុំមានអាយុប្រាំឆ្នាំត្រូវកំព្រាម្តាយឪពុក ដែលកាលនោះប្អូនពៅខ្ញុំ គេនៅបាតជើងក្រហមរងាលនៅឡើយ រស់នៅជាមួយជីដូន ជាមួយជីវភាពបានព្រឹកខ្វះល្ងាច បានបបរខ្វះទឹកត្រី។ ប៉ុន្តែពេលនេះជីដូនខ្ញុំគាត់ធ្វើការរកចិញ្ចឹមពួកខ្ញុំលែងកើត ហើយ ព្រោះគាត់មានជំងឺ ហើយបន្ទុកនេះត្រូវធ្លាក់មកលើខ្ញុំ និងរ៉ាប់រងទាំងខ្លួនខ្ញុំទើបតែអាយុ៨ឆ្នាំ»។
កុមារី ចន្នី ក៏បានបន្តថា៖«ឪពុកខ្ញុំគាត់បានស្លាប់ គ្រាដែលគាត់ចេញទៅរកស៊ីចុះទូកនៅថៃ ត្រូវគេសម្លាប់ទម្លាក់ទឹក។ ចំណែកឯម្តាយខ្ញុំពេលដែលដឹងថា ប្តីគាត់ត្រូវគេសម្លាប់ គាត់ចេញពីផ្ទះ ដោយប្រាប់ខ្ញុំ និងយាយថា ទៅតាមរកសពឪពុកយកមកធ្វើបុណ្យ តាំងពីពេលនោះមកបាត់ដំណឹងគាត់រហូត ជិត៤ឆ្នាំហើយមិនលេចដំណឹងថា គាត់យ៉ាងម៉េចទេ ថារស់ ឬស្លាប់ក៏មិនដឹងដែរ»។
ថ្មីៗនេះ ចន្នី បានសម្តែងការព្រួយបារម្ភថា ទោះបីជាភាពកម្សត់និរាសម្តាយឪពុក រស់នៅក្នុងភាពរងាវេទនាទាំងចិត្តទាំងកាយកាលពី៣ឆ្នាំមុនក្តី ប៉ុន្តែពួកគេនៅមានជីដូនម្នាក់ជាជំហរមើលថែថ្នាក់ថ្នម ផ្គត់ផ្គង់អាហារព្រលប់យប់ព្រឹក តែពេលនេះជីដូនរបស់ពួកគេសម្រាកឈឺយ៉ាងធ្ងន់ធ្ងរមិនអាចធ្វើ អ្វីបានទេ។
ក្នុងសម្តីអួលដើមក កុមារី ចន្នី បានបញ្ជាក់ថា៖«តែពេលនេះលទ្ធភាពដែលគាត់មាននោះ ត្រូវខ្សោះថាមពល ហើយរបរដែលគាត់តែងប្រកបចិញ្ចឹមពួកខ្ញុំឲ្យរស់ធំធាត់នោះ ត្រូវខ្ញុំជាអ្នកទទួលទាំងស្រុងជាមួយប្អូនៗរបស់ខ្ញុំ»។
ចន្នី បានឲ្យដឹងថា៖«របរ ដែលយាយខ្ញុំគាត់រកចិញ្ចឹមពួកខ្ញុំកាលពីគាត់នៅមានកម្លាំងដើរ បាន នោះ គឺគ្មានអ្វីក្រៅពីស៊ីឈ្នួលស្ទូងដកច្រូតស្រូវ ឡើងភ្នំបេះបន្លែ ច្រាត់ទំពាំង និងបករំពាក់មកតម្បាញបង្គីលក់នោះទេ ហើយពេលនេះ របរទាំងនេះត្រូវធ្លាក់មកលើពួកខ្ញុំទាំងអស់»។ ចន្នី បញ្ជាក់ថា៖«នៅរដូវនេះ ផុតរដូវកសិកម្មនៅតាមភូមិ ពួកខ្ញុំត្រូវធ្វើដំណើរឡើងភ្នំស្ទើររាល់ថ្ងៃ ដែលឃ្លាតពីផ្ទះប្រហែលបួនគីឡូម៉ែត្រ ដើម្បីស្វែងរកទំពាំងនិងស្លឹកល្ងៀង និងបន្លែផ្សេងៗយកមកលក់ដូរអង្ករ បើមិនទៅទេនោះ ពួកខ្ញុំប្រាកដជាដាច់បាយហើយ ហើយសកម្មភាពនេះ ខ្ញុំស្នងពីយាយខ្ញុំជិតមួយឆ្នាំហើយ តាំងពីគាត់ធ្លាក់ខ្លួនឈឺមក»។
បើទោះជាសុខភាពដុនដាបដោយជំងឺ រុករានយ៉ាងណាក្តី តែយាយ អ៊ិត លី ក៏មិនដេកចាំតែចៅៗរកចិញ្ចឹមនោះដែរ។ ជីដូនដ៏កម្សត់របស់កុមារី ចន្នី បានឲ្យដឹងថា៖«បើតាមតែជំងឺនោះ ខ្ញុំមិនអាចអង្គុយបានទេ តែចិត្តអាណិតចៅៗនៅភ្នែកខ្មៅៗឲ្យរហង់នោះ ពេលណាខ្ញុំរាងស្រួលខ្លួនបន្តិចនោះ ខ្ញុំក៏អត់នៅទំនេរដែរ ពេលចៅៗបានរំពាក់ពីព្រៃមក ខ្ញុំក៏ធ្វើបង្គីឲ្យបានជាក្បាលៗរួចទុកឲ្យពួកគេនោះបន្តត្បាញ បង្ហើយ»។
ស្ថិតក្នុងវ័យ៥៦ឆ្នាំ ប៉ុន្តែយាយ អ៊ិត លី ហាក់មានសុខភាព និងរាងកាយដូនជាអ្នកមានវ័យ៧០ឬ៨០ឆ្នាំ។ លោក យាយ បានប្រាប់ថា៖«សុខភាពខ្ញុំទ្រុឌទ្រោមយ៉ាងនេះ ដោយសារតែកាលពីជាង១០ឆ្នាំមុន កាលពីប្តីខ្ញុំគាត់នៅរស់ គាត់តែងវាយធ្វើបាបខ្ញុំគ្មានស្រាកស្រាន្តឡើយ មានពេលខ្លះគាត់មកពីផឹកស្រវឹងមកដល់ផ្ទះវាយធ្វើបាបប្រពន្ធ មានធ្លាក់ឈាមទាំងកន្ថោៗក៏មានដែរ»។
ជាមួយសំដីរៀបរាប់បើកកកាយរឿង អតីតកាលនោះ យាយ អ៊ិត លី ក៏បានបន្តថា លុះពេលដែលប្តីស្លាប់ទៅនោះ លោកយាយមានកូនៗចំនួន៧នាក់ តែគ្មានកូនណាម្នាក់បានដោយគន្លងធម៌ទេ ចិញ្ចឹមធំឡើងដឹងក្តី ចេញទៅបាត់ៗរហូត ខ្លះ២ឆ្នាំមិនមកអើតម្តាយម្តងផង ហើយក៏មិនដឹងជាគេទៅរស់នៅឯណាដែរ។
លោកយាយបញ្ជាក់ថា៖«សុខភាព ខ្ញុំធ្លាក់ដល់ថ្នាក់នេះ ក្រោយពីជម្នះលើសុខភាពខ្លួនឯង ពេលមានជំងឺប្រចាំហើយ តស៊ូមិនថាយប់ថ្ងៃ ដើរស៊ីឈ្នួលគេ ឡើងភ្នំធ្វើយ៉ាងណាឲ្យតែចៅៗបានរស់»។
ប៉ុន្តែយ៉ាងណា ពេលនេះការតាំងចិត្ត និងភារៈទាំងនោះត្រូវធ្លាក់មកដល់ចៅស្រីទាំងវ័យមិនទាន់បានដប់ ឆ្នាំផង។ លោក ស្រី អ៊ិត លី បានឲ្យដឹងថា៖«ក្រោយពីខ្ញុំធ្វើអ្វីលែងកើតនោះ ចៅស្រី ចន្នី គេក៏មិនបានទៅរៀនសូត្រដូចមុនទេ គេត្រូវមកចាប់យករបរដែលខ្ញុំតែងប្រកបចិញ្ចឹមពួកគេនោះទាំងអស់ វិញ»៕
8.
ក្មេងស្រីអាយុ៨ឆ្នាំរ៉ាប់រងចិញ្ចឹមសមាជិកគ្រួសារ៥នាក់
នៅឃុំគូស ស្រុកត្រាំកក់ ខេត្តតាកែវ មានក្មេងស្រីអាយុ ៨ឆ្នាំមួយរូប បានឈប់រៀន ហើយទៅរកស៊ីដើម្បីចិញ្ចឹមមនុស្សចំនួន ៥នាក់ជាសមាជិកគ្រួសារ។ មនុស្សទាំង ៥នាក់នោះ មានជីដូនចាស់មួយរូប និងបងប្អូនប្រុស ៣នាក់។ ការប្រឹងរកស៊ី ដើម្បីចិញ្ចឹមមនុស្សជាច្រើននាក់ក្នុងគ្រួសារ ធ្វើឲ្យមានការចាប់អារម្មណ៍ពីសំណាក់ប្រជាពលរដ្ឋជាច្រើននាក់។
ដោយ អ៊ុក សាវបូរី
2013-03-26
ស្ដាប់ ឬ ទាញយកសំឡេង
កុមារី ធិន ចន្ធី អាយុ ៨ឆ្នាំ និងប្អូនប្រុសពៅអាយុ ៣ឆ្នាំ អូសរទេះដឹកទឹក ក្នុងភូមិនៀល ឃុំគូស ស្រុកត្រាំកក់ ខេត្តតាកែវ កាលពីថ្ងៃទី២៥ ខែមីនា ឆ្នាំ២០១៣។ RFA/Ouk Savborey
ភាពទាល់ច្រក បង្ខំឲ្យកុមារី ធិន ចន្ធី ទើបមានអាយុ ៨ឆ្នាំ ស្ថិតនៅក្នុងភាពជាកុមារ ទៅធានារ៉ាប់រងជីវភាពក្រុមគ្រួសារប្រមាណ ៣ឆ្នាំមកនេះ។ កុមារី ធិន ចន្ធី រស់នៅភូមិនៀល ឃុំគូស មានចម្ងាយប្រមាណ ១៤គីឡូម៉ែត្រពីសាលាស្រុកអង្គតាសោម ខេត្តតាកែវ និងនៅជិតភ្នំដំរីរមៀល។
កុមារី ធិន ចន្ធី អះអាងថា ភ្នំដំរីរមៀល ជាភ្នំសម្បូរធនធានដែលនាងអាចរកអង្ក្រង ស្លឹករងៀង អុស ជាដើម លក់ចិញ្ចឹមគ្រួសារនាង។
ថ្ងៃច័ន្ទ ដើមសប្ដាហ៍ទី៤ នៃខែមីនា កុមារី ធិន ចន្ធី មិនបានទៅសាលាទេ។ កុមារីនៅអូសទឹក និងរកអង្ក្រងផ្សំសម្រាប់ធ្វើម្ហូប និងសម្រាប់លក់៖ «ខ្ញុំដងទឹក ពីត្រពាំង ត្រពាំងរបស់គេទឹកនោះមានពណ៌ស្រដៀងខ្មៅ។ ទឹកនេះ ខ្ញុំទុកលាងចាន។ ខ្ញុំអូស ថ្ងៃណានេះ ខ្ញុំរែកខ្ញុំខ្ជិលអូសខ្ញុំរែក»។
កុមារីបានប្រាប់ថា ដោយសារតែជីដូនឈឺ មិនអាចរកអ្វីមកចិញ្ចឹមចៅទាំង ៤នាក់បាន ទើបនាងដើរទៅភ្នំស្វែងរកសម្បុកអង្ក្រង និងអុស មកផ្សំលក់ដើម្បីទិញស្បៀង៖ «១ថ្ងៃ ១ម៉ឺន ២ម៉ឺន ខ្ញុំទៅគោះអង្ក្រងនៅឯភ្នំឯណោះ ២នាក់បង»។
កុមារីឲ្យដឹងថា ក្រោយពីឪពុកម្តាយស្លាប់ បងប្អូននាង ៤នាក់កំព្រា ត្រូវជីដូនខាងម្តាយជួយមើលថែទាំ ប៉ុន្តែដោយសារជីដូនឈឺក្រោកមិនសូវបានយូរ ចេះតែវិលមុខ ទើបកុមារី និងបងប្រុសនាំគ្នាស្វែងរកចំណូលពីការលក់អង្ក្រង និងស្លឹកឈើក្នុងព្រៃភ្នំមកលក់។ កុមារីឲ្យដឹងទៀតថា នៅពេលបានអង្ក្រង និងស្លឹករងៀង ឬអុស រកបានពីភ្នំដំរីរមៀល យកទៅលក់ គាត់ត្រូវដើរតាំងពីភ្នំដំរីរមៀល ទៅដល់ផ្សារត្រាំកក់ ចម្ងាយ ៦គីឡូម៉ែត្រ ដើម្បីលក់របស់រកបាននោះប្ដូរយកប្រាក់ទិញអង្ករ ឬអំបិល ត្រីសាច់ជាដើម ហើយដើរមកផ្ទះវិញ ៣គីឡូម៉ែត្រទៀត៖ «យាយគាត់ឈឺ គាត់ហូបបាយអត់បាន។ ខ្ញុំដើរកាប់ក្តាម រកអង្ក្រងបានយកលក់ យកលុយចាយ និងរៀន។ លក់មួយកូនចាន ១ពាន់រៀល ថ្ងៃណាខ្ញុំរៀនអត់ ថ្ងៃណាខ្ញុំអត់រៀន លក់បាន»។
កុមារា ធិន ចំរើន អាយុ ១០ឆ្នាំ ថ្លែងថា ឪពុកម្តាយគាត់បានស្លាប់មិនដឹងនៅទីណាទេ ព្រោះចេញទៅធ្វើកម្មករសំណង់នៅប្រទេសថៃ។ ៥ឆ្នាំក្រោយមក ឮថាស្លាប់បាត់ទៅហើយ។ កុមារាបន្តថា ជីដូនឈឺសម្រាកលើកន្ទេល មានតែគាត់ និងប្អូនស្រីទេ ដែលអាចរកចំណូលចិញ្ចឹមប្អូនតូចៗបាន។ ពួកគេជួយគ្នាទៅវិញទៅមក និងអត់ធ្មត់នៅពេលខ្វះខាតអាហារម្តងម្កាល។ ពួកគេមិនចេះខ្ចីបុលនរណាឡើយ ព្រោះនៅតូចគ្មានគ្រួសារណាបណ្ដាក់ ឬឲ្យខ្ចីទេ ព្រោះអ្នកភូមិគេជួយចិញ្ចឹមក្រុមគ្រួសារកុមារកំព្រានេះច្រើនពេក ហើយ ពួកគេក៏មានគ្រួសាររបស់គេត្រូវចិញ្ចឹមដែរ៖ «បងប្អូនខ្ញុំចេះជួយគ្នា។ ជួនកាលមានត្រីអាំង មានត្រីងៀតអីចៀន។ ដើររកអង្ក្រងរកអី គោះយកទៅលក់ ហើយទិញមក»។
ស្ត្រីមេម៉ាយឈ្មោះ អិត លី អាយុ ៥៤ឆ្នាំ ត្រូវជាជីដូនរបស់កុមារកំព្រាទាំង ៤នាក់ បានអះអាងថា គាត់មានកូន ៧នាក់។ ប្ដីគាត់ធ្លាក់ពីលើដើមត្នោតស្លាប់រយៈពេល ១៥ឆ្នាំកន្លងមកនេះ។ កូនចៅបែកមានគ្រួសារអស់ គ្មាននរណាបានជួយគាត់វិញទេ។ មិនតែប៉ុណ្ណោះ គាត់ត្រូវរ៉ាប់រងចិញ្ចឹមចៅកំព្រា ៤នាក់នេះទៀត។ តែ ២ ទៅ ៣ឆ្នាំមកនេះ គាត់ឧស្សាហ៍វិលមុខ និងដួលញឹកញាប់ ទើបគាត់មិនអាចជួយអ្វីដល់ចៅទាំង ៤នាក់បាន។ បច្ចុប្បន្ន ចៅទាំង ៤នាក់ មើលថែគាត់វិញ ចៅពៅគេអាយុ ៣ឆ្នាំ ជួយដងទឹកឲ្យគាត់ផឹកជាដើម៖ «ខ្ញុំអត់ដែលហ៊ានដើរទៅណាទេ។ ខ្ញុំឈឺដើរខ្លាចតែដួល។ ខ្ញុំទៅផ្ទះប្រធានភូមិដួលបាត់មាត់ បាត់កទៅ។ បើចៅខ្ញុំគ្នានៅផ្ទះ រែកទឹករែកអីដាំបាយទៅ ខ្ញុំឈឺដៃឈឺជើង ធ្វើអីអត់កើត។ កុំបានមេភូមិគាត់ជួយខ្ញុំ ជួយដោះស្រាយដែរហ្នឹង បានអង្ករ បានមី បានទឹកត្រី ហើយលុយឲ្យក្មេងៗបានម្នាក់ ១០ម៉ឺន ហូបមិនដែលគ្រាន់ទេ មកពីខ្ញុំមិនដែលមានស្អីទេ»។
២៥-មីនា-២០១៣៖ កុមារី ធិន ចន្ធី និងបងប្អូនប្រុស ៣នាក់ រួមទាំងជីដូនសម្រាកនៅលើគ្រែ ឃុំគូស ស្រុកត្រាំកក់ ខេត្តតាកែវ។ RFA/Ouk Savborey
មេភូមិនៀល លោក ណោម សារឿន ថ្លែងថា ក្នុងភូមិនេះមានមនុស្សរស់នៅ ៨៨គ្រួសារ។ ក្នុងនោះមានគ្រួសារជិត៣០ ដែលមានជីវភាពក្រីក្រខ្លាំងលំដាប់លេខ១ និងលេខ២។ ចំណែកក្រុមគ្រួសារកុមារីកំព្រានោះ ស្ថិតឋានៈក្រីក្របំផុត។ លោកថា គ្រួសារនេះបានទទួលការឧបត្ថម្ភពីអាជ្ញាធរស្រុកត្រាំកក់ អាជ្ញាធរខេត្ត ទីប្រឹក្សាលោក ហេង សំរិន ប្រធានរដ្ឋសភា សប្បុរសជនក្នុង និងក្រៅប្រទេស។ សប្បុរសជនខ្លះជួយទិញស័ង្កសីឲ្យ ដើម្បីប្រក់ផ្ទះ ខ្លះជួយទិញស្លឹកបាំងជញ្ជាំង ខ្លះជួយអង្ករ ខ្លះកន្ទេល ក្រមា ខ្លះសម្លៀកបំពាក់ ខ្លះថវិកា។
ចំណែករូបគាត់ ជាអាជ្ញាធរភូមិជួយដឹកក្មេងធំៗទាំង ២នាក់បងប្អូនទៅសាលារៀន ព្រោះចង់ឲ្យគេរៀនអាចចេះអានអក្សរបានខ្លះ៖ «ដោយសារពីមុន គាត់ដំបូលស្លឹក មិនមានស័ង្កសីដូចសព្វថ្ងៃនេះទេ ដោយខាងសម្ដេច ហេង សំរិន គាត់បានជួយ និងសប្បុរសជនមកពីសៀមរាប។ ខ្ញុំក៏មិនបានស្គាល់គាត់ដែរ គាត់មកបានជួយឧបត្ថម្ភជាថវិកាមួយចំនួន ហើយរាជរដ្ឋាភិបាលក៏បានជួយដែរ តែវាមិនបានគ្រប់ចំនួននៅក្នុងក្រុមគ្រួសាររបស់គាត់ទេ ដោយសារគាត់ក្រីក្រពេក។ តែសប្បុរសជនដទៃទៀត គាត់បានជួយហូរហែ»។
ក្នុងថ្ងៃច័ន្ទ ទី២៥ ខែមីនា នោះដែរ ក្រុមប្រឹក្សាខេត្តតាកែវ ដឹកនាំដោយលោក ម៉ៅ សុផល បានទិញកង់មួយគ្រឿង មី ២កេះ សម្លៀកបំពាក់ រួមទាំងថវិកាច្រើនម៉ឺនរៀល ជូនបងប្អូនកុមារី ធិន ចន្ធី។
លោក ម៉ៅ សុផល ថ្លែងថា លោកនឹងស្នើសុំទៅកាកបាទក្រហមកម្ពុជា និងក្រសួងសង្គមកិច្ច ឲ្យជួយផ្តល់ស្បៀងឲ្យបានរាល់ខែដល់ក្រុមគ្រួសារក្រីក្រនេះ ដើម្បីការពារកុំឲ្យកុមារី និងបងប្រុសផ្អាករៀន ព្រោះតែធានារ៉ាប់រងការចិញ្ចឹមក្រុមគ្រួសារបែបនេះតទៅទៀត៖ «យើង បើអត់ជួយក្មេងនេះទេ គឺទៅថ្ងៃអនាគត ក្មេងនេះគឺប្រៀបដូចពេលយប់ គឺអត់មានពន្លឺ ពីព្រោះអនាគតក្មេងនេះនឹងបោះបង់ការសិក្សានៅពេលដែលយើងអត់ជួយ គាត់។ អីចឹង ខ្ញុំសូមអំពាវនាវដល់រដ្ឋាភិបាល ឬក៏ខ្មែរដែលនៅឯនាយសមុទ្រ សូមជួយក្មេងនេះ ធ្វើម៉េចឲ្យគាត់មានអនាគតល្អផង។ ពេលដែលខ្ញុំត្រឡប់ទៅវិញ គឺខ្ញុំប្រាប់ខាងផ្នែកកាកបាទក្រហម ដើម្បីឲ្យជួយដល់យាយ ហើយនិងក្មេង ៤នាក់នេះ ដើម្បីជួយបន្តទៅមុខទៀត»។
នៅថ្ងៃនោះដែរ ក្រុមការងារគណបក្សសង្គ្រោះជាតិ បានផ្តល់ថវិកាចំនួន ១០០ដុល្លារ និងប្រាក់រៀលច្រើនម៉ឺនទៀត ជួយក្រុមគ្រួសារកុមារីកំព្រានោះដែរ។
អាជ្ញាធរឃុំគូស បានថ្លែងថា មិនមែនតែក្រុមគ្រួសារកុមារីមួយនេះទេដែលជួបការលំបាកនោះ គឺនៅក្នុងឃុំមានគ្រួសារច្រើនទៀត បានធ្វើចំណាកស្រុក ព្រោះតែការធ្វើស្រែ និងដាំដំណាំរួមផ្សំមិនអាចរកប្រាក់ចំណូលផ្គត់ផ្គង់ជីវភាពបាន ប្រចាំថ្ងៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
9.
រមណីដ្ឋានភ្នំតាម៉ៅសំបូរសត្វមើលជាងឆ្នាំមុន
តាកែវ ៖ ប្រធានសួនសត្វភ្នំតាម៉ៅបានអះអាងថា មកដល់ចុងឆ្នាំ ២០១២ នេះចំនួនសត្វចាស់ និងថ្មីដែលចូលមកអភិរក្សនៅសួនសត្វបានកើនឡើងដល់ទៅចំនួន ១៤០០ ក្បាល។ លោក ញឹក រតនពេជ្រ ប្រធានសួនសត្វភ្នំតាម៉ៅ បានអះអាងថាចំនួន សត្វនៅភ្នំតាម៉ៅ គឺមានចេញមានចូល ប៉ុន្តែសរុបនៅចុងឆ្នាំនេះ មានចំនួន ១៤០០ ក្បាល។ នៅក្នុងចំណោមសត្វទាំងនោះគឺមានសត្វចំនួន ៩៨ ប្រភេទដោយរាប់តាំងពី ដំរី ខ្លា ខ្លាឃ្មុំ ខ្ទីង ទន្សោង ក្រពើភ្នំ បក្សាបក្សី ជាដើម។លោកបានបន្តទៀតថា គិតមកដល់ពេលនេះគ្រាន់តែការចំណាយនៅលើចំណីរបស់សត្វទាំងនោះ មានតម្លៃប្រមាណ ១២០០ លានរៀល ក្នុងមួយឆ្នាំ។
សួនសត្វភ្នំតាម៉ៅ គឺជាសួនសត្វដែលធំជាងគេនៅក្នុងប្រទេសកម្ពុជា។ សួនសត្វនេះត្រូវបានប្រតិបត្តិការនៅលើទំហំដីប្រមាណជា ២២៨៥ ហិកតា។ ក្រៅពីជាសួនសត្វ វាក៏ជាមជ្ឈមណ្ឌលសង្គ្រោះសត្វព្រៃតែមួយគត់នៅកម្ពុជាផងដែរ។ បើតាមការណ៍សង្កេតមើលភ្នំតាម៉ៅអីឡូវ មានភាពរីកចំរើនច្រើនតាំងពីលោក ញឹក រតនពេជ្រ មកធ្វើប្រធានសួនសត្វភ្នំតាម៉ៅមកធ្វើឲ្យភ្ញៀវជាតិ និងអន្តជាសសើរមិនដាច់ពីម៉ាត់ថា ភ្នំតាម៉ៅពិតជាល្អមែនហើយមានភ្ញៀវមកលេងជារៀងរាល់ថ្ងៃមិនថា រដូវប្រាំង ឬរដូវវស្សាទេ៕ អៀនមករា
From: http://www.watphnom-news.com/page/63
10.