2. Вялікі Тыдзень

У нядзелю 5 красавіка распачнецца Вялікі Тыдзень. Што гэта такое...

Бо так палюбіў Бог свет, што аддаў Сына свайго Адзінароднага, каб кожны, хто верыць у Яго, не згінуў, але меў жыццё вечнае". (Ян 3, 16)

Вялікі Тыдзень

гэта таямніца Любові Бога да чалавека.

Ён аддаў Сваё жыццё з любові да нас, каб мы маглі жыць вечна, каб адкупіць нашыя грахі.

Пальмовая Нядзеля

Ты ўжо ведаеш, што адбылося ў нядзелю перад Пасхай. Езус увайшоў у Ерузалем. І гэты дзень мы называем Пальмовай Нядзеляй. З гэтага дня і пачынаецца Вялікі тыдзень...

Вялікі Чацвер

У гэты дзень мы ўспамінаем тое, як Езус сабраў сваіх вучняў на Апошнюю Вячэру. Ён спачатку абмыў ногі сваім вучням, паказаў, што любіць бліжняга - гэта значыць служыць.

Пасля Езус устанавіў два сакрамэнты: Эўхарыстыі і Пасвячэння.

У гэты дзень мы віншуем нашых святароў. Таксама падчас Святой Імшы ў гэты дзень адбываецца абрад абмывання ног. Святар, выконвае той самы жэст, які зрабіў калісьці Езус.

Таксама падчас гэтай Імшы ў касцёле замаўкаюць званы і арган. Яны зноў загучаць толькі ў Вялікую Суботу.

На заканчэнне Імшы Цела Езуса пераносяць з табэрнакулюма ў цэнтры касцёла ў цямніцу. Гэта нам нагадвае пра тое, што Езус быў арыштаваны ў садзе Аліўным і ўсю ноч правёў у вязніцы.

Вялікая Пятніца

У Вялікую Пятніцу мы разважаем пра муку і смерць Езуса на Крыжы. Гэта дзень сціслага посту (устрыманне ад мяса і толькі 1 раз можна паесці дасыта). Так пасціцца павінны вернікі ад 18 гадоў.

У гэты дзень нават алтар не пакрываюць абрусом.

У Вялікую Пятніцу ў касцёле няма святой Імшы. У касцёле чытаюць Муку Пана. Галоўным пунктам з'яўляецца ўшанаванне Крыжа, калі кожны можа падысці да Крыжа і пацалаваць яго.

На заканчэнне Найсвяцейшы Сакрамэнт пераносяць у грабніцу.

Вялікая Субота

У гэты дзень мы разважаем тое, што Езус памёр і сышоў да адхлані (месца, дзе былі душы тых, хто памёр да Езуса). Чакаем Яго Уваскрасення.

У гэты дзень ёсць звычай асвячаць стравы на Велікодны стол.

Вечарам пачынаецца ўрачыстая Святая Імша, Пасхальная Вігілія. Распачынаецца яна ад распальвання агню. Ад гэтага агня запальваецца Пасхал - вялікая жоўтая свечка з 5 чырвоным цвікамі, якія сімвалізуць раны Хрыста. Пасхал з'яўляецца сімвалам Хрыста.

Ад Пасхала вернікі запальваюць свае свечкі. Адбываецца аднаўленне абяцанняў Хросту.

Заканчваецца літургія радасным "Хрыстос Уваскрос! - Сапраўды Уваскрос!"

Адбываецца таксама працэсія вакол касцёла з фігурай Уваскрослага Хрыста.

Пасха (Велікодная нядзеля)

Пасха - самае важнае і самае радаснае свята хрысціянаў! Жадаю вам добра перажыць Вялікі Тыдзень!

А зараз можаш паглядзець фільм, які распавядае пра Пасху. Добрага прагляду!

Хатняе заданне:

дома прачытай тэмы 19 і 20, і зрабі заданні ў сшытку.

Page updated

Google Sites

Report abuse