Піліпенка Пётр Ананьевіч нарадзіўся 27.06.1909 года ў вёсцы Малынічы Чачэрскага раёна Гомельскай вобласці. З 1931 па 1935 гады служыў у рабоча-сялянскай Чырвонай Арміі. У Савецкую Армію быў прызваны 6 жніўня 1941 года Бялыніцкім РВК. Удзельнік Вялікай Айчыннай вайны. Ваяваў на Бранскім, Цэнтральным і 1-м Беларускім франтах. Пачынаў вайну капітанам адміністрацыйнай службы, а скончыў – маёрам інтэнданскай службы. Усю вайну прайшоў у 216-м асобным Атрадзе размініравання сёмага ўпраўлення абарончага будаўніцтва 1-га Беларускага фронту. Праходзячы службу на пасадзе памочніка па забеспячэнню камандзіра атрада размініравання, сваёй асабістай мужнасцю, уменнем арганізаваць работу па матэрыяльна-тэхнічным забеспячэнні баявых аперацый падраздзяленняў атрада, пры выкананні задання камандавання па размініраванні армейскіх маршрутаў падчас ваеннага наступу ад ракі Одэр да Берліна, спрыяў бліскучаму выкананню задання. Выконваючы заданне камандавання па будаўніцтве штурмавых мастоў праз раку Одэр пад артылерыйскім і мінамётным агнём праціўніка, асабіста кіраваў дастаўкай будаўнічых матэрыялаў і інструментаў, што вырашальным чынам адбілася на выніках паспяховага будаўніцтва.
За гэта выкананне свайго воінскага абавязку ў перыяд 1945/01/01 – 1945/05/09 г. П.А. Піліпенка быў узнагароджаны ордэнам "Айчыннай вайны 2-ой ступені".
13 лістапада 1945 года ў Мядвежагорску, на падставе Указа Прэзідыума Вярхоўнага Савета СССР ад 9 мая 1945 году, П.А.Піліпенка быў уручаны медаль "За Перамогу над Германіяй у Вялікай Айчыннай вайне 1941-1945гг.".

Германія. Горад Берлін. 9 мая 1945 года. А.П. Піліпенка (першы злева ў другім радзе) у сцен звергнутага Рэйхстага