Успаміны Аляксанавай Алены Купрыянаўны, сувязной партызанскага атрада, сведчаць аб тым, што невялікую частку малака і масла, зробленага ў Завалочыцах, удавалася ўкрасці ў немцаў і пераправіць у партызанскі атрад імя Катоўскага. Невялікую частку пакідалі сабе, а астатняе вывозілі да чыгункі ў Старыя Дарогі.
У час Вялікай Айчыннай вайны ў вёсцы Завалочыцы размяшчаўся нямецкі гарнізон. У былым памешчыцкім будынку была размешчана нямецкая камендатура. Камендантам быў немец па прозвішчу Фішар. Нямецкія салдаты жылі ў бараках па вуліцы Сабачай, зараз гэта вуліца носіць імя У.А. Рыбака – Героя Савецкага Саюза, нашага земляка.
У падвале памешчыцкага будынка размяшчалася турма, дзе немцы вялі допыты арыштаваных партызан і сувязных партызанскіх атрадаў.
24 чэрвеня 1944 года вёска Завалочыцы была вызвалена ад нямецка-фашысцкіх захопнікаў. Калі фронт стаў набліжацца да вёскі Завалочыцы, немцы вырашылі даць бой наступаючым часцям Савецкай Арміі за вёскай, на выгане, перад мастом праз раку Пціч. На выгане былі вырыты акопы і замаскіраваны артылерыйскія гарматы. Немцы чакалі падыходу нашых войск. Але нямецкая разведка спрацавала дрэнна. Нашы войскі не пайшлі па шашы Брэст – Масква, а дайшлі да вёскі Карчма, там звярнулі, прайшлі праз вёскі Гарадок, Дварэц, Заполле і з тылу ўдарылі па немцах.
Адразу пасля вызвалення вёскі Завалочыцы пачалося адраджэнне саўгаса "Завалочыцы".