اینٹی سائیکوٹکس Antipsychotcis

اینٹی سائیکوٹک دوائیاں بنیادی طور سے شیزوفرینیا اور بائی پولر ڈس آرڈر کے علاج کے لیے استعمال ہوتی ہیں۔ ان کو شدید ڈپریشن کے علاج کے لیے بھی استعمال کیا جاتا ہے۔

اینٹی سائیکوٹک دوائیں لینے سے کس طرح کے فائدے ہوتے ہیں؟

اینٹی سائیکوٹک دوائیاں اس طرح کی علامات کو کم کرتی ہیں:

- غیبی آوازیں آنا یعنی ایسی آوازیں سننا جو کسی دوسرے کو سنائی نہ دیں۔ (ہیلیو سی نیشن)

- ایسے خیالات ہونا جن کی کوئی بنیاد نہ ہو لیکن مریض کو ان پہ اتنا پکا یقین ہو کہ ان کے غلط ہونے کے پختہ ثبوت دیکھنے اور سننے کے بعد بھی وہ اپنا یقین بدلنے کو تیار نہ ہو۔ (ڈیلیوزن)

- خیالات گڈمڈ ہو جانا، سوچیں الجھ جانا اور واضح نہ رہنا (تھاٹ ڈس آرڈر)

- بائی پولر ڈس آرڈر میں موڈ کا بہت زیادہ اوپر یا نیچے جانا یعنی بغیر کسی ظاہری وجہ کے بے انتہا خوشی اور بے انتہا اداسی ہونا

- اتنا شدید ڈپریشن جو صرف اینٹی ڈپریسنٹ دوائیوں سے ٹھیک نہ ہو رہا ہو

اینٹی سائیکوٹک دوا کا انتخاب کیسے کیا جاتا ہے؟

بہت سارے مریض ہم لوگوں سے پوچھتے ہیں کہ ڈاکٹر صاحب یہ بتائیں سب سے اچھی اینٹی سائیکوٹک کون سی ہے، یا یہ بتائیں کہ میرے لیے سب سے اچھی دوا کون سی ہو گی؟ اس سوال کا جواب جاننے کے لیے یہ تھوڑی سی تفصیل سمجھنا ضروری ہے۔

پہلی بات تو یہ ہے کہ کلوزاپین کو چھوڑ کے تمام اینٹی سائیکوٹک دوائیوں سے تقریباً برابر ہی فائدہ ہوتا ہے۔ اس لیے کسی ایک مریض کے لیے اینٹی سائیکوٹک دوا کا انتخاب اس بنیاد پہ نہیں کیا جاتا کہ کون سی دوا زیادہ موثر ہے (اس لیے سب تقریباً برابر ہی موثر ہیں) بلکہ اس بنا پہ کیا جاتا ہے اس دوا کے سائیڈ ایفیکٹس یعنی مضر اثرات کیا ہیں۔ مثلاً کسی مریض کو زیادہ نیند کی ضرورت ہوتی ہے تو ایسی دوا کا انتخاب کیا جاتا ہے جس سے نیند آتی ہو۔ اس کے برعکس کسی مریض کے لیے اہم ہوتا ہے کہ اس کو دن میں نیند نہ آئے تا کہ وہ اپنا کام کر سکے، اس لیے اس کے لیے ایسی دوا کا انتخاب کیا جاتا ہے جس سے نیند نہ آتی ہو۔

کلوزاپین دوسری تمام اینٹی سائیکوٹک دوائیوں سے زیادہ موثر ہے، لیکن اس سے کچھ شدید مضر اثرات ہو سکتے ہیں اس لیے اس کو صرف اس وقت استعمال کیا جا سکتا ہے جب مریض کم از کم دو اور اینٹی سائیکوٹک دوائیں استعمال کر چکا ہو اور اسے یا ان سے خاطر خواہ فائدہ نہ ہوا ہو، یا اتنے شدید مضر اثرات ہوئے ہوں کہ اسے وہ دوائیں بند کرنی پڑی ہوں۔

یہ پہلے سے بتانا ممکن نہیں ہوتا کہ کس مریض کو کس اینٹی سائیکوٹک دوا سے فائدہ ہو گا۔ اس لیے پہلے مریض سے یہ پوچھ کے کہ اس کے لیے کن مضر اثرات سے بچنا زیادہ اہم ہے، مثلاً یہ کہ دن میں نیند نہ آئے یا وزن نہ بڑھے، ایک دوا تجویز کی جاتی ہے۔ اگر چار سے چھ ہفتوں میں اس دوا سے فائدہ نہ ہو، یا اس دوا کے مضر اثرات اتنے زیادہ ہوں کہ مریض کے لیے برداشت کرنا مشکل ہو، تو اسے بند کر کے کوئی دوسری دوا دی جاتی ہے جس کے مضر اثرات مریض کے لیے اتنے نقصان دہ نہ ہوں۔

اینٹی سائیکوٹک دوائیں کئی شکلوں میں آتی ہیں مثلاً گولی، کیپسول، شربت، اور انجیکشن کی شکل میں۔ بعض انجیکشن ایسے ہوتے ہیں کہ ان کو دو سے چار ہفتے میں ایک دفعہ لینا ہوتا ہے۔ اس سے دوا عضلات میں اسٹور ہو جاتی ہے اور آہستہ آہستہ خون میں شامل ہوتی ہے۔ بہت سے مریض انجیکشن کو اس لیے ترجیح دیتے ہیں کہ اس سے روزانہ گولی کو لینا یاد نہیں رکھنا پڑتا اور دو سے چار ہفتے میں ایک دفعہ انجیکشن لے کے جان چھوٹ جاتی ہے۔

اینٹی سائیکوٹک دوائیوں کے ممکنہ مضر اثرات

ساری اینٹی سائیکوٹک دوائیاں ایک جیسی نہیں ہوتیں بلکہ ان میں سے بعض کے مضر اثرات یعنی سائیڈ ایفیکٹس ایک دوسرے سے بہت مختلف ہوتے ہیں۔ اسی طرح ان دوائیوں کا اثر ہر مریض پہ ایک جیسا نہیں ہوتا۔ ایک ہی دوا سے ایک مریض کو بہت فائدہ پہنچتا ہے، جبکہ دوسرے مریض کو بالکل بھی فائدہ نہیں ہوتا۔ اسی طرح ایک دوا سے کسی مریض کو بہت شدید مضر اثرات ہوتے ہیں، جبکہ دوسرے مریض کو اسی دوا سے کوئی مضر اثرات نہیں ہوتے۔ اسی لیے جب مریض یہ سوال پوچھتے ہیں کہ ڈاکٹر صاحب بہترین اینٹی سائیکوٹک کون سی ہے؟ تو ہم یہ جواب دیتے ہیں کہ ہر مریض کے لیے بہترین اینٹی سائیکوٹک دوا الگ ہوتی ہے، اور اس کا انحصاراس بات پہ ہوتا ہے کہ ا سکو کس دوا سے زیادہ سے زیادہ فائدہ ہوتا ہے، اور بہت کم مضر اثرات ہوتے ہیں۔ اور یہ جاننا عام طور سے اس وقت تک ممکن نہیں ہوتا جب تک کہ مریض وہ دوا کچھ عرصے کے لیے استعمال نہ کرے۔

اینٹی سائیکوٹک دوائیوں کے عام طور سے نظر آنےوالے اور زیادہ شدید مضر اثرات یہ ہیں:

- بلڈ پریشر کا کم ہو جانا، بعض دفعہ اس کا اس طرح سے پتہ چلتا ہے کہ مریض کو لیٹے یا بیٹھے سے اچانک کھڑے ہونے پر چکر آنے لگتے ہیں

- دن میں نیند آتے رہنا

- وزن بڑھ جانا

- ذیابطیس ہونے کا خطرہ بڑھ جانا

- منہ خشک رہنا

- قبض ہو جانا

- عضلات میں سختی آ جانا یا رعشہ ہونا

- سوچنے میں سستی محسوس ہونا، توجہ دینے میں مشکل ہونا

- ایسی بے چینی ہونا جس کی وجہ سے آرام سے بیٹھے رہنا مشکل ہو جائے

- عورتوں میں ماہواری بےقاعدہ ہوجا نا یا آنا بند ہو جانا

- منہ، زبان یا جبڑوں میں غیر ارادی حرکات شروع ہو جانا۔ کچھ مریضوں میں یہ غیر ارادی حرکات کمر، بازوؤں یا ٹانگوں میں بھی نمودار ہو سکتی ہیں۔ یہ مضر اثرات عام طور سے ان لوگوں میں نظر آتے ہیں جو طویل عرصے سے اینٹی سائیکوٹک دوا لے رہے ہوں یا معمّر ہوں

اگر آپ اینٹی سائیکوٹک شروع کرنے والے ہیں تو اپنے ڈاکٹر سے ضرور پوچھیں کہ اس دوا کے عام طور سے نظر آنے والے مضر اثرات کون سے ہوتے ہیں، اور یہ کہ ان میں سے کون سے مضر اثرات وقت کے ساتھ ختم ہو جاتے ہیں۔ اس سے فائدہ یہ ہوتا ہے کہ مریض شروع میں مضر اثرات نظر آنے پہ گھبرا کے دوا نہیں بند کر دیتا۔ اسی طرح سے یہ بھی پوچھیں کہ کس طرح کے مضر اثرات ہوں تو یہ خطرے کی بات ہو سکتی ہے اور فوراً ڈاکٹر سے رابطہ کرنا چاہیے۔

ڈیپو (طویل عرصے تک کام کرنے والا) اینٹی سائیکوٹک انجیکشن

بعض مریضوں کے لیے دوا کی گولی کو روزانہ لینا یاد رکھنا اور وقت پر لینا مشکل ہوتا ہے۔ ایسے مریضوں کے لیے بعض ایسے اینٹی سائیکوٹک انجیکشن آتے ہیں جن کو چند ہفتے میں ایک دفعہ مسلز (عضلات) میں لگانا ہوتا ہے۔ اس سے دوا انسان کے عضلات میں محفوظ ہو جاتی ہے اور اگلے کئی ہفتوں میں آہستہ آہستہ عضلات سے خون میں شامل ہوتی ہتی ہے۔ یہ انجیکشن زیادہ تر دو سے چار ہفتے میں ایک دفعہ لگانے ہوتے ہیں۔

ڈیپو انجیکشن کے فوائد

چونکہ ڈیپو انجیکشن صرف کوئی نرس یا ڈاکٹر ہی لگا سکتے ہیں جس کے لیے مریض کو ہر چند ہفتوں میں انہیں دیکھنا ہوتا ہے، اس وجہ سے مریض کا ہر کچھ ہفتے پہ خود بخود ہی چیک اپ ہوتا رہتا ہے۔ اگر مریض کو بیماری کی کچھ علامات ہو رہی ہوں، یا دوا سے کچھ مضر اثرات محسوس ہو رہے ہوں، تو اس ملاقات میں مریض اپنے ڈاکٹر یا نرس کو یہ باتیں بتا سکتا ہے، اور ان شکایات کا ازالہ جلدی ہو سکتا ہے۔

ریسرچ یہ بتاتی ہے کہ جن مریضوں کو روزانہ گولیاں لینا یاد رکھنا پڑتا ہے، ان کے مقابلے میں جو لوگ ڈیپو انجیکشن کے ذریعے علاج کروا رہے ہوتے ہیں ان کو بیماری کے اٹیک بھی نسبتاً کم ہوتے ہیں اور ہسپتال میں داخلے کی ضرورت بھی نسبتاً کم پڑتی ہے۔

ڈیپو انجیکشن سے ہونے والے ممکنہ مضر اثرات

انجیکشن لگنے کے بعد بعض لوگوں کو بدن میں جس جگہ پہ انجیکشن لگتا ہے وہاں کچھ وقت کے لیے درد یا تکلیف ہو سکتے ہیں۔

اگر کسی وجہ سے دوا کا ڈوز بڑھانا پڑے مثلاً مکمل فائدہ نہ ہونے کی وجہ سے، یا ڈوز کم کرنا پڑے مثلاً مضر اثرات کی وجہ سے، تو دونوں صورتوں میں خون میں دوا کی مقدار مستقل طور پر بڑھنے یا کم ہونے میں کچھ ہفتے لگ سکتے ہیں۔ اس سے یہ ہوتا ہے کہ فوری طور پہ یہ پتہ نہیں چلتا کہ دوا کا ڈوز بڑھانے کی وجہ سے فائدہ ہو رہا ہے کہ نہیں۔ اسی طرح سے اگر دوا کی وجہ سے مضر اثرات ہو رہے ہوں تو گولیوں کے مقابلے میں انجیکشن کا ڈوز کم کرنے یا بند کرنے کی صورت میں بھی ان مضر اثرات کو ختم ہونے میں نسبتاًزیادہ وقت لگتا ہے۔

کلوزاپین شیزوفرینیا کے علاج کے لیے کب استعمال کی جاتی ہے؟

کلوزاپین وہ واحد اینٹی سائیکوٹک دوا ہے جس کا فائدہ ریسرچ کے مطابق دوسری تمام اینٹی سائیکوٹک دوائیوں کے مقابلے میں زیادہ ہوتا ہے، اور اس سے ان مریضوں کو بھی فائدہ ہو سکتا ہے جن کو دوسری اینٹی سائیکوٹک ادویات سے مکمل افاقہ نہ ہوا ہو۔

ہو سکتا ہے کہ کوئی سوچے کہ اگر کلوزاپین اتنی زیادہ موثر ہے تو شروع سے ہی اور اینٹی سائیکوٹک دوائیوں کا تجربہ کرنے کے بجائے کلوزاپین ہی کیوں نہیں دے دیتے۔ اس کی وجہ یہ ہے کہ کلوزاپین سے بعض شدید مضر اثرات ہو سکتے ہیں (جن کی تفصیل آگے آئے گی)۔ ان میں سے ایک مضر اثر، جو کہ ۲ سے ۳ فیصد مریضوں میں خون میں سفید خلیات کم ہو جانے کا امکان ہے، کی وجہ سے جو مریض اس کو لے رہے ہوں انہیں اپنے خون کے خلیات کے ٹیسٹ شروع میں ہر ہفتے، اور کچھ مہینوں یا ایک سال کے بعد ہر مہینے کروانے ہوتے ہیں۔ اسی وجہ سے دنیا کے بیشتر ملکوں میں یہ پابندی ہے کہ کلوزاپین شیزوفرینیا کے صرف ان مریضوں کو تجویز کی جا سکتی ہے جو کم از کم دو اینٹی سائیکوٹک دوائیں مناسب ڈوز میں مناسب مدّت کے لیے لے چکے ہوں اور انہیں ان سے خاطر خواہ فائدہ نہ ہوا ہو۔ لیکن یہ ظاہر ہو جانے کے بعد کہ اور دوائیوں سے فائدہ نہیں ہو رہا کلوزاپین جتنی جلدی شروع کر دی جائے اتنا ہی اس سے فائدہ ہونے کا امکان زیادہ ہوتا ہے۔

کلوزاپین کے بہت سارے مضر اثرات (سائیڈ ایفیکٹس) دوسری اینٹی سائیکوٹک دوائیوں سے ملتے جلتے ہیں، لیکن چونکہ اس کا دماغ کے ڈوپامین سسٹم پر، جو ہماری جسمانی حرکات کو کنٹرول کرتا ہے، اثر نہ ہونے کے برابر ہوتا ہے اس لیے اس سے رعشہ، عضلات کی سختی اور اکڑن، حرکات کا سست ہو جانا، یا جسمانی بے چینی جیسے مضر اثرات نہیں ہوتے جو کہ بہت ساری اور اینٹی سائیکوٹک دوائیوں سے ہوتے ہیں۔ اسی طرح اس سے طویل عرصے کے استعمال کے بعد چہرے ، منہ، زبان اور جسم کے دوسرے حصوں کے عضلات کی وہ غیر ارادی حرکات بھی نہیں ہوتیں جنہیں ٹار ڈو ڈس کائینیسیا (tardive dyskinesia) کہتے ہیں، بلکہ بعض دفعہ اس کو ان حرکات کے علاج کے لیے استعمال کیا جاتا ہے۔

جیسا کہ اوپر آیا، کلوزاپین کے سب سے شدید مضر اثرات میں سے یہ ہے کہ اس سے ہڈیوں کے گودے میں خون کے سفید خلیات بننا کم ہو سکتے ہیں، جس کی وجہ سے مریض کی جراثیم کے خلاف قوتِ مدافعت کمزور پڑ جاتی ہے، اس کو بار بار انفیکشن ہونے اور شدید انفیکشن ہونے کا خطرہ بڑھ جاتا ہے، اور اس سے اس کی زندگی کو بھی خطرہ لاحق ہو سکتا ہے۔ اگر خون کے سفید خلیات ایک خاص حد سے کم ہو جائیں تو دوا کو فوراً بند کرنا پڑتا ہے تا کہ ہڈیوں کے گودے میں ان کا دوبارہ بننا شروع ہو سکے۔

کلوزاپین سے بعض اور تکلیف دہ مضر اثرات بھی ہو سکتے ہیں مثلاً منہ میں تھوک کا جمع ہو جانا اور رال بہنا، وزن بڑھ جانا، شدید قبض، گنے چنے مریضوں میں آنتوں کا غیر معمولی حد تک سست ہو جانا، دل کی دھڑکن تیز ہو جانا، بعض گنے چنے مریضوں میں دل کی بیماری ہو جانا، مرگی کے دورے ہو جانا۔

حالانکہ بعض مریضوں کو کلوزاپین لینے سے یہ شدید قسم کے مضر اثرات ہو سکتے ہیں، اور ہر کچھ عرصے پہ خون کے ٹیسٹ کرواتے رہنے کی زحمت بھی برداشت کرنی پڑتی ہے، لیکن اس کا دوسرا پہلو یہ ہے کہ یہ صرف ان مریضوں کو دی جاتی ہے جن کو دوسری اینٹی سائیکوٹک دوائیوں سے فائدہ نہیں ہوا ہوتا۔ اور اگر ان کو کلوزاپین سے فائدہ ہو جائے، جو کہ بہت سارے مریضوں کو ہوتا ہے، تو اس سے ان کی زندگی کی کوالٹی بدل سکتی ہے۔

اینٹی سائیکوٹک دوائیوں سے کس حد تک فائدہ ہوتا ہے؟

شیزوفرینیا کے علاج میں

جن لوگوں کو پہلی دفعہ شیزوفرینیا کی بیماری کی علامات شروع ہوتی ہیں ان میں سے بیشتر لوگوں میں بیماری کی علامات اینٹی سائیکوٹک دوا لینے سے بہت حد تک کم ہو جاتی ہیں۔ لیکن ان کو ٹھیک ہونے کے بعد بھی کافی عرصے تک دوا لیتے رہنا ہوتا ہے، ورنہ اس بات کا خطرہ ہوتا ہے کہ بیماری کی علامات واپس آ جائیں گی۔

جن لوگوں کو شیزوفرینیا کے ایک سے زیادہ اٹیکس ہو چکے ہوں ان میں دوائی لیتے رہنے کے باوجود بعض دفعہ شیزوفرینیا کی علامات دوبارہ واپس آ سکتی ہیں۔ البتّہ اگر مریض علامات ختم ہونے کے بعد بھی باقاعدگی سے دوائی لیتا رہے تو اس بات کا امکان کافی حد تک کم ہو جاتا ہے کہ اسے بیماری کا اگلا اٹیک ہو گا، اور اگر کبھی اٹیک ہو بھی تو اس کی شدّت کافی کم ہوتی ہے۔

موڈ ڈس آرڈر (بائی پولر ڈس آرڈر اور ڈپریشن) کے علاج میں

جن لوگوں کو بائی پولر ڈس آرڈر کی بیماری ہو ان میں بعض مخصوص اینٹی سائیکوٹک دوائیں ہائیپو مینیا یا مینیا (Hypomania) کی علامات، مثلاً موڈ بغیر کسی وجہ کے بہت دنوں تک بے انتہا خوش رہنا اور بہت زیادہ حرکت میں رہنا، اور ڈپریشن کی علامات، مثلاً طویل عرصے کی اداسی اور ہر چیز میں دلچسپی ختم ہوجانا، میں مدد کرتی ہیں۔

عام طور سے جس دوا سے مینیا یا ڈپریشن کے اٹیک میں فائدہ ہوا ہو، ٹھیک ہونے کے بعد بھی اس دوا کو لیتے رہنا بیماری کے اگلے اٹیک کو واپس آنے سے روکنے کا بہترین طریقہ ہوتا ہے۔

مینیا یا ڈپریشن میں اینٹی سائیکوٹک دوائیں صرف ان مریضوں میں ہی کام نہیں کرتیں جن کو سائیکوسس کی علامات ہوں (مثلاً ڈیلیوزن، ہیلیو سی نیشن)، بلکہ ان مریضوں میں بھی کام کرسکتی ہیں جن کو سائیکوسس نہ ہو لیکن ان کو مینیا میں صرف موڈ اسٹیبلائزر مثلاً لیتھیم یا ڈپریشن میں صرف اینٹی ڈپریسنٹ سے فائدہ نہ ہو رہا ہو۔

اینٹی سائیکوٹک دوائیں بند کرنے کا محفوظ طریقہ

جن مریضوں کو شیزوفرینیا کا اٹیک پہلی دفعہ ہوا ہو ان کے لیے گائیڈ لائنز یہ تجویز کرتی ہیں کہ بالکل ٹھیک ہونے کے بعد بھی انہیں اینٹی سائیکوٹک دوا کم از کم بارہ سے اٹھارہ مہینے تک جاری رکھنی چاہیے، اور اس کے بعد اسے کم از کم تین مہینے کے اوپر آہستہ آہستہ بند کرنا چاہیے۔ جن لوگوں کو شیزوفرینیا کے ایک سے زیادہ اٹیکس ہو چکے ہوں ان کے لیے یہ تجویز کیا جاتا ہے کہ انہیں دوا کم از کم کئی سال تک جاری رکھنی چاہیے۔

اگر کوئی مریض اپنی اینٹی سائیکوٹک دوا بند کرنا چاہے تو یہ دیکھنا ضروری ہے کہ اس کے بیماری کے پچھلے حملوں میں کیا ہوا تھا اور اس کی علامات کتنی شدید تھیں۔ مریض کے ساتھ یہ تبادلہء خیال کرنا ضروری ہے کہ اس کے لیے کیا چیز زیادہ اہم ہے یا زیادہ خطرناک ہے، دوا کے مضر اثرات برداشت کرنا، یا بیماری کے پچھلے اٹیک میں اسے جو علامات ہوئی تھیں اور اس کی زندگی میں جتنی مشکلات ہوئی تھیں ان کا دوبارہ سامنا کرنا؟

جن لوگون کو شیزوفرینیا کا ایک سے زیادہ اٹیک ہو چکا ہو ان میں اینٹی سائیکوٹک دوا بند کرنے سے بیماری واپس آنے کا اور ہسپتال میں داخلے کی ضرورت پڑنے کا خطرہ دو گنا سے بھی زیادہ بڑھ جاتا ہے۔

اگر اس کے باوجود کوئی مریض دوا بند کرنا چاہے تو اس کے اور اس گھر والوں کے ساتھ اس کی بیماری کی ابتدائی علامات (early warning signs) کے بارے میں تفصیلی بات کرنی چاہیے۔ عام طور سے ایک مریض کی شیزوفرینیا کی بیماری پہلی یا دوسری دفعہ جن علامات کے ساتھ شروع ہوتی ہے اس بات کا کافی امکان ہوتا ہے کہ اگر اس کو دوبارہ اٹیک ہو گا تو اس میں بھی ان ہی سے ملتی جلتی علامات ہوں گی، مثلاً نیند اڑ جانا، خاموش ہو جانا، اپنے کاموں میں دلچسپی نہ لینا، اپنے کمرے میں بند رہنے لگنا وغیرہ۔ عام طور سے زیادہ شدید علامات مثلاً ڈیلیوزن یا ہیلیو سی نیشن ان ابتدائی علامات کے شروع ہونے کے کچھ عرصے بعد نظر آنا شروع ہوتے ہیں۔ اگر مریض کو اور اس کے گھر والوں کو اچھی طرح معلوم ہو کہ اس مریض میں ابتدائی علامات کس طرح کی ہوتی ہیں تو اٹیک کے شروع ہوتے ہی علاج دوبارہ شروع کر کے اس اٹیک کو زیادہ شدت اختیار کرنے سے روکا جا سکتا ہے۔ علاج اگر فوراً شروع کر دیا جائے تو عام طور سے دوا کا زیادہ ڈوز بھی نہیں چاہیے ہوتا اور اکثر ہسپتال میں داخلے کی ضرورت بھی نہیں پڑتی۔

اینٹی سائیکوٹک دوائیوں سے اس طرح سے تو عادت نہیں پڑتی جس طرح سے نیند لانے والی یا گھبراہٹ کم کرنے والی بعض دوائیوں سے پڑتی ہے، لیکن اگر انہیں بھی اچانک بند کیا جائے تو مریض کو بعض جسمانی اور ذہنی تکلیف دہ علامات ہو سکتی ہیں۔ اس لیے انہیں بند بھی کرنا ہو تو ہمیشہ آہستہ آہستہ بند کرنا چاہیے۔ اس کے علاوہ آہستہ آہستہ بند کرنے سے یہ بھی فائدہ ہوتا ہے کہ اگر مریض کو اپنا ڈوز کسی خاص حد تک کم کرنے کے بعد دوبارہ بیماری کی علامات نمودار ہونے لگیں تو یہ معلوم ہو جاتا ہے کہ مریض کا کم از کم ضروری ڈوز (minimum effective dose) کیا ہے۔ اس کا فائدہ یہ ہوتا ہے کہ اکثر اس آخری ڈوز پہ واپس جانے سے مریض کی علامات ختم ہو جاتی ہیں اور واپس سے زیادہ ڈوز دینے کی ضرورت نہیں پڑتی۔

کیا شیزوفرینیا کا اینٹی سائیکوٹک دوائیوں کے علاوہ بھی کوئی علاج ہے؟

ریسرچ سے اس بات کا بہت واضح ثبوت موجود ہے کہ شیزوفرینیا کی زیادہ شدّت کی علامات کے علاج کے لیے علاج کا کوئی اور طریقہ اینٹی سائیکوٹک دوائیوں کے برابر موثر نہیں ہے۔

البتّہ ریسرچ سے اس بات کا بھی بہت واضح ثبوت موجود ہے کہ شیزوفرینیا کے مریضوں کے ایک بھرپور اور مطمئن زندگی گزارنے کے لیے صرف اینٹی سائیکوٹک دوائیاں دینا کافی نہیں۔

کئی دہائیاں پہلے برطانیہ میں ایک ریسرچ ہوئی تھی جسے تھری ہاسپٹل اسٹڈی (تین ہسپتالوں کی اسٹڈی) کہا جاتا ہے۔ اس سے یہ پتہ چلا کہ اگر مریضوں کے دو گروپس کو بالکل ایک اینٹی سائیکوٹک دوا دی جا رہی ہو، لیکن ایک گروپ کے مریضوں کو مصروف رکھا جائے، ان کو اس بات کی ترغیب دی جائے کہ وہ مختلف کاموں میں مصروفیات میں حصّہ لیں، لوگوں سے بات چیت کریں، ملتے جلتے رہیں، تو ان میں ان لوگوں کے مقابلے میں جن کو صرف دوا دے لے بستر پہ لیٹا چھوڑ دیا جائے، شیزوفرینیا کی وہ بہت سی علامات جو اس بیماری کے طویل عرصے تک رہنے سے پیدا ہوتی ہیں (مثلاً کام کرنے، لوگوں سے بات کرنے، تعلقات استوار کرنے، اپنا خیال رکھنے کی صلاحیتوں میں کمی ہو جانا یا ان کا ختم ہو جانا) یا تو پیدا نہیں ہوتیں، یا ہوتی بھی ہیں تو ان کی شدّت کم ہوتی ہے۔

اس لیے آج کل اس پہ بہت زور دیا جاتا ہے کہ شیزوفرینیا کے مریضوں کو صرف دوا دے کے چھوڑ نہ دیا جائے، بلکہ ان کو کام میں، لوگوں سے ملنے جلنے میں، ورزش کرنے میں، سب لوگوں کے ساتھ شامل کیا جائے۔ اس سے طویل عرصے کے اوپر ان کی ذہنی صحت بھی بہتر ہوتی ہے اور جسمانی صحت بھی۔

بشکریہ: https://www.rcpsych.ac.uk/mental-health/treatments-and-wellbeing/antipsychotics

Last accessed: 26 July 2024

اولینزاپین.pdf

اولینزاپین

(Olanzapine)

(ڈاکٹر سید احمر ایم آر سی سائیک، کنسلٹنٹ سائیکائٹرسٹ، نیوزی لینڈ)

اولینزاپین کن بیماریوں کے علاج کے لئے استعمال کی جاتی ہے؟

¨ شیزوفرینیا، اور اس سے ملحقہ سائیکوسس کی بیماریاں

¨ مینیا کا ایکیوٹ دورہ (acute mania)

¨ بائی پولر ڈس آرڈر میں مینیا یا ڈپریشن کے اگلے اٹیک کو ہونے سے روکنے کے لئے

اولینزاپین شروع کرنے سے پہلے اپنے ڈاکٹر کو بتا دیں اگر آپ کو ان میں سے کوئی بیماری ہوئی ہو

¨ پیچوٹری گلینڈ کی رسولی

¨ خون کی یا ہڈیوں کے گودے کی کوئی ایسی بیماری جس میں خون کے سرخ یا سفید خلیات کم ہو گئے ہوں

¨ دماغ کی خون کی نالیوں کی کوئی بیماری بشمول اسٹروک

¨ پروسٹیٹ گلینڈ کی بیماری

¨ جگر کی یا گردوں کی بیماری

¨ بریسٹ کینسر یا خاندان میں کسی کو بریسٹ کینسر کی ہسٹری

¨ چھوٹی آنت کے کام چھوڑ دینے کی بیماری (paralytic ileus)

¨ مرگی کی بیماری

¨ گلوکوما (آنکھ کا پریشر بڑھ جانے کی بیماری، کالا موتیا)

¨ دل کی بیماری، بشمول دل کی دھڑکن کی بے قاعدگی

¨ نیورولیپٹک میلگننٹ سنڈروم (neuroleptic malignant syndrome)، یہ دوائیوں سے ایک ری ایکشن ہوتا ہے جس میں اچانک بدن کا درجہٴ حرارت بڑھ جاتا ہے، بلڈ پریشر بہت بڑھ جاتا ہے، اور مرگی کے دورے پڑنے لگتے ہیں

¨ (tardive dyskinesia) یہ بھی بعض دوائیوں کا ایک سائیڈ ایفیکٹ ہوتا ہے جس میں بدن یا اعضاٴ میں غیر ارادی حرکات ہونے لگتی ہیں، مثلاً زبان کا غیر ارادی طور پہ بار بار منہ سے باہر نکلنا اور واپس آنا

¨ سلیپ ایپنیا (sleep apnoea) نیند کی ایک بیماری جس میں نیند کے دوران سانس تھوڑی تھوڑی دیر کے لئے رک جاتی ہے یا بہت ہلکی ہو جاتی ہے

¨ اگر آپ سگریٹ نوشی کرتے ہوں

زچگی اور بچے کو دودھ پلانا

¨ اور بہت سی اینٹی سائیکوٹک دوائیوں کی طرح اولینزاپین کے مینوفیکچررز بھی یہ تجویز نہیں کرتے کہ حاملہ خواتین اسے زچگی کے دوران لیں

¨ اگر آپ حاملہ ہوں اور ڈاکٹر آپ کو کوئی اینٹی سائیکوٹک شروع کرنا چاہیں، یا آپ اولینزاپین یا کوئی بھی اور اینٹی سائیکوٹک لے رہی ہوں اور لینے کے دوران حمل شروع ہو جائے ، تو اپنے ڈاکٹر کو ضرور فوراً بتا دیں کیونکہ زچگی میں اولینزاپین لینے سے بچے کو پیدائش کے فوراً بعد کچھ مضر اثرات ہو سکتے ہیں، جس کی تفصیل آگے آئے گی ۔ وہ آپ سے تفصیل سے ڈسکس کریں گے کہ ان صورتوں میں دوا لینے کے فائدے کیا ہیں اور ممکنہ نقصانات کیا ہیں، یا دوا کو بدلنے کے امکانات کیا ہیں۔

¨ جن نوزائیدہ بچوں کی مائیں زچگی کے آخری تین مہینوں میں اولینزاپین لیتی رہی ہوں انہیں پیدائش کے بعد کچھ ایکسٹرا پرامڈل سائیڈ ایفیکٹس ہو سکتے ہیں، یا ودڈرال یعنی بند کرنے کے مضر اثرات ہو سکتے ہیں، مثلاً بے چینی، رعشہ، عضلات میں سختی یا کمزوری ہونا، دودھ پینے میں مسئلہ ہونا، غنودگی ہونا، سانس لینے میں دشواری ہونا وغیرہ۔

¨ اولینزاپین کے مینوفیکچرر یہ تجویز کرتے ہیں کہ اگر آپ اپنے بچے کو دودھ پلا رہی ہوں تو اولینزاپین نہ لیں۔

اگر آپ اور دوائیاں لے رہے ہوں تو

اگر اولینزاپین بعض اور دواؤں کے ساتھ لی جائے تو دونوں دوائیں ساتھ لینے سے ری ایکشن ہوسکتا ہے۔اس لئے اگر ڈاکٹر آپ کو اولینزاپین شروع کرے تو اسے ہمیشہ یہ بتا دیں کہ آپ کون کون سی دوائیں لے رہے ہیں، تا کہ وہ چیک کر سکیں کہ ان دوائیوں کو اولینزاپین کے ساتھ لینے سے کوئی ری ایکشن تو نہیں ہو گا۔ اسی طرح اگر آپ ڈاکٹر کو کسی اور مرض کے لئے دکھائیں اور وہ کوئی نئی دوا تجویز کرنا چاہیں، تو انہیں پہلے سے بتا دیں کہ آپ اولینزاپین لے رہے ہیں۔

خاص طور سے اگر آپ ان میں سے کوئی بھی دوائی لے رہے ہوں تو اولینزاپین شروع کرنے سے پہلے اپنے ڈاکٹر کو ضرور بتا دیں؛

¨ دل کی دھڑکن کو کنٹرول کرنے والی دوائیں

¨ اینگزائٹی یا ڈپریشن کے علاج کی دوائیں

¨ کاربامازیپین (carbamazepine)

¨ سپروفلوکساسن (ciprofloxacin)

¨ بلڈ پریشر کو کم کرنے والی دوائیاں

¨ پارکنسن کی بیماری کا علاج کرنے والی دوائیاں

ان دوائیوں کے علاوہ بعض اور دوائیوں سے بھی اولینزاپین کے ساتھ لینے سے ری ایکشن ہو سکتا ہے ا سلئے آپ کے ڈاکٹر کو ان تمام دوائیوں کا علم ہونا چاہیے جوآپ لے رہے ہیں، چاہے وہ کسی بھی بیماری کی ہوں۔

اولینزاپین کب اور کس ڈوز میں لی جانی چاہیے

¨ بیماری کی شدت کے مطابق اولینزاپین کا ڈوز ۵ ملی گرام روزانہ سے لے کے ۲۰ ملی گرام روزانہ تک ہوتا ہے۔ ٰہ آپ کے ڈاکٹر آپ کو بتائیں گے کہ آپ کو اسے کس ڈوز میں لینا چاہیے۔

¨ علاج کے لئے اولینزاپین کو دن میں ایک دفعہ لینا کافی ہوتا ہے۔ بہت سارے لوگوں کو اولینزاپین سے نیند آتی ہے اس لئے ہم لوگ عام طور سے مریضوں کو یہ تجویز کرتے ہیں کہ وہ اسے سونے کے وقت سے تقریباً ایک گھنٹہ پہلے لے لیں۔

¨ اس دوا کو خالی پیٹ یا کھانے کے ساتھ دونوں طرح سے لیا جا سکتا ہے۔

اولینزاپین کے مضر اثرات (سائیڈ ایفیکٹس)

تمام دوائیوں کے کچھ نہ کچھ مضر اثرات ہوتے ہیں۔ بعض مضر اثرات کم شدّت کے ہوتے ہیں اور وقت کے ساتھ ساتھ کم یا ختم ہو جاتے ہیں۔ ان کی وجہ سے دوا بند کرنے کی ضرورت نہیں ہوتی۔ لیکن بعض مضر اثرات زیادہ سنجیدہ نوعیت کے ہوتے ہیں، مثلاً الرجک ری ایکشن ہو جانا، اور ان کی وجہ سے فوراً دوا بند کرنا ضروری ہوتا ہے۔

دوا کےمعلوماتی کتابچے میں بے شمار مضر اثرات لکھے ہوئے ہوتے ہیں جو دنیا میں کبھی بھی کسی بھی مریض کو ہوئے ہوتے ہیں۔ ہو سکتا ہے آپ کو ان میں سے بیشتر اثرات یا کوئی بھی مضر اثر نہ ہو۔ میں یہاں صرف ان مضر اثرات کا ذکر کروں گا جو ہم عام طور سے مریضوں میں دیکھتے ہیں، یا جو کم نظر آتے ہیں لیکن اتنی شدت کے ہوتے ہیں کہ ڈاکٹر کو فوری طور پہ دکھانا لازمی ہوتا ہے۔ لیکن اگر دوا شروع کرنے کے بعد آپ کو کوئی بھی نئی تکلیف دہ علامات شروع ہوں جو یہاں نہیں بھی لکھی ہوئی ہیں تو اپنے ڈاکٹر سے فوراً رابطہ کریں۔

کم شدّت کے مضر اثرات (اپنے ڈاکٹر کو بتائیں اگر یہ آپ کے لئے تکلیف دہ ہوں)

¨ دن میں غنودگی ہونا

¨ تھکن اور کمزوری محسوس ہونا

¨ بخار

¨ بے چینی، ایک جگہ بیٹھے رہنے میں مشکل ہونا

¨ بھوک بڑھ جانا، وزن بڑھ جانا

¨ قبض، پیٹ پھولا پھولا لگنا

¨ منہ میں خشکی ہونا

¨ ہاتھ، پیر یا ٹخنے سوج جانا

¨ جوڑوں میں درد ہونا

¨ نکسیر پھوٹ جانا

¨ چکر آنا، چیزیں بھولنے لگنا

¨ بولنے میں مشکل ہونا

¨ نیند میں چلنا

¨ نیند میں کھانا

¨ لیٹے یا بیٹھے سے کھڑے ہونے میں چکر آنا

درمیانی شدّت کے مضر اثرات (اپنے ڈاکٹر کو بتائیں جتنا جلد سے جلد ممکن ہو)

¨ سورج کی روشنی میں کھال جلنے لگے مثلاً جلد سرخ ہو جائے، خارش ہونے لگے، سوجن ہو جائے، آبلے پڑ جائیں

¨ جلد میں یا جسم کے دوسرے حصوں میں الرجی ہوجانا

¨ دل کی دھڑکن سست ہو جانا

¨ جنسی عمل یا خواہش میں تبدیلی ہو جانا

¨ خون میں شوگر بڑھ جانے کی علامات (بہت زیادہ پیشاب آنا، بہت زیادہ پیاس لگنا، جلد اور منہ میں خشکی ہو جانا، کمزوری)

¨ اگر اولینزاپین اچانک بند کر دی جائے تو بہت زیادہ پسینہ آ سکتا ہے اور متلی اور الٹی ہوسکتی ہے

¨ عورتوں میں ماہواری بند ہو جانا یا ماہواری کا وقت بے قاعدہ ہوجانا

¨ بال ہلکے ہوجانا یا گر جانا

¨ خود سے پیشاب نکل جانا

شدید نوعیت کے مضر اثرات (اگر یہ علامات ہوں تو فوراً ڈاکٹر کو دکھائیں یا ایمرجنسی ڈپارٹمنٹ جائیں)

¨ الرجی ری ایکشن اچانک شروع ہو جانا مثلاً جلد میں ریش ہو جانا، خارش، سانس لینے میں دشواری ہونا، چہرے، ہونٹوں یا زبان کا سوج جانا

¨ بار بار انفیکشن ہونا جس میں بخار ہوجائے، شدید سردی لگے، گلا خراب ہو جائے، منہ میں چھالے ہو جائیں

¨ بہت چھوٹی سی چوٹ سے خون بہنے لگنا یا نیل پڑ جانا

¨ ٹانگ کا سوج جانا اور اس میں درد ہو جانا، سینے میں درد، سانس لینے میں دشواری؛ یہ سب رگوں میں خون جم جانے کی علامات ہو سکتی ہیں

¨ مرگی کے دورے پڑنا

¨ آنکھیں یا جلد پیلی نظر آنے لگنا

¨ متلی محسوس ہونا، الٹی ہو جانا، بھوک اڑ جانا،

¨ پیٹ میں شدید درد ہونا

¨ زبان میں غیر ارادی حرکات شروع ہو جانا، یا منہ، گالوں، جبڑے کے عضلات کی غیر ارادی حرکات شروع ہو جانا

¨ اچانک سے تیز بخار ہو جانا، پسینہ آنے لگنا، دل کی دھڑکن تیز ہو جانا، عضلات اکڑ جانا، بلڈ پریشر بڑھ جانا، مرگی کا دورہ پڑ جانا

¨ سینے میں شدید درد ہونا، کھانسنے پہ خون آنے لگنا

¨ پنڈلیوں میں درد ہونا

¨ دل کا دورہ پڑ جانا

یہ تمام مضر اثرات زیادہ تر لوگوں کو نہیں ہوتے، لیکن اگر کسی کو ہوں تو بہت شدید ہو سکتے ہیں اور ہسپتال میں داخلے کی ضرورت پڑ سکتی ہے۔

ان کے علاوہ بھی کچھ مضر اثرات ہوسکتے ہیں ا سلئے بہتر ہوتا ہے کہ اگر آپ کو دوا شروع کرنے کے بعد کچھ نئی تکلیف دہ علامات شروع ہوں تو اپنے ڈاکٹر سے مشورہ کر لیں۔

ماخوذ

https://www.nps.org.au/assets/medicines/99babe72-2503-4315-8de2-a53300ff6734.pdf

Accessed: 20/04/2024

Olanzapine.pdf

Olanzapine

Link to English leaflet: www.nps.org.au/assets/medicines/99babe72-2503-4315-8de2-a53300ff6734.pdf

رسپیریڈون.pdf

رسپیریڈون

(Risperidone)

(ڈاکٹر سید احمر ایم آر سی سائیک، کنسلٹنٹ سائیکائٹرسٹ، نیوزی لینڈ)

(ایک جملہٴ معترضہ: یہ تحریر دوا کے ساتھ جو معلوماتی پرچہ ملتا ہے اس کا متبادل نہیں ہے۔ اس میں صرف وہ معلومات ہیں جو ہم لوگ جب مریض کو یہ دوا شروع کرتے ہیں تو اس وقت بتاتے ہیں۔ تفصیلی معلومات کے لئے آپ دوا کے ساتھ جو پرچہ ملتا ہے اسے پڑھ سکتے ہیں۔)

رسپیریڈون کے محفوظ استعمال کا طریقہ

رسپیریڈون کن بیماریوں کے علاج کے لئے استعمال کی جاتی ہے؟

¨ شیزوفرینیا، اور اس سے ملحقہ سائیکوسس کی بیماریاں

¨ مینیا کا ایکیوٹ دورہ (acute mania)

ڈاکٹرز ان بیماریوں کے علاوہ بعض اور بیماریوں کے علاج کے لئے بھی آپ کو رسپیریڈون تجویز کر سکتے ہیں۔

رسپیریڈون شروع کرنے سے پہلے اپنے ڈاکٹر کو بتا دیں اگر آپ کو ان میں سے کوئی بیماری ہوئی ہو

¨ دل کی بیماری بشمول دل کی دھڑکن کی بے قاعدگی، یا خون کی نالیوں کی بیماری بشمول بلڈ پریشر کا کم یا زیادہ ہونا

¨ دماغ کی خون کی نالیوں کی کوئی بیماری بشمول اسٹروک

¨ بہت زیادہ پسینہ آنا، پیچش ہونا، جسم میں پانی کی کمی ہو جانا، بدن کا درجہ حرارت قابومیں رہنے کے نظام میں خرابی ہونا

¨ جگر کی یا گردوں کی بیماری

¨ لیٹے یا بیٹھے سے کھڑے ہونے میں چکر آنا

¨ پارکنسن کی بیماری

¨ ڈیمینشیا (نسیان کی بیماری)، بڑی عمر کے لوگ جن کو ڈیمینشیا ہو ان میں رسپیریڈون لینے سے اسٹروک یا موت کا خدشہ بڑھ جاتا ہے

¨ خون میں شوگر کے زیادہ ہونے کی علامات مثلاً بے انتہا پیاس لگنا، تھکن، بینائی میں دھندلا پن، پیٹ خراب ہو جانا، بار بار پیشاب آنا

¨ مرگی کی بیماری

¨ بدن یا اعضاٴ میں غیر ارادی حرکات کا ہونے لگنا

¨ خود کشی کے خیالات آنا

¨ خون میں پوٹاشیم کا کم ہو جانا

¨ بریسٹ کینسر یا خاندان میں کسی کو بریسٹ کینسر کی ہسٹری

¨ پیچوٹری گلینڈ کی بیماری

¨ ذیابطیس

¨ (tardive dyskinesia) یہ بعض دوائیوں کا ایک سائیڈ ایفیکٹ ہوتا ہے جس میں عضلات میں غیر ارادی حرکات ہونے لگتی ہیں، مثلاً زبان کا غیر ارادی طور پہ بار بار منہ سے باہر نکلنا اور واپس آنا

¨ نیورولیپٹک میلگننٹ سنڈروم (neuroleptic malignant syndrome)، یہ دوائیوں سے ایک ری ایکشن ہوتا ہے جس میں اچانک بدن کا درجہٴ حرارت بڑھ جاتا ہے، بلڈ پریشر بہت بڑھ جاتا ہے، اور مرگی کے دورے پڑنے لگتے ہیں

¨ خون کے خون کی نالیوں میں جم جانے کی ہسٹری ہونا

¨ خون کی یا ہڈیوں کے گودے کی کوئی ایسی بیماری جس میں خون کے سفید خلیات کم ہو گئے ہوں

زچگی اور بچے کو دودھ پلانا

¨ اگر آپ حاملہ ہوں اور ڈاکٹر آپ کو کوئی اینٹی سائیکوٹک شروع کرنا چاہیں، یا آپ رسپیریڈون یا کوئی بھی اور اینٹی سائیکوٹک لے رہی ہوں اور لینے کے دوران حمل شروع ہو جائے ، تو اپنے ڈاکٹر کو ضرور فوراً بتا دیں کیونکہ زچگی میں رسپیریڈون لینے سے بچے کو پیدائش کے فوراً بعد کچھ مضر اثرات ہو سکتے ہیں، جس کی تفصیل آگے آئے گی ۔ وہ آپ سے تفصیل سے ڈسکس کریں گے کہ ان صورتوں میں دوا لینے کے فائدے کیا ہیں اور ممکنہ نقصانات کیا ہیں، یا دوا کو بدلنے کے امکانات کیا ہیں۔

¨ جن نوزائیدہ بچوں کی مائیں زچگی کے آخری تین مہینوں میں رسپیریڈون لیتی رہی ہوں ان بچوں کو پیدائش کے بعد کچھ مضر اثرات ہو سکتے ہیں،مثلاً رعشہ، عضلات میں سختی ہونا، دودھ پینے میں مسئلہ ہونا، وغیرہ، جو کچھ وقت کے بعد ختم ہو سکتے ہیں۔

¨ رسپیریڈون ماں کے جسم سے بچے میں دودھ کے ذریعے منتقل ہوتی ہے، اس لئے اگر آپ رسپیریڈون لے رہی ہوں تو بچے کو اپنا دودھ نہ پلائیں۔

اگر آپ اور دوائیاں لے رہے ہوں تو

اگر رسپیریڈون بعض مخصوص دواؤں کے ساتھ لی جائے تو دونوں دوائیں ساتھ لینے سے ری ایکشن ہوسکتا ہے۔اس لئے اگر ڈاکٹر آپ کو رسپیریڈون شروع کرے تو اسے ہمیشہ یہ بتا دیں کہ آپ کون کون سی دوائیں لے رہے ہیں، تا کہ وہ چیک کر سکیں کہ ان دوائیوں کو رسپیریڈون کے ساتھ لینے سے کوئی ری ایکشن تو نہیں ہو گا۔ اسی طرح اگر آپ ڈاکٹر کو کسی اور مرض کے لئے دکھائیں اور وہ کوئی نئی دوا تجویز کرنا چاہیں، تو انہیں پہلے سے بتا دیں کہ آپ رسپیریڈون لے رہے ہیں۔

خاص طور سے اگر آپ ان میں سے کوئی بھی دوائی لے رہے ہوں تو رسپیریڈون شروع کرنے سے پہلے اپنے ڈاکٹر کو ضرور بتا دیں؛

¨ ڈائی یوریٹکس یعنی پیشاب زیادہ بنانے والی دوائیاں

¨ دل کی دھڑکن کو کنٹرول کرنے والی دوائیں

¨ بلڈ پریشر کو کنٹرول کرنے والی دوائیاں، مثلاً ویراپامل

¨ نیند لانے والی دوائیاں، سکون آور ادویات، الرجی کی دوائیں، کچھ اینٹی ڈپریسنٹس، اور الکحل

¨ میتھائل فینی ڈیٹ

¨ ری فیمپیسن (rifampicin)

¨ کاربامازیپین (carbamazepine)

¨ ایڈز کے علاج کی ادویات مثلاً ریٹوناور (Ritonavir)

¨ پارکنسن کی بیماری کا علاج کرنے والی دوائیاں

ان دوائیوں کے علاوہ بعض اور دوائیوں کو بھی رسپیریڈون کے ساتھ لینے سے ری ایکشن ہو سکتا ہے، ا سلئے آپ کے ڈاکٹر کو ان تمام دوائیوں کا علم ہونا چاہیے جوآپ لے رہے ہیں، چاہے وہ کسی بھی بیماری کی ہوں۔

رسپیریڈون کب اور کس ڈوز میں لی جانی چاہیے

¨ شیزوفرینیا کے علاج کے لئے عام طور سے رسپیریڈون کو ۱ ملی گرام دن میں دو دفعہ کے ڈوز سے شروع کیا جاتا ہے۔عام طور سے اس ڈوز کو مریض کی ضرورت کے مطابق بڑھایا جاتا ہے۔

¨ اس کے بعد سے رسپیریڈون دن میں ایک دفعہ بھی لی جا سکتی ہے، اور دو دفعہ بھی، جیسے آپ کا ڈاکٹر ہدایت کرے۔

¨ طویل عرصے کے علاج کے لئے عام طور سے اسے ۴ سے ۶ ملی گرام روزانہ کے ڈوز میں دیا جاتا ہے، لیکن بعض مریضوں کی ضروریات مختلف ہو سکتی ہیں اس لئے اسے اس ڈوز میں لیں جو آپ کا ڈاکٹر تجویز کرے۔

¨ رسپیریڈون کا زیادہ سے زیادہ دن میں ۵ ملی گرام دو دفعہ ہے۔

¨ اس کو کھانے کے ساتھ بھی لیا جا سکتا ہے، اور خالی پیٹ بھی۔

¨ مینیا کے اچانک دورے کے علاج کے لئے رسپیریڈون کو عام طور سے ۲ ملی گرام دن میں ایک دفعہ کے ڈوز سے شروع کیا جاتا ہے۔ اس کو پھر اگلے کچھ دنوں میں ۱ ملی گرام روزانہ کے حساب کے بڑھایا بھی جا سکتا ہے۔ زیادہ تر لوگوں کو ۲ سے ۶ ملی گرام روزانہ کے درمیان ڈوز سے فائدہ ہو جاتا ہے، لیکن اس کا فیصلہ آپ کا ڈاکٹر کرے گا کہ آپ کے لئے کون سا ڈوز موزوں ہے۔

رسپیریڈون شیزوفرینیا اور مینیا کے علاوہ اور بھی بعض بیماریوں اور علامات کے علاج کے استعمال ہوتی ہے، لیکن اس کے لئے اسپیشلسٹ ٹریننگ چاہیے اس لئے اس کی تفصیل یہاں نہیں لکھی جا رہی۔

رسپیریڈون کے مضر اثرات (سائیڈ ایفیکٹس)

تمام دوائیوں کے کچھ نہ کچھ مضر اثرات ہوتے ہیں۔ بعض مضر اثرات کم شدّت کے ہوتے ہیں اور وقت کے ساتھ ساتھ کم یا ختم ہو جاتے ہیں۔ ان کی وجہ سے دوا بند کرنے کی ضرورت نہیں ہوتی۔ لیکن بعض مضر اثرات زیادہ سنجیدہ نوعیت کے ہوتے ہیں، مثلاً الرجک ری ایکشن ہو جانا، اور ان کی وجہ سے فوراً دوا بند کرنا ضروری ہوتا ہے۔

دوا کےمعلوماتی کتابچے میں بے شمار مضر اثرات لکھے ہوئے ہوتے ہیں جو دنیا میں کبھی بھی کسی بھی مریض کو ہوئے ہوتے ہیں۔ ہو سکتا ہے آپ کو ان میں سے بیشتر اثرات یا کوئی بھی مضر اثر نہ ہو۔ میں یہاں صرف ان مضر اثرات کا ذکر کروں گا جو ہم عام طور سے مریضوں میں دیکھتے ہیں، یا جو کم نظر آتے ہیں لیکن اتنی شدت کے ہوتے ہیں کہ ڈاکٹر کو فوری طور پہ دکھانا لازمی ہوتا ہے۔ لیکن اگر دوا شروع کرنے کے بعد آپ کو کوئی بھی نئی تکلیف دہ علامات شروع ہوں جو یہاں نہیں بھی لکھی ہوئی ہیں تو اپنے ڈاکٹر سے فوراً رابطہ کریں۔

کم شدّت کے مضر اثرات (اپنے ڈاکٹر کو بتائیں اگر یہ آپ کے لئے تکلیف دہ ہوں)

¨ دن میں غنودگی ہونا

¨ سر درد ہونا

¨ رعشہ،عضلات میں کمزوری، کھڑے ہونے یا چلنے میں ڈگمگانا، بت چھوٹے چھوٹے قدموں کے ساتھ چلنا (دوا سے ہونے والی پارکنسن کی بیماری کی علامات)

¨ نیند کی کمی ہو جانا

¨ تھکن اور کمزوری محسوس ہونا، توجہ برقرار رکھنے میں مشکل ہونا

¨ بولنے میں مشکل ہونا

¨ دھندلا نظر آنا

¨ بے ہوشی کا دورہ ہو جانا

¨ بدن کے مختلف حصوں مثلاً گردن، کمر، کان، ہاتھوں، یا پیروں میں درد ہونا

¨ گر جانا

¨ چڑچڑا پن، جارحیت

¨ بخار

¨ بے چینی، ایک جگہ بیٹھے رہنے میں مشکل ہونا

¨ نکسیر پھوٹنا

¨ وزن بڑھ جانا

¨ بھوک بڑھ جانا یا کم ہو جانا

¨ قبض، پیٹ پھولا پھولا لگنا، پیٹ میں درد ہونا

¨ منہ کی سائیڈ سے رال بہنے لگنا

¨ ہاتھ، پیر یا ٹخنے سوج جانا

¨ منہ میں خشکی ہونا

¨ جوڑوں میں درد ہونا

¨ بولنے میں مشکل ہونا

¨ لیٹے یا بیٹھے سے کھڑے ہونے میں چکر آنا

¨ پیشاب آنے میں مشکل ہونا

¨ جنسی علامات مثلاً مردوں کو فارغ ہونے میں مشکل ہونا

شدید نوعیت کے مضر اثرات (اگر یہ علامات ہوں تو فوراً ڈاکٹر کو دکھائیں یا ایمرجنسی ڈپارٹمنٹ جائیں)

¨ دل یا بلڈ پریشر کا مسئلہ: بلڈ پریشر کم ہو جانا خاص طور سے کھڑے ہونے پہ، دل کی دھڑکن بہت زیادہ تیز یا آہستہ ہوجانا، دل کی دھڑکن بے قاعدہ ہو جانا

¨ بدن کے درجہ حرارت میں تبدیلی: بخار، بدن کا درجہ حرارت بغیر کسی ظاہری وجہ کے بہت زیادہ بڑھ جانا، بہت زیادہ پسینہ آنا، سانس تیز تیز آنا

¨ پھیپھڑوں کی خرابی: اچانک سانس لینے میں دشواری ہونے لگنا، سانس میں گھٹن ہونا، چکر آنا