అధ్యాయం - 32
||సీ.|| అశ్వత్థ వృక్ష సాదృశ్య సంసారంబు
దాని నధిగమింప దారి జూపు
సద్గురుండవుసరంబగునన్న సత్యంబు
బాబాతనయనుభవంబు తెలిపె
పండితుల్నల్వురుం భగవదన్వేషణ
కడవులందిరుగుచు నడ్డదారి
నొకవర్తకుడు మమ్ముల కలసి యెటుపోవు
చుంటిరే పనిమీద నుంటి రనగ
||ఆ.వె.|| యడవి వెదుకమేము యరుదెంచినామంచు
ఎందుకోసమన్న దేమి లేదు
యనగ ధ్యేయరహతయన్వేషణదియేల
సకల సుగుణ శీలి సాయి రామ ||79||
||సీ.|| అతడు కనికరించి యడవుల సంగతి
వివరంగ తెలియక వెంటనెవరు
లేక యిచ్ఛారీతి నేగరాదొక మార్గ
దర్శి కావలె మీరహస్య మేమి
చెప్పనక్కరలేదు చేయుడు భోజనం
విశ్రమించిన పిదప దిరుగవచ్చు
మృదువైన వాక్కులు వృధ చేసి పోతిమి
దారితప్పటునిటు తిరిగి బయలు
||ఆ.వె.|| దేరినచటి కేగు దెంచితి మెటులనో
వర్తకుండు మరల వచ్చి కలిసి
యుత్త కడుపు నేమియుపలబ్ధి కలుగనెన్
సకల సుగుణ శీలి సాయిరామ ||80||
||సీ.|| వడ్డించు విస్తరిన్వలదని ద్రోయుట
ధర్మముగాదు పదార్ధములను
యర్పించ శుభమగునను సూక్తి పాటించి
తినుడని బతిమాల తిరిగి మువ్వు
రటులె పోవగ జూడ యాకలితోనుంటి
బంజార ప్రేమకుం బరవశించి
పెట్టిన భోజనం బ్రీతిగా భుజియించి
నీరు ద్రాగంగ మాగురువు గారు
||ఆ.వె.|| యచట నుండ జూచి యాశ్చర్యపడునంత
విషయమడుగ నేను విశదపరచ
విశ్వసించి రండు విజయంబు కలుగనెన్
సకల సుగుణ శీలి సాయి రామ ||81||
||సీ.|| తక్కిన మువ్వురు తమదారి పోవంగ
గురునాజ్ఞతలదాల్చి వారికపుడు
గౌరవంబుగ నమస్కారంబు చేయగా
వచ్చిరి తోడ్కొని బావికడకు
కట్టికాళ్లను రెండుచెట్లకు త్రాడుతో
వ్రేలాడ తలక్రిందు వేగులాడ
నీటిమట్టముపైన నీరందకుండంగ
సరిమూడు యడుగుల దూరముంచి
||ఆ.వె.|| యాగివచ్చి రపుడు నాల్గైదు గంటలు
యనిరి పైకి దీసి యున్న దెటుల?
సంతసంబు ననగ సంతుష్టి చెందిరి
సకల సుగుణ శీలి సాయి రామ ||82||
||సీ.|| చేతవీపును దట్టి చేర్చి వారిబడిని
చేరి నాతల్లితండ్రి మరచిపోతి
నాకు వేరే స్పృహలేకనే పోయె నా
యభిమానమావిరై యాత్మజ్ఞాన
ముదయించె నింద్రియమ్ములు కేంద్రీకృతములై
నేత్రాంచలములందు గురుని దివ్య
రూపదర్శనమున యపురూపయానంద
యనుభూతి పొందితి యచట నేను
||ఆ.వె.|| జ్ఞాన భక్తి కర్మ ధ్యాన యోగాదులు
మనకు నేర్పి దైవ మందు చేర్చు
గురువులందు బోధ గురువులు వేరయా
సకల సుగుణ శీలి సాయి రామ ||83||
||సీ.|| భుక్తి కొరకు నాడు పూర్వాశ్రమంబున
వెదకుచు బీద్గాము వెళ్లినపుడు
బట్టపై నల్లిక పనిదొర్కె కష్టించి
చేసినంతెజమాని చేరదీసి
మునుముగ్గురికి నిచ్చు మొత్తమంప్ కు రెట్టింపు
నాకిచ్చె నాతండు నారునూర్లు
నిండు దుస్తుల నివ్వ వాడకుండుంచితి
ఎవరిచ్చునదిగాని దైవమిచ్చు
||ఆ.వె.|| దాన పోల్చలేము దేనినైనను నాదు
ప్రభువు తీస్కొనమన ప్రజలు నన్ను
తెమ్ముతెమ్మననుట తెల్వితక్కువ గాదె
సకల సుగుణ శీలి సాయి రామ ||84||
||సీ.|| ఎవరని పిల్చేను శివశంకరుండనా
శిగపైన లేదాయె శిరుల గంగ
మెడలోన కనరావు మేటి పన్నగములు
తలపైన కనరాడు కలువరేడు
ఆదివిష్ణువనంగ నటలక్ష్మిలేదాయె
శంఖు చక్రాదుల జాడలేదు
పవళింప శేష తల్పంబు లేదచ్చోట
జానెడు బల్లయే పానుపయ్యె
||ఆ.వె.|| ఉండనిల్లు లేదు యునికి మసీదులో
ఊదితోనె యొరుల నుద్ధరించు
జనుల హృదయమందు చక్కగా నెల్కోన్న
సకల సుగుణ శీలి సాయి రామ ||85||
||సీ.|| ఉత్తకడుపునజేయు పనులేవైననూ
సఫలీకృతముగావు,నుపవసింప
బనిలేదు యెవరికీ యను సూక్తి దెల్పుచూ
ఉపవాస దీక్షతో నున్న గోఖ
లేగారి భార్యను విరమింప జేసి దా
దాభట్టు నింటిలో బొబ్బటులను
జేసి పిల్లలకిచ్చి వాసిగా భుజియింప
మని జెప్పి నోదార్చి యనియెనిటుల
||ఆ.వె.|| శక్తిలేక మనిషి భక్తి సాధనమెట్లు?
శక్తి ఎటుల కలుగు భుక్తిలేక
భుక్తితోడ జీవ శక్తులు పనిజేయు
సకల సుగుణశీలి సాయిరామ ||86||