అధ్యాయం - 1
||సీ.|| విందుగ నొక్కనాడు దయంబు మనసాయి
గోధుమల్విసరంగ గుంపు చేరి
యాశ్చర్యమునజూచునంతలో నల్గురు
జెవరాండ్రు ధైర్యంబు చేసియపుడు
పిడిపట్టి తిరగలి వడిదిప్పి పిండినీ
పంచుకొనగ చూచె వడివడిగను
పసిగట్టియది సాయి పడతుల దరిజేరి
ఇదియేమి పనియని నిలువరించి
||గీ.|| అబ్బ సొమ్మనుకుంటిరా యకట మీరు
యనుచు నాపిండి గ్రామ సర్హద్దులందు
జల్లుడని జెప్పి యాశ్చర్య చకితు జేసె
సకల సద్గుణ ధామ జై సాయిరామ ||1||
||సీ.|| గోధుమ పిండెలా వ్యధినీ బాపెనో
యను సంశయంబులు యపుడుకలిగె
భక్త జనుల కెల్ల భగవంతు డిలయందు
సాయి భక్తుల కెట్టి యాపదైన
దరిజేరగా నేరదని యంచు నారీతి
వాడవాడల షిర్డి వాసులంత
యెలుగెత్తి చాటగా పలుదూరదేశాల
వాసులందరు గూడ వచ్చి చేర
||గీ.|| షిర్డి యయ్యెను ఒక పుణ్యక్షేత్రమపుడు
సాయినాధుడె యందున్న సద్గురుండు
ఇహపరంబులనిచ్చేటి ఈశ్వరుండు
సకల సద్గుణ ధామ ఓం సాయిరామ ||2||