لحن العمال - ما قلتلكش ان الكترة 

لحن سيد درويش - كلمات بديع خيرى

ما قلتلكش ان الكترة                           لابد يوم تغلب الشجاعة

واديك رأيت كلام الأمرا              طلع تمام ولا فيهشي لواعة

غيرشي اللي كان هالك أبداننا         ومطلع النجيل على عيننا

ان فهمي يكره حنا                  وايش دخل دول يا نا بس ف ديننا

دخل بناتنا اللي موقعنا                 في بعضنا وراح لك متصدر

فقسنا لعبته واتجمعنا                    لا يضيع شرفنا الله لا يقدر

عاديك على اللي ادت له الدنيا        وش وبقى له تركة ومتاعة

تشوفنا احنا تقول حنفية                   وتشوفه هوه تقول بلاعة

عايشين في وادي النيل نشرب        من عدادات على مللي وسنتي

من جاز لملح ومن سكر                    لترموايات لخواجة تريانتي

ربنا ما يوريكشي دوختنا               الجيب نضيف أما البيت أنضف

والهدمة دي اللى على جتتنا       محجوز عليها دي عيشة تقرف

الحق كله على الأغنيا                          إحم يا فرحتنا بشطارتهم

ملهيين في روزا وماريا                       والسف نازل على أمتهم

إمتى بقى نشوف قرش المصري     يفضل في بلده ولا يطلعشي

انتوا بمالكم واحنا بروحنا                 دي الإيد لوحدها ما تسقفشي