الجهادية

كلمات: بديع خيرى - ألحان سيد درويش

يا أمّي ليه تبكي عليّ وانا مسافر الجهادية 

الأم: الفرقة صعبة يامراري     والغربة ح تشعلل ناري 

كتبوك بيادة ولا سواري  وللا نفر في الطوبجية 

 يا أمّي ليه تبكي عليّ وانا مسافر الجهادية 

ليه بس ليه تطاوعي شفقتك    وتشتريني وتبيعي صيغتك 

لو انتصرنا تقيمي رايتك         وتكوني أول وطنية 

صوت المدافع فى الميدان    زي الكمانجه والعيدان 

والحرب مخلوقة للشجعان    والصيغة تلبسها ولية 

يا أمّي ليه تبكي عليّ وانا مسافر الجهادية 

نوم السراير للعاشق   اما احنا نومنا في خنادق 

نعمل مخدتنا بنادق         فرش وغطا وبطانية 

ساعة الخطر ننسى ارواحنا   نطوي العدا تحت جناحنا 

نفدي وطننا بأرواحنا وآدي أساس الحرية 

يا أمّي ليه تبكي عليّ وانا مسافر الجهادية