Gure nabigatzailean Interneteko webgune bat ikusiz gero, orri bakar bat dela esango genuke. Alabaina, hainbat orrialdez eta fitxategiz osatuta dago. Bertan daude irudiak, bideoak eta, garrantzitsuena, iturri-kodea: orrian dagoen guztia non eta nola kokatu behar izan den esan duen testua.

Nahiz eta elementu ugari izan, orriaren egitura erraz antolatzen da geroago aipatuko ditugun etiketen bidez. Beraz, Interneten gune berriak argitaratzeko, hipertestua edo hipermedia duten dokumentuak sortu behar dira, eta, amaitutakoan, webean zerbitzari izango diren ordenagailuetan jarri. Hori guztia segidako puntuetan ikusteko aukera izango dugu.

Web-orriaren kodea ikusteko, hau da, nola eginda dagoen jakiteko, iturburu-kodea aukeratu behar da, eskuineko botoiarekin saguan klik eginda.

Askotan, aukera bikaina da webak eskaintzen dituen zerbitzuak erabiltzen ikasteko.

Web-orriak argitaratzeko, jarraibide batzuk kontuan izatea premiazkoa da. Hasteko, plangintza egin behar da; gero, web-orriak sortu, eta, azkenik, webgunea sortuta dagoenean, hura sustatu eta etengabe eguneratu.

Has gaitezen, beraz, webgunearen plangintza aztertzen.

Lehen pausoak

• Gaia pentsatu eta hari buruz hausnartu

Webgunea sortzeko, ideia egokia izatea da pausorik garrantzitsuena. Ondoren, hausnartu egin behar da ideiaren gainean, eta haren inguruko dokumentazioa bilatu. Informazioak landua, zehatza eta baliagarria izan behar du.

Ez ahaztu hautatutako gaiak interesa piztu behar duela, webgunea sustatzea eta, horrekin batera, gunea bera arrakastatsua izatea nahi badugu.

• Webgunearen egitura

Webguneak egitura txukuna eta adierazgarria badu, irakurleak arreta eskainiko dio, interesa izango du, eta, horren ondorioz, errazago jarraituko du bertan, ez da aspertu eta gunetik aterako.

Kontuak kontu, ausardiaz, ideiak paperean idatzi behar dira, eta, ostean, diagrama eta zerrenden bitartez, helburua lortzeko zer ahalegin beharko den adieraztea komeni da.

Hori dela eta, kontuan izatekoak dira, bai gunearen egitura, bai bertan jarriko diren edukiak; esaterako, sekzioak, nabigazioa, orrien itxura…

Puntuz puntu aztertuko ditugu esandakoak.

• Gunearen sailak edo sekzioak. Hau guztia pentsatu behar da: orri bakoitzean zenbat sail jarri; non kokatu eta zer ordenatan azaldu; informazio orokorra eta kontaktuak zein sailetan ezarri; argazkiak eta bideoak non ipini; ikus-entzunezkorik behar den…
• Orrialdeen arteko nabigazioa. Laukien barruan sekzioak marraztu behar dira, eta estekak elkarri lotutako lerroen bidez irudikatu. Fluxu-diagramen antzera, argi geratu behar da klik egitean erabiltzaileak zer orritatik zer orritara egingo duen salto.
• Orrialdearen eskema edo egitura. Orokorrean, orrialde guztiek antzeko itxura izango dute, webguneari batasuna emateko eta erraz irakurri ahal izateko. Ezinbestekoa da webgunea intuitiboa izatea. Dudarik gabe, erabaki egin behar da, eta marrazkien bidez diseinatu, nabigazio-barra, logotipoa, publizitatea (balego)… non jarri.
• Webgunearen itxura

Orriak itxurosoak izan daitezen, izan kontuan honako aholku hauek:

• Ez erabili batera hainbat kolore eta letra-tamaina. Egiten diren lehen webguneek sinpleak eta ulerterrazak izan behar dute. Efektu asko txertatuz gero, orriak irakurtzea eta ulertzea oso zaila izaten da.
• Aldez aurretik, egin zirriborroa; koloreak eta tamainak zehazteko ere balio du. Probak egitea guztiz baliagarria da, emaitzak ikusi eta gustukoena aukeratzeko.
• Aztertu beste webgune batzuk, eta ikusi besteek nola egiten duten lan: informazioa nola argitaratzen duten, garrantzia zeri ematen dioten, zein kolore erabiltzen dituzten… Askotan, beste webgune batzuk ikusita, hainbat ideia har dezakegu.

Hitz gutxitan esateko, plangintza egiteak hainbat lan aurrezten du, bai webgune eraginkor eta erakargarri bat sortzeko, bai alferrikako ahaleginak ekiditeko.

Kodea idatzi eta gero, fitxategia gorde behar dugu, “.html” luzapenarekin. SARRERA.html, sarrera.html, index.html… fitxategien izenak onargarriak dira. Orokorrean, izenekin arazorik izan nahi ez badugu, letra xehez eta karaktere berezirik gabe (&, $, /,”,!...) idaztea komeni da. Orrien izenak sortzeko erabiltzen dugun eskema ere zaindu egin behar da; une bakoitzean, egileak erabili behar dituen web-orriak erraz aurki ditzan.

Badaude beste hainbat erreminta web-orriak erraz programatzeko aukera ematen dutenak. Erreminta horiek automatikoki sortzen dute HTML kodea edozein elementu web-orrian jartzen denean.