پەیڤێت خویانی وبیانی   

پەیڤێت خویانی وبیانی   

١- پەیڤ وهەڤواتە

ئاهەنگ – مُؤْتَمَر - conference

جڤین - مُنْتَدًى - forum

جەمیان - مَجْمَع - convention

خەلەکا خوێندنێ – حلقة دراسية - symposium

ڤێکەڤتن - مُلْتَقًى - rendezvous

کۆمبوون - مَحْفِل - gathering

کۆنگرە - اِجْتِمَاع congress -

گڤتن - مُنَاقَشَة - discussion

گوڤەند - نَدْوَة - seminar

گفتوگۆ: حَدِيث، تَحَاوُر، نِقَاش، مُنَاظَرَة، مُجَادَلَة، حِجاج: controversy, debate, argument

٢- تێبین ورونکرن

ئەڤ سێ پەیڤێت بیانی:  (symposium, seminar, conference)دهێنە ب کارئینان وحەتا رادەکی ب هەڤواتەکا بێ جوداهی وزور جاران جهێت ئێکودوو دگرن دزمانێت بیانیدا ئەمژی وان ب کاردئینن ب رێنۆسا بیانی، بێ گومان مە یێت پەتی ورەسن دهەین یێت، خویانیێت دکەڤن دزمانێ کوردیدا ل شونێت وان پەیڤان، وئەڤە جهێ داخێ یە. ل ژێری چەند نمونەنە بو ڤێ گرفتاریێ:

هەڤواتێت خویانی:

 کۆمبوون، جڤین، جەمیان، گفتوگۆ، گڤتن، دانوستاندن، ڤێکەڤتن، ئاهەنگ، گوڤەند، کۆنگرە

هەڤواتێت عەرەبی:

اِجْتِمَاع، اِنْعِقاد، حلقة دراسية، تَحَاوُر، مَجْمَع، مَحْفِل، ملتقى، مُنَاقَشَة، مُنْتَدًى، مُؤْتَمَر، نَدْوَة

هەڤواتێت بیانی: (seminar, conference, symposium ) - سیمینار، کۆنفرانس، سیمپۆزیۆم

  forum, convention, conference, seminar, symposium gathering, discussion, rendezvous,

٣- دیروکا پەیڤێ

ل یۆنانا کەڤن پەیڤا (symposium) دهاتە ساخکرن ودانان وەک: ئاهەنگەکا خوارنێ وڤەخارنێ وشاهیێ وشیلانبوو: (a drinking party symposia: symposium)

 بەلێ نۆکە ب سەرەکی دهێت بو جڤین وجەمیانێ بو درستکرنا خەلەکەکا لێکولینی یا فەرمی ب گڤتن و دانوستاندن ل سەر بابەتەکی یان مژارەکا تایبەتمەند ب بەشداریا بسپۆر وبێژەران. هەر وەسا ب بەرهەڤکرن وبەرچاڤکرنا چەندێن گوتاران ل سەر بابەتەکا تایبەت. ب بەرهەڤبوونا ڤان کەسێت پر مێشک وهش وبیر بو دارێژتنا هزر وزانینان، ئەڤ رەنگە ئاهەنگ وگوڤەند وڤێکەڤتن وشەهیان دهینە گرێدان ل زانینگەهان ول جهێت فەرمی ل سەر بابەتێت زانستی ورەوشەنبیری ژبەر ڤەگوهاستنا پێزانینان دناڤ جڤاکێدا.

٤- جوداهی وجێوازی دناڤبەرا ڤان پەیڤاندا

  conference, seminar, symposium, forum

چەند جوداهی وجێوازی دناڤبەرا ڤان پەیڤێت ژوریدا:

سیمپۆزیۆم، سیمینار، فورۆم، کۆنفرانس

ئێکەم - المؤتمر - conference – کۆنفرانس – ئاهەنگ - conferee, conventioneer

جەمیانەکا فەرمی یە یا زانستی ب هندەک بازنێت تایبەتا ئاشکەرا ب دەمەکێ بەرفرەهـ گرێدایە، چەند لیکولنیت زانستی دگەل چەندین لاپەرێت کارێت مەیدانی ل سەر بابەتەکێ زانستی یێ تایبەیتمەند ب ئالیکاریا چەند لێکولینەر وبسپۆرێت وێ مژارێ تێدا پەشداردبن، ودبێت ئەڤە ڤەکێشیت بو چەند روژان ودان وستناندن تێدا چێدبیت وئەڤە ب دویماهی دهێت ب چەند پەسەند وپێشنیاران، ئەڤ رەنگە ئاهەنگ نە یا بەردەوامە ودبێت بو جارەکا بتنێ ب هێتە گێران وگرێدان.

دووەم - گوڤەند - نَدْوَة - seminar

ڤێکەڤتنەکا زانستی یە یا رێکخستی یە ورێکوپێکە،  ب خرڤەبوونا بسپۆران ولێکولینەران وقوتابیان بو گڤتن ودانوستاندنێ ل سەر بابەتەکێ تایبەت ب درێژی وکویراتی، پشتی پێشەکیێ گفتوگۆیا ڤەکری ل سەر ناڤەرۆکا مژارێ دهێتە دان.

سێێەم - خەلەکا خوێندنێ - حلقة دراسية، نَدْوَة - symposium

ب کۆمبوونا وبەشداریا چەند بسپۆران دبوارێت هەمەرەنگدا وهەر ئێک ل دیف زانین وبوچونێت خۆ و ئەوا  گرێدای ب بابەتەکێ ئێکلاڤە یێ تایبەتمەند بو چارەسەرکرنا ئاریشەکێ ل روژەکا جیهانیدا یا تایبەتڤە بو دەمەکێ کورت دسالێدا.  

چارەم - جڤین - مُنْتَدًى - forum

ڤێکەڤتنا کۆمەکا مروڤان ل سەر بابەتەکێ گشت وەک: ( ئابۆر، کەشتی، پەیوەندی ...) نە یێ زانستی یە، پەشداربوون یا هەمەرەنگە ژلایێت فەرمیڤە، ئەڤە ب خۆڤە ڤەدگریت کۆمەکا کارێت کارگەهی و پێشانگەهان 

ودبیت ببیت ڤێکەڤتنەکا جیهانی ئەگەر سێ چار وەلاتان پێکبهێت.

٥- چەند نمونە ل سەر ڤان پەیڤان دزمانێ ئنگلیزیدا

گوڤەندا رەوەشەنبیری: ندوة ثقافية: cultural symposium

ئاهەنگا زانستی: ندوة علمية: scientific symposium

خەلەکا دانوستاندن: الحلقة الدراسية: colloquium; seminar; symposium

خەلەکا گڤتنێ: حلقة نقاش: discussion circle

جڤین: منتدى: forum

ئاهەنگا جیهانی: الندوة الدولية: international symposium

ئامەدەبوون یان بەشداری ل ئاهەنگێ: حضر ندوة: attend a symposium 

مێڤاندریا ئاهەنگێ: استضاف ندوة: host a symposium

٦- کیژک: خویانی یان بیانی؟

ل شوینا ڤان پەیڤێت بیانی یێت دهێنە ب کارئینان ل جهێت ئێک بێ جێوازی ل دام ودەزگایێت مە  چ یێت زانستی یان ژی یێت رەوشەنبیری ئەم دشێین ئەڤێت خویانی ل جهێت وان ب کاربینن بێ جوداهی:

conference, seminar, symposium

سیمپۆزیۆم، سیمینار، کۆنفرانس - فێستیڤال

کی ژچێترە ئەم بێژن:

سیمپۆزیۆما مەلایێ جزیری یان ئاهەنگا مەلایێ جزیری

سیمینار فەقیێ تەیران یان گوڤەندا فەقیێ تەیران

کۆنفرانسی ژنان کوردستان یان ڤێکەڤتنا ژنان کوردستان

هەر وەسا ئەڤ پەیڤە ژی (festival ، مِهْرَجَان، فێستیڤال) دهێتە ب کارئینان ب وان هەڤواتە ل جهێت ئەوێت ژێری بێ جوداهی وەک:

فێستیڤالا ئەحمەدێ خانی یان ئاهەنگا یان شەهیانا ئەحمەدێ خانی

١٢- ١٢ – ٢٠٢٥ ئەحمەد عەلی حەسەن