ڤەدان

دیوانا دووێ ژهوزانێت کەڤن

دبن ڤی ناڤی

(( ڤەدانا خەما ))

ئەڤ هوزانە دەست پێکە

بێژە ... چ بێژم ؟

دەستێ درێژ ... ژوارێ تاری 

ناڤ سور گولا کرە نیهاری 

بو ... بو ؟ بهار کانێ تو ؟

گولا رەنگین .. کیڤە چو ؟

رەش بو رەش بو هەمی وار

باغێ گولا بو بەیار

خو کەڕکر تەیرێ کەیفێ

خو ڤەدەرکر جانە هەیڤێ

نەما ل واری رەنگێ تازە

خو کێشا هنداڤ تەیرێ بازە

بایێ دژوار، دگەل توزێ

شبتی بەزی ، د ناڤ کوزی

چەراند .. نقاند ..

 چاڤێت ڤەبی ...                                                                            

من پسیارکر، رێ بەرزەبی

من هەوار کر، کەسێ هاژمن نەبی

کورە مە د ناڤ دنا مەزن

کورەمە.. نێ برینێت گەزن

نوکە دەمە .. ئەڤرو دەمە

بێژە دەمە :

" دەستی سەر تە ، یێ پر قرێژە "

رێکا تە زورا درێژە ،

خر تاری یە ..بەیان هێژە .

پرسە .. قەت نەترسە

نوکە دەمە .. بێژە دەمە : 

خو ڤەدە ئەی دەست

دا ڤەدەت شەوقا روژێ،

هەتا گەنگی دێ مینم مەست؟

ناڤ گەرما ئەڤێ دوژێ،

دا بدەت تاکا ، گولا سوتی

ڤەبیت دیمێ بشکوژێ ،

هەر دەم  نە بەس نوکە منا گوتی 

ناژیم قەت ژینا نوژێ.

١٥ / ١٢ / ١٩٧١ الأربعاء -موصل

            ئەڤ پارچە هوزانە من ڤەهاندبو دەما تەمەنێ من ٢٢ سال بونمن فرێکربو روژنامەکێ، بەداخەوە نەهاتە فلاڤکرن چنکی هوین هەمی دزانن ژ بەر چێ؟ ( مە داخازا ئازاد بونێ دکر)  لوی دەمی. نوکە ئەز دکەمە دیاری بو هەر کوردەکێ ئازاد وسەربەخو وسەربەست.

ئەحمەد عەلی دوسکی ١٠ -٥ - ٢٠١٦ دهوک

یا بەلاڤبوی دگروپێ دوسکی ناسناما مەیە

دەنگی ناکەم

  تە دامن..

ئەو شەربەتا..!

ژوی رەنگی،

تە دامن بە جاری..

بێ دەنگی

من ڤەخاربو

ئەی هەڤالێ

شرین.. ئەڤرو هاتم

نە وەک ئەوێ جارێ

رەڤیم بێ زاری

ژوی رەنگی

نوزانم..بو؟

ددلدا هەمی پەنگی

وەک ژەهرەمارێ

هاتم ئەڤێ جارێ

بێ دەنگی

دەنگی ناکەم

ئەی هەڤالێ

بلا..دناڤ هزرا

ببم وەکی مەستا

شرینێ..

نساخ بکەڤمە خەستا

ژبەر ئەڤینێ

بلا.. دەستێ خەمێ

ژهەمی ئالا

شبتی رمی

دناڤ لەشی

شبتی چالا

پەردا رەش

بێختە بەر من

بەرزەکەت روژا گەش..

ئەی هەڤالێ.

ل هیڤیا ئاڤێ

بێژە من..

ئاڤگێرێ، ئاڤا زەلاڵ

برێژە دەڤی

ئەوێ ئاڤێ، بێ بەتاڵ،

ئەزم تێنی..

بو دێ مینی؟!

ل هیڤیا تە مە..مەهو سال

ل ئەوان شیڤا 

ب هشکە لێڤا

ژەهرەمار..

چەندا شێلێ، زورا تاڵ

بو چی ڤەمای؟

ئەی هەڤاڵ

گەریام..

دناڤ بیش ورێلا

بێ پەر فریم

هنداڤ چیا

بێ چاڤ کرم

ناڤ مێرگێت..بێ گیا

چون ژمن ئاخ وناڵ

چون ژمن..

هات تەیرێ باز

جەمین سەر من

خو ڤەکێشا..قولنگێ

بێ ئاواز!

ژلەشی ڤەکر

گوشتێ خاڤ

بەر دەنگێ ترسێ 

نە کرن دەستا چ بزاڤ

بی هەتاڤ

نەمان چاڤ وگاڤ

هات..مرنا دەلال

هات مرن..

شبتی دکێلێ

من نە کر گازی

وەک تەنیا سێلێ

ئەز نخاڤتم

دەست شورکرن

تەیرێ بازی 

ئەز بشاڤتم

ژخوینا لەشی

بو چی رەشی

دنا بەرفرەهو رون

بەر من بو هشکە مازی

ئەو نشیڤی

بو ئەڤرازی

حەتا کەنگی؟ ئەز دخازم

وەکی رویڤی 

ئەوێ ئاڤێ

ئەی هەڤال

من نەما هیڤی

بورین گەلەک ساڵ

بێ بزاڤ..دناڤ داڤێ

دێ بەردەم گیانێ

شبتی بەزێ کیڤی

ل چول وچیا

بلا هەستی..ناڤ شکەفتا ڤاڵ

دویربیت ژهیڤیا

بمینیت کەڕ ولاڵ

کەڕ ولالم

ماری گەستم

خەوا گران کەڤتە چاڤا

من نەهێلا

من نەدیت کانیا زەلاڵ

ل هیڤیا تە..ئەز روینشتم

گەلەک دەما

بزانە..!

ب ئەڤی تهنێ تە ئەز کوشتم

بێ دەرمانە

گیان پربو ژخەما

حەتا کەنگی؟ دێ مینم

ئەی هەڤاڵ

هنداڤێ ئەڤێ جوکا 

هەرا ڤاڵ

ب ئەڤێ تهنێ

نێ ئەز سوتم

برین ل من بونە چاڵ

تێگدا هەمی لەش

بونە برین

کی هەیە دەرمان بکەت!

وەکی دەنگێ رەش

شەڤا تارێ ب سەردا کەت

کوتر گرین

نە شێم هەستم

کەتە.. پیا..بەندا داڤا

کەتە دەستم

بەر وێ ژەهرێ

نە هشیارم

هەرێ مەستم

گرفتارم..

بێ هەڤاڵ

بێ ئیغباڵ

تەمرین..ئەو هڵ شەمال

رەشە تاری..بو نهاڵ

وەکی کورەی

من نە دیت رێکا ماڵ

برین نالین.. کا تو هەڤاڵ؟

بو چی ڤەمای؟

دەڤ ما زوها

  کەنگی ڤەخوم..ئاڤا زەلاڵ

١٨-١-١٩٧٢میسل

گازیەک ژوەلاتی بو وەلاتی

جانێ ژخەو رابە

تازی نەما

گوه بدە دەنگێ بولبولا،

هنداڤ مەدا

ناڤ ڤان چەما

دگالن گەل سور گولا

رابە..جانم

بەر تاڤێ هل بەقژی

گیانم

چاڤ زلم

ل هیڤیا تەژی

بێ دلم

ئەگەر نە کەم

وەغەرێ

دا رێکێ ڤەکەم

دلبەرێ

بو دلدارا

ل ئالێ دژی

وەک گرفتارا

ل هیڤیا مە نە

چەند دەما

ئەو چەوا؟

تە گوه لێ نەما

دەنگێ نالینێ

گەهشتە برینێت مژێ

بو چیە؟

سەر شور

بەر تاڤێ بژی

وەک پور!

چەنگ وشاپەرێت

بازێ نزم

شورببن هنداڤێ تە ژی

ستێرە گەش ئەوە

ئەگەر زوی

بەری هەمیا رژی

یا ب خەوە

ئەگەربمینیت

ل هیڤیا روژێ

ببیتە رەژی

شبتی بشکوژێ

خو گرت

ل هیڤیا مەژی

بو نە پرت

گوشتێ لەشی

بێ دەنگ

دەلیڤە گرت

دەڤ بەش

حەتا گەنگی دێ مینی؟!

درێژ ناکەی

ئەوی دەستی

ڤەگیرینی

بو ڤەناکەی؟

دەستێ ڤەبستی

شبتی کەوێ گرتی 

دناڤ رکێ

خەمگیر ڤەما..

دخازت مرنا خوژی

هیڤی نە ما

ئەگەر وەک لالی

نە کەین چ دەنگا

ڤەمان..

لی ببیت پەژی

دەرمان 

ب چ رەنگا

قەت نە بیت

هەر دەم ئەورێ تاری

سەر هەبیت

ل هەمی واری

بەر ئەوان چاڤێت

هیڤیدار

ئەو دەست وگاڤێت

چلک دار

بمینین لال وگێژ

رەشا ئالا

هنداڤ هژی

لهەمی ئالا

مرن ببیتە ڤەرێژ

ب کەڤیتە گەها

وەکی دارێ

هژبێت ژرەها

وەکی قوپا

شورکەن گوها

هەوارکەن

دەڤ ما زوها

دێ گەنگی؟

هەلێت روژا مەژی!

دێ هێت

روژا نە دەرکەڤتی

بو وە ژی..

ئەگەر گولێت بشکڤتی

مێشێ مێت

شلخێت ڤالا پرکرن

ژخو ڤەرێت

هێلان تژی..

سەردا هاڤێت

بێژن: نەیار..!

گوها بگرن

هات دەنگێ دژوار

خو ڤەدەن..

ئەگەر ب ئازرن

دێ خو ل وەدەن

ستێنگێت ب ژەهرەمار

دێ رێژنە دەڤی

ئەوێ ژەهرێ

یا ڤەخاری هەڤالا تەژی..

شبتی بەفرێ..

دێ حەلینیت

تاڤا مەژی

دێ هلینیت

وان سنورا

ژرێکا مەژی

وەکی کورا

دێ کەڤن

 ژرەخ ودورا

دێ رەڤن

شەوقا روژێ

دێ ڤەدەت

سەر کوردێ پاکێ هەژی

گەر نەدەت..

دوژمنێ سەر شور

گوها،-

زوها..دێ گرین

ب گشتە دەستان

رەها پشتا وژی..

ئەگەر هەلستان

لاوێت نڤستی

نەمان..دخەودا

ناڤ شەڤا تاری

دەست گەهاندە دەستی

پێگڤە هەودا

ل سەر نەیاری..

ب هەمی دەنگی

بکەین گازی:

خو ڤەدەن

هەلات روژا کوردا

بکەن تازی

ب رەشە رەنگی

دوژمن..

ژبەر ئاخا مەردا

ژبەلنگازی

بزانە دێ سوژی!

وەک لەشێ تازی..

شەوقا روژێ

بو مە ببیت دەرمان

بو تە نەبیت

چ یەمان..

دل کورەبیت

ژهەردو چاڤان برژی..

هنداڤ تەبیت

دەستێ مرنێ

وەک نساخی

سەر ڤی رەنگی..

ژبهن تەنگی

ئەگەر بکەی جەنگی

بزانە!..

دێ نێزیکەی

مرنا خوژی..

ئەگەر چاڤکەی

دی بینی خورتا

شپتی سنگی!

یێ دگرتین کنار

گەل هەر چار کوژی..

هەر دەما هشیار-

بزانە دوژمن

ئەوی دەستی

درێژ نەکەی..

نەهاڤێ

دەستێ مە گەستی

وێ گاڤێ

دێ زڤرینی

خوین وهەستی

ئەڤێ جارێ

هەر وەکی دەست دەی ژژی!

بو بهارێ

بو سەربەستی

دی کەین..

دا جهێ کوردا

ب گەهیتە ئارمانجا خوژی.

١٥-٢-١٩٧٢ میسل

پێلە بێژم

پێلە بێژم

ئەڤێ جارێ

گولا رەنگ چرمسی

ڤی هەواری

ڤەرێژم-

ڤەشارتی دەنگی

ژبرینا..

خەمێت دلی

بێ دەنگی

من نڤێسی

بو دلی

دەما پەنگی

ناڤ برینا..

ژهەمی رەنگا

من بژارت

وەک ئاوازی

من هنارت..

بو دلدارا

دێ بێژم

گاڤا تێنی

دێ ڤەمێژم

وەکی مەمکی

دێ ڤەکێشم

وەک چلکدارا

بلا بێشم

پێلە بێژم.

چ بێژم

بوڤیانا

دلێ نڤستی

ژخەو راکری..

لەشی تەنا

پر ژانکری

گوشت وهەستی

گەل گیانی

هەر وەکی گەستی

مارێ رەش

رەنگ زەرکری

رویێ گەش

بێ رەنگ کری.

ڤیانا تە..

ئەز برم

بو بەحشتا

ئەز فێرکرم

وەک بچیکا

ل گەلەک تشتا

ئەز نڤاندم

ل سەرێت زویرکا

ئەز گێراندم

ناڤ کولیلکا..

بو شەڤ..

تێدا نڤستم

نەهشیار-

بێ هش وسەودا

تێک ئێخستم

دەما ل من هەودا

وەک نەخوشا

کەڤتم..

گرکدار-

دناڤ تایا

گەرم وسار

من هەوارکر..

ئەزێ مەستم

کانێ دختور؟

بو چی نینە؟

هەر بێ خەستم..

ئەڤ نە ژینە

ئەزم تێدا

هەر نساخم

هەر نەخوشم

ب ئاخ وداخم

ب ژان وبرین..

مەندەهوشم

چەند دنالم

چەند درێژم

ئاهو گرین..

نینە دەرمان

بو برینا..

گەر نەبینم

ئەو شرینا

پر ئەڤین..

هەرێ دینم

وەکی گێژا

قەت نارینم

وەکێ مەمێ

دکەم پسیار

کانێ زین؟

کوترا خاندن

ئاوازێت خەمێ

هنداڤی سەری

ل من هلاندن

هزر وتەخمین..

هاتە هزرێ

بیرا یارێ

کەت مە وێرێ

هار ودین..

دلبەرێ..

من نەزانی

ڤیانا تە

دێ وەکەت

دەرگەها

دێ ل من ڤەکەت

جاڤێت دنێ

دێ ژمن ڤەکەت

دێ گرت

پەرژانەکەت..

ئەز گرێدام

شەڤا تاری

کرهەڤال

من راهێلان هەواری

کانێ شەپال

حەتا گەنگی؟

ناڤ شەڤێ

دێ ڤەهینم

رەشە رەنگا

خو گەزینم

ب دەست وچەنگا

حەتا سپێدا زەلال..

ڤیانا تە..

نیشا مندا

وەک دیمەنی

چەوا دێ مینی

دهزرا مندا

کیڤە بچم

بێیە درێکامندا

وەک رێڤینگێ ب هەڤال

ڤیانا تە..

خوش بەهشتە

هزر تێدا هات وچو

جار زوزانە

جار ژی دەشتە

ئاگر بەردا من وخو

بێ بهارین

زڤستانە..

یان پائیزە

بهار نا هێت بو؟

ڤیانا تە..

ئەز فراندم

وەک بەلگێ هشک

ئەز گێراندم

ناڤ پێلێت خەمێ

بەرێ مندا

وارێت بیانی

وارێت چاڤا

نەدیتن بەرێ

ب سوتنا هناڤا

یا گیانی..

دیتی- دلبەرێ

ئەز گەهاندم

وەکی تەیرێ مەلیل

بو وارێ رەش

ئەز برم

من نەدیت

سیتافکا گەش

هێلام تێدا مژیل

مژیلم..

ناڤ ئەڤی واری

کیڤە چوم

من دیت رەنگێ تاری

سەر پەرێت

هەمی تەیرا

سەر ئەنیا

 گونەهکاری

من دیت..

ئەڤ رەنگێ کرێت

ناڤ زەڤیا

ناڤ بەیاری

ناڤ شەڤێ

 ناڤ چاڤێت سویاری

ل جوکا هشک

ناڤ هناڤێت برینداری

سەر ئەزمانێ زوها

دویربوی..

ژکانیا بەر رویباری

من دیت..

دناڤ دەستێ برسی

بەر گاڤێت هەژاری

سەر لەشێ رویسی

بەلنگازێ کەتی

بەر دیواری

ناڤ دەنگێ بەرخا

پتنێ ڤەمای

ل تاری ئاقاری

ناڤ دەنگێ..

کرێت

دەما هژیای

ڤەرێت..

ددەستێ زورداری..

ڤیانا تە..

وەک بەنیشتێ

کەزوانێ

ب دلی ڤە نیسا..

ئەز گرتم

قەت منا بەردەت

وەک بێوکانێ

دەست نە گەهشتێ

بو دێ دلی؟

هەر ڤەکێشیت

ب وان وەریسا..

من نەڤێت

ڤیانا دلی

بەرزەکەم

ل باژێرێ پیسا..

دێ ڤەکەم

بو دێ تەلیا؟

ئێخیە بەر من

دێ ڤەدەی دیسا

کەت مە.. بەختێ خودێ

گەل یێ تە دا

گەل پێغەمبەرێ عیسا

بەس دلی..

ژکول وژانا پرکە دیسا..

ژڤەمانا دلی

دێ گرم رێکێ

دێ کەم قەستا لیسا

من نەدیت

قەت چ جاراروناهی

درێکا مندا تەیێسا

دێ کوژم..

ڤێ ڤیانێ

بلا ب سوژم

وەکی چولی

ژگیانێ

بەرێ دلی دەمە

رەخێ ژوری

ناڤ جهێ کوردستانێ

دێ قوسینم

لێ چەنگ وپەرا

وەکی کوترێ

بێ پەر

دێ بەر دەمە

چول وچیا

نا زڤرینم

دێ لێ گرم

هەمی دەرا

گەل خر ریا

نا هێلم..

چ جارا ب گەهتە

وارێ دلی

دێ هێلم..

ناڤ ڤەمانێ

وەک سلی

ب مینیت بێ دەنگ

دێ دەرینم

ڤێ ڤیانێ..

ژدلی

ژگیانێ

ژکەڤنە برینا..

٢٥-٢-١٩٧٢ میسل

پسیارەک؟

ڤیانا من..

بو تو وەدکەی؟

دلێ تژی

وەک تەنیرێ

پرئاگرێ هەلدکەی

شپتی تیرێ

درژی..

ناڤ هناڤێت مژی

دلێ چرمسی

بریندار دکەی

ب دەردێ ڤەمانێ

گەل داڤێت دژی

بەر گیانی..

ل عەردێ ڤیانێ

بەرمن ڤەدەی

دلێ سوتی..

پارچە..پارچە

ژێک ڤەدکەی

بێ پاچە..

ئەگەر پرنەکەی

ژدەڤ ولێڤا

دەڤێ تێنی..

وەک شەربەتا سێڤا

ژوێ مەیێ

ب ئەڤینی..

تێر ڤەکەی

برینێت کەڤن

دەرمان کەی

خر شەڤن..

ژیانا من..

گەر ئەڤێ پەردێ

بەر چاڤا

دویر نەکەی.

٤-٣-١٩٧٢ میسل

پێلە هڵ

من تو دڤی..گەر بزانی

ڤیانا شرین..تو ژیانی

تو شەڤی.. تو دلی

تودنی.. جەرگ ودڵ

چاڤ وگیان..

 تیدا گرین

تو ئەسمانی..

شەرمینا سڵ

هزر وبیرێ

کرن زیان

تێدا فرین..

تو مەیێ..ژرەنگێ بیرێ

هش وسەودا

ژسەری ..تە برن

دخەودا..

تێدا ڤەمام

لەشێ تەنا

تە پرکر برین..

حەلیام..

وەکی بەفرێ

قەت نزانم

وەکی بەرێ

بو نە زڤرین؟

من تو دڤی..

هیڤیا من

ئەگەر بشی

بێژە من

پەردا رەش

راکە بەر چاڤێت من..

دکەن شەرمێ

هیڤی دارن

روناهیا گەش

ببینن درێکا من..

نە چارن..

 گەر نە ئینن

وێ چریسکێ

گەش نەکەن

دلێ من..

رەش نەکەن

ئەوان رەنگا

زوی ڤەکەن

خرێکا من..

بەرزەکەن

من ببەن..

من نەهێلن

ل وارێ خەمێ

من ڤەشێرن

ژدەستێ درێژ..

ڤەگێرن

گەر هات هێژ..

نە شێلن

رەنگێت ڤەبی

ناڤ سەرێ گێژ..

نە هێلنبێت

گریا من..

بو بەرزەبیت؟

ژیانا تەر

بو ڤە نابێت؟

گرتی دەر

دل هەر بمینێت

پر کەسەر

نە هێت روژا من..

بو ناهێت دلبەر؟

روژا مەژی

ما بەس نینە؟

چەرگ ودڵ

بو نە رەژی..

ب ئاگرێ ڤیانێ

هەر مە ب سوژی..

ڤەمری شەمالێ

پێلە هڵ..

ئەی هەڤالێ

دا رون بیت رێکا مەژی.

٧-٣-١٩٧٢ میسل

روناهی دگەل من وەرە

رێکا منە.. ئەڤە

روناهی دگەل من وەرە

پێش من بکەڤە

ئەی هەڤال..

دگەل شەڤێ مە شەرە

بێ بەتال..

چ نا بینم

گەر نە ئینم

ئەوان رەنگا.. نە زڤرینم

دا هەڤالا تێ ب گەهینن

ژ خەوێ راکەن

سەر ڤێ رێکێ

گەل خو ب گەرینن

وێ گرێکێ!

ژدەست وپیا

زوی ڤەکەن

بەر چاڤێت نڤستی

دویر ڤەکەین

وی دیواری

گەل سرتێت چیا

شپتی گەرا پەنگی

بەجارێ ڤەرستی

دگاڤێ..

دەر ڤەکەین

ژئاڤێ..

بێ دەنگی-

 بو داروباری

بو ئەزمانێ تینی

بو بەیاری..

بو گولا وەریای

بو شەرمینێ

بو میها گەریای

پتنێ ل ئاقاری..

ڤەقەتیای

ژبێ پسیاری

بو گیای

بو ئەوان دەنگا

دەما کری هەواری

نە دیتی.. خوینا لەشی

سەر ئاخێ ڤەخاری

بو گەشە رەنگێ بەرزەبوی

ناڤ گەریا دەڤ بەشی

ناڤ هناڤێت نەیاری..

ژچاڤێت بچیکا

دویر ڤەبوی

نە دیتی هەژاری..

بو تڤیرکا

بو کوترا ئاشتی

هنداڤ سەرێ زورداری..

بو بەردەین

ب هەمی رەنگا

بو هەمی واری..

بەرزەکەین

رەنگێ کرێتێ تاری-

بێژین..زڤستان نەما

ژیان هەمی بو بهاری..

١٩-٣-١٩٧٢ میسل

بریارەک گەل لەشی

لەشم.. گەل تە مە

گیانم بەر ژانا-

 بو گەر..

دناڤدا..پێ کول

دگەل کوڤانا

هاتە سەر

ڤەکر تول

تێدا غەونی

ژمن بەردا

کویرە نالین..

ڤەما..ڤەما

قەت نە کەنی

دلم بن پەردا

دناڤ خەما

بەر پەنجا

هاتە مالین..

بێ پێژن

گەل گران دەما

درێژن..

بێ ئەزمان..

نەزان..

سەر ڤی رەنگی

دناڤ چەرخێ ڤەمام

وەکی لەنگی..

گەل بایێ خەمێ

بێ دەنگی

ژرەنگی رەڤام

ناڤ ئەسمانێ تاری

ئەز برم

من نەزانی

خو ب چڤە بگرم

ناڤ دکێلێ

شپتی رمێ

هاتنە گرفتاری

رەنگێت کرێت

شپتی سێلێ

سەر پەرێت

تەیرێ رەش

هێدی ڤەرێت

ناڤ برینێت بەش

ل من زڤراند

ئەو کەڤنە نالین..

بە جارێ براند

شینوارێ کەیفێ

نە هێلا...ڤەهێلا..

دل مراند..

بەردا رێلا

هزر وبیر

قەت نە زڤراند

زور ڤەهێلا

وەک عەورێ رەش

بایێ ..لێدا

رەڤاند دویر..

رەنگێت ژیانێ

بەر من شێلا

تێدا لڤاند..

گەزی لەش

بەربو گیانێ

دەردێ لیر..

ناڤ مژا بەلاڤ

هاتنە من

گەلەک تیر..

وەک بارانێ

جەرگ وهناڤ

سوتن ئاڤا سویر..

بو لەشم؟

گیانی پێلم

سەر ڤی رەنگی

نەکەم بزاڤێ

دا رەخا پەنگی

وەک گەرا ئاڤێ

بو ڤەهێلم؟

سەر ڤی رەنگی

ناڤ پێلێت ڤەمانێ

نە کەم دەنگی

رەش کەم ژیانێ

بو ڤەهێرم؟

شرین گیانێ

ناڤ چەرخا خەمێ

بو ژبایێ کەیفێ؟

جەرگ ودلێ ڤەشێرم

بو .. بو؟

ژیان هندا ب لەزی

ناڤ ژان وخەما

هەمی لەشی دگەزی..

ل هەمی دەما

دگەل خو

دەمێ خوش

ژدلی دزی

سەودا وهوش

بەردەی هزر وتەخمینا

وەک سویاری

دیفدا دبەزی..

دبەهینی..

کەڤنە برینا

ناڤ بایێ تەزی

رەنگا دڤەهینی

دکەیە کەزی..

من دگری

ناڤ جهێت ڤەدەر

وەکی پەزی..

لەشم ئەگەر

نە هێن ئەو رەنگ

دێ هێم بێ دەنگ

ناڤ ڤەمانێ برزی..

٢٢-٣-١٩٧٢ میسل

ناڤێ تە مە نڤێسی

ناڤێ تە..

هات بو نڤێسین.. لوێری

بەری نوکە

سەر دەڤێ کێرێ..

سەر تڤەنگێ

ناڤ هناڤا

ب خوینا دلی

بەر تێنی چاڤا

دناڤ دەنگێ..

هەمی خورتا

سەر بەلگی چلی

سەر کەڤرێت چیا

ل سەرێت سرتا

ب خوینا لەشێ

وان بریندارا

ب ئاڤا گیا..

سەر قورمێت دارا

جان گوری یێت شورەشێ

ئەڤرو.. شورەش

ناڤێ تە.. مە نڤێسی

ب رەنگێ گەش

مە نڤێسی..

سەر پەرا

ڤەخار دەڤێ تێنی

وەک ئاڤا گەرا

ڤەخاند ئەزمانی

بو هشکە بەرا

گوهێت خو دایێ نەیاری

گەل دوژمنی

دگەل دلدارێ شەرا

دیت زورداری

گەل بیانی..

سەر خر دەرا

شورەش..

درێکا مەدا

دێ مینی گەش

سەر ڤەبی گولا

دگوهێ مەدا..

هاتە خاندن

وەک ئاوازێ بولبلا

بەلاڤ بو.. ل گرا

نەهالا ڤەدا

گەهشتە سەرێت ملا

دەنگێ تە..

وەک روناهیا ئاگرا

ئەم جەماندن

ئەم کرینە برا

رژین چاڤێت نەیاری

گەل یێ زورداری

گاڤا دیتی.. ئەو هەل چرا.

٢٤-٣-١٩٧٢ خورسیباط

جەژنا نیسانێ

بو تە نابینم؟

رەوشا دلی..

ل وارێ کەیفێ ئەڤرو

چاڤا دزڤرینم

ل هەمی ئالا

قەت تە نا بینم

خو ناگرم ل هەڤالا

دگەریێم شپتی گێژی

بەلکی تە ببینم

ناڤ سور گولا

ئەزێ دگەرییم

ب چاڤێ دلی

وەک بولبلا

وەکی سلی

ئەزێ درەڤم..

دگەل هزر وبیرێ

ئەزێ دفرم

وەکی تیرێ

درێکا خەلکی

دههلنگڤم..

من هزکر

دێ تە بینم بەلکی

ناڤ جەژنا تولازا

جەژنا کەیفێ

جەژنا ئەڤین خازا

جەژنا ئێکێ نیسانێ.

١-٤- ١٩٧٢ میسل

وەغەرا دەنگێ راستیێ

گەل تە مە..

وەرە نک من

تەیرێ فروکە:

خودانێ چەنگ وپەرا

وەرە  نوکە

من دگەل خو ببە

من ب گێرینە

دا ببینم ژیانێ

ژیانا ژاری

یا گرفتاری

گەل هەمی قەلەندەرا

ناڤ دەستێت زورداری

دا گوهی ب دەمە..

نالینا برینداری

ناڤ گەرمە شەرا

دا پاقژکەم

روندکێت بچیکێ برسی

بەر دیوارێ زەنگینی

خودانێ زێر وزەرا

دویر ڤەکەم

رەشە پەردا

بەر چاڤێت خەمگینی

دەرمان بکەم

ئێش ودەردا

دەر بکەم

خر کول وکەسەرا

ب رێژمە دەڤی

وەکی ئاڤێ..

هەمی رەنگێت ڤیانێ

وەکی خوناڤێ

ل سەر بشکوژا

ل سەر بەلکە تەرا

من ببە دگەل خو

من نە دانە

قەت نە بێژە بو؟

جهێ پاقژ ڤەدای ئەسمانە

من دڤێت ببینم کا چەوا؟

زوردار دمریت

نەیار دنریت

پێ بزانم کا چەوا؟

گونەهکار دزڤریت

توبەدار دخریت

تێ بگەهم کا چەوا؟

ئەڤین دبریت

نەڤین نا مریت

من نە دانە..

ل وارێ پیسا

کو ڤیان ب دلی ڤە نەنیسا

من ببە..

ناڤ عەورا

هنداڤی زەڤایا جوتیاری

هنداڤ کەڤرا

سەر سەرێ زورداری

هنداڤ چیا

دا شورکەم پیا

هنداڤ پشتا نەیاری.

٣-٤-١٩٧٢ میسل

من نەزانی

من دیت وێ گاڤێ

نە بێژە گەنگی

من دیت وەک گەرا ئاڤێ

دلم پەنگی..

دەست وپێ

مانە خاڤ

من نە دێت رێ

روناهیا روژێ

بو گەرمە تاڤ

رەنگێت خەمێ

بونە داڤ

وەک هلما دوژێ

بایێ دژوار

هشکر ژهناڤا

ئەو تەر خوناڤ

تازە  وار

بەر چاڤا

بو هشکە ئاقار

جهێت ئاڤا

بونە کاڤل

بونو شینوار

چاڤ مانە زل

کوزیرک بەر بو دل

گریم وەک شەمالکا هل

گاڤ مانە شل

بو مە هشکە دار

بێ زار

ژمن نەهات هاوار

ناڤ هشا کەلیم

من ڤەخار

ناڤ خشا حەلیم

من نەزانی کا ئەز چمە

چوی مە یان ئەڤە مە

درنگە یان هێشتا دەمە

یان ل هیڤیا مرنا خو مە

کوڤەندارم.. نە هشیارم

دناڤ خەونا تە مە

٧-٤-١٩٧٢ خورسیباط

 رەنگێت گرینێ

ئەز گریم..

ژبەرچ گریم؟

ئەوێ گاڤێ

بێژنە من ئەی روندکا

وەکی تاڤێ

هوین هاتنە خار

دناڤ لاندکا

من نە دزانی چ بێژم

من نە بو زار

برسی ل هیڤیا مەمی

دا ب مێژم..

من نە بو خەم

ئەو بو هەمی

ڤەمانێ گراندم

گاڤا بوری دەم

دەستێ دایێ هژاندم

 دناڤ خەوێ نڤاندم.

ئەز گریم..

ب ئەڤان جاڤا

وەک چپکێت خوناڤا

بەر دیوارا

ژمالێ دویر

وەک هەژارا

ناڤ بچیکا من رێژتن

روندکێت سویر

من نەزانێ..

بێ بها.. ب ئەرزانی

ئەز بچیک بوم

من نە دزانی

کانێ روندک چنە؟

من هزرک..

ئەو تڤنگا منە

من پێ دکر..

شەرێ بی دەنگی

گاڤا دپەنگی

دناڤ دلی

وەکی سلی

هزر ژهەمی رەنگی.

ئەز گریم..

ب ئەڤان چاڤا

گاڤا مرن بویە زاڤا

هاتیە جانێ هەڤالێ من

وەکی ئەلهوی دویرکر

پێش چاڤێ من

دلم پرکر..

ژهەمی رەنگێت خەما

ژچاڤا هشکر

روندک تێدا نەما

گاڤا من زانی

گەلەک ڤەما

هزرا هەڤالی

وان درێژ دەما.

ئەز گریم..

ب ئەڤان چاڤا

گاڤا ئەڤین کەتیە هناڤا

ئەز گریم..

بەر سوتنا دلی

چەند شەڤ وروژا

وەک بولبلی

بەر ڤیانا دلسوژا

ئەز گریم..

بو ڤیانا جانێ

هش وسەودا نەما

ژبەر ڤەمانێ

جانم ناڤ خەوێ ڤەما.

ئەز گریم..

بو تە ئەی وەلات

ب ئەڤان چاڤا

وەک بچیکێ ساڤا

من کرنە خەلات

دکەم پسیار

ئەو گەنگی هات؟

ئەو چەوا هات؟

چێکرن ئەڤ دیوار

تو ڤەمای..

ناڤ ڤی دراڤێ تەنگ

تو هێلای..

کەسێ نەکر چ دەنگ

دەستێ دوژمنی

لەشێ تە کێلای

وەک ئاگری

تێدا غەونی

ژێک کەرکری

مللەت هێلا ژار

ناڤدا کەنی

کرینە گرفتار

ماینە بێ وار

بن دەستێ زورداری

حەتا نوکە..

ژ نە گوهداری

بو تە دگرم

ئەی وەلاتێ بریندار

ب دلێ ئەڤیندار

حەتا گەنگی دێ گرم

ئەی وەلات؟

ب دلێ کوڤەندار

دێ ژهناڤا رێژم

دێ خەما ڤەمێژم

ناکەی هاوار..

دا ژخەوێ رابیت

لاوێ نە ‌هشیار

حەتا گەنگی دێ مینی؟

دێ من گرینی..

نا هێت ئەو بهار

دا تازە بیت ئەڤ رەشا وار..

خر ڤەبن..

پالە بکەن کاری

لاو ڤەبن..

چاڤیت جوتیاری

دا کورەبن..

چاڤێت نەیاری

ما شەرم نینە

بو کوردێ ئاری

حەتا نوکە مابیت

بن دەستێ زورداری!

١-٥-١٩٧٢ میسل

سلاڤێت خاتر خاستنێ

بو تە دهنێرم..

ڤیانا من

ژباژێرێ خەمێ

ژیانا من..

ناڤ ئودا تاری

هنداڤ چەمێ

بێ دەنگ

رویتێ بێ رەنگ

ژبرینێت دلی

گەل ئاوازێت بولبلی

ب دەنگێ پر نیهاری

گەل بایێ ڤیانێ

ژ دلێ سوتی

یێ تە ژخوینێ دوتی

ژڤێ گیانێ.

بو تە دهنێرم..

ژوارێ ئەڤینێ

ب روندکێت گرینێ

ڤان سلاڤا

سلاڤێت خاتر خاستنێ

ژنیڤا هناڤا

سەر پەرێ ڤالا

یێت دلی ڤەشارتن

ئەڤرو دارژتنێ

یێت دو سالا

کو دلا گوهارتی

ئەی جانا تازە

ئەڤە خوش داخازە

بو تە دهنێرم

نا ڤەگێرم

جانا تازە..

٣-٥-١٩٧٢ میسل

ژبەر چێ؟

پسیار نەکە

نە بێژە..

ژبەر چێ؟

ژرەنگی..

رەنگ زەری

ژمێژە-

ماری ئەزێ گەستم

ژدەڤی ئەزێ بەستم

وەکی لالی...

لەشێ گێژە..

حەتا نوکە ژەهر تێدا

دناڤ گەها

یا دغەونیت

خو موکم لێدا

خوین ڤەمالی

یا درەنیت

یا دمرینیت

گوشتێ لەشی

ژهەمی ئالی

یا دگرینیت

چاڤێ دلی

ژخوینێ..

لەوا برین نالی

نە شێم بێژم

دەڤێ گەستی

خوینا مێتی

لەشێ هێلای

چەرم وهەستی

بەر ددانا..

خرێ کێلای

دناڤ کوڤانا

ناڤ ئاهو ژانا

ئەزێ مایم نە هشیار

وەکی مەستی

رێکا راست

یا بو یە پەسار

من هیڤی خاست

درێژکە دەستی

بەندا ڤەکە

ژدەرست وپیا

برینا دەرمان کە

هشکە.. نە هێلە

ئەگەر تە ڤیا

پاقژکە..

دویرکە..

ژێ ب مێژە

ژێ برێژە

تێدا نە هێلی

چ تشتێ بیانی

ئەگەر تە دڤێت پێلی

ساخلەم.. لەشی

گەل گیانی.

٢٥-٥-١٩٧٢ میسل

بژارتن..

ئەگەر نەبی..

کوتر،

بفری هنداڤی مە

ببینیت..

دەم وگاڤێ

پتر،

چاڤێ مە

ب گەهینیت..

وێ سلاڤێ

زویتر..

ئەگەر نەبی..

ئەو هل چرا

ژرەنگێ ڤەبی

گەش کەی رێکا تاری

پێش چاڤێ مە..

رون کەی هەمی واری

دا دەربازکەین

وان ئاسێ پرا

ئەگەر نەبی..

ستێرەکا گەش

برقا بدەی..

پێش چاڤێ نەیاری

ڤەدەی..

خو وێرانکەی

بە جاری

شینێ پێلی رەش.

ئەگەر نەبی..

بایێ دژوار

بهی حێل

کورەکەی..

ئاگرێ دوژمنی

دا ببیت دکێل

دویر ڤەکەی

خرێ برەنی

نە هێلی ب مینیت

قەت چ شینوار.

ئەگەر نەبی..

ئاڤا زەلال

هەمی دەما

بو تینی هەبی

بو خر چەما

شین کەی گیایێ

پرکەی چیایێ

ژنێرگزا..

ژهەمی رەنگا هەلالا.

ئەگەر نەبی..

جان فدا

بو مللەتی  برێژی

ئاڤدەی هشکە ئاخێ

ڤەرێژی..

ئەگەر بڤێت

گوری کەی گیانێ

گەل هەمی زاخێ

بو وێ ژیانێ

بو بشکوژکێت دیف تەدا

ئەگەر نەبی..

شەنگە پالە

گەل گەنجە جوتیاری

بکەی کاری

پێش ڤەبەی

گەل خویندەڤانی

دا مللەت..

ب گەهتە بوری کاروانی

بن دەستێ زورداری

نەمینیت.. نە روینیت

یێ دەست ڤالە.

ئەگەر نەبی ئەڤ

نە بە هەمی دەڤ

وەکی کەوی بخازی قەبا

نە بە ستری

نە بە دوری

نە بە رێل ودەحل

بو گورگ ودەهبا

نە بە توز وهر

دا ب وەرینی

وان جان گولا

نە بە تەقن وکر

هەر ب مینی

دا نە گەهنە سەرێت ملا

قەت نە بە.. نە بە

ئەگەر دێ بیە ئەڤ.

٢٤-٦-١٩٧٢ میسل

جوتیارم..

بن دەستم..

ئەڤرو..دوهی

نزانم روژا دهێت

هەر دەم..

خوینا من مێت

چ بکەم؟

ئەزێ گرتیم ژگوهی

نیری یێ دانای ل سەر ملا

کەتە برینا ب هەمی تلا.

بن دەستم..

زورن.. هندن

سەر بلندن

پشتا چەماندی

نە شێم هەستم

ببورن..ئەز نە یێ مەستم

هشا نڤاندی

زاخا رەڤاندی

بن دەستم..

ژهەمی ئالا..

گرێدام  ب وەریسا ڤەبستم

مامە هشیار

قەت نە نڤستم

نە وەک لالا

مایمە بێ دەنگ

من بەزاڤ کر

من هەوارکر

چ ژمن نەهات

دوری..گرێدا

ژدەڤی بەستم

داهات..

سارە بستم.

بن دەستم..

جوتیارم..

ژارم

بێ دان..

برسیمە.. خاسم

کەسێ نە ناسم

تێنی مە.. بێ نان

رێنجبەرم..پالەمە

ژدەستی ڤالە مە

قەلەندەرم..بریندارم

بێ دەرمان

بارێ گران

ئەز ئێخستم

نە شێم هەستم.

بن دەستم

گەلەک دەستن

هەمی پێگڤە

ڤەرستن

هاتنە هێڤە

دەستێ خومالی، پەنجێت بیانی

گەل دەستێ هەڤالی

هاتیە گیانی

هاتنە لەشی ڤەکێشان

برنە وێڤە

چ نەما پێڤە.

بن دەستم..

وەکی هەر جار

ئەی هەڤال

ئەڤرو وەکی پار

تە ئەز هێلام بێ وار

بێ کار

بێ دار وبار

کا ئەوا تە گوتی؟

تە ڤاژی کر

بویە کورەمار

تە وەک تاژی کر

نیچیر تە گرت وخار

تە ئەز هێلام بێ بار.

بن دەستم..

ژمێژە..

نە بێژە..بێژە؟

یا مای

چەرخا دەمی هێژە

یا ڤەمای

دێ هەر زڤریت

وان کزما بریت

نا هێلیت چ شینا

دێ دەرمان کەت

ڤان برینا

دێ راکەت

وی دەستێ پرقرێژە

دێ بێژیت بەس ب مێژە.

٩-٧-١٩٧٢ میسل

 ئەحمەد عەلی حەسەن

دیماهیا دیوانا دووێ

ئەڤ دیوانە ب شێوێ (PDF) ێ ل ژێری یا هەی

 ڤەدان خەما.pdf