برایەتی

قویناغا درێژ

چو مە رێکێ غەریب دل بودیتنا یار

هاتم گەلێ، کەڤرێ حلی، رێاکا خار

هەلبومە ملێ بەفر ل چوکا دنیا سار

زڤریم، من دا رێلا  تێگدا دار وبار

من دیت شێر وپلنگ وگەل حەفتیار

نە خەونە ، دنیا روژە ئەزێ هشیار

کانێ مەفەر بوتە ئەی ئخسیرێ ژار

خر رەخێت تە ژی کەتی ناڤ نەیار

خو پاڤە، نە ترسە، هەلینە بئێک جار

وەکی کەوی ژوی نزاری هاتمە خار

شێڤێ، رەخ ریلێ، من دیت کورەمار

من دا رێلا، ئەز ئاسێ بوم بەر ریبار

ئەڤ شەهمار،زورێ خورت وسویار

من خو هاڤێت دا ب گەهمە گوندێ یار

دەربازبوم ژپێلا وەک سەندەبادێ بەحار

ل بنێ گوندی ، رەوین ئەو سەیێت هار

تەر وتەلیز وسەرێ گێژ ولەشێ بریندار

رەخ چەمی، روینشتم ل بن سیبەرا هنار

راکر پەز وی شڤانی بەرێ وان دا نزار

هلبوم چیای، گاڤا گوتی یا مری پێر ئیڤار

ئاخینک وئاخ بو تە شرینا دلی گول بهار

دلسوژ:تە کرمە ئخسیر، هیلام  دین وهار

دەستێ مرنێ تە ژێک ڤەکرن دوست ویار

مێڤانا مالا، گەل تە هاتن زەنگین وهەژار

بچیک ومازن، گەل سنێل وتولاز وئختیار

گەر مرن هەر گەل مەیە، بونابین توبەدار

هزر وبیر وسەودا مان دگەل من وگرفتار

ل شەکفتا تاری، مام ل رەخ واری نەچار

من گرت رێکا راست، لێ کەم کار وبار

بوخو ژتە دخازم  مرادا هەرئەزم هێڤیدار

ل من ببورە خودێ، تو رەحیمی یێ غەفار

 خوزی نەهێت روژا تێ چوی گول بهار

١٨-٦-١٩٧٠ میسل

بو هەڤالێ هێژا ( عبدالقادر ممدوح البريفكاني) ، دەما پروگرامێ شعر وهوازان پێش کێش دکر ل ئێزگا بەغدا.

چ بێژم هەڤالێ بەرێز

ئەزچ بێژم، ئەی هەڤالێ بەرێز

سلاڤێت ڤی دلی دا دبوینە رێز

من گەلەک دڤێت ئەز تە ببینم

داڤان دەستا دور تە ب وەرینم

دەف من هەڤالی وەکی برایێ

دل گەشی ، یێ روی چرایێ

من تو ژهەمی هەڤالا بژارتی

من هزرەک ژدلی یا هنارتی

دگەل بایێ سپێدی دەما دهێت

لبەیانێ، وەختێ روژ دهەلێت

ئەو چێ هزرە، یا تە هنارتی

ئەوچ هەڤالە، یێ تە بژارتی؟

ئەی دل هژبە، شولا تە نینە

ل دەف من هەڤالەکێ شرینە

گەل ئێک مە ڤیانا گوهارتی

وەختەکی خوش یێ قەتاندی

بەس زەمانی ئەم ژێک کرن

کورتە رێک، لمە دویرکرن

هیڤیا من ئەوە نە بن چ خەم

خەما برەڤینی، ل هەمی دەم 

بزانە دنیا لبەر چێ ناکەڤیت

ژکێ دهێت، ژمرنێ برەڤیت

ماترسە لئودێ خو ڤەشارتی

یان صوفیاتیە بوخو بژارتی

بەس نە ئەوە، نە ئەوا دی یە

ئەز دبێژم، دەردێ ئیکمالیە

چ بێژم، ئەی هەڤالێ بەرێز

خەمێت ددلیدا، بوینە رێز!

ئەزهیڤیدارم تو دەربازبی

ژڤێ تەنگاڤیێ خلاس بی

ژئیزای، ببینی نەجاحەتێ

ژخەمێ ببینی، فەرحەتێ

گەر من گوهلێبو مزگینی

دێ بێژمە خەمێ نەمینی

بیژمە خەلکی، روژا منە

کەیف وشادی هەربو منە

خودا دوعایێ، قەبیل کەی

سەروێ پرێ، دەربازکەی

 چ بێژم،ئەی هەڤالێ بەرێز

سلاڤێت ددلی دا بوینە رێز

٣١-٨-١٩٧٠ میسل

ئەڤ پارچە هەلبەستە کربو دیاری بو هەڤالێ هێژا (ئەنوەر مەحمەد طاهری) دەما ئیکمالبوی.

خوشی

خوشی ئەو نینە یا بەرێ

نەیا تە گوتی ڤێ گەرێ

هزرا خو کویر تێدا بکە

رەنگێت نهینی خرڤەکە

تێک ڤەهینە دیتنا درست

نە بێژە- ئاخڤتن ڤەرست

ئەو چ خوشی یە ئەگەر

گەریا، ژێهاتن بیتە گەر

دناڤدا حەتا مرنێ بمینیت

ئیزایێ هەردەم ب بینیت

مابێ دەنگ وەک کەڕی

تەگوت مروڤەکێ کەری

ل نک تە خوشیێ نزانیت

لەوما تەعلاتی بخو دانیت

تە کرە بەرخوشیێ کراس

تە لێدا ئەو نە خوشە داس

گەه کورت بون مابێ بزاڤ

دناڤ تەلیا، ما سست وخاڤ

تە لبەر ڤەدان داڤێت گەش

تە ژبەر ڤێدان داڤێت رەش

تە خەملاند ژرەنگێت سور

گەهاندن، لبەرتە کرە سنور

بو وێ قەت قویناغا نە دانە

ئەو خرە ناڤ هەمی تشتانە

ب خر رەنگا خو دگوهێریت

نەپەنی لتشتا خو دڤەشێریت

لەوما چ رێکێت دیار ناچنی

چەند بکەن بەزێ نا گەهنێ

کەس دیف خوشیێ نە چویە

چونکو دزانن ئەو نە گویە 

دیف دا بەزن ببن کەسیرە

بزڤرن بێ زاخ ببن خەتیرە

کەس لڤی رەنگی نا گەهیتێ

ژنوی پێڤە کەس هو نا چیتی

ئەگەر خوشیێ تو هو ببینی

ل من وەرە تویێ کێم برینی

نەبێژە  ناکەڤیت هەمی دەستا

خو نا گرت سەرهەمی رستا

روژەکێ یێ تالی نە ڤەخوت

مەی شرین نا بیت، تە گوت

 گەرڤاژی بکەین یا مە گوتی

 هەروەکی تەچ تشت نە دوتی

گوتنا تە گوتی  ئەوجارا بەری

زور یا دویرە ژئەڤا ڤێ گەرێ

٢٩-٥-١٩٧٢ میسل

ئەڤ هەلبەستە منا پێش کری بو هەڤالێ خو یێ بەریز وهێژا ئەندیاز (ئەدیب مصطفا )

ئاڤ تەزینک

مام کاکل ئێڤاریا تە بخێر

ئاڤتەزینەک منا ئینای پێر

هەکە بشی دا بچینە وێرێ

چونکو نەشێم، بینمە ڤێرێ

یا ئاسێ بوی جهێ ئاڤێ

تشتەکێ مکم بو مە پاڤێ

من دوهی خولێ جەرباند

نیڤەکا رحێ ژمن قەتاند

ئەم خر پێڤە موفتەلابوین

چەند تلێت بریندار بوین

مەیێ کری شەروگنگاشە

چیێ دیتی، گوت نە باشە

دەولوت سەرێ خو وەرە

هەتا نوکە ل مالێ شەڕە

خالەت نە شێم بێم درنگە

ئەڤە نەبازارە ئەڤە جەنگە

صوبە بینە، دێ چێ کەم

کارەکێ لاو دێ لێ کەم

خالەتێ گوتێ: نە درێژکە

سەرێ تەنا، بەس گێژکە

چ فەرقا ئیرو یان سوباهیە

ئیڤارا هێشتا گەلەک زوییە

دەست پاڤێژە چەکیچ وکلبتانا

دوهی کەتمێ بچەنگ وددانا

کاکل خەم  نە بەس ئەڤە یە

نێ خەما مازن هەرصوپەیە

خەما ژخرا مازنتربرەمیزە

یا بوی وەک کەسێ بگلیزە

ژخررەخا گاز دهێتە خارێ

هەیلا ل منێ ئەزێ ژارێ

هەمی کەت نە دەستێ من دا

هلو، کەت مە دبەختێ تە دا

بومن جارەکا چاک لێ کە

حەتا مالا مە کورتە رێکە

خالەت نە دختورم یێ نساخا

دا بگەرریێم ل رەخ  وتاخا

  تە هەبن نساخ بینە دختوری

توقەت نەشی من بەی بزوری

خالەت زڤری بوان سەر ودلاڤە

روژا پاشتر خرگەل خو ئینا ڤە

 کاکلی خر پێگڤە دەرمان کرن

بدانەکێ روژێ وی ساخ کرن

خالەتێ گوتێ : ما خلاس نەبو

گوتی: بەلێ ئەڤە چ شول نە بو

چنە ما بو ئەزو برا پێڤە مرن

هەکە شەرم نەبا ئەم دا گرن

خالەتێ گوت: حەقێ تەچەندە

کاکلی گوت دینارەکا کوندە

خالەتێ گوتێ هندێ نەخازە

ما خەلک چەندا حیلە بازە

وی هندەکا دی بو کێم کرن

خالەتێ تشتێت خو خربرن

ئەڤە سوحبەتا مامێ کاکلە

هەرن نک دا بگرن عاقلە

١٠-٧-١٩٧١ میسل

دیاری بو هوستا کاکلێ

ئەحمەد عەلی حەسەن