جڤاکی

جڤاکی

هەلبەست وجڤاک

بزن وبێری وشڤان

هەردو پێگڤە دبەزن چنکی شڤانە

بو چاڤدانێ بو سەخبێرێ بێریڤانە

بتبلێت قەشەنگ ددوشیت گوهانە

دکەتە ماست ، دانیت بەر مێڤانە

بزنێ:نە ترسە یێ ل بەر تە شڤان

شاخ مەزنێ هاتە رەخ تە بێریڤان

زاروک لپشتێ، دەستا دەتە گوهان

ماستێ قەرستی دانیت بەر مێڤان

بزنێ: شڤانێ خورتە هشیارە

تە دگێرینیت ل چول وبەیارە

لگر وملا، هنداڤی چیا دیارە

بو ژیانێ خوش کار وژیارە

شەرمێ نە کە

دەستا نە دە چاڤا

شەرمێ نە کە چ دەم وگاڤا

من وەرە تو نە یێ وەستیایێ

نە یێ دامایێ

بەس دەستەکێ ڤالایە

ئێکی چێ تێ نەمایێ

جەژن هات خێزان

یا ل هیڤیا دەستا مایێ

بزانە گەر بەنیا نەدا

بمینە ل رەحما خودایێ

باپێر

ل چول وچیا گەریام ل پەزێ کیڤی

من قوتان خەلک ب گوپال و چیڤی

ژیان نا هێتە کێشان تو نە شی پیڤی

چو سەرئەڤرازی هات سەر نشیڤی

ژی بۆری وەک خەونا پتر ژنیڤی

ل ڤێ دنی تە نەمان سوز وهیڤی

شوینا شێران دکەن گێرێ رویڤی

خەلکی دگوت برا تەگوت کریڤی

چەمیا پشت هەروەکی دارێ گوپالی

گوپال بو من خوش دوست وهەڤالی

مای پیچەک نیزیکە ب کەڤیە چالی

داخاز دکەم ببۆریت ل سەرڤی حالی

تویێ کەتیە هزرا،هزرەکا زورا کویر

نەمای ل ڤان رەخ ودورا چویە دویر

نە هێلا بۆری سالا، چ تشتەک ل بیر

پیر وکالێ داکەتی، هەژار بویە باپیر

چوتیار و چوت

ئەڤ رێنجبەرا چوتیارە

ددەستدا کوپال وهنجارە

ل سەر ملا چوخە دیارە

شاشک پێچا کوردەوارە

ل سەر دەوارا هەفسارە

لسەرستوی نێرکە دارە

جلە لسەر پاتکێ ستارە

شێڤ توڤ پرێز دەبار

کارێ وی خوش کارە

دکێلیت خاکی نە بەیارە

کارەک راستە نە خارە

ژێ دهێت نان و پارە

دەیکا چەلەنگ

دەیکا دەلال وچەلەنگ

چەند تو یا چویە بێرێ

کارێ کری بێ دەنگ

ب شالوک تەڤر وبێرێ

ژئاقاری ئینا خررەنگ

سیر وقوراد ب کێرێ

ب ژیری دەمێت تەنگ

دهزرێدا مانە ل بیرێ

تە ئینا بجەرک وکەدینی

ئاڤا تەزی ژکانیت زەلال

تە کرە گوسک ومەسینی

خردەما پرن نە مابو ڤال

ل بەر مەشکێ دروینی

دامە ئەو پەنیرێ خۆمال

ماستێ قەرستی دمەهینی

دەوێ تەزی بویە سیقال

کار وکوکێ دەیکێ

چول وچیا ل کەند و کۆرا تو یا پەشی

بهن ڤەدانێ سەربانا تە یا رستی تەشێ

ئەڤ رەنگە کارە تە کرن ب دل گەشی

بسەر بلندی وەسا ژیان بۆری ومەشی

چەند جارا ل هەفشی تە میها دوتی

بدەنگێ نزم ستران بو زاروی گوتی

بەیانێ نانێ پەحتی بەرئاگرێ بزوتی

تێشت وفراڤینا بری ل وەختێ جوتی

٢٠١٦ / دهوک ئەحمەد عەلی