Embedded Files
Este Entroido, no noso instituto, fixemos unha viaxe por Galicia sen coller o bus. O punto de partida foi o libro Guía Ilustrada do Entroido Galego de Alba de Evan e Xabier Domínguez, que nos abriu a porta a un montón de personaxes, máscaras e xeitos de celebrar que forman parte do noso Patrimonio Inmaterial.
O alumnado de 1º de ESO traballou como un auténtico equipo de investigación: leron as páxinas do libro con ollos curiosos, buscaron máis información na biblioteca e en internet e, co que aprenderon, crearon infografías para explicar, de forma clara e visual, como se vive o Entroido en distintos lugares de Galicia.
Para pechar o proxecto, gravaron pequenos podcasts, tipo programa de radio, onde describen os disfraces, os sons, as tradicións e algunha que outra curiosidade.
Ao mesmo tempo, en 4º de ESO, na materia de Plástica, partiron do mesmo libro para facer algo moi distinto: recrearon coas súas mans as máscaras máis características de cada zona. Papel, cartón, pintura, volumes e moita paciencia para transformar a aula nun obradoiro.
Dúas maneiras diferentes e complementarias de traballar co mesmo material. E o mellor é que todo quedou xunto: na entrada do centro montamos unha exposición coas máscaras e as infografías, e engadimos códigos QR para que, ao escanealos, poidas escoitar os programas de radio. Tradición, creatividade e aprendizaxe… todo no mesmo corredor. Así, entre lectura, arte e voz, celebramos o Entroido con respecto e festa, e convidamos á comunidade educativa a velo e escoitalo xuntos.
Page updated
Google Sites
Report abuse