Faladoiros con Claire

Na Biblioteca estamos de estrea: poñemos en marcha un programa novo para practicar inglés falando de cousas do día a día. Chámase “Faladoiros con Claire” e vai ser un espazo relaxado, divertido e moi útil para gañar soltura coa lingua.

Claire é a nosa lectora de inglés, e ven todas as semanas para conversar co alumnado nun formato tipo charla-curta, sen presión e sen exames. A idea é sinxela: falar, equivocarse sen medo, rir un pouco e aprender moito. Porque xa o sabemos: unha cousa é facer exercicios no caderno… e outra moi distinta é abrir a boca e soltarse.

Quen vai levar o micro? Os nosos axudantes da Radio da Biblioteca, que son os encargados de preparar as preguntas, propoñer os temas e conducir a conversa con Claire en inglés. E os temas van ser dos que realmente nos interesan: roupa e estilos, música e artistas, deportes, aficións, series e películas, xogos, festas e tradicións, plans de fin de semana… o que toque en cada momento. Tamén haberá espazo para que o alumnado propoña ideas, porque isto é un programa feito entre todas e todos.

O obxectivo non é “falar perfecto”, senón falar cada vez mellor: aprender vocabulario real, practicar expresións útiles e perder a vergoña. Mesmo se só entendes unha parte ao principio, non pasa nada: con escoitar e participar un pouco, xa se avanza. E canto máis se practica, máis fácil sae.

Se che apetece mellorar o teu inglés dun xeito diferente, achégate á Biblioteca e pregunta polos Faladoiros con Claire. Prometemos un ambiente bo, temas chulos e moitas ganas de falar. See you soon!