মোক বৰষুণ এজাক দিবানে
দিবানে সলাবলে এৰাতিৰ জোনাক
দিবানে তোমাক জগোৱা অতীতৰ
সেই চৰাইটোৰ মাত......"
- প্ৰণৱ কুমাৰ বৰ্মন।
এইবাৰৰ উৎসাহনৰ বিশেষ অতিথি আছিল কবি প্ৰণৱ কুমাৰ বৰ্মন, অসমীয়া কাব্যজগতৰ এক চিনাকি নাম। 'সন্দিকৈ কলেজ' , 'কলকাতাৰ বেশ্যা দিল্লীৰ বৰষুণ' , 'সন্দিকৈ কলেজৰ তুমি সাগৰিকা বৰদলৈ' আৰু যে কত কি.... অনন্য ব্যক্তিত্ব, নতুন সমাজ গঢ়াৰ স্বপ্নেৰে আগবাঢ়ি যোৱা প্ৰণৱ কুমাৰ বৰ্মনৰ কবিতা আজি সকলোৰে মুখে মুখে।
প্ৰশ্ন ১: আপোনাৰ দৃষ্টিত কবিতা সৃষ্টিৰ আঁৰৰ ৰহস্য কি?
বৰ্মন: কবি হোৱাৰ দুৰাকাংক্ষা!
প্ৰশ্ন ২: কবিতাই সমাজ পৰিৱৰ্তন কৰে, আপুনি এই কথাষাৰ বিশ্বাস কৰেনে?
বৰ্মন: কবিতাই মানুহৰ অন্তৰজগতৰ পৰিবৰ্তন সাধন কৰে।মানসিকতাত প্ৰভাৱ পেলায়।ইয়াৰ প্ৰভাৱ ধীৰ।সময় সাপেক্ষে ই পৰিবৰ্তনৰ বতাহ তীব্ৰতৰ কৰিব পাৰে।
প্ৰশ্ন ৩: আপোনাৰ দৃষ্টিত অনুজ কবি এজনে কেনেদৰে সৃষ্টিৰ পথাৰখন কৰ্ষণ কৰা উচিত?
বৰ্মন: গভীৰ মনোযোগেৰে কবিতাৰ অধ্যয়নেৰে,পৰম্পৰাৰ ওচৰত ঋণী হৈ ,নৈৰ্ব্যক্তিক হৈ নতুন কাব্য ভাষাৰ আবিষ্কাৰৰ সাধনাৰে।
প্ৰশ্ন ৪: দেখা যায় যে, এজন সফল কবিয়ে আন এজন বিফল কবিৰ কবিতা প্ৰায়ে নপঢ়ে আৰু নপঢ়াকৈয়ে কবিতাটিৰ ওপৰত বিৰূপ মন্তব্য প্ৰদান কৰে। এজন সফল কবি হিচাপে সেই বিফল কবিজনক আগবঢ়াই নিবলৈ আপুনি কেনেধৰণৰ পদক্ষেপ গ্ৰহণ কৰিব?
বৰ্মন: কাৰ কবিতা কোনে পঢ়িব সেই কথাত কোনেও কাকো হস্তক্ষেপ কৰিব নোৱাৰে ।ভাল কবিতা হ'লে সকলোৱে পঢ়িব।বেয়া কবিতা কোনেও নপঢ়ে ।কবিৰ সফল বিফল কোনে নিৰূপণ কৰিব?কবিৰ নিজৰ সৃষ্টিৰ ওপৰত নিজৰে দায়িত্ব অধিক।এজন কবিয়ে নিজৰ কবিতাৰ উত্তৰণৰ বাবে নিজে কষ্ট কৰিব লাগিব-অধ্যয়ণ পৰ্যবেক্ষণ সকলোতে গভীৰ মনোনিবেশেৰে ।জ্যেষ্ঠ বা শ্ৰেষ্ঠ জনৰ ঘৰৰ দুৱাৰমুখত ৰৈ নহয় ।
প্ৰশ্ন ৫: আপুনি এগৰাকী প্ৰাক্তন কটনিয়ান। কটনক প্ৰতিভা বিকাশ বা প্ৰতিষ্ঠাৰ মঞ্চ বুলি কোৱা হয়। আপোনাৰ জীৱনত কটনৰ অৱদান কেনে?
বৰ্মন: কটন কলেজে বহুতৰে দৰে মোকো নদৃষ্টি দিছে ।ন গতি দিছে।জীৱনবোধ দিছে।
প্ৰশ্ন ৬: আপোনাৰ কবিতাৰ দুৰ্বোধ্যতাক লৈ বহুতেই প্ৰশ্ন কৰে । আপুনি কি ক'ব এই বিষয়ে?
বৰ্মন: মই খুব সহজ ভাবে কবিতা লিখো-আচল অভিযোগ এইটোহে!!
প্ৰশ্ন ৭: আপুনি এটা সাক্ষাৎকাৰত কৈছিল সমালোচকসকলৰ দৃষ্টিত আপুনি উপেক্ষিত। কবিতাক জনমুখী কৰাটোৱেই ভুল নেকি? নিজে কি ভাবে?
বৰ্মন: সকলো ক্ষেত্ৰৰে দৰে অসমীয়া কবিতাও দুটা ধাৰাত বিভক্ত ।চিনেমাত যেনেদৰে মূলসুঁতি আৰু সমান্তৰাল নামৰ ধাৰণা বিৰাজমান-অসমীয়া কবিতাতো দুটা ধাৰা-এটা ধাৰাই কবিতা কেৱল কবিতা ৰ বাবে-দায়বদ্ধতাৰ উৰ্দ্ধতো কবিতা কবিতা হ'ব লাগিব-শ্ৰেষ্ঠ প্ৰতীক চিত্ৰকল্প আৰু শ্ৰেষ্ঠ ভাষাৰে!আনটো ধৰাই সমাজ পৰিবৰ্তন ৰ স্বপ্নেৰে নতুন সমাজ গঢ়াৰ পণেৰে প্ৰগতিশীল চেতনাৰে ধাৱমান!মই দুয়োটা ধাৰাতে কছৰত কৰিছোঁ ।কিন্তু শেষত দেখিছো মই দ্বিতীয় ধাৰাটোতহে আৰাম অনুভৱ কৰিছোঁ ।সমালোচক জন প্ৰগতিশীল চেতনাৰ নহ'লে দ্বিতীয় ধাৰাটোক আনসকল বিদ্বৎ সমালোচকে কবিতা স্বীকৃতি দিবলৈ টান পায়!তাতে আৰু সমালোচক ক গুৰুভজা প্ৰথা এটাও আছে-যিটোত মই দক্ষ নহয় ।কিন্তু সমালোচক সৃষ্টিশীল লেখকৰ উৰ্দ্ধত হ'বলৈ তেওঁৰ সৃজনীশীলতা পাণ্ডিত্য উদাৰতা বহুউচ্চ খাপৰ হ'ব লাগিব ।তেনে সমালোচক আজিকালি এপাচি শাকত এটাও জালুক নোহোৱাৰ নিচিনা ।
প্ৰশ্ন ৮: অসম সাহিত্য সভাৰ কাম- কাজক লৈ আপুনি সন্তুষ্ট নে?
বৰ্মন: অসম সাহিত্য সভাই এসময়ত ভাষা সাহিত্যৰ প্ৰতি বিশাল গুৰু দায়িত্ব পালন কৰিছে ।তাৰ জবাব নাই আৰু তাৰ বাবে অসমৰ মানুহৰ সন্মান আৰু কৃতজ্ঞতা সাহিত্য সভাই সদায় আদায় কৰি আহিছে।কিন্তু যোৱা ডেৰটা দশক সাহিত্য সভা সাহিত্যৰ সেৱাৰ বাবে নহয় ক্ষমতা কেন্দ্ৰিক অঁৰিয়াঅঁৰিৰ বাবে জনতাৰ বিৰাগভাজন হৈছে।সঠিক সময়ত সঠিক দায়িত্ব সাহিত্য সভাই পালন কৰিব পৰা নাই।
প্ৰশ্ন ৯: এই লকডাউনে কবি হিচাপে আপোনাৰ কৰ্মত কেনেদৰে প্ৰভাৱ পেলাইছে?
বৰ্মন: এনেকুৱা লকডাউন পৃথিৱীৰ নতুন অভিজ্ঞতা ।আমাৰো প্ৰথম অভিজ্ঞতা ।প্ৰথমে সৃষ্টিৰ প্ৰতি হাবিয়াস বাঢ়ি গৈছিল যদিও দীঘলীয়া লকডাউন মানুহৰ বিৰল সমস্যা হৈ উঠিল।হতাশাই বেৰিকুৰি ধৰিলে মানুহক ।আৰ্থিক সমস্যা ই ভয়ংকৰ ৰূপ পৰিগ্ৰহ কৰিলে ।তেনে পৰিস্থিতিত সৃষ্টিশীলতা সদায় সক্ৰিয় হৈ নাথাকে।তথাপি মই ভ্ৰাম্যমাণ থিয়েটাৰ ৰ আধাৰত "চন্দ্ৰগ্ৰহণ "(উপন্যাস)নিসংগ ঘোঁৰাৰ আত্মকথা "weep not my love (কবিতাৰ অনুবাদ)সন্দিকৈ কলেজ উপন্যাস ৰ ইংৰাজী অনুবাদ প্ৰকাশৰ বাবে সাজু কৰিলোঁ ।I am BAICHUNG নামৰ চুটিছবিখন বনাইছিলো-যিখন প্ৰতিদিন time আৰু "আমাৰ নলবাৰী ' পৰ্টেলত প্ৰচাৰিত হ'ল।হতাশাৰ মাজতো তেনেদৰেই ব্যস্ত আছোঁ-মূলত চলচ্চিত্ৰৰ কামত ।
প্ৰশ্ন ১০: নৱপ্ৰজন্মলৈ বিশেষ বাৰ্তা দিব নেকি?
বৰ্মন: MAKE IT NEW .
MAKE EVERYTHING NEW
